Sam 103 - Natqgu

Sam Kratrtqki-esz'-nrade-tq (103) Nivz Lrde Tqyc Tqyc Aodu-zvzle Ninge

¹ Naglqpxx Yawe mz nabznge atwrnrngr! Naglqpx-zvzx drtqde kxtr.

² Na-aoti zvz drtwrnge nivz lrde, X da kxmrlz kcng tqalemle bange.

³ Murde katxpxbzle alwx rngeng amrlx. X amrlzle ninge mz zyagox amrlx.

⁴ Arlapxle ninge mz nzbzngr. Aodu-zvzle ninge.

⁵ Okatrle ninge mz da kxmrlz Murde nzlu-krnge naboi x nrkrdrtqnge naxplr, mz nzapu-krnge lr.

Ipqpxle Alwx Rgung

⁶ Yawe okatrle kxnzobqszong murde ale-zvzle da kxtubq Mzli kc tqayzlu-ngrbzle da mz leplz.

⁷ Aelwa-ngrbzle me pnz drtwrde mz Mosis, X zmatq ngrde mz lr Israel.

⁸ Yawe mrlz-esz'ngr x aodu-zvzle nigu. Drtwrde trngya-aniu, a' okatr-zvzle nigu.

⁹ Trkrlzleu nzaboitr-krmle zngya ngr drtwrde bagu, A' ani txpwz nzipq-mou-krde nigu.

¹⁰ Kxmule-esz' takitrde nzayrplapx-zlwz-krde nigu, A' ycngr drtwrde nigu, x trayzlupleu bagu mz nzvz-nqblq-krde nzvz-rbr-krgung.

¹¹ Murde sc tqaodu-zvzpele nigu kcng tzamrluelr nide, Murde nzetu-krm nivz lrde bagu myaszpxle bongavz.

¹² X mz nzipqpx-krbzle alwx rgung, Apule kx rtctx-ngrbzle rlru, me trpengr nzrmc-moungr.

¹³ X Yawe amqtrple drtwrgu, Da kc tqwai trte nzamqtr-krbzle drtwr doa nedeng.

¹⁴ Dcpx mz drtwrde kx nigu leplz kxtrnzxplrung, Murde wztx-ngrpwzle nigu mz drtc'.

Aodu-zvzle Nigu

^15-16 X nzlu-krgu mrbcnepwz, Apule nepi kc tqprtzm mz nourla, x tqxplr mzli kc bea. A' sc tqtaope mou milzpq. Murde mzli kc nabzngr leplz trpengr nzrmc-moungr nidr.

^17-18 A' Yawe aodu-zvzle x amrlz-zvzle nigu, Kcng tzamrluelr nide, Mz nzyrlq-angidr-krgu natqde, X mz nzlolvz-amqngi-krgu Nzesz'tikr Drtwrgu badr.

Naglqpx-zvzku Nide

¹⁹ King Yawe wxbu mz tron nyzde Heven, Mrkc tqaclve-ngrde nrlc atwrnrngr.

²⁰ Nimu enjrl kxnzmatq kcng tzvz-nqblqlr natqde, Naglqpxamu nide!

²¹ X nimu ami ngr Heven kcng tzwztrpzng bade mz nzatutr-krbzmu me pnz drtwrde, Naglqpx-kzamu nide.

²² X nigu amrlx mz nrlc tulvzo naglqpx-kzku nide. Naglqpxx Yawe mz nabznge atwrnrngr!