Nzaelwapxngr 12 - Natqgu

Olvz Kc Tqngi Israel X Doa Nede Kc Tqngi Mevalu

¹ Zbz kzdq rkx kxmatq prpxm mz bongavz. X mcx kc olvz kq lrpz kx apule nepi, x tuo-ngrmle temz x ngrlelvzle narde vri nzpnu-esz'-nrade-li (12) apule kraon ngr narde.

² Olvz lc yr x tangqgx mz nzetqtikr drtqde nzrmika-krde.

³ Zbz kzdq rkx kxmatq prpx-mop mz bongavz. Krlcde mepwz kxpc kxetu, narde rlimz, taplxsr kraon kxtopwzting, x scde dxpa' kxetu nzpnu-esz'.

⁴ Mepwz lcde nqglqde iplro-ngrmle vri ngr bongavz kxnzkqlung mrka mz drtc'. X vzbz mz olvz kc, sc tqtu-pz'litrpebzle doa kc namikale, murde nangqde.

⁵ Olvz kc rmika x nede doa ncblo. A' doa ne olvz kc trngqu Mepwz kc murde nzglqlz-rlrubz mz Gct mrkc tqwxbu-ngrde mz tron. Nide kc na-aclvele leplzng amrlx mz zmatq kx xplr-esz'ngr, na-apule bz kc tqrniglc botol.

⁶ X olvz kc sc tqdwatrpe lzke, me oliqtibz Gct mz nzmncpx-krmle elr mz yiz kcng tq x ncte kc.

Enjrl Nzaovxiolr Drka' Neng Setzn

⁷ X vea kxetu kc tqprtzpe Heven, Narenjrl Maekol badr enjrl nedeng nzvecng badr Mepwz. X Mepwz badr enjrl nedeng nzotang badr.

^8-9 Mepwz kxetu kc tqngi kz ningidoe ngr nrlanc kc bqnc, tzrpi-kzpz ‘Nar Drka'’ x ‘Setzn.’ Nide enqmi r leplz murde tqpibqle leplz x tqesabrtile leplz ngr nrlc atwrnrngr. Nzvecng x Mepwz badr enjrl nedeng sc tzaovxiopeng Maekol badr enjrl nedeng. X trnzrlrpe-ngrpwzu nzmnc-krdr mou Heven. Nzrtcmipxngr enjrl nedeng Heven x nztaomqng mz nrlc, mz nzngini-krdr drka'.

^10-12 Mz nibrde, xlrx kc natq kxetu Heven, rpile kx, “Gct rgu sa na-arlapxle Leplz nedeng mzli ka. Sa natwzpele zmatq ngrde, X nangipe King mz nrlc. Kxnzmcpx nede twzpele zmatq ngrde, X Setzn kc tqpibqtitr- Zvzbzle kztegung Mz mz Gct rgu, Nzrtcpxpengr Heven. “A' kztegung nzaovxiopelr Nide mz zmatq ngr mepyr Ngr Nei Sip. X nimu lr Heven Na-abrtz-zlwzamu. A' nimu lr nrlc ka Na-aclvetioamu. Nar Drka' vzopebz bamu. Drtwrde ngya zlwz murde nzmnc-krde Mrla mzli trnaboiu.”

Mepwz Nzotang Badr Olvz Kc X Doa Nedeng Amrlx

¹³ Kx glxpe Mepwz kc nzrtco-ngrm nide mz nrlc, sc tqmaneutinepele lxede doa kc.

¹⁴ A' olvz kc lvctr-ngrde mrnyzde mrkc lzke nabx lr kxetu li kx nzkabz bade. X namncpx-ngrmle mrkc nakrlzbzle yiz kxtq x ncte kcng, murde namnc-rlrubz mz Mepwz kc.

¹⁵ Zbz Mepwz kc sc tqbyape-ngrbzle lue kxkqlu mz nibr olvz kc, murde natwz nubla ngrde x trpnzngr nzrlapx-krde.

¹⁶ A' drtc' okatrle olvz kc. Amzpxle naode x mnqle nubla ngr lue kc tqbyapxngr Mepwz kc yrkrtxo.

¹⁷ Zbz Mepwz kc sc tqngyatipe drtwrde olvz kc, x sc tqvzpe mz nzvec-krdr badr kzdung kz doa nedeng, kcng tzvz-nqblqlr Loukxtr sc Gct, x tzlxngitilr natq angidr kcng tqpipx Jiszs.