ಪ್ರಕಟನೆ 8 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಕ್ಹಾತ್ವಾ ಶಿಕ್ಕೊ

¹ ಎ ಬಕ್ರಾನು ಬಚ್ಚು಼ ಥಯಲವಾಲೊ ಕ್ಹಾತ್ವಾ ಮುದ್ರೆ ಖುಲ್ಲಾ ಕರ‍್ಯೊ. ತೆಳಾಮಾ ಸ್ವರ್ಗಮಾ ಅರದಿ ತಾಸ ಶಾಂತ ಥೈಗಯು.

² ಕ್ಹುದಾನಾ ಕ್ಹಾಮು ಕ್ಹಾತ ದೆವದುತ ಹುಬ್ರಯಲ ಮಿ. ದೆಕ್ಯೊ ತ್ಯುನೊ ನೆ ಕ್ಹಾತ ತುತ್ತುರಿಯು ದಿದ್ಯಾತಾ.

³ ಬಿಜೆಕ್ಲೊ ದೆವದುತ‍ ಐನ ಯಜ್ಞವೆದಿನಾ ಕ್ಹಾಮೊ ಹುಬ್ರಯೊ ಎ ದೆವದುತ ಉದನು ಧವಾಂಡೊ ‌‍ರ‍್ಹಯಲ ಕ್ಹೊನಾನಿ ಪರಾತ ಧರ್ಲಿನ ಹುಬ್ರಯೊತು ಕ್ಹುದಾನಾ ಪರಿಶುದ್ಧ ರ‍್ಹಯಲ ಮನಕ್ಹೊ ಪ್ರಾಥನಾ ‍ಕರ್ತಾ ತಿನಿ ಚ಼ಡಾವಾನೆ ತಿನೆ ಘನ್ಯು ಉದನೊ ಧವಾಂಡೊ ಎ ದೆವದುತ ಸಿಂಹಾಸನ್ನಾ ಕ್ಹಾಮೊ ಕ್ಹೊನಾನಿ ಯಜ್ಞವೆದಿಪರ ತೆ ಉದನೊ ಧವಾಂಡಾನು ಮುಕ್ಕಯೊ.

⁴ ಉದ ಘಾಲಲ ಧವಾಂಡೊ ದೆವದುತನಾ ಹತ್ಮಾತು ಕ್ಹುದಾನಾ ಮನಕ್ಹೊನಿ ಪ್ರಾರಥನಾನಾ ಕ್ಹಾತೆ ಕ್ಹುದಾಕನ ಗಯು.

⁵ ತೆಳಾಮಾ ದೆವದುತೊ ಉದನೊ ಧವಾಂಡೊ ರ‍್ಹಯಲ ಪರಾತ ಯಜ್ಞವೆದಿನೆ ಆಗಕ್ಹು ಭರಿನೆ ತಿನೆ ಜಿಮಿನಪರ ನಾಕಿಪಾಡ್ಯೊ ತೆಳಾಮಾ ಬಿಜಲಿ ಗಡಗಡಾನು ವರಿ ಮಿಂಚಾ಼ನು ಬಿಜಿಯೊ ಅವಾಜೊ಼ ಭುಕಂಪೊ ಥಯಾ.

ಕ್ಹಾತ ಪೊಂಗಾ

⁶ ಪಾಚಾ಼ತಾ ತೆ ಕ್ಹಾತ ಜ಼ನಾ ವರಿ ದೆವದುತೊ ಕ್ಹಾತ ತುತ್ತುರಿಲಿನ ವಜಾ಼ಡಾನೆ ತಯಾರ ಥಾವಾಡ್ಯಾತಾ.

⁷ ಪೈಲಾನೊ ದುತ ತಿನಿ ತುತ್ತುರಿ ವಜಾ಼ಡ್ಯೊ. ತೆಳಾಮಾ ರಗತಮಾ ಕಲಾಯಲ ಘಾರಗಿಯೊ ವರಿ ಆಗ್ನು ಪಾನಿ ಜಿಮಿನಪರ ಥಾವಾಡ್ಯುಸ ಜಿಮಿನ್ನಿ ತನ್ವಾ ಭಾಗ ವರಿ ಹಸರ ಝಾಡೊ ಬಳಿಗಯಾ. ವರಿ ಝಾಡೊಮಾ ತನ್ವಾಭಾಗ ಯಕ್ಕ ಬಳಿ ಗೈಯು.

⁸ ಬೆವಾ ದೆವದುತ ತಿನಿ ತುತ್ತುರಿ ವಜಾ಼ಡ್ಯೊ. ತೆಳಾಮಾ ಆಗಕ್ಹು ಮ್ಹೊಟು ಡೊಂಗರ ಲಿಂಗತ ರ‍್ಹಯಲ ಯಕ್ಕ ಸಾಮನ ಸಮುಂದರಮಾ ನಾಕ್ಕಯೊ. ತೆಳಾಮಾ ಸಮುಂದರನು ತನ್ವಾ ಯಕ್ಕ ಭಾಗ ರಗತ ಲಿಂಗತ ಥಯು.

⁹ ಸಮುಂದರಮಾ ರ‍್ಹಯಲ ಜಿವಿಯೊಮಾ ತನ್ವಾ ಯಕ್ಕ ಭಾಗ ಮರಿ ಗೈಯು. ವರಿ ಹಡಗಾವೊಮಾ ತನ್ವಾ ಯಕ್ಕ ಭಾಗ ಆಳ ಥೈಗಯು.

¹⁰ ತನ್ವಾ ದೆವದುತ ತಿನಿ ತುತ್ತುರಿ ವಜಾ಼ಡ್ಯೊ ತೆಳಾಮಾ ಆಗ ಲಾಗಲ ಮ್ಹೊಟಿ ಚಿಕ್ಕಕಿಲಿಂಗತ ಹಬಾಳಮಾತಿ ಉತ್ರಿನ ಪಡಿ ತೆ ಚಿಕ್ಕಕಿ ನದಿಮಾ ವರಿ ಪಾನಿನಿ ಧಡ್ಕಿಯೊಮಾ ತನ್ವಾ ಯಕ್ಕ ಭಾಗಪರ ಪಡಿ.

¹¹ ತೆ ಚಿಕ್ಕಕಿನೆ "ಕಡು ಕವಾನು "ಝಾಡ ಪಾನಿಮಾ ತನ್ವಾ ಯಕ್ಕ ಭಾಗ ಕಡು ಥೈಗೈಯು. ತೆ ಕಡು ಪಾನಿ ಘನ್ನಾ ಮನಕ್ಹೊ ಪಿನ ಮರಿಗಯಾ.

¹² ಚಾರವಾ ದೆವದುತ ತಿನಿ ತುತ್ತುರಿ ವಜಾ಼ಡ್ಯೊ. ತೆಳಾಮಾ ಸುರ್ಯಾನು ತನ್ವಾ ಭಾಗ ಚ಼ಂದಪ್ಪಾನೊ ತನ್ವಾ ಭಾಗ ವರಿ ಚಿಕ್ಕಕಿಯೊನು ತನ್ವಾ ಭಾಗ ತ್ಯುನೊಮಾನು ಯಕ್ಕ ಅಂದಾರು ಥೈಗೈಯು. ದಿನ್ಮಾಬಿ ವರಿ ರಾತ್ಮಾಬಿ ತನ್ವಾಮಾನೊ ಯಕ್ಕ ಭಾಗನೆ ಉಜಾಲು ನೈಸು ಥೈಗಯು.

¹³ ಮಿ ದೆಕಲಲಿಂಗತ ವಾಯುಮಂಡಲಮಾ ಘನ್ನು ಉಚ್ಚಾ಼ಪರ ಯಕ್ಕ ಗರುಡ ಪಕ್ಕಷಿ ಉಡಾನು ಮಿ ದೆಕ್ಯೊ ತೆ ಪಕ್ಕಷಿ ಝೊರ ಅವಾಜ಼ ಕ್ಹು ತ್ರಾಸ! ತ್ರಾಸ! ಜಿಮಿನಪರ ರ‍್ಹಯಲ ಮನಕ್ಹೊನೆ ತ್ರಾಸ; ಬಿಜಾ಼ ತನ್ನ ದೆವದುತೊ ತ್ಯುನಿಯೊ ತುತ್ತುರಿಯೊ ವಜಾ಼ಡ್ತಾಮಾ ತ್ರಾಸ ಆವಾನು ಶುರು ಥಾವಸ ಕೈನ ಶುರು ಥಾವಸ ಕೈನ ವದ್ರಾನು ಐಕ್ಯೊ.