ಪ್ರಕಟನೆ 4 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಸ್ವರ್ಗಮಾ ಆರಾಧನಾ

¹ ಪಾಚಲ್ತೊ ಮಿ ದೆಕ್ತಾಮಾ ಮಾರಾ ಕ್ಹಾಮೊ ಸ್ವರ್ಗನು ಬಾಕಲ ಖುಲ್ಲಾ ಥಯಲ ಮಿ ದೆಕ್ಯೊ. ಮಾರಾ ಕ್ಹಾತೆ ಪೈಲಾ ಬೊಲಲ ಆವಾಜ಼ಜ಼ ವರಿ ಮಾರಾ ಕ್ಹಾತೆ ಬೊಲ್ಯು. ತೆ ಅವಾಜ಼ ತುತ್ತುರಿನಿ ಅವಾಜ಼ ಲಿಂಗತ ವ್ಹತ್ತು" ತೆ ಅವಾಜ಼ಮಾ ಉಪ್ಪರ ಚ಼ಡಿನ ನ್ಹ್ಯಾ ಆ. ಅಗು ಥಾವಾನು ಮಿ ತುನೆ ದೆಕಾಡಿನ ದ್ಯುಸ "ಕೈನ ಕದ್ಯು.

² ತೆಳಾಮಾಜ಼ ಮಿ ಪವಿತ್ರ ಆತ್ಮಾನಾ ವಶ್ಮಾ ಥಯೊ. ಸ್ವರ್ಗಮಾ ಮಾರಾ ಕ್ಹಾಮುಜ಼ ಯಕ್ಕ ಸಿಂಹಾಸನ ವ್ಹತ್ತು. ಕುನ ಯಕ್ಕ ತೆ ಸಿಂಹಾಸನ ಪರ ಬೈಟಲ ದೆಕ್ಯೊ.

³ ಸಿಂಹಾಸನ ಪರ ಬೈಟಲವಾಲಾನು ಮ್ಹೊಡು ಸುರ‍್ಯಕಾಂತ ಪದ್ಮರಾಗ ದಗ್ಡಾವೊ ಲಿಂಗತ ಮಿಂಚಾ಼ಡೊತೊ, ಸಿಂಹಾಸನ್ನಾ ಸುತ್ತೆ ಹಸರ ರಂಗ ದಿಕ್ಹಾನು ಕಾಮನ ಬಿಲ್ಲ ವ್ಹತ್ತು.

⁴ ತೆ ಸಿಂಹಾಸನ್ನಾ ಸುತ್ತೆ ಇಕ್ಹಪರ ಚಾರ ಶಾನಾ ಮನಕ್ಹೊ ಬೈಟ್ಯಾತಾ. ತ್ಯುನೆ ಧೊಳಾ ವಣ್ಣಾ ಘಾಲ್ಲಿದ್ಯಾತಾ. ತ್ಯುನಾ ಮಾತಾಪರ ಕ್ಹೊನಾನಾ ಕಿರಿಟೊ ವ್ಹತ್ತಾ. ಎ

⁵ ತೆ ಸಿಂಹಾಸನಮಾತಿ ಬಿಜ಼ಲಿ ಗಡ ಗಡಾನಿ ಅವಾಜ಼ ವರಿ ಬಿಜಿಯೊ ಬಿಜೊಯೊ ಆವಾಡ್ಯುತು. ತೆ ಸಿಂಹಾಸನಾ ಕ್ಹಾಮಾ ಕ್ಹಾತ ದಿವ್ವಾ ಲಾಗಲ ವ್ಹತ್ತಾ. ತೆ ದಿವ್ವಾ ಕ್ಹುದಾನಿಯೊ ಕ್ಹಾತ ಆತ್ಮಾ ವ್ಹತ್ತಿಯೊ.

⁶ ಎನೈಸೊ ಸಿಂಹಾಸನಾ ಕ್ಹಾಮು ಕಾಂಚ಼ನು ಸಮುಂದರ ಲಿಂಗತ ದಿಕ್ಹಾನು ಸುಯ್ಯಕ ಸಾಮನ ವ್ಹತ್ತು. ತೆ ಘನ್ನು ಹಸಾ ವ್ಹತ್ತು. ತೆ ಸಿಂಹಾಸನಾ ಕ್ಹಾಮು ವರಿ ತಿನಾ ಹರಿ ಯಕ್ಕ ಬಗಲ ಚಾರ ಜಿವಿಯೊ ವ್ಹತ್ತಿಯೊ. ತೆ ಜಿವಿನಾ ಪಾಚಾ಼ ವರಿ ತಿನಾ ಕ್ಹಾಮಾ ಡೊಳಾ ಭರಿ ಗಯಾತಾ.

⁷ ಪಸ್ಟಲಿ ಜಿವಿ ಶಿಂಯ್ಯಾ ಲಿಂಗತ ವ್ಹತ್ತು. ಬೆವಾ ಜಿವಿ ಗೈ ಲಿಂಗತ ವ್ಹತ್ತಿ. ತನ್ವಾ ಜಿವಿ ಮನಕ್ಹನಾ ಮ್ಹೊಡಾ ಲಿಂಗತ ವ್ಹತ್ತು. ಚಾರವಾ ಜಿವಿ ಗರುಡ ಪಕ್ಕಷಿ ಲಿಂಗತ ವ್ಹತ್ತಿ.

⁸ ಹರಿ ಯಕ್ಕ ಜಿವಿನೆ ಛೆ ರೆಕ್ಕಯಾ ವ್ಹತ್ತಾ. ತೆ ಜಿವಿನಾ ಭಾರಲ್ಯಾ ಭಾಗ ವರಿ ಮ್ಹೈನಾ ಭಾಗನೆ ಡೊಳಾ ವ್ಹತ್ತಾ. ಎ ಚಾರೆ ಜಿವಿಯೊ ದಿನ್ನ ರಾತ ಛೊಡೆ ನೈಸೊ ಅಮ್ಮ ಕತ್ಯೊತ್ಯೊ"ಕ್ಹುದಾ ಥಯಲ ಪ್ರಭು, ಪರಿಶುದ್ಧ ವ್ಹೈ ಪರಿಶುದ್ಧ ವ್ಹೈ ಪರಿಶುದ್ಧ ವ್ಹೈ. ತೆ ಮ್ಹೊಟಿ ತಾಕತ ವಾಲೊ ವ್ಹೈ. ತೆ ಭುತಕಾಲಮಾ ರ‍್ಹಯಲವಾಲೊ ವರತಮಾನ ಕಾಲಮಾ ರ‍್ಹಯಲವಾಲೊ ವ್ಹೈ. ವರಿ ಆವಾಲೊ ವ್ಹೈ.

⁹ ಎ ಜಿವಿಯೊ, ಸಿಂಹಾಸನ ಪರ ಬೈಟಲ ವಾಲಾನೆ ಪ್ರಭಾವ ವರಿ ಮರ್ಯಾದಿ ವರಿ ಕೃತಜ್ಞತೆ ಕವಾಡಿಯೊತ್ಯೊ. ಯುಗ ಯುಗಮಾ ಜಿವ್ತೊ ರ‍್ಹವಾಲೊ ತೆಜ಼ ವ್ಹೈ.

¹⁰ ಇಕ್ಹಪರ ಚಾರ ಮ್ಹೊಟಾ ಶಾನಾ ಮನಕ್ಹೊ ತ್ಯುನೆ ಘಾಲ್ಲಿದಲ ಕಿರಿಟೊ ಕಾಡಿನ ಬಾಜು಼ಮಾ ಮ್ಹೆಲಿನ, ಸಿಂಹಾಸನ ಪರ ಬೈಟಲವಾಲಾನೆ ಉಂದಾಗುಡಗಾ ಘಾಲ್ಲಿನ ಪಗೆಪಡಿನ, ಯುಗ ಯುಗಮಾ ಜಿವ್ತೊ ರ‍್ಹವಾಲೊ ತಿನೆ ಆರಾಧನಾ ಕರತಾ ಅಮ್ಮ ಕದ್ಯಾ;

¹¹ "ಹಮಾರಾ ಪ್ರಭು, ಹಮಾರಾ ಕ್ಹುದಾ! ತು ಪ್ರಭಾವ, ಮರ್ಯಾದಿ, ಹರಿ ಯಕ್ಕನೆ ಯೊರಗ್ಯ ವ್ಹೈ. ಕ್ಹಾರು ತಯ್ಯಾರ ಕರಲವಾಲೊ ತುಜ಼಼ ವ್ಹೈ. ತಾರಿ ಮರ್ಜಿ ಲಿಂಗತ ಎ ಕ್ಹಾರು ವ್ಹತ್ತು; ವರಿ ಕ್ಹಾರು ತಯ್ಯಾರ ಥಯು"