ಪ್ರಕಟನೆ 11 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಬೆಜ಼ನಾ ಸಾಕ್ಕಷಿಯೊ

¹ ಪಾಚಾ಼ತಾ ಧಾಂಡಾ ಲಿಂಗತ ರ‍್ಹಯಲ ಅಳ್ತಿನಿ ಯಕ್ಕ ಲಾಕಡಿ ಮನೆ ದಿನ್ನ ಅಮ್ಮ ಕವಾಯಾ; "ಜಾ಼, ಕ್ಹುದಾನಿ ಯಗ್ನೆವೆದಿ ವರಿ ತಿನಿ ಆಲಯ ಅಳತಿ ಕರ; ವರಿ ತ್ಯಾ ಆರಾಧನಾ ಕರಾಲಾ ಮನಕ್ಹೊನೆ ಮೊಜ಼.

² ತೆನೈಸೊ ಆಲಯನಿ ಭಾರಲಿ ಅಂಗಳಾ ಅಳತಿ ಕರ‍್ಯಾವಾಚಿ ಛೊಡಿಪಾಡ. ತೆ ಯೆಹುದಿಯೊ ನೈ ರ‍್ಹಯಲ ಮನಕ್ಹೊನೆ ಛೊಡ್ಯಾಸ. ತೆ ಮನಕ್ಹೊ ಪವಿತ್ರ ಗಾಮಪರ 42 ಮ್ಹೈನಾ ಖುಂದತಾ ಚಾ಼ಲಸ..

³ ಕೊತ್ಳಾ ಘಾಲ್ಲಿದಲ ಮಾರಿ ಬೆ ಸಾಕ್ಕಷಿಯೊನೆ ಅದಿಕಾರ ದ್ಯುಸ. ತ್ಯುನೆ ಬಾರಾಕ್ಹೊನ ಕ್ಹಾಟ ದಿನ್ನ ಪ್ರವಾದನೆ ಕರಸ"

⁴ ಭುಲೊಕನೊ ಪ್ರಭುನಿ ಸನ್ನಿದಾನಮಾ ಹುಬ್ರಯಲ ಬೆ ತೆಲನಾ ಝಾಡೊ ವರಿ ಬೆ ದಿವ್ವಾನಾ ಖಂಬಾ ಎ ಬೆ ಸಾಕ್ಷಿ ವ್ಹೈ.

⁵ ಎ ಸಾಕ್ಕಷಿನೆ ಕುನಬಿ ಕೆಟ್ಟ ಕರಾನೆ ಕೊಶಿಶ ಕರ‍್ಯಾಮ, ಸಾಕ್ಕಷಿಯೊನಾ ಮ್ಹೊಡಾಮಾತು ಆಗ ಭಾರಿ ಐನ ತ್ಯುನಾ ದುಶ್ಮನೊನೆ ಕದ್ಯಾಮ ತ್ಯುನೊನೆ ತ್ರಾಸ ಕರಾನೆ ಕೊಶಿಶ ಕರಲ ಕ್ಹಾರಾವೊನೆ ಖಲಾಸ ಕರಸ.

⁶ ಎ ಸಾಕ್ಕಷಿಯೊ ತ್ಯುನಾ ಪ್ರವಾದನೆನಾ ಟೈಮಮಾ ಹಬಾಳ ಪರತು ಪಡಾನು ಪಾನಿ ಹುಬ್ರಾಡಾನೆ ಪಾನಿನೆ ರಗತ ಕರಾನೆ ಜಿಮಿನ್ನೆ ಕ್ಹಾರಿ ತರಾನಾ ತ್ರಾಸೊ ದಿವಾನೆ ಅದಿಕಾರ ವ್ಹಂದಲ ರ‍್ಹವಸ. ತ್ಯುನೆ ತ್ಯುನೊನೆ ಮನಸ್ಸ ಆಯಲ ತೆಕ್ಲು ಅಮ್ಮ ಕರ ಸಕಸ.

⁷ ಎ ಬೆ ಸಾಕ್ಷಿಯೊ ತ್ಯುನಿ ಸಂದೆಶ ಕೈನ ಕ್ಹರಲ ಪರ ಪಾತಾಳಮಾತು ಉಪ್ಪರ ಆವಾನು ಜಾನವರ ತ್ಯುನಾ ವಿರುದ್ದ ಯುದ್ದ ಕರಸ. ಎ ಜಾನವರ ತ್ಯುನೊನೆ ಸೊಲ್ಸಿನ ಖಲಾಸ ಕರಸ.

⁸ ಎ ಸಾಕ್ಷಿಯೊನಾ ಬೆ ಮುರದಾ ಮ್ಹೊಟಾ ಗಾಮ್ನಾ ವಾಟಮಾ ಪಡಲ ರ‍್ಹವಸ. ಎ ಗಾಮನೆ ಸೊದೊಮ ವರಿ ಇಜಿಪ್ತ ಕೈನ ನಾಮ ಥಾವಸ. ತೆ ಗಾಮನಾ ನಾಮೊನೆ ಖಾಸ ಮತ್ಲಬ ಛೆ. ಪ್ರಭು ಎ ನಗರಮಾಜ಼ ಶಿಲುಬಿ ಪರ ಘಾಲ್ಯಾ.

⁹ ಕ್ಹಾರಾ ಮನಕ್ಹೊ, ಘರದಾನು, ವಾತೊ, ಜಾ಼ತವಾಲಾ ಕ್ಹಡಾ ತನ್ನ ದಿನ್ನ ಲಕ್ಕಾ ಎ ಸಾಕ್ಷಿಯೊನಾ ಮುರದಾವೊನೆ ದೆಕತಾ ರ‍್ಹವಸ. ತ್ಯುನೊನೆ ಸಮಾದಿ ಕರಾನೆ ಮನಕ್ಹೊ ವಪ್ಪಿಲೆತಾ ನೈ.

¹⁰ ಎ ಭಂಬಿಜ಼ನಾ ಮರಲ ಹುತಿ ಜಿಮಿನ ಪರ ರ‍್ಹಯಲ ಮನಕ್ಹೊ ಖುಶಿ ಥಾವಸ. ತ್ಯುನೆ ಕಾರಯೊ ಕರಿನ, ಯಕ್ಕನೆ ಯಕ್ಕ ಆಯಾರ ದಿವಸ. ಎ ಭಂಬಿ ಪ್ರವಾದಿಯೊ ಜಿಮಿನ ಪರ ರ‍್ಹಯಲ ಮನಕ್ಹೊನೆ ಘನ್ನು ತ್ರಾಸ ದಿದಲಕ್ಹು ಎ ಮನಕ್ಹೊ ಅಮ್ಮ ಕರಸ.

¹¹ ತೆನೈಸೊ ಕ್ಹಡಾ ತನ್ನ ದಿನ್ನ ಥಯಲ್ಪರ ಕ್ಹುದಾ ತೆ ಭಂಬಿ ಪ್ರವಾದಿಯೊಮಾ ವರಿ ಜ಼ಲಮ ಆಯೆಲಿಂಗತ ಕರ‍್ಯೊ. ತೆಳಾಮಾ ತ್ಯುನೆ ತ್ಯುನಾ ಪಗೊಪರ ಹುಬ್ರಯಾ. ತ್ಯುನೊನೆ ದೆಕಲ ಕ್ಹಾರಾ ಮನಕ್ಹೊ ಭೆಕ್ಹು ಭರಿ ಗಯಾ.

¹² ಪಾಚಾ಼ತಾ "ಉಪ್ಪರ ಚ಼ಡಿನ ಆವೊ" ಕೈನ ಸ್ವರಗತಿ ಮ್ಹೊಟಿ ಆವಾಜ಼ ತೆ ಪ್ರವಾದಿಯೊನೆ ಐಕೊ ಆಯು. ತೆಳಾಮಾ ತೆ ಭಂಬಿ ಪ್ರವಾದಿಯೊ ಹಬಾಳನಾ ಕ್ಹಾತೆ ಸ್ವರ್ಗನೆ ಗಯಾ. ತ್ಯುನೆ ಜಾ಼ವಾನು ತ್ಯುನಾ ದುಶ್ಮನೊ ದೆಕತಾ ವ್ಹತ್ತಾ.

¹³ ತೆ ಟೈಮಮಾ ಮ್ಹೊಟು ಭುಕಂಪ ಥಯು. ತೆ ಗಾಮನು ದಕ್ಹಮಾನು ಯಕ್ಕ ಭಾಗ ಹಾಳ ಥಯು. ಭುಕಂಪಮಾ ಕ್ಹಾತ ಹಜಾ಼ರ ಮನಕ್ಹೊ ಹಾಳ ಥಯಾ. ನೈ ಮರಲ ಮನಕ್ಹೊ ಘನ್ನಾ ಭೆಕ್ಹು ಸ್ವರಗಮಾನಾ ಕ್ಹುದಾನೆ ಶ್ರೆರಷ್ಠನೆ ಮಹಿಮಾ ಕರ‍್ಯಾ.

¹⁴ ಬೆಂವಾ ಮ್ಹೊಟು ಮುಸಿಬತ್ತ ಖರ‍್ಯು. ತನ್ವಾ ಮ್ಹೊಟು ಭೆಗಿನ ಆವಸ.

ಕ್ಹಾತ್ವಾ ಪೊಂಗೊ

¹⁵ ಕ್ಹಾತ್ವಾ ಕ್ಹುದಾನು ದುತ ತಿನಿ ತುತ್ತುರಿ ವಜಾ಼ಡ್ಯೊ. ತೆಳಾಮಾ ಸ್ವರ್ಗಮಾ ಮ್ಹೊಟಾ ಆವಾಜೊ಼ ಥಯಾ. ತೆ ಆವಾಜೊ಼ ಅಮ್ಮ್ ಕದ್ಯಾ; "ಎ ಲೊಕನು ರಾಜ್ಯ ಹಮ್ನಾ ಅಪ್ನಾ ಪ್ರಭುನಾ ವರಿ ತಿನೊಜ಼ ರ‍್ಹಯಲ ಕ್ರಿಸ್ತನಿ ರಾಜ್ಯ ಥೈಸ. ತೆ ಯುಗೊ ಯುಗೊಮಾಬಿ ಅದಿಕಾರ ಚ಼ಲಾವಾ ವಾಲೊ ವ್ಹೈ"

¹⁶ ಪಾಚಾ಼ತಾ ಇಖ್ಪರ ಚಾರ ಜ಼ನಾ ಶಾನಾ ಉಂದಾ ಗುಡ್ಗಾ ಘಾಲಿನ ಆರಾಧನಾ ಕರ‍್ಯಾ. ಕ್ಹುದಾನಿ ಸನ್ನಿಧಿಮಾ ತ್ಯುನಿ ಸಿಂಹಾಸನನಾ ಉಪ್ಪರ ಬೈಟಲ ಶಾನಾಜ಼ ತ್ಯುನೆ ವ್ಹೈ.

¹⁷ ತೆ ಶಾನಾ ಅಮ್ಮ್ ಕದ್ಯಾ; "ಪ್ರಭು, ಸರವಶಕ್ಕತ ರ‍್ಹಯಲ ಕ್ಹುದಾ, ಭುತಕಾಲಮಾ ರ‍್ಹಯಲವಾಲಾ, ವರತಮಾನ ಕಾಲಮಾ ರ‍್ಹವಾಲಾ, ತುನೆ ಕೃತಜ್ಞತಾಸ್ತುತಿ ಕರೆಸ. ತು ತಾರಿ ಮ್ಹೊಟಿ ಅದಿಕಾರ ಉಪಯೊಗ ಕರಿನ ತಾರಿ ಆಡಳಿತ ಶುರು ಕರಲಕ್ಹು ತುನೆ ಕೃತಜ್ಞತಾಸ್ತುತಿ ಕರೆಸ.

¹⁸ ದುನಿಯಾನಾ ಮನಕ್ಹೊ ಶಿಟ್ಟ ಥಯಾತಾ. ತೆನೈಸೊ ಎ ತಾರಾ ಶಿಟ್ಟನೊ ಟೈಮ ವ್ಹೈ. ಮರಲವಾಲಾವೊನೆ ಫೈಸಲೊ ದಿವಾನೊ ಟೈಮ ಎಜ಼ ವ್ಹೈ. ತಾರಾ ಸೆವಕೊ ರ‍್ಹಯಲ ಪ್ರವಾದಿಯೊನೆಬಿ ತಾರಾ ಪರಿಶುದ್ಧ ಮನಕ್ಹೊನೆ ತುನೆ ಮರ್ಯಾದಿ ದಿವಾಲಾ ಮ್ಹೊಟಾವೊನೆಬಿ ನ್ಹಾನಾವೊನೆಬಿ ಪ್ರತಿಫಲ ದಿವಾನೊ ಟೈಮ ಆ ವ್ಹೈ. ದುನಿಯಾ ಹಾಳ ಕರಾಲಾವೊನೆ ಹಾಳ ಕರಾನೊ ಟೈಮ ಆ ವ್ಹೈ"

¹⁹ ಪಾಚಾ಼ತು ಸ್ವರ್ಗಮಾ ರ‍್ಹಯಲ ಕ್ಹುದಾನಿ ಆಲಯ ಕ್ಹುಲ್ಯು. ಕ್ಹುದಾ ತಿನಾ ಮನಕ್ಹೊನೆ ದಿದಲ ವಡಂಬಡಿಕೆ ಮ್ಹೆಲಲ ಪೆಟ್ಟಗಿ ತಿನಾ ಆಲಯಮಾ ದಿಕ್ಹಿ. ತೆಳಾಮಾ ಬಿಜ್ಲಿಯೊ ಮಾರ‍್ಯೊ, ಆವಾಜೊ಼ ಥಯಾ, ಭುಕಂಪೊ ಥಯಾ ವರಿ ಘಾರಗಿಯೊನು ಪಾನಿ ಐಯು.