ಮತ್ತಾಯ 26 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಯೆಸುನೆ ಖಲಾಸ ಕರಾನೆ ದೆಕಲ

¹ ಯೆಸು ತೆ ಕ್ಹಾರಿಯೊ ವಾತೊ ಕೈನ ಮುಗ್ಸಲ್ಪರ ತಿನಾ ಶಿಶ್ಯಾವೊನೆ ಬೆ ದಿನ್ನ ಥಯಲ್ಪರ ಫಸ್ಕ ಸನ್ನ ಆವಾನೊ ಛೆ ಕೈನ ತುಮೊನೆ ಗ್ವತ್ತ ಛೆ;

² ತೆಳಾಮಾ ಮನಕ್ಹೊನೊ ದಿಕ್ರಾನೆ ಶಿಲುಬಿಪರ ಘಾಲಾನಾ ಹುತಿ ವಪ್ಸಿನ ದಿವಸ ಕೈನ ಕದ್ಯೊ.

³ ತೆ ಕಾಲಮಾ ಖಾಸ ಯಾಜಕೊ, ಶಾನಾ ಮನಕ್ಹೊ ಕಾಯಫ ಕವಾಲೊ ಮ್ಹೊಟೊ ಯಾಜಕನಾ ಭವನಮಾ ಮಳಿನ ಐನ

⁴ ಯೆಸುನೆ ಗಪ್ಪಜ಼ ಧರಿನ ಖಲಾಸ ಕರು ಕೈನ ಮ್ಹೈನಾ ಮ್ಹೈ ವಿಚಾರ ಕರ‍್ಯಾ.

ಬಾಕ್ಡಿ ಮೊಗಾನು ತೆಲ ತಿನಾ ಮಾತಾಪರ ರಿಚಾ಼ಯಲ

⁵ ವರಿಬಿ ಸನ್ನಮಾ ಧರುನೈ ಕೈನ, ಅಪ್ನಾ ಮನಕ್ಹೊಮಾ ಗದ್ದಲ ಥಾವಸ ಕೈನ ಬೊಲ್ಲಿದ್ಯಾ.

⁶ ಯೆಸು ಬೆಥಾನ್ಯಮಾ ಸಿಮೊನ ಕೈನ ಕವಾಲಾ ಕುಷ್ಠರೊಗಿನಾ ಘರ್ಮಾ ಖಾವಾಹುತಿ ಬೈಟಲ ಟೈಮ್ಮಾ ಯಕ್ಲಿ ಬಾಕ್ಡಿ

⁷ ಘನ್ನು ಮೊಗು ಬಾಸನು ತೆಲನಿ ಭರ್ಣಿ ಲೈನ ತಿಕನಾ ನಜಿಕ ಐನ ತೆ ತೆ ತಿನಾ ಮಾತಾಪರ ರಿಚೈ಼.

⁸ ಶಿಶ್ಯಾ ಎ ಕ್ಹಾರು ದೆಇಮ್ಮ ಸುಕ್ನಿಜ಼ ಖರ್ಚ಼ ಕರಾನು ಕಾ?

⁹ ಎ ತೆಲ ಮೊಗು ಇಕ್ಕಿನ ಗರಿಬೊನೆ ದಿವಾನೆ ಥಾತುತೊ ಕದ್ಯಾ.

¹⁰ ಯೆಸುನೆ ಎ ಗ್ವತ್ತ ಥಾತಾಮಾ ತ್ಯುನೊನೆ , ಎ ಬಾಕ್ಡಿನೆ ಕಾ ತ್ರಾಸ ಕರಾಡ್ಯಾಸ? ಎ ಮನೆ ಚೊ಼ಕು ಕಾಮ ಕರಿಸ.

¹¹ ಗರಿಬೊ ಹಮೆಶಾಬಿ ತುಮಾಕ್ಹಾತೆ ರ‍್ಹವಸ್ತೊ, ಮಿ ತುಮಾರಾ ಕ್ಹಾತೆ ಹಮೆಶಾಬಿ ರ‍್ಹತೊ ನೈ.

¹² ಎ ಬಾಕ್ಡಿ ಎ ತೆಲ ಮಾರಾ ಅಂಗ್ಪರ ರಿಚಾ಼ಯಲ ಮಾರಾ ಉತ್ತರ ಕ್ರೆಯೆನೆ ವ್ಹೈ.

¹³ ಮಿ ತುಮೊನೆ ಕ್ಹರಿಮಾಜ಼ ಕೌಸ, ಎ ಸುವಾರ್ತೆ ಕ್ಹಾರಿ ದುನಿಯಾಮಾ ಕವಸ ತ್ಯಾ ತ್ಯಾ ಎ ಬಾಕ್ಡಿನಾ ಹುತಿ ಶೆ ಕರಸ.

¹⁴ ತೆಳಾಮ ಬಾರಾ ಶಿಶ್ಯಾವೊಮಾನೊ ಯಕ್ಲೊ ರ‍್ಹಯಲ ಇಸ್ಕರಿಯುತ ಯುದ ಕವಾಲೊ ಖಾಸ ಯಾಜಕೊಕನ ಗೈನ,

¹⁵ ಮಿ ತಿನೆ ಧರಿನೆ ದಿವಾನೆ ತುಮೊನೆ ಮದತ ಕರ‍್ಯೊಮ ಮನೆ ತುಮೆ ಸು ದಿವೊಶಿ? ಕದ್ಯೊ. ತಿವ್ನೆ ತಿನೆ ಮುವತ್ತ ರುಪ್ಪಾನಾ ಬಿಲ್ಲಾ ದಿದ್ಯಾ.

¹⁶ ತೆಳಾಮಾತಾ ತಿವ್ನೆ ತಿನೆ ಧರಾನಾ ಹುತಿ ಮೌಕೊ ದೆಕಾಡ್ಯಾತಾ.

ಯೆಸು ತಿನಾ ಶಿಷ್ಯಾವೊನಾ ಕ್ಹಾತೆ ಲಾಸ್ಟಸಲಾ ಖಾದಲ

¹⁷ ಖಾಟೊ ನೈಸೊ ರೊಕ್ಲಾನೊ ಸನ್ನಾ ಪೈಲಾನಾ ದಿನ್ಮಾ ಶಿಶ್ಯಾ ಯೆಸುಕನ ಐನ, ಪಸ್ಕನು ಅನ್ನ ಖಾವಾನಾ ಹುತಿ ಹಮೆ ತುನೆ ಕಿಜಾ಼ ತಯ್ಯಾರ ಕರುಕೈನ ಛೆ ಕೈನ ಪುಚ಼್ಚ್ಯಾ.

¹⁸ ತೆ ತ್ಯುನೊನೆ ಗಾಮ್ಮಾ ಗ ಮಿ ಕವದಲವಾಲಾಕನ ಗೈನ ತಿನೆ, ಮಾರೊ ಟೈಮ ನಜಿಕ ಆಯೊಸ , ಮಿ ಮಾರಾ ಶಿಶ್ಯಾವೊನಾ ಕ್ಹಾತೆ ಪಸ್ಕ ಸನ್ನ ಕರುಸ ಕೈನ ಗುರು ಕವಾಡ್ಯೊಸ ಕೈನ ಕವೊ ಕದ್ಯೊ.

¹⁹ ಶಿಶ್ಯಾ ಯೆಸು ಕದಲ ತಿಮ್ಮಜ಼ ಪಸ್ಕಾನು ಅನ್ನ ತಯ್ಯಾರ ಕರ‍್ಯಾ.

²⁰ ಕ್ಹಾಂಜ಼ ಥಾತಾಮಾ ತಿನಾ ಬಾರಾ ಶಿಶ್ಯಾವೊನಾ ಕ್ಹಾತೆ ಖಾವಾನು ಹುತಿ ಬೈಟ್ಯೊ.

²¹ ತ್ಯುನೆ ಅನ್ನ ಖಾತಾಮಾ ತೆ , ತುಮೊನೆ ಕ್ಹರಿಮಾಜ಼ ಕೌಸ ತುಮಾಮಾ ಯಕ್ಲೊ ಮನೆ ಧರೈನ ದಿವಸ ಕೈನ ಕದ್ಯೊ.

²² ತೆಳಾಮಾ ತ್ಯುನೆ ಘನ್ನಾ ದುಖಿ ಥೈನ ಕರ್ತಾ, ಮಿ ವ್ಹೈ ಸು? ಕೈನ ಹರಿಯಕ್ಲೊ ಪುಚಾ಼ನು ಶುರುಕರ‍್ಯಾ.

²³ ತೆನೈಸೊ ಯೆಸು, "ಕುಂಡಾಮಾ ಮಾರಾ ಕ್ಹಾತೆ ಹತ್ತ ಡುಬಾಲಯವಾಲೊ ಮನೆ ಧರಿನ ದಿವಾಲೊ.

²⁴ ಮನಕ್ಹನೊ ದಿಕ್ರೊ ತಿನಾ ವಿಷಯಮಾ ಬರದಲ ನಿಂಗತ ಗೈ ಪಡಸ; ತೆನೈಸೊ ಕುನಬಿ ಮನಕ್ಹನಾ ದಿಕ್ರಾನೆ ಧರಿನ ದಿವಸ್ತೊ ತಿನೆ ಆಯೊ. ತೆ ಮನಕ್ಹ ನೈ ಹುಟ್ಟಾರೆ ಕೆಕ್ಲುಕಿ ಚೊಕೊ ರ‍್ಹತುತು ಕದ್ಯೊ.

²⁵ ತೆಳಾಮಾ ತಿನೆ ಧರಿನ ದ್ಯುಸ ಕೈನ ಕವಾಲೊ ಯುದಾ, ಪ್ರಭು ಮಿಜ ವ್ಹೈ? ಕೈನ ಪುಚ್ತಾಮಾ ಯೆಸು ತಿನೆ, ತು ತಿಮ್ಮ ಕದ್ಯೊತೊ ಕೈನ ಕದ್ಯೊ.

²⁶ ತ್ಯುನೆ ಅನ್ನ ಕ್ಹಾತಾ ಟೈಮ್ಮಾ ಯೆಸು ರೊಕ್ಲೊ ಲಿನ ಕ್ಹುದಾನೆ ಸ್ತೊತ್ರಾ ಕರಿನ ತೆ ತೊಡಿನ ಶಿಶ್ಯಾವೊನೆ ದಿನ, ಕಾಡಿಲಿವೊ, ಕ್ಹಾವೊ, ಎ ಮಾರು ಅಂಗ ವ್ಹೈ ಕದ್ಯೊ.

²⁷ ಪಾಚಲ್ತೊ ಪಾನಿನೊ ತಾಂಬ್ಯೊ ಲಿನ ಸ್ತೊತ್ರಾ ಕರಿನ ತ್ಯುನೊನೆ ದಿನ ಅಮಾ ರ‍್ಹವಾನೂ ಕ್ಹಾರಾಜ಼ನಾ ಪಿವೊ; ಎ ಮಾರು ರಗತ ವ್ಹೈ,

²⁸ ಎ ಮಾರು ರಗತ ವ್ಹೈ. ಪಾಪ ಮಾಫನಾಹುತಿ ಘನ್ನಾ ಮನಕ್ಹೊನಾ ಹುತಿ ಚುವಾಯಲ ರಗತ.

²⁹ ಮಿ ಮಾರಾ ಬಾನಾ ರಾಜ್ಯಮಾ ತಾರಾ ಕ್ಹಾತೆ ನವು ದ್ರಾಕ್ಷರಕ್ಹ ಪಿವಾನಾ ದಿನ್ನ ಲಕ್ಕಾ ಹಜು಼ನ ಎ ಪಿತೊಜ಼ ನೈ ಕೈನ ಮಿ ತುಮೊನೆ ಕೌಸ ಕದ್ಯೊ.

³⁰ ತೆ ಥಯಲ್ಪರ ತ್ಯುನೆ ಕಿರ್ತನೆನು ಗಿದ್ದ ಕದಲ್ಪರ ತೆಲನಾ ಝಾಡೊನಾ ಡೊಂಗರ್ಪರ ಗೈಪಡ್ಯಾ.

³¹ ತೆಳಾಮಾ ಯೆಸು, ತ್ಯುನೊನೆ, ಕುರಬುರ‍್ಯಾನೆ ಮಾರುಸ; ಹಿಂಡನಾ ಬಕ್ರಾ ಭಿಕ್ಹರೈ ಜಾವಸ ಕೈನ ಬರದಲ ನಿಂಗತ ತುಮೆ ಕ್ಹಾರಾ ಆ ರಾತೆ ಮಾರಾ ವಿಷಯಮಾ ಪಾಚಾ ಸರಕಸ.

³² ತೆನೈಸೊ ಮಿ ಜ್ಯುತ್ಯೊ ಥೈನ ಉಟಲ್ಪರ ತುಮಾರಾತಿ ಪೈಲಾಜ ಗಲಿಲಾಯನೆ ಜಾವಸ ಕೈನ ಕದ್ಯೊ.

³³ ತೆನೈಸೊ ಪೆತ್ರಾ ತಿನೆ, ಕ್ಹಾರಾಜ಼ನಾ ಮಾರಾ ವಿಷಯಮಾ ಘಾಬ್ರಾಥೈನ ಪಾಚಾ ಸರಕ್ಯಾ ಮಿತೊ ಕೆಳಾಮಾಜ ಪಾಚೊ಼ ಸರಕ್ತೊ ನೈ ಕೈನ ಉತ್ತರ ದಿದ್ಯೊ.

³⁴ ಯೆಸು ಪೆತ್ರಾನೆ, ತುನೆ ಕ್ಹರಿಜ಼ ಕೌಸ, ಎಜ಼ ರಾತಮಾ ಕುಕ್ಡೊ ಬಾಂಗದಿವಾತಿ ಪೈಲಾಜ಼ ತು ಮನೆ ತನ್ನ ಸಲಾ ಒಪ್ಪಿಲೆತೊ ನೈ ಕೈನ ಕದ್ಯೊ.

³⁵ ಪೆತ್ರಾ ತಿನೆ ಮಿ ತಾರಾ ಕ್ಹಾತೆ ಮರಣ ಆಯುತಬಿ ಮಿ ತುನೆ ಇನ್ಕಾರ್ತೊ ನೈ ಕೈನ ಕದ್ಯೊ.

ಯೆಸು ಗೆತ್ಸೆಮನೆ ಮಳಾಮಾ ಪ್ರಾಥನಾ ಕರಲ

³⁶ ತೆ ಥಯಲ್ಪರ ಯೆಸು ತಿನಾ ಶಿಶ್ಯಾವೊನಾ ಕ್ಹಾತೆ ಗೆತ್ಸಮನೆ ಮಳಾಮಾ ಐನ ತ್ಯುನೊನೆ, ನ್ಹ್ಯಾಜ಼ ಬೈಟೊ, ಮಿ ಬಿಜಿಬಗಲ ಗೈನ ಪ್ರಾಥನಾ ಕರುಸ ಕೈನ,

³⁷ ಪೆತ್ರಾನೆ ಜೆಬೆದಾಯನಾ ಭಂಬಿ ದಿಕ್ರಾವೊನೆ ಅಗೊ ಬಲೈಲಿನ ಗೈನ ದುಖಿ ಥೈನ ಮನಸ ದುಖಕರ್ಲಿದ್ಯೊ.

³⁸ ವರಿ ತ್ಯುನೊನೆ ಮಾರಾ ಜ಼ಲಮ ಮರಾನಾ ಯಕ್ಲು ದುಖಮಾ ಪಡ್ಯುಸ; ತುಮೆ ನ್ಹ್ಯಾಜ಼ ರ‍್ಹೈನ ಮಾರಾ ಕ್ಹಾತೆ ಹುಶಾರ ರ‍್ಹವೊ ಕೈನ ಕದ್ಯೊ.

³⁹ ತೆ ದಕ್ಹೊ ಅಗೊ ಗೈನ ಉಂದೊ ಪಡಿನ, ಮಾರಾ ಬಾ, ತುಕನ ಸಾದ್ಯ ಥಯುರೆ ಎ ತ್ರಾಸನೊ ಘಡೊ ಮನೆ ಛೊಡಿನ ಜಾ಼ವಾದೆ; ತೆನೈಸೊ ಮಾರಿ ಚಿತ್ತನಾ ಪ್ರಕಾರ ಥಯಾವಾಚಿ ತಾರಿ ಚಿತ್ತ ಲಿಂಗತಜ಼ ಥಾವಾದೆ ಕೈನ ಕ್ಹುದಾನೆ ಪ್ರಾರ್ಥನಾ ಕರ‍್ಯೊ.

⁴⁰ ಪಾಚ಼ಲ್ತೊ ತೆ ಶಿಶ್ಯಾವೊಕನ ಜಾ಼ತಾಮಾ ತ್ಯುನೆ ನಿಂದರ ಕರಾನು ದೆಕಿನ ಪೆತ್ರನೆ, ಯಕ್ಕ ಟೈಮತುಬಿ ಮಾರಾ ಕ್ಹಾತೆ ಹುಶಾರ ರ‍್ಹತಾ ನೈ ಸು?

⁴¹ ಶೊದನೆಮಾ ಮ್ಹೈ ಥಯಾ ಬಗರ ಹುಶಾರ ರ‍್ಹೈನ ಪ್ರಾರ್ಥನಾ ಕರೊ; ಆತ್ಮಾ ಸಿದ್ದ ಥೈಸ ತೆನೈಸೊ ಅಂಗ ಬಲಹಿನ ಥಯುಸ ಕೈನ ಕದ್ಯೊ.

⁴² ಫರಿನ ಬೆವಾಸಲಾ ಗೈನ, ಮಾರಾ ಬಾ, ಮಿ ತ್ರಾಸ ಖಾದ್ಯಾ ಬಗರ ಎ ತ್ರಾಸ ಮನೆ ಛೊಡಿನ ಜಾ಼ತು ನೈ ಕವಾನು ರ‍್ಹಯಮ ತಾರಿ ಚಿತ್ತ ಲಿಂಗತ ಥಾವಾದೆ ಕೈನ ಕ್ಹುದಾನೆ ಪ್ರಾರ್ಥನಾ ಕರ‍್ಯೊ.

⁴³ ತೆ ಫರಿನ ಆಯಲ್ಪರ ತ್ಯುನೆ ನಿಂದರ ಕರಾನು ದೆಕ್ಯೊ; ತ್ಯುನಾ ಡೊಳಾ ವಜ್ಜಾ಼ ಥಯಾತಾ.

⁴⁴ ತೆ ಥಯಲ್ಪರ ವರಿ ತ್ಯುನೊನೆ ಛೊಡಿನ ಗೈನ ಫರಿನ ತೆಜ಼ ವಾತೊ ಕತೊ ತನ್ವಾ ಸಲಾಬಿ ಪ್ರಾರ್ಥನಾ ಕರ‍್ಯಾ.

⁴⁵ ಪಾಚಲ್ತೊ ತೆ ಶಿಶ್ಯಾವೊಕನ ಐನ ತ್ಯುನೊನೆ, ತುಮೆ ಹಜು಼ನ ನಿಂದರ ಕರಿನ ಅರಾಮ ಕರಾಡಾಸ ಸು; ದೆಕೊ, ತೆ ಟೈಮ ನಜಿಕ ಆಯುಸ, ಹಮ್ನಾ ಮನಕ್ಹನೊ ದಿಕ್ರೊ ಪಾಪಿಸ್ಟೊನಾ ಹತೆ ಒಪ್ಸಾಲಗಾಡಸ.

⁴⁶ ಉಟೊ, ಗಯ್ಯೆ; ಮನೆ ಧರೈನ ದಿವಾಲೊ ನಜಿಕ ಆಯೊಸ ದೆಕೊ ಕೈನ ಕದ್ಯೊ.

ದುಶ್ಮನೊ ಯೆಸುನೆ ಧರಲ

⁴⁷ ಯೆಸು ಹಜು಼ನ ಬೊಲ್ತೊ ರ‍್ಹತಾಮಾಜ, ಬಾರಾ ಶಿಶ್ಯಾವೊಮಾ ಯಕ್ಲೊ ಥಯಲ ಯುದ ಆಯೊ. ಕ್ಹಾಸ ಯಾಜಕೊನಾ ವರಿ ಮನಕ್ಹೊನಾ ಶಾನಾವೊಕಂತಾ ಘನ್ನಾ ಜ಼ನಾವೊನು ಗುಂಪ ಚಾಕಾ, ಗುಂಡಕಾ ಲಿನ ತಿನಾ ಕ್ಹಾತೆ ಆಯಾ.

⁴⁸ ತೆಜ಼ ನೈಸೊ ತಿನೆ ಧರಿನ ದಿವಾಲೊ ತ್ಯುನೊನೆ, ಮಿ ಕಿನೆ ಮಟ್ಟಿ ದ್ಯುಸ ತೆಜ಼ ತೆ ವ್ಹೈ; ತಿನೆ ಧರೊ ಕೈನ ಪೈಲಾಜ಼ ಕದ್ಯೊತೊ.

⁴⁹ ತೆಳಾಮಾಜ಼ ತೆ ಯೆಸುಕನ ಐನ, ಗುರು ನಮಸ್ಕಾರ ಕೈನ ತಿನೆ ಮಟ್ಟಿ ದಿದ್ಯೊ.

⁵⁰ ತೆಳಾಮಾ ಯೆಸು ತಿನೆ, ದೊಸ್ತ, ತು ಶಾನೆ ಆಯೊಸ ಕೈನ ಕದ್ಯೊ. ತ್ಯುನೆ ನಜಿಕ ಐನ ಯೆಸುನಾ ಉಪ್ಪರ ಹತ್ತ ಘಾಲಿನ ತಿನೆ ಧರ‍್ಯಾ.

⁵¹ ಯೆಸುನಾ ಕ್ಹಾತೆ ರ‍್ಹಯಲಮಾ ಯಕ್ಲೊ ಹತ್ತ ಚಾಚಿನ ತಿನು ಚಾಕು ಕಾಡಿನ ಮಹಾಯಾಜಕನಾ ಆಳನೆ ಮಾರಿನ ತಿನು ಕಾನ ಕತ್ರಿಪಡ್ಯೊ.

⁵² ತೆಳಾಮಾ ಯೆಸು ತಿನೆ, ತಾರು ಚಾಕು ಫರಿನ ಮ್ಯಾನಮಾ ಘಾಲ; ಚಾಕು ಧರ‍್ಯಲವಾಲಾ ಕ್ಹಾರಾ ಚಾಕಾಕ್ಹು ನಾಶ ಥಾವಸ.

⁵³ ಮಿ ಮಾರಾ ಬಾನೆ ಮಾಂಗಿ ನೈ ಲೆಸಕ್ತೊ ಸು, ಮಾಂಗಿಲಿದ್ಯೊಮ ತೆ ಮನೆ ಹಮ್ನಾಜ಼ ಬಾರಾ ಗುಂಪತೊಬಿ ಜಾಸ್ತ ಜ಼ನಾ ದೆವದುತೊ ನೈ ವಳಾತೊ ನೈ ಕೈನ ವಿಚಾರ ಕರ್ಶಿಸು?

⁵⁴ ವಳಾಯೊಮ ಮನೆ ಅಮ್ಮ ತಿಮ್ಮ ಥೌ ಕವಾನಾ ಶಾಸ್ತ್ರನಾ ವಾತೊ ಪುರಾ ಥಾವಾನುತಬಿ ಕಿಮ್ಮ ವ್ಹೈ? ಕೈನ ಕದ್ಯೊ.

⁵⁵ ತೆಜ಼ ಟೈಮಮಾ ಯೆಸು ಗುಂಪ ಥೈನ ಆಯಲ ಮನಕ್ಹೊನೆ, ಚ್ವಟ್ಟಾನೆ ಧರಾನೆ ಆಯೆ ಲಿಂಗತ ಚಾಕಾ ಗುಂಡಕಾ ಲಿನ ಮನೆ ಧರಾನಾಹುತಿ ಆಯಾಸ ಸು? ಮಿ ಹರ ದಿನ್ನ ದೆವಾಲಯಮಾ ಬೈಟಿನ ಬೊದನೆ ಕರ‍್ತಾಮಾ ತುಮೆ ಮನೆ ಧರ‍್ಯಾ ನೈತೊ.

⁵⁶ ತೆನೈಸೊ ಪ್ರವಾದಿಯೊ ಬರ್ದಲ ವಚನಾ ಪುರಾ ಥಯೆ ಲಿಂಗತ ಎ ಕ್ಹಾರು ಥಯು ಕೈನ ಕದ್ಯೊ. ತೆಳಾಮಾ ಕ್ಹಾರಾ ಶಿಶ್ಯಾ ತಿನೆ ಛೊಡಿನ ನ್ಹಾಟಿ ಗಯಾ.

ಯೆಸು ತ್ರಾಸ ಖಾದಲ

⁵⁷ ಯೆಸುನೆ ಧರಲವಾಲಾ ತಿನೆ ಮಹಾಯಾಜಕ ಥಯಲ ಕಾಯಫಕನ ಬಲೈಲಿನ ಗಯಾ, ತ್ಯಾ ಶಾಸ್ತ್ರಿಯೊ ಶಾನಾ ಮಳಿನ ಆಯಾತಾ.

⁵⁸ ತೆನೈಸೊ ಪೆತ್ರಾ ದುರತೊ ತಿನೆ ಪಾಚೊ಼ಲಾಗಿನ, ಮಹಾಯಾಜಕನಾ ಭವನನಾ ಅಂಗಳಾಮಾ ಮ್ಹೈ ಐನ ತಿನೆ ಸು ಥಾವಸ ದೆಕು ಕೈನ ಸೈನಿಕೊನಾ ಕ್ಹಾತೆ ಬೈಟ್ಯೊ.

⁵⁹ ತೆಳಾಮಾ ಕ್ಹಾಸ ಯಾಜಕೊ ಮ್ಹೊಟಿ ಸಬೆವಾಲಾ ಕ್ಹಾರಾ ಯೆಸುನೆ ಖಲಾಸ ಕರೌ ಕೈನ ತಿನಾ ಉಪ್ಪರ ಸುಳ್ಳ ಸಾಕ್ಷಿಯೊ ಹುಡಕ್ಯಾ; ತೆನೈಸೊ ಘನ್ನಾ ಜ಼ನಾ ಸುಳ್ಳ ಸಾಕ್ಷಿಯೊ ಅಗಾ ಆಯಾತಬಿ ಸುಜ಼ ಮಳ್ಯು ನೈ.

⁶⁰ ಪಾಚ಼ಲ್ತಾ ಬೆ ಜ಼ನಾ ಕ್ಹಾಮಾ ಐನ,

⁶¹ ಮಿ ಕ್ಹುದಾನಿ ಆಲಯ ಕೆಡಶಿನ ತನ್ನ ದಿನ್ನಮಾ ಫರಿನ ಭಾಂದಸಕುಸ ಕೈನ ‘ಎ ಮನಕ್ಹ ಕದ್ಯೊ’ ಕದ್ಯಾ;

⁶² ತೆಳಾಮಾ ಮಹಾಯಾಜಕ ಉಟಿನ ಹುಬ್ರೈನ, ತು ಸು ನೈ ಕತೊ ಸು? ಇವ್ನೆ ತಾರಾ ಉಪ್ಪರ ಘಾಲಾನಾ ಆರೊಪ ಕ್ಹರಿಜ಼ ವ್ಹೈ ಸು? ಕೈನ ತಿನೆ ಪುಚ್ಯೊ. ತೆನೈಸೊ ಯೆಸು ಗಪ್ಪ ಚುಪ್ಪ ವ್ಹತ್ತೊ.

⁶³ ಮಹಾಯಾಜಕ ಯೆಸುನೆ, ತುನೆ ಜಿವ್ತೊ ರ‍್ಹಯಲ ಕ್ಹುದಾನಾ ಉಪ್ಪರ ಖಮ್ಮ ಘಾಲಿನ ಪುಚ್ಚಾ಼ಡೊಸ; ತು ಕ್ಹುದಾನೊ ದಿಕ್ರೊ ಥಯಲ ಕ್ರಿಸ್ತ ರ‍್ಹಯೊಮ, ಹಮೊನೆ ಕೌ ಕೈನ ಕದ್ಯೊ.

⁶⁴ ಯೆಸು ತಿನು ಜವಾಬ ದಿನ, ತು ಕವಾಡೊಸ; ತೆನೈಸೊ ಮಿ ತುಮೊನೆ ಕವಾನು ಸುವೈ ಕದ್ಯಾಮ, ಇನಾ ಉಪ್ಪರ ಮನಕ್ಹನೊ ದಿಕ್ರೊ ಸರ್ವಶಕ್ತನಾ ಸಿದಾ ಬಗಲ ಬೈಟಲ ರ‍್ಹವಾನು, ಹಬಾಳನಾ ಉಪ್ಪರ ಬೈಟಿನ ಆವಾನು ದೆಕೊಶಿ ಕೈನ ಕದ್ಯೊ.

⁶⁵ ತೆಳಾಮಾ ಮಹಾಯಾಜಕ ತಿನಾ ವಣ್ಣಾ ಫಾಡಿಲಿನ, ಎ ಕ್ಹುದಾನಿ ದುಷಣೆನಾಹುತಿ ಬೊಲ್ಯೊಸ; ಹಮೊನೆ ಸಾಕ್ಷಿಯೊ ವರಿ ಶಾನೆ ಚಾ಼ಯೆ? ದೆಕೊ ಎ ಹಮ್ನಾ ಕದಲ ದುಷಣೆನಿ ವಾತ ಐಕ್ಯಾಸತೊ;

⁶⁶ ತುಮೊನೆ ಕಿಮ್ಮ ಲಾಗಸ? ಕತಾಮಾ, ಇ ಮರಣನಿ ಶಿಕ್ಷಾನೆ ಲಾಯಕ ವ್ಹೈ ಕೈನ ತ್ಯುನೆ ಉತ್ತರ ದಿದ್ಯಾ.

⁶⁷ ತೆಳಾಮಾ ತ್ಯುನೆ ತಿನಾ ಮ್ಹೊಡಾನಾ ಉಪ್ಪರ ಗುದ್ಯಾ; ದಕ್ಹಾ ಜ಼ನಾ ತಿನಾ ಗಾಲೆ ಮಾರಿನ,

⁶⁸ ಕ್ರಿಸ್ತ, ತುನೆ ಮಾರ‍್ಯಲವಾಲಾ ಕುನ್ನ ವ್ಹೈ? ಹಮೊನೆ ಪ್ರವಾದನೆ ಕೆ ಕದ್ಯಾ.

ಪೆತ್ರಾ ಯೆಸು ಮನೆ ಗ್ವತ್ತ ನತ್ತಿ ಕೈನ ಕದ್ಯಲ

⁶⁹ ತೆಳಾಮಾ ಪೆತ್ರಾ ಭಾರೊ ಅಂಗ್ಳಾಮಾ ಬೈಟ್ಯೊತೊ. ತ್ಯಾ ಯಕ್ಕ ದಾಸಿ ತಿಕನ ಐನ, ತುಬಿ ಗಲಿಲಾಯಮಾ ಯೆಸುನಾ ಕ್ಹಾತೆ ರ‍್ಹಯಲವಾಲೊ ವ್ಹೈನೈ ಕತಾಮಾ.

⁷⁰ ತೆ ಇನ್ಕಾರ ಕರಿನ, ತು ಕವಾಡೊಸ ಮನೆ ಗೊತ್ತ ನತ್ತಿ ಕೈನ ಕ್ಹಾರಾ ಜ಼ನಾವೊಕನ ಕದ್ಯೊ.

⁷¹ ತೆ ತ್ಯಾಂತ್ಯೊ ಬಾಕಲನ ಜಾ಼ತಾಮಾ ಹಜಿ಼ಯಕ್ಲಿ ದಾಸಿ ತಿನೆ ದೆಕಿನ ತ್ಯಾ ರ‍್ಹಯಲವಾಲಾವೊನೆ, ಆ ನಜ಼ರೆತನೊ ಯೆಸುನಾ ಕ್ಹಾತೆ ರ‍್ಹಯಲವಾಲೊ ವ್ಹೈ ಕೈನ ಕದಿ.

⁷² ತೆ ಫರಿನ ಇನ್ಕಾರ ಕರಿನ ಕ್ಹಮ್ಮ ಘಾಲಿನ, ತೆ ಮನಕ್ಹನೆ ಕುನ್ನ ವ್ಹೈ ಕವಾನು ಕೈನ ಕದ್ಯೊ.

⁷³ ದಕ್ಹೊ ಟೈಮ ಥಾತಾಮಾ ತ್ಯಾ ಹುಬ್ರೆಲವಾಲಾ ಕ್ಹಾಮಾ ಐನ ಪೆತ್ರಾನೆ, ನಿಶ್ಚಯಥೈನ ತುಬಿ ತ್ಯುನಾಮಾ ಯಕ್ಲೊ ವ್ಹೈ, ತಾರಿ ಜಾತ ತುನೆ ಗಲಿಲಾಯಲವಾಲೊ ವ್ಹೈ ಕೈನ ದೆಕ್ಲಾಡಿನ ದಿವಸ ಕೈನ ಕತಾಮಾ

⁷⁴ ತೆ, ಶಾಪ ಘಾಲ್ಲಿಲಿವಾನಾಹುತಿ ಶುರು ಕರಿನ ಕ್ಹಮ್ಮ ಘಾಲಿನ, ತೆ ಮನಕ್ಹ ಕುನ್ನ ವ್ಹೈ ಕವಾನು ಮೆ ಗ್ವತ್ತ ನತ್ತಿ. ಕೈನ ಕದ್ಯೊ. ತೆಳಾಮಾ ಕುಕ್ಡೊ ಬಾಂಗ ದಿದ್ಯೊ.

⁷⁵ ಪೆತ್ರಾನೆ ಯೆಸು, ಕುಕ್ಡೊ ಬಾಂಗ ಲಿವಾತಿ ಪೈಲಾಜ಼ ತನ್ನ ಸಲಾ ಮನೆ ಇನ್ಕಾರ ಕರಿನ ಕಸಿ ಕೈನ ಕದಲ ವಾತನೆ ಸ್ಹೆಂ ಕರಲಿನ ಭಾರಾ ಗೈನ ಘನ್ನೊ ದುಖ ಪಡ್ದಿನ ರೊಯೊ.