ಮತ್ತಾಯ 10 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಬಾರಾ ಅಪೊಸ್ತಲೊ

¹ ಯೆಸು ತಿನಾ ಬಾರಾ ಶಿಷ್ಯಾವೊನೆ ಬಲೈನ, ತ್ಯುನೊನೆ ಕೆಟ್ಟ ಆತ್ಮಾವೊನೆ ಛೊಡಾವಾನೆಬಿ ವರಿ ಕ್ಹಾರಾ ತರಾನಾ ರೊಗೊ ವರಿ ದುಕ್ಕೊನೆ ಅರಾಮ ಕರಾನೆ ಅದಿಕಾರ ದಿದ್ಯೊ.

² ಬಾರಾ ಜ಼ನಾ ಅಪೊಸ್ತಲೊನಾ ನಾಮೊ ಇಮ್ಮ ಛೆ: ಪೈಲಾರ ಪೆತ್ರಾ ಕವೈಲಿವಾಲೊ ಸಿಮೊನ, ತಿನೊ ಭೈ ಥಯಲ ಅಂದ್ರೆಯ, ಜೆಬೆದಾಯನೊ ದಿಕ್ರೊ ಥಯಲ ಯಾಕೊಬ, ತಿನೊ ನ್ಹಾನೊ ಭೈ ಥಯಲ ಯೊಹಾನ,

³ ಫಿಲಿಪ್ಪ ವರಿ ಬಾರ್ತೊಲೊಮಾಯ, ತೊಮ, ಭು ಭಾಡೊ ಲಿವಾಲೊ ಮತ್ತಾಯ, ಅಲ್ಫಾಯನೊ ದಿಕ್ರೊ ಥಯಲ ಯಾಕೊಬ, ತದ್ದಾಯ,

⁴ ಯಹುದಿಯೊನಾ ರಾಜಕಿಯ ಪಕ್ಷನೆ ಮಳಲ ಸಿಮೊನ, ಯೆಸುನೆ ಧರಿನ ದಿದಲ ಇಸ್ಕರಿಯೊತ ಯುದ, ಇವುನೆಜ.

ಬಾರಾ ಅಪೊಸ್ತಲೊನಿ ಗುರಿ

⁵ ಯೆಸು ಎ ಬಾರಾ ಅಪೊಸ್ತಲೊನೆ ದಕ್ಹಾ ಆಗನ್ಯಾ ದಿನ ಪರಲೊಕ ರಾಜ್ಯನಾ ಹುತಿ ತಿಳಸಾವಾನೆ ತ್ಯುನೊನೆ ವಳಾಯೊ. ಯೆಸು ತ್ಯುನೊನೆ ಕದಲ ಸು ವ್ಹೈ ಕದ್ಯಾಮ: ಯೆಹುದ್ಯೊ ನೈ ರ‍್ಹಯಲ ಮನಕ್ಹೊಕನ ರ‍್ಹವಾದೆ ಸಮಾರ್ಯವಾಲಾ ರ‍್ಹಯಲ ಕಯಾಬಿ ಗಾಮೊನೆ ಜಾ಼ವೊ ನಕೊ.

⁶ ತೆನೈಸೊ ತ್ಯುನೊಕ್ಹು ಚುಕೈಲಿನ ಬಕ್ರಾವೊಲಿಂಗತ ರ‍್ಹಯಲ ಇಸ್ರಾಯೆಲರೊಕನ ಜಾ಼ವೊ,

⁷ ಪರಲೊಕ ರಾಜ್ಯ ಭೆಗಿನ ಅವಸ ಕೈನ ಭೊದನೆ ಕರೊ.

⁸ ರೊಗಿಯೊನೆ ಅರಾಮ ಕರೊ. ಮರಲವಾಲಾವೊನೆ ವಚಾ಼ಡೊ. ಕುಷ್ಠರೊಗಿಯೊನೆ ಅರಾಮ ಕರೊ. ಮನಕ್ಹೊನೆ ಭುತ್ಡಾವೊಕ್ಹು ಛೊಡಾವೊ. ಮಿ ತುಮೊನೆ ಎ ಅದಿಕಾರೊ ಫ್ರಿಮಾ ದ್ಯುಸ. ತಿನಾಹುತಿ ಬಿಜಾವೊನೆಬಿ ಫ್ರಿಮಾ ಮದತ ಕರೊ.

⁹ ತುಮಾರಾ ಕ್ಹಾತೆ ದೊಕ್ಡಾ ರ‍್ಹವಾದೆ ತಾಂಬು, ಕ್ಹೊನು ರುಪ್ಪು ರ‍್ಹವಾದೆ ಲಿಂಜಾವೊ ನಕೊ.

¹⁰ ಕೊತಳಾ ರ‍್ಹವಾದೆ ಹೆಚ್ಕಿ ವಣ್ಣಾ ರ‍್ಹವಾದೆ ಚಪ್ಲೊ ರ‍್ಹವಾದೆ ಉರುಗೊಲು ರ‍್ಹವಾದೆ ಲಿಂಜಾ಼ವೊ ನಕೊ. ಕಾಮ ಕರಾಲಾನೆ ಚಾ಼ಯೆ ಥಯಲ ದಿವಸ.

¹¹ ತುಮೆ ಕಯಾಬಿ ಗಾಮಮಾ ಗಯಲ ಟೈಮಮಾ ತ್ಯಾ ರ‍್ಹವಾನಾ ಚೊ಼ಕಾ ಮನಕ್ಹನೆ ವಳಕೊ, ತುಮೆ ತೆ ಗಾಮ ಛೊಡಿನ ಜಾ಼ಯೆಲಕ್ಕಾ ತಿನಾ ಘರಮಾ ರ‍್ಹವೊ.

¹² ತೆ ಘರಮಾ ತುಮೆ ಗಯಲ್ಪರ, ‘ತುಮೊನೆ ಚೊ಼ಕು ಥಾವಾದೆ ಕೈನ ಕವೊ.

¹³ ತೆ ಘರಮಾ ರ‍್ಹವಾಲಾ ಮನಕ್ಹೊ ತುಮೊನೆ ಮಳೈಲಿದ್ಯಾಮ ತುಮಾರಾ ಆಶಿರ್ವಾದನೆ ತ್ಯುನೆ ಯೊದ್ಯ ರ‍್ಹಯಲಕ್ಹು ತೆ ಆಶಿರ್ವಾದ ತ್ಯುನೊನೆ ಮಳಾದೆ. ತ್ಯುನೆ ತುಮೊನೆ ನೈ ಮಳೈಲಿದ್ಯಾಮ, ತುಮಾರಿ ಆಶಿರ್ವಾದ ತುಮೊನೆ ವಾಪಸ ಆವಾದೆ.

¹⁴ ಯಕ್ಕ ಘರವಾಲಾ ನೈತೊ ಯಕ್ಕ ಗಾಮವಾಲಾ ತುಮೊನೆ ನೈ ಮಳೈಲಿದ್ಯಾಮ ತ್ಯುನೆ ತುಮಾರಿ ವಾತ ನೈ ಐಕ್ಯಾಮ ತುಮೆ ತೆ ಜ಼ಗಾನೆ ಛೊಡಿನ ಜಾ಼ತಾಮಾ, ತುಮಾರಾ ಪಗೆ ಲಾಗಲ ಧುಳ ಝಾಡ್ಸಿ ಪಾಡೊ.

¹⁵ ಫೈಸಲಾನಾ ದಿನ್ನಮಾ ಎ ಗಾಮನಿ ಗತಿ ಸೊದೊಮ ವರಿ ಗೊಮೊರತಿಬಿ ಘನ್ನಿ ಕೆಟ್ಟ ಥಾವಸ ಕೈನ ಮಿ ತುಮೊನೆ ಕ್ಹರಿಮಾಜ಼ ಕೌಸ.

ಅಗು ಆವಾನು ತ್ರಾಸ

¹⁶ ಐಕೊ! ನರಿಯೊನಾ ವಚ್ಮಾ ಬಕ್ರಾವೊನೆ ಛೊಡಲ ಲಿಂಗತ ಮಿ ತುಮೊನೆ ವಳಾವಾಡೊಸ. ತಿನಾಹುತಿ ತುಮೆ ಕ್ಹಾಪೊ ಲಿಂಗತ ಹುಶಾರ ಕ್ಹಬುತರ ಲಿಂಗತ ಕಪಟ ನೈಸೊವಾಲಾ ಥೈನ ರ‍್ಹವೊ.

¹⁷ ಮನಕ್ಹೊನಾ ಹುತಿ ಹುಶಾರ ರ‍್ಹವೊ ತುಮೊನೆ ತ್ಯುನೆ ಧರಿಲಿನ ನ್ಯಾಯಾಲಯನೆ ಬಲೈಲಿನ ಜಾ಼ವಸ. ತ್ಯುನೆ ತ್ಯುನಾ ಸಭಾಮಂದಿರೊಮಾ ಬಾರಕೊಲೊಕ್ಹು ಮಾರಸ.

¹⁸ ತುಮೊನೆ ಅದಿಕಾರಿಯೊನಾ ಕ್ಹಾಮಾ ರಾಜಾ಼ವೊನಾ ಕ್ಹಾಮಾ ಬಲೈಲಿನ ಜಾ಼ವಸ. ಮಾರಾ ಹುತಿ ಮನಕ್ಹೊ ತುಮೊನೆ ಇಮ್ಮ ಕರಸ. ತೆನೈಸೊ ತುಮೆ ತೆ ರಾಜಾ಼ವೊನೆಬಿ ಅದಿಕಾರಿಯೊನೆಬಿ ಯಹುದಿಯೊ ತೆ ಮನಕ್ಹೊನೆ ಮಾರಾ ವಿಶಯಮಾ ಕವೊಶಿ.

¹⁹ ತುಮೊನೆ ಧರಿಲಿನ ಗಯಲ್ಪರ ತುಮೆ ಸು ಬೊಲು, ಕಿಮ್ಮ ಬೊಲು ಕವಾನು ಚಿಂತಾ ನಕೊ ಕರೊ. ತುಮೆ ಕವಾನು ತೆ ಟೈಮಮಾ ಕವಾಲಗಾಡಸ.

²⁰ ಬೊಲಾಲಾ ಕ್ಹರಿಮಾಜ಼ ತುಮೆ ನ್ಹವೈ. ತುಮಾರಾ ಬಾನಿ ಆತ್ಮಾಜ಼ ತುಮಾರಾ ಮುಲಕ ಬೊಲಸ.

²¹ ಭಾಯೊ ಸ್ವಂತ ಭಾಯೊನೆಜ಼ ವಿರುದ ಥೈನ ತ್ಯುನೊನೆ ಮರಣನಿ ಸಜಾನೆ ವಪ್ಪಿಸಾವಸ. ಬಾವೊ ತ್ಯುನಾ ಸ್ವಂತ ಬಚ್ಚಾವೊನೆ ವಿರುದ್ದ ಥೈನ ತ್ಯುನೊನೆ ಮರಾನಿ ಸಜಾನೆ ವಪ್ಪಿಸಸ.

²² ತುಮೆ ಮಾರಾ ಪಾಚಾ಼ ಆವಾಕ್ಹು ಕ್ಹಾರಾ ಮನಕ್ಹೊ ತುಮೊನೆ ದ್ವೆಶ ಕರಸ. ತೆನೈಸೊ ಲಾಸ್ಟ ಲಕ್ಕಾ ತಡ್ದಿಲಿವಾಲೊ ರಕ್ಷಣೆ ವ್ಹಂದಿಲಿವಸ.

²³ ಯಕ್ಕ ಗಾಮಮಾ ತುಮೊನೆ ತ್ರಾಸ ಕರ‍್ಯಾಮ ಬಿಜಾ಼ ಗಾಮೆ ಜಾವೊ. ಮನಕ್ಹನೊ ದಿಕ್ರೊ ಫರಿನ ಆವಾತಿ ಪೈಲಾ ತುಮೆ ಇಸ್ರಾಯೆಲನಾ ಕ್ಹಾರಾ ಗಾಮೊನೆ ಜಾ಼ವಾನು ಕ್ಹಾರಾಯೆಲಜ಼ ನೈ ರ‍್ಹತಾ ಕೈನ ಮಿ ತುಮೊನೆ ಕ್ಹರಿ ಕೌಸ.

²⁴ ಶಿಷ್ಯೊ ಗುರುತಿ ಹೆಚ್ಕಿ ನ್ಹವೈ. ಆಳ ತಿನಾ ಮಾಲಕತಿ ಕ್ಹಾಸ ನ್ಹವೈ.

²⁵ ಶಿಷ್ಯೊ ತಿನಾ ಗುರು ಲಿಂಗತ ಥಯೊಮ ಬಸ್ಸ. ಆಳ ತಿನಾ ಮಾಲಕ ಲಿಂಗತ ಥಯೊಮ ಬಸ್ಸ. ಘರನಾ ಮ್ಹೊಟಾನೆ ಬೆಲ್ಜೆಬುಲ (ಭುತಡು) ಕೈನ ಬಲಾಯಾಮ, ತೆ ಘರವಾಲಾವೊನಾ ಬಿಜಾ಼ವೊನೆ ವರಿ ದಕ್ಹಾ ಕೆಟ್ಟ ನಾಮೊಕ್ಹು ಬಲಾತಾ ನೈ ಸು?

ಕಿನೆ ಭುಚ್ಕು಼

²⁶ ತಿನಾಹುತಿ ಮನಕ್ಹೊನೆ ಭುಚ಼ಕೊ ನಕೊ. ಝಕಾಯಲ ಕ್ಹಾರು ಭಾರು ಆವಸ. ದಡಿ ರ‍್ಹಯಲ ಹರಿಯಕ್ಕ ವಾತ ಭಾರು ಆವಸ.

²⁷ ಮಿ ಅಂದಾರಾಮಾ ಎ ವಾತೊ ತುಮೊನೆ ಝಾಕಿನ ಕವಾಡೊಸ. ತೆನೈಸೊ ತುಮೆ ಎ ವಾತೊ ಉಜಾಲಾಮಾ ಕೌ ಕೈನ ಮಾರಿ ಆಸ ವ್ಹೈ. ಮಿ ತುಮೊನೆ ಎ ವಿಶಯೊ ತುಮೊನೆ ಹಲ್ಲು ಕವಾಡೊಸ. ತೆನೈಸೊ ತುಮೆ ಎ ವಿಶಯೊ ಕ್ಹಾರಾ ಮನಕ್ಹೊನೆ ಜೊ಼ರ ವದ್ರಿನ ಕವೊ.

²⁸ ಮನಕ್ಹನೆ ಭುಚ಼ಕೊ ನಕೊ. ತ್ಯುನೆ ತುಮಾರು ಅಂಗ ಯಕ್ಕಜ಼ ಖಲಾಸ ಕರಸ. ತೆ ಮನಕ್ಹೊ ಆತ್ಮಾನೆ ಖಲಾಸ ನೈ ಕರ್ತಾ. ಅಂಗನೆ ವರಿ ಆತ್ಮಾನೆ ನರಕಮಾ ಘಾಲಾಲಾ ಕ್ಹುದಾನೆ ಯಕ್ಕಜ಼ ಭುಚ಼ಕೊ.

²⁹ ಬಾಜ಼ರೊಮಾ ಬೆ ಚಿಮ್ಣಿಯೊನೆ ಯಕ್ಕ ಬಿಲ್ಲಾನೆ ಇಕ್ಕಸ. ತೆನೈಸೊ ತುಮಾರೊ ಬಾ ಅಪ್ಪಣೆ ದಿದ್ಯಾ ಬಗರ ತ್ಯುನೊಮಾ ಯಕ್ಕಬಿ ನೈ ಮರ್ತು.

³⁰ ತುಮಾರಾ ಮಾತಾಮಾ ಕಕ್ಲಾ ಬಾಲೊ ಛೆ ಕವಾನುಬಿ ಕ್ಹುದಾನೆ ಗ್ವತ್ತ ಛೆ.

³¹ ತಿನಾಹುತಿ ಭುಚ಼ಕೊ ನಕೊ. ತುಮೆ ಘನ್ನಾ ಚಿಮ್ಣಿಯೊತಿಬಿ ಘನ್ನಾ ಕಿಮ್ಮತನಾ ಥಯಾಸ.

ಯೆಸುಪರ ಬರೊಕ್ಹೊ

³² ಯಕ್ಲೊ ಬಿಜಾ಼ವೊನಾ ಕ್ಹಾಮೊ, ತೆ ಮಾರೊ ವ್ಹೈ ಕೈನ ಕದ್ಯೊಮ, ಮಿಬಿ ಪರಲೊಕಮಾ ರ‍್ಹಯಲ ಮಾರಾ ಬಾನಾ ಕ್ಹಾಮೊ ತೆ ಮಾರೊ ವ್ಹೈ ಕೈನ ಕೌಸ.

³³ ತೆನೈಸೊ ಯಕ್ಲೊ ಮನಕ್ಹೊನಾ ಕ್ಹಾಮೊ, ತೆ ಮಾರೊ ನ್ಹವೈ ಕೈನ ಕದ್ಯೊಮ, ಮಿಬಿ ಪರಲೊಕಮಾ ಮಾರಾ ಬಾನಾ ಕ್ಹಾಮೊ ತೆ ಮಾರೊ ನ್ಹವೈ ಕೈನ ಕೌಸ.

ಯೆಸುನಾ ಪಾಚಾ಼ ಆವಾಲಾವೊನೆ ತ್ರಾಸ ಆವಸ

³⁴ "ಎ ದುನಿಯಾಮಾ ಮಿ ಶಾಂತ ಕರಾನೆ ಆಯೊಸ ಕೈನ ವಿಚಾರ ಕರೊ ನಕೊ. ಮಿ ಶಾಂತ ಕರಾನೆ ಆಯೊ ನತ್ತಿ, ತಲ್ವಾರ ಘಾಲಾನೆ ಆಯೊಸ.

³⁵ ಕಿಮ್ಮ ಕದ್ಯಾಮ ದಿಕ್ರಾನೆಬಿ ಬಾನೆ, ದಿಕ್ರಿನೆಬಿ ಮಾನೆ, ಫೈನೆಬಿ ವ್ಹೌನೆಬಿ ಬೆದ-ಭಾವ ಹುಟ್ಸಾವಾನೆ ಆಯೊಸ.

³⁶ ಇಮ್ಮ ಯಕ್ಕ ಮನಕ್ಹನೆ ತ್ಯುನಾ ಘರವಾಲಾಜ಼ ದುಶ್ಮನೊ ಥಾವಸ.

³⁷ ಬಾಪನಾ ಉಪ್ಪರ ರ‍್ಹವಾದೆ ಮಾನಾ ಉಪ್ಪರ ರ‍್ಹವಾದೆ ಮಾರಾ ಉಪ್ಪರ ಮ್ಹೆಲಾತಿ ಜಾಸ್ತ ಮಯಾ ಕರಾಲೊ ಮನೆ ಯೊಗ್ಯ ನತ್ತಿ; ದಿಕ್ರಾನಾ ಉಪ್ಪರ ರ‍್ಹವಾದೆ ದಿಕ್ರಿನಾ ಉಪ್ಪರ ರ‍್ಹವಾದೆ ಮಾರಾ ಉಪ್ಪರ ಮ್ಹೆಲಾತಿ ಜಾಸ್ತ ಮಯಾ ಕರಾಲೊ ಮನೆ ಯೊಗ್ಯ ನತ್ತಿ.

³⁸ ಕುನ್ನತಬಿ ಮಾರಾ ಪಾಚೊ಼ ಆತಾಮಾ ತಿನೆ ದಿವಾನಿ ಶಿಲುವಿ (ತ್ರಾಸೊ) ಉಚೈಲಿದ್ಯಾ ಬಗರ, ತೆ ಮಾರಾ ಪಾಚೊ಼ ಆವಾಲೊ ನ್ಹವೈ.

³⁹ ಮನೆ ಮಯಾ ಕರಾತಿ ಜಾಸ್ತ ತಿನಾ ಜಲಮನೆ ಮಯಾ ಕರಾಲೊ ತಿನೆ ಜವೈಲಿವಸ. ಮಾರಾಹುತಿ ತಿನು ಜ಼ಲಮ ಜವೈಲಿವಾಲೊ ತಿನೆ ಪಡ್ದಿಲಿವಸ.

ಪ್ರತಿಫಲ

⁴⁰ ತುಮೊನೆ ಮಳೈ ಲಿವಾಲೊ ಮನೆಬಿ ಮಳೈ ಲಿವಸ. ಮನೆ ಮಳೈ ಲಿವಾಲೊ ಮನೆ ವಳಾಯಲವಾಲಾನೆ (ಕ್ಹುದಾನೆ) ಬಿ ಮಳೈ ಲಿವಸ.

⁴¹ ಪ್ರವಾದಿನೆ ಪ್ರವಾದಿ ವ್ಹೈ ಕೈನ ಮಳೈಲಿವಾಲೊ ತೆ ಪ್ರವಾದಿನೆ ಆವಾನು ಪ್ರತಿಫಲ ಪಡ್ದಿಲಿವಸ. ನಿತಿವಂತವಾಲಾನೆ ನಿತಿವಂತ ವ್ಹೈ ಕೈನ ಮಳೈಲಿವಾಲೊ ತೆ ನಿತಿವಂತನೆ ಆವಾನು ಪ್ರತಿಫಲ ಪಡ್ದಿಲಿವಸ.

⁴² ವರಿ ಎ ನ್ಹಾನಾವೊಮಾ ಯಕ್ಲಾನೆ ಯೆಸುನೊ ಶಿಷ್ಯಾ ವ್ಹೈ ಕೈನ ಕುನ್ನತಬಿ ಯಕ್ಕ ತಾಂಬಿಯೊ ಥಂಡು ಪಾನಿತುಬಿ ಪಿವಾನೆ ದಿದ್ಯೊಮ ತಿನೆ ಆವಾನು ಪ್ರತಿಫಲ ತಿನೆ ಚು಼ಕ್ತೊಜ಼ ನೈ ಕೈನ ತುಮೊನೆ ಕ್ಹರಿಮಾಜ಼ ಕೌಸ” ಕದ್ಯೊ.