ಯಾಕೊಬ 4 - ಕ್ಹುದಾನಿ ಕ್ಹರಿನಿ ವಾಕ್ಯಾ

¹ ತುಮೊಮಾ ಲಡೈಯ್ಯೊ, ಕಿತ್ತಾನು ಕಿಜಾ಼ಂತು ಆವಸ? ತುಮಾರಾ ಇಂದ್ರಿಯೊಕ್ಹು ಆವಾನು ಹೊರಾಡಾನಾ ವಿಚಾರೊಕ್ಹು ಘನ್ನಿ ಆಸಕ್ಹು ಆವಸ.

² ತುಮೆ ಆಸ ಕರಲ ಪಡ್ದಿಲಿದ್ಯಾ ನತ್ತಿ. ತುಮೆ ಖಲಾಸ ಕರ‍್ಯಾತಬಿ, ಸಂಗಟ ಘಾಲಿಲಿದ್ಯಾತಬಿ ಆಸ ಕರಲ ಲಿದ್ಯಾವಾಚಿ ಛೆ; ತುಮೆ ಕಿತ್ತಾ - ಕಿತ್ತ ಕರೊಶಿ, ಲಡೈ ಕರೊಶಿ. ತೆನೈಸೊ ತುಮೆ ಕ್ಹುದಾಕನ ನೈ ಮಾಂಗಿಲಿದಲಕ್ಹು ತುಮೊನೆ ಸುಜ಼ ಲಿವಾನೆ ಥಾವಾಡು ನತ್ತಿ.

³ ತುಮೆ ಮಾಂಗಿಲಿದ್ಯಾತಬಿ ಮಾಂಗಿಲಿದಲ ತುಮಾರಾ ದುನಿಯಾಮಾನಿ ಆಸನಾ ಹುತಿ ಕೆಟ್ಟ ಉಪಯೊಗ ಕರಿಲ್ಯು ಕವಾನಿ ಕೆಟ್ಟ ಉದ್ದೆಶಕ್ಹು ಮಾಂಗಿಲಿವಾನಾ ಹುತಿ ತುಮೊನೆ ಮಳಾಡು ನತ್ತಿ.

⁴ ವ್ಯಭಿಚಾರಿಯೊ, ಎ ದುನಿಯಾನಿ ದೊಸ್ತಿ ಕ್ಹುದಾನೆ ದುಶ್ಮನ ವ್ಹೈ ಕವಾನು ತುಮೊನೆ ಗ್ವತ್ತ ನತ್ತಿ ಸು? ತಿನಾಹುತಿ ದುನಿಯಾನೆ ದೊಸ್ತ ಥೈನ ರ‍್ಹೌಸ ಕವಾಲೊ ತಿನೆ ಕ್ಹುದಾನೊ ವಿರೊದಿ ಥೈನ ಕರಿಲಿವಸ.

⁵ ಕ್ಹುದಾ ಅಪೊಮಾ ಮ್ಹೆಲಾನಿ ಪವಿತ್ರ ಆತ್ಮಾ ಅಭಿಮಾನ ಆಸನಾ ಕ್ಹಾತೆ ಅಪ್ನಾಹುತಿ ಆಸ ಕರಸ ಕವಾನಿ ವಾತ ಸುಳ್ಳ ವ್ಹೈ ಕೈನ ಪವಿತ್ರ ಗ್ರಂಥ ಕವಸ ಕೈನ ತಿಳ್ದಿಲಿವೊ ನಕೊ.

⁶ ತೆ ಅಪೊನೆ ಘನ್ನಿ ಕೃಪಾ ದಿವಸ. ತಿನಾಹುತಿ, ಕ್ಹುದಾ ಅಹಂಕಾರಿಯೊನೆ ವಿರುದ್ದ ಥಯೊಸ, ದಿನ ರ‍್ಹಯಲವಾಲಾವೊನೆ ಕೃಪಾ ದಿವಸ ಕೈನ ಧರಮಶಾಸ್ತ್ರ ಕವಸ.

⁷ ಇಮ್ಮ ರ‍್ಹತಾಮಾ ಕ್ಹುದಾನೆ ಅದಿನ ಥೈನ ರ‍್ಹೈನ ಸೈತಾನನೆ ಭುಚ್ಕಾಡೊ, ತೆಳಾಮಾ ತೆ ತುಮೊನೆ ಛೊಡಿನ ನ್ಹಾಟಿ ಜಾ಼ವಸ.

⁸ ಕ್ಹುದಾನಾ ನಜಿಕ ಆವೊ, ತೆಳಾಮಾ ತೆ ತುಮಾರಾ ನಜಿಕ ಆವಸ. ಪಾಪಿಯೊ, ತುಮಾರಾ ಹತೊ ಶುದ್ದ ಕರಿಲಿವೊ; ಬೆ ಮನಸೊ ರ‍್ಹಯಲವಾಲಾ, ತುಮಾರಾ ಮನಸೊ ಚೊ಼ಕಾ ಕರಿಲಿವೊ.

⁹ ದುಖ ಥಾವೊ, ಗೊಳಾಡೊ, ಡೊಳಾಮಾನು ಪಾನಿ ಕಾಡೊ; ತುಮಾರು ಅಕ್ಹಾನು ಛೊಡಿನ ಪ್ರಭುನಿ ಕೃಪಾನಾ ಹುತಿ ಗೊಳಾಡಿನ ಮಾಂಗಿಲಿವೊ. ತುಮಾರಿ ಲೌಕಿಕ ಕ್ಹುಶಿನೆ ಛೊಡಿನ ಪ್ರಭುನೆ ಪಡ್ದಿಲಿವಾನು ಕೊಶಿಶ ಕರೊ.

¹⁰ ಪ್ರಭುನಾ ಕ್ಹಾಮಾ ತುಮೊನೆ ತುಮೆ ತಗಸಿಲಿವೊ; ತೆ ತುಮೊನೆ ಉಪ್ಪರ ಉಚಾವಸ.

¹¹ ಭಾಯೊ ವರಿ ಭೆನೊ, ಯಕ್ಕನೆ ಯಕ್ಕ ದುಖ ಕರೊ ನಕೊ. ಕುನ್ನತುಬಿ ತಿನಾ ಭೈನೆ ದುಖ ಕರ‍್ಯಾಮ ನೈತೊ ತಿನಾ ಭೈನಾ ವಿಷಯನಾ ಹುತಿ ತಿರ್ಪ ಕರ‍್ಯೊಮ ತೆ ಧರಮಶಾಸ್ತ್ರನೆ ದುಖ ಕರಿನ ಧರಮಶಾಸ್ತ್ರನಾ ವಿಷಯಮಾ ತಿರ್ಪ ಕರಲ ಲಿಂಗತ ಥಾವಸ. ತೆನೈಸೊ ತು ಧರಮಶಾಸ್ತ್ರನಾ ವಿಷಯಮಾ ತಿರ್ಪ ಕರ‍್ಯೊಮ ತು ನ್ಯಾಯಾದಿಪತಿ ವ್ಹೈ ಕೈನ ಕವೈಲೆಶಿ ತೆನೈಸೊ ತಿನೆ ಚಾ಼ಲಿನ ಜಾ಼ವಾಲೊ ಥಾತೊ ನೈ.

¹² ಧರಮಶಾಸ್ತ್ರ ದಿದಲ ನ್ಯಾಯಾದಿಪತಿ ಯಕ್ಕಜ಼ ವ್ಹೈ; ತೆಜ಼ ವಚಾ಼ಡಾನೆಬಿ ವರಿ ನಾಶ ಕರಾನೆಬಿ ತಾಕತವಾಲೊ ವ್ಹೈ. ಇಮ್ಮ ರ‍್ಹತಾಮಾ ತಾರಾ ಬಾಜು಼ನಾ ಮನಕ್ಹನಾ ವಿಷಯಮಾ ತಿರ್ಪ ಕರಾನೆ ತು ಕುನ್ನ ವ್ಹೈ?

¹³ ಹಮ್ನಾ ನೈತೊ ವಂತಾ ಅಪೆ ಹೆವಾ ಗಾಮೆ ಗೈನ ತ್ಯಾ ಯಕ್ಕ ವರಕ್ಹ ರ‍್ಹೈನ ವ್ಯಾಪಾರ ಕರಿನ ಫೈದೊ ಕರಿಲಿಯೆಸ ಕವಾಲಾ ಐಕೊ.

¹⁴ ವಂತಾ ಸು ಥಾವಸ ಕವಾನು ತುಮೊನೆ ಗ್ವತ್ತ ನತ್ತಿ. ತುಮಾರಿ ಜಿವ್ನಾ ಕೆವಿ ವ್ಹೈ? ತುಮೆ ದಕ್ಹಿಯೆಳ ದಿಕ್ಹಿನ ಪಾಚ಼ಲ್ತಾ ನೈ ದಿಕ್ಹಾನಿ ಠಾರ ಲಿಂಗತ ಥಯಾಸ.

¹⁵ ತಿನಾಹುತಿ ತುಮೆ ತ್ಯವಾ ವಾತೊ ಛೊಡಿನ ಕ್ಹುದಾನಿ ಚಿತ್ತ ರ‍್ಹಯುಮ ಅಪೆ ಜಿವ್ತಾ ರ‍್ಹೈನ ಎ ಕಾಮ ರ‍್ಹವಾದೆ ತೆ ಕಾಮ ರ‍್ಹವಾದೆ ಕರ ಸಕೆಸ ಕೈನ ಕೌ.

¹⁶ ತೆನೈಸೊ ತುಮೆ ತುಮಾರಾ ಅಹಂಕಾರಕ್ಹು ತುಮಾರಾಹುತಿ ಹೊಗಳಿ ಲಿವಾಡಾಸ. ತ್ಯವಿ ಹೊಗಳಕಿ ಕ್ಹಾರಿ ಕ್ಹುದಾನಾ ಕ್ಹಾಮಿ ಕೆಟ್ಟಜ಼ ವ್ಹೈ.

¹⁷ ಇಮ್ಮ ರ‍್ಹಯಲಕ್ಹು ಚೊ಼ಕು ಕರು ಕವಾನು ಗ್ವತ್ತ ರ‍್ಹಯುತಬಿ ತೆ ನೈ ಕರಾಲೊ ಪಾಪ-ಪಾಪ ಕರಾಲೊ ಥಯೊಸ.