ಅಪೊಸ್ತಲೊ 28 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಪೌಲಾ ಮೆಲಿತೆ ದ್ವಿಪಮಾ

¹ ಹಮ್ಮೆ ಸುರಕ್ಷಿತಕ್ಹು ದಂಡಿ ಮುಟ್ಟೆಲಪರ, ತೆ ಉಪರತೊ ದಿವೊ ಉತರಿನ ಆಯೊ.

² ಬಿಜಾ಼ವಾತೊನಾ ತೆ ದ್ವಿಪವಾಲಾ ಹಮೊನೆ ವಿಶೆಷ ಸನಾಹುಬುತಿ ದೆಕಾಡ್ಯಾ. ತೆಳಾಮಾಜ಼ ಪಾನಿ ಐನ ಥಂಡ ಲಾಗಾಕ್ಹು, ತ್ಯುನೆ ಆಗ ಲಗಾಡಿನ ಹಮೊನೆ ಕ್ಹಾರಾ ಜ಼ನಾವೊನೆ ಮಳೆಲಿದ್ಯಾ.

³ ಪೌಲಾ ಯಕ್ಕ ಗುಂಪ ಲಾಕ್ಡಾ ಮಳೈನ,ಲೈನ ತೆ ಆಗಮ್ಮಾ ಘಾಲಕ್ಹು, ತೆ ಕೌವಕ್ಹು ಯಕ್ಕ ಕ್ಹಾಪ ಭಾರು ಐನ, ತಿನಾ ಹತೆ ಘಟ್ಟ ಧರಲಿದ್ಯುತು.

⁴ ತೆ ತಿನಾ ಹತತೊ ಜೊತಾಡುನು ದ್ವಿಪವಾಲಾ ದೆಕಿನ ; ತೆ ಮನಕ್ಹೊನೆ ಖಲಾಸ ಕರಾವಾಲೊ ವ್ಹೈ ಕದ್ಯಾ. ಸಮುಂದರ ಕಂತಾ ತಪಸಿನ ಆಯಾ ಫೈಸ್ಲಾನಿ ದೆತಾ ತ್ಯುನೊನೆ ವಾಚಾನೆ ನೈದೆತಿ ಕೈನ ತ್ಯುನಾ ತ್ಯುನಾಮ್ಮಾ ಬೊಲಿದ್ಯಾ.

⁵ ತೆನೈಸೊ ಪೌಲಾ ಕ್ಹಾಪನೆ ಆಗಮ್ಮಾ ನಾಕಿ ಪಾಡ್ಯೊ; ತಿನೆ ಸುಜ಼ ಅಪಾಯ ಥನೈ.

⁶ ತ್ಯುನೆ ; ತಿನು ಅಂಗ ಹಮ್ಮನಾ ಫುಗಸ, ತೆನೈಸೊ ತೆ ಗಪಕ್ನೆ ಮರಿ ಪಡಸ ಕೈನ ತ್ಯುನೆ ಕಾಯಿದಾಡಾತ್ತಾ ಕೆಕಲಿಕೆ ತ್ಯುನೆ ಕಾಯಿದಾಡಾತ್ತಾ. ತಿನೆ ಸುಜ಼ ಹಾನಿ ಥಯು ನೈ. ತೆ ದೆಕಿನ ತ್ಯುನೆ ತ್ಯುನೆ ವಿಚಾರ ಬದಲಿನ ತೆ ಯಕ್ಲೊ ಕ್ಹುದಾ ಕೈನ ಕಲಿದ್ಯಾ.

⁷ ತೆ ದ್ವಿಪನೊ ಖಾಸ ಥಯಲ ಪೊಪ್ಲಿನಾ ಕ್ಹೆತರೊ ಮಿ ರಹೆಲ ಜ಼ಗಾಮಾ ನಜಿಕಮ್ಮಾ ವ್ಹತ್ತಾ. ತೆ ಹಮನೊನೆ ಸ್ವಾಗತ ಕರಿನ ತನ್ನ ದಿನ ತಕ್ಕಾ ಘನ್ನಾ ಇಜತ್ತಕ್ಹು ವರಿ ಮರ್ಯಾದಿ ದಿದ್ಯಾ.

⁸ ತ್ಯುನೊ ಬಾಪ ತೌಕ್ಹು ವರಿ ರಕ್ತಬೆದಿಕ್ಹು ವಚಾನು ಧರ‍್ಯೊತೊ. ಪೌಲಾ ತಿಕನ ಗೈನ ಪ್ರಾರ್ಥಾನಾ ಕರಿನ ತಿನಾ ಹತೊ ಮ್ಹೆಲಿನ ತಿನೆ ಅರಾಮ ಕರ‍್ಯೊ.

⁹ ತೆ ಥಹೆಲ ಪರ ತೆ ದ್ವಿಪಮ್ಮಾ ಉಗರೆಲ ರೊಗಿಯೊ ಪೌಲಾ ಕನ ಐನ ಆರಾಮ್ಮ ಥಯಾ.

¹⁰ ತ್ಯುನೆ ಹಮನೊನೆ ಘನ್ನಾ ಮರ್ಯಾದಿ ದಿನ್ನ ಹಮೆ ತ್ಯಾತಾ ಹಮ್ಮಾರು ಪ್ರಯಾಣ ಅಗಾ ಬಡಾಯೆಲ ಪರ ಹಮನೊನೆ ಚಾಯೆಲ ಥಯಲ ಕ್ಹಾವಾನು ಲೈನ ಹಡಗಮ್ಮಾಮ್ಹೆಲಾ.

¹¹ ಎ ಥಯಲ ಪರ ಅಲೆಕ್ಸಾಂಡ್ರಿಮ್ಮಾತ್ತಾ ಐನ ತೆ ದ್ವಿಪಮ್ಮಾ ಥಂಡನೊ ದಿನ್ನ ದಾಟಿನ ತ್ಯಾ ರಹೆಲ ಯಕ್ಕ ಹಡ್ಗೊ ಚ಼ಡಿನ ಚಾ಼ಲ್ಯಾ. ತೆ ಹಡಗನೆ ಅಶ್ವಿನಿ ದೆವಸ್ಥಾನ ಕವಾನು ಯಕ್ಕ ವಳಕ ವ್ಹತ್ತು.

¹² ಹಮ್ಮೆ ಸುರಕುಸಿನೆ ಗೈನ ತ್ಯಾ ತನ್ನ ದಿನ್ನ ವ್ಹತ್ತಾ.

¹³ ತ್ಯಾತಾ ಅಗಾ ಗೈನ ರೆಗಿನ ಗಾಮ್ಮೆ ಗಯಾ. ಯಕ್ಕ ದಿನ ಥಯಲ ಪರ ತೆಂಕಣ ವಾರೊ ಆಯೆಲಕ್ಹು ಬೆವಾ ದಿನ್ನೆ ಪೊತಿಯೊಲನೆ ಗಾಮೆ ಗಯಾ.

¹⁴ ತ್ಯಾ ವಿಸ್ವಾಸಿಯೊ ಮನಕ್ಹೊನೆ ದೆಕ್ಯಾ. ತ್ಯುನೆ ಹಮನೊನೆ ತ್ಯುನೊ ಕೈನ ಬಲೆಲಿನ ಕ್ಹಾತ ದಿನ ರ‍್ಹೈವು ಕೈನ. ಮಾಂಗಿಲಿದ್ಯಾ ತೆಳಾಮಾ ರೊಮಾಪುರನೆ ಆಯಾ.

¹⁵ ತ್ಯಾ ರಹೆಲ ಭಾಯೊ ಹಮ್ಮಾರು ಸಮಾಚಾರ ಐಕಿನ ಹಮ್ಮನೊನೆ ಮಳಾನೆ ದಕ್ಹಜ಼ನಾ ಅಪ್ಪಿಯಪೆಟೆಲಕುನ ವರಿ ದಕ್ಹಾಜ಼಼ನಾ ತ್ರಿ ಛತ್ರಕವಾನು ಜ಼ಗಾಮಟಾ ಆಯಾ. ಪೌಲಾ ತ್ಯುನೊನೆ ದೆಕಿನ ಕ್ಹುದಾನೆ ಸ್ತೊತ್ರಾ ಕರಿನ ಧೈರ‍್ಯಕ್ಹು ರ‍್ಹಯೊ.

¹⁶ ಹಮ್ಮೆ ರೊಮಾಪುರನೆ ಆಯಲ್ಪರ, ಪೌಲಾ ತಿನೆ ಕೈದಾಲಾ ಸಿಪಾಯಿನಾ ಕ್ಹಾತೆ ಜ಼ುದೊ ಥೈನ ರ‍್ಹೌ ಕೈನ ಅಪ್ಪಣೆ ಹೊಂದಿಲಿದ್ಯೊ.

¹⁷ ತನ ದಿನ್ನ ಥಯಲ್ಪರ ಯೆಹುದಿಯೊನೊ ಖಾಸ ಮನಕ್ಹೊನೆ ತಿಕನ ಬಲೈಲಿದ್ಯೊ. ತ್ಯುನೆ ಆತಾಮಾ ತೆ ತ್ಯುನೊನೆ; ಭಾಯೊ, ಮಿ ಮಾರಾ ಮನಕ್ಹೊನೆ, ಮಾರಾ ಪಿತೃವೊನೆ ಪದ್ದತಿಯೊನಾ ವಿರುದ್ದ ಥೈನ ಸುಜ಼ ಕರಾವಾಲೊ ನೈಸೊಜ಼ ಯೆರುಸಲೆಮತೊ ರೊಮವಾಲಾವೊನಾ ಹತೊಮಾ ಜೆಲಮ್ಮಾ ರ‍್ಹವಾಲೊ ಥೈನ ಒಪ್ಪಸಿ ದಿದ್ಯಾ.

¹⁸ ತ್ಯುನೆ ಮನೆ ವಿಚಾರಣೆ ಕರಿನ, ಮಾರಾವಾನಿ ದಂಡನೆನೆ ಕಾರಣ ಸು ನೈಸೊ ಮನೆ ಚ್ಹೊಡೌ ಕೈನ ವ್ಹತ್ತಾ.

¹⁹ ತಿನಾಹುತಿ ಯೆಹುದಿಯೊ ವಿರುದ್ದ ಕರಲಕ್ಹು, ಮಿ ಕೈಸರನಾ ಕ್ಹಾಮೊ ಕಲಿದ್ಯುಸ ಕೌವ ಕೈನ ಐಯು. ಮಾರಾ ಸ್ವಂತ ದೆಶವಾಲಾವೊನಾ ಉಪ್ಪರ ದೊಷಾರೊಪಣೆ ಘಾಲುನಾ ಮನಸ ಕ್ಹು ತೆ ಕದ್ಯೊ ನೈ.

²⁰ ಎ ಕಾರಣನಾ ಹುತಿ ಮಿ ತುಮನೊನೆ ದೆಕಿನ ಬೊಲು ಕೈನ ಬಲೆಲಿದ್ಯೊ. ಇಸ್ರಾಯೆಲ ಮನಕ್ಹೊನಾ ಕೈದಾನಾ ಹುತಿ ಎ ಬೆಡಿಯೊಕ್ಹು ಭಂದಿ ಥಯೊಸ ಕೈನ ಕದ್ಯೊ.

²¹ ತಿನಾಹುತಿ ತ್ಯುನೆ ತಿನೆ; ತಾರಾ ವಿಷಯಮಾ ಹಮೊನೆ ಯುದಾಯತಿ ವರದಿ ಐ ನೈ, ಭಾಯೊಮಾ ಯಕ್ಲೊ ಐನ ತಾರಾ ವಿಷಯಮಾ ಕೆಟ್ಟ ರ‍್ಹಯಲ ಸುಬಿ ಕದೊನೈ. ಸುಜ಼ ಬೊಲ್ಯಾ ಬಿ ನೈ.

²² ತೆನೈಸೊ, ತಾರಾ ವಿಚಾರಮಾ ತಾರಾಕ್ಹುಜ಼ ಐಕು ಕೈನ ಹಮೊನೆ ಚೊ಼ಕು ವ್ಹೈ ಕೈನ ದಿಕ್ಹಸ. ತೆ ಗುಂಪನಾ ವಿಷಯಮಾ ಮನಕ್ಹೊ ಕಜ಼ಾ ಕಜಾ಼ ಕಿಜ಼ ವಿರುದ್ದ ಥೈನ ಬೊಲಸ ಕರಿನ ಕೈನ ಯಕಜ಼ ಹಮೊನೆ ಗ್ವತ್ತ ಛೆ ಕದ್ಯಾ”.

²³ ತ್ಯುನೆ ತಿನೆ ಯಕ್ಕದಿನ್ನ ಪೌಲಾ ಗ್ವತ್ತ ಕರಾಯಲಕ್ಹು, ಘನ್ನಾ ಜ಼ನಾ ತಿನಾ ಝುಪ್ಡಾಮಾ ತಿಕನ ಆಯಾ. ತೆ ಪಾಟತೊ ಧರಿನ ಕ್ಹಾಂಜ ಮಟಾ ಕ್ಹುದಾನಾ ರಾಜ್ಯನಾ ಹುತಿ ಕ್ಹರಿಮ್ಮಾಜ಼ ಸಾಕ್ಷಿ ಕೈನ ಮೊಶೆನಾ ಧರಮಶಾಸ್ತ್ರನೆ ಪ್ರವಾದಿಯೊನಾ ಗ್ರಂಥತೊನೆ ಆದಾರ ಕರಲಿನ ಯೆಸುನಾ ವಿಷಯಮಾ ತ್ಯುನೊನೆ ಕತೊ ವ್ಹತ್ತೊ.

²⁴ ತೆ ಕದಲ ವಾತೊ ದಕ್ಹಾಜ಼಼ನಾ ಐಕ್ಯಾ; ದಕ್ಹಾಜ಼಼ನಾ ನಂಬ್ಯಾವಾಚಿ ಗಯಾ.

²⁵ ತ್ಯುನೆ ವಾದ ಕರಿನ ತ್ಯಾಂತಾ ಜ಼ಾವಾನೆ ತಯಾರ ಥಯಲ ಟೈಮಮಾ ಪೈಲಾ ತ್ಯುನೊನೆ ಅಮ್ಮ ಕದ್ಯೊ; ಪವಿತ್ರಾತ್ಮಾ ಪ್ರವಾದಿ ಥಯಲ ಯೆಶಾಯನಾ ಮ್ಹೊಡಾಕ್ಹು

²⁶ ತಮ್ಮಾರಾ ಪಿತೃವೊನೆ ತಿಳಸೈನ ಕದಲ ಸವೈ ಕದ್ಯಾಮ; ‘ತು ತೆ ಮನಕ್ಹೊಕನ ಗೈನ ತ್ಯುನೊನೆ ಕದ್ಯೊ ತಮೆ ಕಾನೊ ಐಕ್ಯಾತಬಿ ತಿಳದಿಲೆತ್ತಾ ನೈ. ಡೊಳಾ ರ‍್ಹೈನ ದೆಕೆವಾಚಿ ರ‍್ಹವೊಸಿ ಕದ್ಯೊ.

²⁷ ಕಾಕದ್ಯಾಮ ತೆ ಮನಕ್ಹೊನು ಮನಸಮ್ಮಾ ಘಟ್ಟ ಥಯಾಸ; ತ್ಯುನಾ ಕಾನೊ ಕ್ಯುಡಾ ಥಯಾಸ; ತ್ಯುನೆ ಡೊಳಾ ಝಾಕಿ ಲಿದ್ಯಾಸ ;ತ್ಯುನೆ ಡೊಳಾಕ್ಹು ದೆಕಿ, ಕಾನೊಕ್ಹು ಐಕಿನ ಮನಸ್ಸ ತಿಳಿದಿಲಎತ್ತು ಮಕನ ಫರ‍್ಯಾಮ್ಮಾ ಮಾರಾಕ್ಹು ಅರಾಮ ಕಿಮ್ಮ ಹೊಂದಿಲ್ಯು ಕೈನ ಕ್ಹುದಾ ಕ್ಹದ್ಯೊ.

²⁸ ತಿನಾಹುತಿ ಪೌಲಾ ಥಯಲ ತೆ ಕ್ಹುದಾಕ್ಹು ರಕ್ಷಣೆ ಬಿಜಾ಼ ಮನಕ್ಹೊ ಕೈನ ವಳಾಯೊ ಕೈನ ತಮನೊನೆ ಚೊ಼ಕಿ ತಂಗ ಗೊತ್ತ ರ‍್ಹವಾದೆ; ತ್ಯುನೆ ತಬಿ ಐಕಸ ಕೈನ ಕದ್ಯೊ.

²⁹ ತೆ ವಾತೊ ಕದಲ ಪರ ತ್ಯುನೆ ಗೈಪಡ್ಯಾ.

³⁰ ತೆ ಥಯಲ ಪರ ಪೌಲಾ ಬಾಡಿಗೆ ಲಿದೆಲ ಘರಾಮ್ಮಾ ಬೆ ವರಕ್ಹ ತ್ಯಾ ರ‍್ಹೈನ ತಿಕ ಆವಾವಾ ಲಾವೊನೆ ಮರ್ಯಾದಿನ ಬಲಾವುನು ಕರ‍್ಯೊ.

³¹ ಕೈಜ಼ ಅಡ್ಡಿ ನೈಸೊ, ಘನೊ ಧೈರ್ಯಕ್ಹು ಕ್ಹುದಾನಿ ರಾಜ್ಯನಾ ಹುತಿ ಬೊದನೆ ಕರತೊ, ಕರ್ತಾ ಥಯಲ ಯೆಸುಕ್ರಿಸ್ತನಾ ವಿಷಯಮ್ಮಾ ಉಪದೆಶ ಕರತೊ ವ್ಹತ್ತೊ.