ಅಪೊಸ್ತಲೊ 20 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಮೆಕೆದೊನ ವರಿ ಗ್ರಿಸ ದೆಶಮಾ ಪೌಲಾನಿ ಸೆವೆ

¹ ಗದ್ದಲ ಹುಬ್ರಯಲ್ಪರ ಪೌಲಾ ವಿಶ್ವಾಸಿಯೊನಾ ಕ್ಹಾತೆ ಬಲೈನ ಯಕ್ಕ ಜ಼ಗಾ ದೈರ್ಯದಿನ ತ್ಯುನೊಕಂತೊ ಅಪ್ಪಣೆ ಲಿನ ಮಕೆದೊನಿಯಾನೆ ಗಯೊ.

² ತೆ ಗಾಮ್ಮಾ ಫರಿನ ತ್ಯಾ ರ‍್ಹಯಲ ಮನಕ್ಹೊನೆ ಘನ್ನಾ ಸಂದೆಶ ದಿನ್ನ ಧೈರ್ಯದಿನ ಗ್ರಿಸ ದೆಶೆ ಆಯೊ.

³ ತ್ಯಾ ತನ್ನ ಮ್ಹೈನಾ ಥಯಲ್ಪರ ಸಿರಿಯಾ ದೆಶೆ ಸಮುಂದರನಿ ವಾಟತೊ ಜೌ಼ ಕೈನ ಕೈಲೆತಾಮಾ ತಿನಾ ವಿರುದ್ದ ಯೆಹುದಿಯೊ ಪ್ಲಾನ ಕರಲ ತಿನೆ ಗ್ವತ್ತ ಥಯಲ ಹುತಿ ತೆ ಮೆಕೆದೊನಿಯಾನಿ ವಾಟತೊ ಪಾಚೊ಼ ಪ್ಹರಿನ ಜಾ಼ವಾನೆ ಫೈಸಲೊ ಕರ‍್ಯೊ.

⁴ ಪುರ್ರನೊ ದಿಕ್ರೊ ಥಯಲ ಬೆರೊಯೊ ಗಾಮವಾಲೊ ಸೊಪತ್ರನು, ಥೆಸಲೊನಿಕ ಅರಿಸ್ತಾರ್ಕ, ಸೆಕುಂದನದೆರ್ಬೆ ಥೆಸಲೊನಿಕ ಗಾಮವಾಲೊ ಗಾಯೊಸನೊ,ತಿಮೊಥಿಯೊನ, ಆಸ್ಯಸಿಮೆಮಾ ರ‍್ಹಯಲವಾಲಾ ಮನಕ್ಹೊ ತುಖಿಕನ, ತ್ರೊಫಿಮನೊ, ಆಸ್ಯಸಿಮೆ ಲಕ್ಕಾ ತಿನಾ ಕ್ಹಾತೆ ಗಯಾ.

⁵ ತ್ಯುನೆ ಪೈಲಾಜ಼ ಗೈನ ಹಮಾರಾ ಹುತಿ ತ್ರೊವಾಮಾ ಕೈದಾಡ್ಯಾತಾ.

⁶ ನೈ ಫುಗ್ಗಲ ರೊಕ್ಲಾನಾ ಸನ್ನನಾ ದಿನೊಮಾ ಪುರಾ ಥಯಲ್ಪರ ಹಮೆ ಪಿಲಿಪ್ಪಮಾತಾ ಹಡಗಾಮಾ ಪಾಂಚ಼ ದಿನೊಮಾ ತ್ರೊವಾಮಾ ಐನ ತ್ಯುನಾ ಕ್ಹಾತೆ ಮಳ್ಯಾ. ತ್ಯಾ ಕ್ಹಾತ ದಿನ್ನ ವ್ಹತ್ತಾ.

ಯುತಿಕನೆ ಜಿವದಾನ

⁷ ಹಪ್ತಾನಾ ಪಸ್ಟಲ್ಯಾ ದಿನ್ಮಾ ರೊಕ್ಲೊ ತೊಡಿನ ಖಾವಾನಾ ನಿಯಮನಾ ಹುತಿ ಮಳಿನ ಆತಾಮಾ ಪೌಲಾ ತ್ಯಾ ಮಳಿನ ಆಯಲ ವಿಸ್ವಾಸಿಯೊನೆ ಭೊದನ ಕರ್ತೊ ಅರ್ದಿ ರಾತಲಕ್ಕಾ ಉಪನ್ಯಾಸ ದಿದ್ಯೊ.

⁸ ಹಮೆ ಮಳಿನ ರ‍್ಹಯಲ ಅಂಟಾನಾ ಘರ್ಪರ ಘನ್ನು ಉಜಾಲು ದಿವಾನಾ ದಿವ್ವಾ ವ್ಹತಾ.

⁹ ಯುತಿಕ ಕವಾಲೊ ಯಕ್ಲೊ ಜಾಂಜಿಮಾನ ಖಿಡ್ಕಿಕನ ಹುಬ್ರೈನ ನಿಂದರ್ಮಾ ಜ಼ುಕತ್ತೊ ರ‍್ಹವಸ. ಪೌಲಾ ಭೊದನೆ ಕರ್ತೊ ರ‍್ಹತಾಮಾ ತೆ ಜಾಂಜಿಮಾನ ತನ್ನ ಮಹಡಿ ಮ್ಹಾಡಿಪರ್ತೊ ಹೆಟೊ ಪಡಿಗಯೊ; ತಿನೆ ಉಟಾಡಾನೆ ಜಾ಼ತಾಮಾ ತೆ ಮರಿಗಯೊತೊ.

¹⁰ ತೆನೈಸೊ ಪೌಲಾ ಹೆಟೊ ಉತ್ರಿನ ಗೈನ ತಿಪರ ಪಡಿನ ತಿನೆ ಔಳಗಿಲಿನ; ಚಿಂತಾ ನಕೊ ಕರೊ, ತೆ ಜಿವ್ತೊ ಛೆ ಕೈನ ಕದ್ಯೊ.

¹¹ ತೆಳಾಮಾ ತೆ ಉಪ್ಪರ ಗೈನ ರೊಕ್ಲೊ ತೊಡಿನ ಖೈನ ದಿನ್ನ ನಿಕ್ಹಳೆ ಲಕ್ಕಾಬಿ ತಿನಾ ಕ್ಹಾತೆ ಬೊಲಿನ ಗೈಪಡ್ಯೊ.

¹² ತ್ಯುನೆ ತೆ ಜಿವ್ತೊ ಥಯಲ ಪಟ್ಟಾನೆ ಘರೆ ಬಲೈಲಾತಾಮಾ ತ್ಯುನೊನೆ ಘನ್ನು ಸಮಾಧಾನ ಥಯು.

ಪೌಲಾ ಮಿಲೆತ ದ್ವಿಪನೆ ಗಯಲ

¹³ ಅಪೆ ತ್ಯಾ ಪೈಲಾಜ಼ ಗೈನ ಅಸ್ಸೊಸಿಮಾ ಪೌಲಾನೆ ತ್ಯುನಾ ಕ್ಹಾತೆ ಚ಼ಡೈಲ್ಯು ಕೈನ ವ್ಹತ್ತಾ. ಸಮುಂದರನಿ ವಾಟತ್ತಾ ಪ್ರಯಾಣ ಕರ‍್ಯಾ. ಪೌಲಾ ತಿಮ್ಮಜ಼ ಅಪ್ಪಣೆ ದಿನ ಚಾ಼ಲ್ತೊ ಜೌ಼ ಕೈನ ಮನಸ ಕರ‍್ಯೊ.

¹⁴ ಅಸ್ಸೊಸಿಮಾ ತೆ ಅಪ್ನಾ ಕ್ಹಾತೆ ಮಳ್ತಾಮಾ ಹಮೆ ಹಮಾರಾ ಕ್ಹಾತೆ ಹಡಗಾಮಾ ತಿನೆ ಮಳೈಲಿನ ಮಿತಿಲಿನ ಗಾಮೆ ಚಾ಼ಲ್ಯಾ.

¹⁵ ತ್ಯಾಂತಾ ಗೈನ ಮರ್ನಾ ದಿನ್ನೆ ಖಿಯೊನ ದ್ವಪನಾ ಕ್ಹಾಮಾ ಐನ ವರಿ ತಿನಾ ಮರ್ನಾ ದಿನ್ನೆ ಸಾಮೊಸಿನನಾ ನಜಿಕ ಆಯಾ. ಮರ್ನಾ ದಿನ್ನೆ ಮಿಲೆತಕ್ಕಮಾ ಆಯಾ.

¹⁶ ಪೌಲಾ ಮನೆ ಸಾದ್ಯಥಯುಮ ಪಂಚಾಶತಮನಾ ಸನ್ನನೆ ಯೆರುಸೆಲಿಮಮಾ ರ‍್ಹೌ ಕೈನ ಗಡಬಡ ಕರ್ತೊ ರ‍್ಹತಾಮಾ ಆಸ್ಸಿಸಿಮಾ ರ‍್ಹವಾನೆ ಮನಸ ನೈಸೊ ಎಫೆಸ ಗಾಮ ದಾಟಿನ ಜೌ಼ ಕೈನ ವಿಚಾರ ಕರ್ಲಿದ್ಯೊ.

ಪೌಲಾನು ಎಫೆಸ ಸಭೆನಾ ಮ್ಹೊಟಾ ಮನಕ್ಹೊನೆ ಕದಲ ಲಾಸ್ಟ ವಾತ

¹⁷ ತೆ ಮಿಲೆತತೊ ಎಫೆಸೆಯೆ ಮೊಕ್ಲಿನ ತ್ಯಾನಾ ಸಭೆಮಾ ಮ್ಹೊಟಾವೊನೆ ಬಲಾವಾನಾಹುತಿ ಸಂದೆಶ ವಳಾಯೊಸ.

¹⁸ ತ್ಯುನೆ ತಿಕನ ಆತಮಾ ತ್ಯುನೊನೆ ತೆ ಸು ಕದ್ಯೊ ಕದ್ಯಾಮ; ಮಿ ಆಸ್ಯಸಿಮೆಮಾ ಪ್ರಾಂತ್ಯ ಪಗ್ಗ ಮ್ಹೆಲಲ ಪೈಲಾ ದಿಂತಾ ತುಮಾರಾ ವಚ್ಮಾ಼ ಕ್ಹಾರಾ ಕಾಲೊಮಾ ಕಿಮ ಚಾ಼ಲಿಲಿನ ಗಯೊ ಕವಾನು ತುಮೊನೆಜ಼ ಗ್ವತ್ತ ಛೆ.

¹⁹ ಯೆಹುದಿಯೊನು ತ್ಯುನೆ ಮ್ಹೈನು ವಿಚಾರ ಕಸ್ಟೊಮಾ ಮಿ ಘನ್ನೊ ನಮ್ರೆತೆಕ್ಹು, ಡೊಳಾನಾ ಪಾನಿಕ್ಹು ಕರ್ತಾನಿ ಸೆವೆ ಕರಾಡ್ಯೊಸ.

²⁰ ಮಿ ತುಮಾರಿ ಮನಕ್ಹೊನಾ ಕ್ಹಾಮೊ ತಮನೊನೆ ಚೊ಼ಕಾನಿಕ್ಹು ಕವಾಕ್ಹು, ಘರ ಘರಮಾ,ಐನ ತಮನೊನೆ ಸಹಾಯ ಕರಾನು ಉಪದೆಶ ಕವಾನಿಕ್ಹು ಪಾಚೊ಼ ಸರಕ್ಯಾವಾಚಿ

²¹ ಯೆಹುದಿಯೊನೆ ವರಿ ಗ್ರಿಕವಾಲಾಬಿ ಪಶ್ಚಾತಾಪ ಪಡಿನ ಕ್ಹುದಾ ಬಗಲ ಫರು ಕೈನ, ಅಪ್ನೊ ಕರ್ತಾ ಥಯಲ ಯೆಸುಪರ ಬರೊಕ್ಹೊ ಮ್ಹೆಲು ಕೈನ ಮಿಜ಼ ಕದ್ಯೊ.

²² ದೆಕೊ, ಮಿ ಹಮ್ನಾ ಪವಿತ್ರ ಆತ್ಮಾಕ್ಹು ಬಂದನಮಾ ರ‍್ಹೈನ ಯೆರುಸೆಲೆಮೆ ಚಾಲ್ಯೊಸ. ತ್ಯಾ ಮಾರಾಕ್ಹಾತೆ ಸು ತಾವಸ ಮನೆ ಗ್ವತ್ತ ನತ್ತಿ.

²³ ತುನೆ ಜೆಲಮಾ ಬೆಡಿಯೊ ವರಿ ತ್ರಾಸೊ ಕೈದಾಡ್ಯಾಸ. ಕೈನ ಪವಿತ್ರ ಆತ್ಮಾ ಹರಯಕ್ಕ ಗಾಮೊಮಾ ಮನೆ ಎಚ್ಚರಿಕೆ ದಿದ್ಯೊಸ ಕವಾನು ಮಿ ವಳಕ್ಯೊಸ.

²⁴ ತೆನೈಸೊ ಜ಼ಲಮ ವಚಾ಼ಡಿಲಿವಾನು ಶ್ರೆಷ್ಠೆ ವ್ಹೈ ಕೈನ ಮಿ ವಿಚಾರ ಕರ್ತೊ ನೈ; ಕ್ಹುದಾನಿ ಮರ್ಗಾನಾ ಹುತಿ ಸುವಾರ್ತೆ ಆಸಕ್ತಿ ಕ್ಹು ಸಾಕ್ಷಿನಾ ರೊಪಮಾ ಕವಾನು ನಿಯೊಗ ಕರ್ತಾ ಥಯಲ ಯೆಸುಕ್ಹು ಮಿ ವ್ಹಂದ್ಯೊಸ. ಎಜ಼ ನಿಯೊಗ ಉಪಯೊಗ ಕರಾನು ಮಾರಿ ಆಸ ವ್ಹೈ.

²⁵ ದೆಕೊ, ಯಕ್ಲಾ ದಿನ್ನ ತುಮೊಕನ ಐನ ಕ್ಹುದಾನಿ ರಾಜ್ಯನ ಹುತಿ ಉಪ್ಪರ ತುಮೆ ಮಾರು ಮ್ಹೊಡು ಯಕ್ಲೊಬಿ ದೆಕ್ತಾ ನೈ ಕೈನ ಮನೆ ಗ್ವತ್ತ ಛೆ.

²⁶ ತಿನಾಹುತಿ ಹಮ್ನಾ ಕ್ಹರಿಜ಼ ಕೌಸ, ತುಮೊಮಾ ಕುನಬಿ ಹಾಳ ಥಯಾಮ ತೆ ಮಾರಾ ತಪ್ಪಕ್ಹು ನ್ಹ ವ್ಹೈ.

²⁷ ಕಾಕದ್ಯಾಮ ಯಕ್ಕಬಿ ಝಾಕ್ಯಾವಾಚಿ ಕ್ಹುದಾನಿ ಕ್ಹಾರಿ ವಿಚಾರ ತುಮೊನೆ ಕದ್ಯೊಸ.

²⁸ ಕರ್ತಾ ತಿನಾ ಸ್ವಂತನು ರಗತಕ್ಹು ಕಮಾಯಲ ಕ್ಹುದಾನಿ ಸಬೆವಾಲಾ ಪಾಲನ ಕರಾನಾಹುತಿ ಪವಿತ್ರ ಆತ್ಮಾ ತುಮೊನೆ ಎ ಗುಂಪಮಾ ಸಭಾದಕ್ಷ ಕರಿನ ಮ್ಹೆಲಲ ಹುತಿ ತುಮಾರಾ ಹುತಿ, ಕ್ಹಾರಿ ಗುಂಪನಾ ಹುತಿ ಹುಷಾರಮಾ ರ‍್ಹವೊ.

²⁹ ಮಿ ಗಯಲ್ಪರ ಘನ್ನಾ ಕ್ರುರ ರ‍್ಹಯಲ ರಾನ್ನಾ ಕುತ್ರಾ ತುಮೊಮಾ ಆವಸ ಕೈನ ಮನೆ ಗ್ವತ್ತ ಛೆ; ತೆ ಹಿಂಡನೆ ಮರಗತಾ ನೈ.

³⁰ ಎನೈಸೊ ತುಮೊಮಾ ದಕ್ಹಾಜ಼಼ನಾ ಉಟಿನ ಸುಳ್ಳ ರ‍್ಹಯಲ ಭೊದನೆ ಕರಿನ ಶಿಷ್ಯಾವೊನಾ ತ್ಯುನಾ ಬಗಲ ಜಗ್ಗಿಲಿವಸ.

³¹ ತಿನಾಹುತಿ ಮಿ ಡೊಳಾಮಾನು ಪಾನಿ ಕಾಡ್ತೊ ತನ್ನ ವರಕ್ಹ ದಿನ್ನ ರಾತ ಛೊಡ್ಯಾವಾಚಿ ಹರಿ ಯಕ್ಲಾನೆ ಗ್ಯಾನ ಕದ್ಯೊಸ ಕವಾನು ತುಮೆ ಶೆ ಕರ್ಲಿನ ಹುಶಾರ ಥೈನ ರ‍್ಹವೊ.

³² ಮಿ ಹಮ್ನಾ ತುಮೊನೆ ವರಿ ಕ್ಹುದಾನೆ, ತಿನಾ ಕೃಪಾನಿ ವಾಕ್ಯಾಕ್ಹು ವಪ್ಸಿನ ದ್ಯುಸ. ತೆ ತುಮೊಮಾ ಭಕ್ತಿವೃದ್ದಿ ಕರಾನೆ, ಪರಿಶುದ್ಧನಾ ಕ್ಹಾತೆ ತುಮಾರಾ ಹಕ್ಕ ಅನುಗ್ರಹ ದಿವಾನೆ ಹಕ್ಕ ಥಯೊಸ.

³³ ಮಿ ಕಿನು ಕ್ಹೊನು ರುಪ್ಪು ರ‍್ಹೈನೆಕಾ ಫೆರಾವಡಾನೆ ರ‍್ಹಯನೆಕಾ ಆಸ ಕರ‍್ಯೊ ನೈ.

³⁴ ಮಿ ಮಾರಾ ಸ್ವಂತ ಹತೊಕ್ಹು ಕಾಮ ಕರಿನ, ಮನೆ ಕಮಿ ರ‍್ಹಯಲ ಮಾರಾಕ್ಹಾತೆ ರ‍್ಹಯಲವಾಲಾವೊನೆ ಚಾ಼ಯೆ ಥಯಲ ಪುರಾ ಕರ‍್ಯೊಸ ಕವಾನು ತುಮೊನೆ ಗ್ವತ್ತ ಛೆ.

³⁵ ಕ್ಹಾರಿ ವಿಷಯಮಾ ಮಿ ತುಮೊನೆ ವಾಟ ದೆಕಾಡ್ಯೊಸ. ತುಮೆ ತಿಮ್ಮಜ಼ ರಾಬಿನ ತಾಕತ ನೈಸೊವಾಲಾವೊನೆ ಮದತ ಕರು; ವರಿ; ಪಡ್ದಿಲಿವಾತಿಬಿ ದಿವಾನುಜ಼ ಹೆಚ್ಕಿ಼ ಆಶಿರ್ವಾದ ವ್ಹೈ, ಕರ್ತಾ ಥಯಲ ಯೆಸು ಕ್ರಿಸ್ತ ತೆಜ಼ ಕದಲ ವಾತೊ ಶೆ ಮ್ಹೆಲ್ಯು ಕೈನ ಕದ್ಯೊ.

³⁶ ಎ ವಾತೊ ತ್ಯುನೆ ಕದಲ್ಪರ ಉಂದಾ ಗುಡ್ಗಾ ಘಾಲ್ಲಿನ ತ್ಯುನಾ ಕ್ಹಾತೆ ಪ್ರಾಥನಾ ಕರ‍್ಯಾ.

³⁷ ತ್ಯುನೆ ಕ್ಹಾರಾ ರೊಯಾ ತೆ ಥಯಲ್ಪರ ಪೌಲಾ; ತುಮೆ ಮಾರು ಮ್ಹೊಡು ಹಬ್ದಾತಾ ದೆಕ್ತಾ ನೈ ಕತಾಮಾ, ತ್ಯುನೆ ಕ್ಹಾರಾ ದುಖಿ ಥೈನ, ರೊತಾ ತ್ಯುನೊನೊ ಔಳ್ಗಿಲಿನ ತಿನೆ ಮಟ್ಟಿ ಲಿದ್ಯಾ.

³⁸ ತ್ಯುನೆ ಘನ್ನಾ ದುಖ ಕರಲಿನ ತೆ ಥಯಲ್ಪರ ತ್ಯುನೆ ಹಡಗಾ ಲಕ್ಕಾ ತಿನಾ ಕ್ಹಾತೆ ಗೈನ ತಿನೆ ಮೊಕ್ಲಿನ ಆಯಾ.