ಅಪೊಸ್ತಲೊ 11 - ಕ್ಹುದಾನಿ ಕ್ಹರಿನಿ ವಾಕ್ಯಾ

¹ ಯೆಹುದಿ ನೈಸೊ ವಿಸ್ವಾಸಿಯೊ ಕ್ಹುದಾನಿ ವಾಕ್ಯಾನೆ ಸ್ವಿಕಾರ ಕರ‍್ಯಾಸ ಕವಾನು ಅಪೊಸ್ತಲೊನೆ ಯುದೆಯನಾ ವಿಸ್ವಾಸಿಯೊನೆ ಗ್ವತ್ತ ಥಯು.

² ತೆನೈಸೊ ಪೆತ್ರಾ ಯೆರುಸಲೆಮೆ ಆಯಲ್ಪರ ದಕ್ಹಾ ಯೆಹುದಿನಾ ವಿಶ್ವಾಸಿಯೊ ಖತ್ನಾ ಕರೈಲ್ಯು ಕೈ ಕವಾಲಾ ತಿನಾ ಕ್ಹಾತೆ ವಾದ ವಿವಾದ ಕರ‍್ಯಾ.

³ ತ್ಯುನೆ"ಯೆಹುದಿ ನೈಸೊ ರ‍್ಹಯಲ ವರಿ ಖತ್ನಾ ನೈ ಕರೈ ಲಿದಲವಾಲಾವೊನಾ ಘರೊನೆ ತು ಗಯೊ! ತು ತ್ಯುನಾ ಕ್ಹಾತೆ ಅನ್ನಬಿ ಖಾದ್ಯೊ"ಕದ್ಯಾ.

⁴ ತಿನಾಹುತಿ ಪೆತ್ರಾ ಥಯಲ ಸಂಗತಿಯೊ ಕ್ಹಾರಾ ತ್ಯುನೊನೆ ತಿಳ್ಸಾಯೊ.

⁵ ಪೆತ್ರಾ ತ್ಯುನೊನೆ"ಮಿ ಯೊಪ್ಪ ಗಾಮಮಾ ವ್ಹತ್ತೊ. ಮಿ ಪ್ರಾಥನಾ ಕರ‍್ತಾಮಾ ಮನೆ ಯಕ್ಕ ದರ್ಶನ ಥಯು. ತೆ ದರ್ಶನಮಾ, ಹಬಾಳತು ಉತ್ರಿನ ಆವಾನು ಯಕ್ಕ ಚಿಜ಼ ದೆಕ್ಯೊ. ತೆ ಮ್ಹೊಟೊ ಥಾಳೊ ಲಿಂಗತ ವ್ಹತ್ತು. ತಿನಾ ಚಾರೆ ಮುಲಾವೊನೆ ರಾಕ್ಹೆ ಭಾಂದಿನ ತೆ ಉತ್ರಿನ ಐನ ಮಾರಾ ನಜಿಕ ಹುಬ್ರಯು.

⁶ ಮಿ ತಿಮಾ ದೆಕ್ಯೊ. ತಿಮಾ ಜಾನವರೊ ಖತರ್ನಾಕ ಜಾನವರೊ ಇಶಾಡಾನಾ ಜಾನವರೊ ಉಡಾನಾ ಪಕ್ಷಿಯೊ ವ್ಹತ್ತಾ.

⁷ ತೆಳಾಮಾ, ‘ಪೆತ್ರಾ, ಉಟ್ಟ! ಇಮಾ ರ‍್ಹಯಲ ಕಿನೆಬಿ ಖಲಾಸ ಕರಿನ ಖಾ! ಕೈನ ಮನೆ ಕವಾನಿ ಅವಾಜ಼ ಐಕ್ಯೊ.

⁸ "ತೆನೈಸೊ ಮಿ, ‘ಪ್ರಭು, ಮಿ ತಿಮ್ಮ ನೈ ಕರಸಕ್ತೊ! ಪವಿತ್ರ ನೈ ರ‍್ಹಯಲ ವರಿ ಶುದ್ಧ ನೈ ರ‍್ಹಯಲ ಸುಬಿ ರ‍್ಹವಾದೆ ಮಿ ಕೆಳಾಮಾಜ಼ ನತ್ತಿ ಖಾದ್ಯೊ’ ಕೈನ ಕದ್ಯೊ.

⁹ "ತೆನೈಸೊ, ‘ಎ ಕ್ಹಾರಾನೆ ಕ್ಹುದಾ ಶುದ್ಧ ಕರ‍್ಯೊಸ. ಎ ಕ್ಹಾರು ಶುದ್ಧ ನ್ಹವೈ ಕೈನ ಕೌ ನಕೊ! ಕೈನ ತೆ ಅವಾಜ಼ ಮನೆ ಜವಾಬ ದಿದ್ಯು.

¹⁰ "ಇಮ್ಮ ತನ್ನ ಸಲಾ ಥಯು. ಪಾಚಾ಼ತು ತೆ ಪುರಾ ಚಿಜ಼ ಹಬಾಳೆ ವಾಪಸ ಲಿದ್ಯಾ.

¹¹ ತೆಜ಼ ಟೈಮಮಾ ಮಿ ರ‍್ಹಯಲ ಘರೆ ತನ್ನ ಜ಼ನಾ ಆಯಾ. ಎ ತನ್ನೆ ಜ಼ನಾವೊನೆ ಸೆಜರೆಯ ಗಾಮತಾ ವಳಾಯಾತಾ.

¹² ಶಕ್ಕ ಕರ‍್ಯವಾಚಿ ತ್ಯುನಾ ಕ್ಹಾತೆ ಜಾ಼ ಕೈನ ಪವಿತ್ರ ಆತ್ಮಾ ಮನೆ ಕದ್ಯೊ. ನ್ಹ್ಯಾ ರ‍್ಹವಾನಾ ಎ ಛೆ ಜ಼ನಾ ಭಾಯೊ ಮಾರಾ ಕ್ಹಾತೆ ಆಯಾ. ಹಮೆ ಕೊರ್ನೆಲಿಯನಾ ಘರೆ ಗಯಾ.

¹³ ತಿನಾ ಘರಮಾ ಕ್ಹುದಾನು ದುತ ಯಕ್ಲೊ ಹುಬ್ರಯಲ ತೆ ದೆಕಲ ಕೊರ್ನೆಲಿಯ ಮನೆ ಕದ್ಯೊ. ತೆ ಕ್ಹುದಾನೊ ದುತ ಕೊರ್ನೆಲಿಯನೆ, ‘ದಕ್ಹಾ ಮನಕ್ಹೊನೆ ಯೊಪ್ಪ ಗಾಮೆ ವಳಾ. ಸಿಮೊನ ಪೆತ್ರಾನೆ ಬಲಾವಾನೆ ಕರಿನ ತುಮೊಕನ ಬಲಾವಾನು ಕರಲೆ.

¹⁴ ತೆ ತುಮೊಕನ ಸಂದೆಶ ಲಾವಸ. ತೆ ಸಂದೆಕ್ಹು ತುನೆ ತಾರಾ ಘರವಾಲಾವೊನೆ ರಕ್ಷಣೆ ಕರಸ’ ಕೈನ ಕದ್ಯೊ.

¹⁵ ಮಿ ಮಾರಿ ಉಪದೆಶ ಶುರು ಕರಲ್ಪರ, ಶುರುವಾತಮಾ ಪವಿತ್ರ ಆತ್ಮಾ ಅಪ್ನಾ ಉಪ್ಪರ ಆಯಲ ಲಿಂಗತ ತ್ಯುನಾ ಉಪ್ಪರಬಿ ಆಯೊ.

¹⁶ ತೆಳಾಮಾ ಮಿ ಪ್ರಭುನಾ ವಾತೊ ಶೆಂ ಕರ‍್ಯೊ. ‘ಯೊಹಾನ ಮನಕ್ಹೊನೆ ಪಾನಿಮಾ ಬಾಪ್ತಿಸ್ಮ ಕರಾಯೊ, ತೆನೈಸೊ ತುಮೆ ಪವಿತ್ರ ಆತ್ಮಾಮಾ ಬಾಪ್ತಿಸ್ಮ ಲಿವೊಶಿ. ಕೈನ ಪ್ರಭು ಕದ್ಯೊತೊ.

¹⁷ ಪ್ರಭು ಥಯಲ ಯೆಸು ಕ್ರಿಸ್ತಮಾ ಬರೊಕ್ಹೊ ಮ್ಹೆಲಲ ಅಪೊನೆ ದಿದಲ ವರಾನೆಜ಼ ಕ್ಹುದಾ ಎ ಮನಕ್ಹೊನೆ ದಿದ್ಯೊ. ಇಮ್ಮ ರ‍್ಹತಾಮಾ ಮಿ ಕ್ಹುದಾನು ಕಾಮ ಹುಬ್ರಾಡಾನೆ ಸಾಧ್ಯ ನ್ಹೊತು "ಕದ್ಯೊ.

¹⁸ ಯಹುದ್ಯ ವಿಶ್ವಾಸಿಯೊ ಎ ಸಂಗತಿಯೊ ಐಕಲ್ಪರ ವಾದ-ವಿವಾದ ಹುಬ್ರಾಡೊ, ಕ್ಹುದಾನೆ ಸ್ತುತಿ ಕರ್ತಾ"ತಿಮ್ಮ ರ‍್ಹಯಮ ಅಪ್ನಾ ಲಿಂಗತಜ಼ ತ್ಯುನಾ ಮನಸೊ ಫರೈಲಿನ ಜ಼ಲಮ ಹೊಂದಿಲಿವಾನೆ ಕ್ಹುದಾ ಯೆಹುದಿ ನೈ ರ‍್ಹಯಲವಾಲಾವೊನೆ ಮೌಕೊ ದಿದ್ಯೊಸ "ಕದ್ಯೊ.

¹⁹ ಸ್ತೆಫನನೆ ಖಲಾಸ ಕರ‍ಲ್ಪರ ಥಯಲ ತ್ರಾಸಕ್ಹು ವಿಶ್ವಾಸಿಯೊ ದುರ ದುರ ಥಯಾ. ವಿಶ್ವಾಸಿಯೊಮಾ ದಕ್ಹಾ ಜ಼ನಾ ಘನ್ನಾ ದುರ ರ‍್ಹಯಲ ಫೆನಿಶ್ಯ, ಸೈಪ್ರಸ್ ವರಿ ಅಂತಿಯೊಕ್ಯನೆ ಗಯಾ. ವಿಶ್ವಾಸಿಯೊ ಎ ಜ಼ಗಾವೊಮಾ ಸುವಾರ್ತೆ ತಿಳಸಾಯಾ. ತೆನೈಸೊ ತ್ಯುನೆ ಯೆಹುದಿಯೊನೆಜ಼ ತಿಳಸಾಯಾ.

²⁰ ಎ ವಿಶ್ವಾಸಿಯೊಮಾ ದಕ್ಹಾ ಜ಼ನಾ ಸೈಪ್ರನ್ ವರಿ ಸಿರೆನ್ ಜ಼ಗಾವಾಲಾ ವ್ಹತ್ತಾ. ಎ ಮನಕ್ಹೊ ಅಂತಿಯೊಕ್ಯನೆ ಆಯಲ್ಪರ ತ್ಯುನೆ, ಪ್ರಭು ಥಯಲ ಯೆಸುನಿ ವಿಷಯಮಾ ರ‍್ಹಯಲ ಸುವಾರ್ತೆ ತ್ಯಾನಾ ಗ್ರಿಕ ಮನಕ್ಹೊನೆಬಿ ತಿಳಸಾಯಾ.

²¹ ಪ್ರಭು ವಿಶ್ವಾಸಿಯೊನೆ ಮದತ ಕರಾಡೊತೊ. ಮನಕ್ಹೊ ಘನ್ನಾ ಸಂಖ್ಯೆಮಾ ಪ್ರಭುನೆ ಬರೊಕ್ಹೊ ಕರಿನ ಚಾ಼ಲಾನು ಶುರು ಕರ‍್ಯಾ.

²² ಅಂತಿಯೊಕ್ಯಮಾ ರ‍್ಹಯಲ ಎ ನವಾ ವಿಶ್ವಾಸಿಯೊನಾ ಹುತಿ ಯೆರುಸಲೆಮನೆ ಸಬೆವಾಲಾವೊನೆ ಗ್ವತ್ತ ಥಯು. ತಿನಾಹುತಿ ಜೆರುಸಲೆಮನಾ ವಿಶ್ವಾಸಿಯೊ ಬಾರ್ನಬನೆ ಅಂತಿಯೊಕ್ಯನೆ ವಳಾಯಾ.

²³ ಬಾರ್ನಬ ಚೊ಼ಕೊ ಮನಕ್ಹ ವ್ಹತ್ತೊ. ತೆ ಪವಿತ್ರ ಆತ್ಮಾಕ್ಹು ಭರಲ ವ್ಹತ್ತೊ ವರಿ ಪುರಾ ಬರೊಕ್ಹೊ ರ‍್ಹಯಲವಾಲೊ ವ್ಹತ್ತೊ. ಬಾರ್ನಬ ಅಂತಿಯೊಕ್ಯನೆ ಗಯಲ್ಪರ, ಕ್ಹುದಾ ತೆ ಮನಕ್ಹೊನೆ ಘನ್ನೊ ಆಶಿರ್ವಾದ ಕರಾನು ದೆಕ್ಯೊ. ಇಕ್ಹು ಬಾರ್ಬನನೆ ಘನ್ನಿ ಖುಶಿ ಥಯು. ಅಂತಿಯೊಕ್ಯಮಾ ರ‍್ಹವಾಲಾ ವಿಶ್ವಾಸಿಯೊನೆ ಕ್ಹಾರಾ ತೆ ಪ್ರೊತ್ಸಾಹ ಕರ‍್ಯೊ.

²⁴ ತೆ ಚೊ಼ಕೊ ವ್ಹೈ. ಪವಿತ್ರ ಆತ್ಮಾ ಕ್ಹು ಭರಲವಾಲೊ ವರಿ ಬರೊಕ್ಹಾಕ್ಹು ಭರಲವಾಲೊ ವ್ಹತ್ತೊ. ತಿನಾಹುತಿ ತ್ಯಾ ಐನ ಕ್ಹುದಾನು ಕೃಪಾನಾ ಕಾಮೊ ದೆಕ್ತಾಮಾ ಘನ್ನೊ ಖುಶಿ ಥಯೊ. ತುಮೆ ಘಟ್ಟ ಮನಸಕ್ಹು ಕರ್ತಾಮಾ ಹುಬ್ರೊ ಕೈನ ತ್ಯುನೊನೆ ಗ್ಯಾನ ಕದ್ಯೊ.

²⁵ ಪಾಚಲ್ತೊ ಬಾರ್ನಬ ಸೌಲಾನೆ ಹುಡಕ್ತೊ ತಾರ್ಸ ಗಾಮೆ ಗಯೊ.

²⁶ ಬಾರ್ನಬ ತ್ಯಾ ಸೌಲಾನೆ ಮಳಿನ ತಿನೆ ಅಂತಿಯೊಕ್ಯನೆ ಬಲೈಲಿನ ಗಯೊ. ಸೌಲಾ ವರಿ ಬಾರ್ನಬ ಅಂತಿಯೊಕ್ಯಮಾ ಯಕ್ಕ ವರಕ್ಹ ಪುರಾ ಸಭೆನಾ ಅನ್ಯುನ್ಯತೆಮಾ ರ‍್ಹೈನ ಘನ್ನಾ ಮನಕ್ಹೊನೆ ಬೊದನೆ ಕರ‍್ಯಾ. ಯೆಸುನಾ ಹಿಂಬಾಲಕೊನೆ "ಕ್ರೈಸ್ತರೊ "ಕವಾನು ನಾಮ ಆಯಲ ಅಂತಿಯೊಕ್ಯಮಾಜ಼ ವ್ಹೈ.

²⁷ ತೆ ಕಾಲಮಾ ದಕ್ಹಾ ಪ್ರವಾದಿಯೊ ಯೆರುಸಲೆಮತಾ ಅಂತಿಯೊಕ್ಯನೆ ಗಯಾ.

²⁸ ಎ ಪ್ರವಾದಿಯೊಮಾ "ಅಗಬ "ಕವಾಲೊ ಯಕ್ಲೊ ವ್ಹತ್ತೊ. ಅಗಬ ಅಂತಿಯೊಕ್ಯಮಾ ಪವಿತ್ರ ಆತ್ಮಾನಿ ಪ್ರೆರಣೆಕ್ಹು"ಪುರಾ ದುನಿಯಾನೆ ಮ್ಹೊಟಿ ಬರಾ ಆವಾನಿ ಛೆ "ಕದ್ಯೊ. ಎ ಬರಗಾಲ ಕ್ಲಾಡಿಯಸ್ ಚಕ್ರವತಿನಾ ಕಾಲಮಾ ಐಯುತು.

²⁹ ಯುದೆಯಮಾ ರ‍್ಹವಾನಾ ಭಾಯೊ ಭೆನೊನೆ ಮದತ ಕರಾನೆ ವಿಶ್ವಾಸಿಯೊ ನಿರ್ಧಾರ ಕರ‍್ಯಾ. ವಿಶ್ವಾಸಿಯೊಮಾ ಹರಯಕ್ಲಾ ತ್ಯುನೊನೆ ಥಯಲ ತೆಕ್ಲು ತ್ಯುನೊನೆ ವಳೈನ ದಿವಾನೆ ವಿಚಾರ ಕರ‍್ಯಾ.

³⁰ ತ್ಯುನೆ ದೊಕ್ಡಾ ಮಳೈನ ಬಾರ್ನಬ ವರಿ ಸೌಲಾನೆ ದಿದ್ಯಾ. ಪಾಚಾ಼ತಾ ಬಾರ್ನಬ ವರಿ ಸೌಲಾ ತಿನೆ ಲೈನ ಯುದೆಯಮಾ ರ‍್ಹಯಲ ಸಭೆನಾ. ಮ್ಹೊಟಾವೊನೆ ದಿದ್ಯಾ.