2 ಕೊರಿಂಥ 3 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಕ್ಹುದಾನಿ ಸೆವೆನಾ ಹುತಿ ನೈ ವಾತ

¹ ಹಮೊನೆ ಹಮೆಜ಼ ಘನ್ನಾ ಚೊ಼ಕಾ ವ್ಹೈ ಕೈನ ಕೈಲಿವಾಡ್ಯಾಸ ಸು? ನೈತೊ ಬಿಜಾ಼ವೊನೆ ದೆಕಾಡಾನಾ ಹುತಿ ಯೊಗ್ಯತಾ ಪತ್ರ ಹಮೊನೆ ಚಾ಼ಯೆ ಕೈನ ತುಮೊನೆ ಲಾಗಸ ಸು? ನೈತೊ ತೆ ಯೊಗ್ಯತಾ ಪತ್ರ ತುಮೊಕ್ಹು ಹಮೆ ಲ್ಯು ಸು?

² ಹಮೊನೆ ತುಮೆಜ಼ ತೆ ಯೊಗ್ಯತಾ ಪತ್ರ ವ್ಹೈ ತೆ ಪತ್ರ ಹಮಾರಾ ಮನಸೊಮಾ ಬರ್ದಲ ಛೆ ತೆ ಪತ್ರ ಕ್ಹಾರಾವೊನೆ ಗೊತ್ತ ಛೆ. ತೆ ಪತ್ರ ಕ್ಹಾರಾ ಒದಸ.

³ ತುಮೆ ಬಿ ತಿಮ್ಮಜ಼ ದೆಕಾಡೊಶಿ ಕಿಮ್ಮ ಕದ್ಯಾಮ ಕ್ರಿಸ್ತ ಹಮಾರಾ ಹತೆ ಬರ್ದಾಯಲ ಲಿಂಗತಜ಼. ತುಮೆ ಹಮಾರಿ ಸೆವಾನು ಫಲ ವ್ಹೈ. ತೆ ಪತ್ರ ಕ್ಹಾಲಿ ಮಸಿಕ್ಹು ಲಿಕ್ಕಲ ನವೈ. ಜುವ ರ‍್ಹಯಲ ಕ್ಹುದಾನಿ ಆತ್ಮಾಕ್ಹುಜ಼ ಬರ್ದಲ ವ್ಹೈ. ದಗ್ಡಾನಾ ಹಲಗಿಪರ ನೈ ಮನಕ್ಹನಾ ಮನಸನಾ ಹಲಗಿಪರ ಬರ್ದಲ ವ್ಹೈ.

⁴ ಹಮೊನೆ ಹವೊ ಬರೊಕ್ಹೊ ಕ್ರಿಸ್ತನಾ ಮುಲಕಜ ಕ್ಹುದಾಪರ ಛೆ.

⁵ ಹಮೊಕ್ಹುಜ಼ ಸುಬಿ ಥಯುಸ ಕವಾನೆ ಅಕ್ಲಾ ಹಮೆ ಲಾಯಕ ನತ್ತಿ. ಹಮೊನೆ ಯೊಗ್ಯತೆ ಆಯಲ ಕ್ಹುದಾಕ್ಹುಜ಼ ವ್ಹೈ.

⁶ ತೆ ನೌ ವಡಂಬಡಿಕೆನಾ ಸೆವಕೊ ಥಾವಾನೆ ತಾಕತ ಹಮೊನೆ ದಿದ್ಯೊಸ. ಆ ನೌ ವಡಂಬಡಿಕೆ ಲಿಖಿತ ರುಪನಾ ಲಿಂಗತ ನತ್ತಿ ಕ್ಹುದಾನಿ ಆತ್ಮಾನೆ ಸಂಬಂದ ರ‍್ಹಯಲವಾಲೊ ವ್ಹೈ. ಲಿಖಿತ ರುಪಮಾ ರ‍್ಹಯಲ ವಡಂಬಡಿಕೆ ಮೌತ ಲಾವಸ. ಕ್ಹುದಾನಿ ಆತ್ಮಾನೆ ಸಂಬಂದ ರ‍್ಹಯಲ ವಡಂಬಡಿಕೆ ಜುವ ದಿವಸ.

⁷ ದಗ್ಡಾ ಪರ ಬರ್ದಲ ಆ ಮೌತನೆ ಲಾವಾನು ಶಾಸನ ಘನ್ನು ಮಹಿಮಾಕ್ಹು ಭರಲ ವ್ಹತ್ತು. ತೆ ಮಹಿಮಾಕ್ಹು ಮೊಶೆನು ಮ್ಹೊಡಾ ಪರ ತೆ ಮಹಿಮಾ ವ್ಹತ್ತಿ ತೆ ಮಹಿಮಾ ದಕ್ಹಾ ದಿನ ಥಯಲ್ಪರ ಗೈ ಪಡಾನಿ ರ‍್ಹೈತಬಿ ತೆ ಮಹಿಮಾಕ್ಹು ಮೊಶೆನು ಮ್ಹೊಡು ದೆಕಾನೆ ಇಸ್ರಾಯೆಲ ಮನಕ್ಹೊನೆ ಥಯು ನೈ.

⁸ ತೆಜ಼ ಮಹಿಮಾ ತೆಕ್ಲಿ ರ‍್ಹಯಾರೆ ಕ್ಹುದಾನಿ ಆತ್ಮಾನೆ ಸಂಬಂದ ರ‍್ಹಯಲ ಆ ಸೆವಾ ಹಜು ಕೆಕ್ಲಿ ಮಹಿಮಾಕ್ಹು ಭರಲ ರ‍್ಹೌ?

⁹ ತಪ್ಪ ಕರಾಲಾನೆ ಫೈಸಲೊ ಕರಾನೆ ರ‍್ಹಯಲ ಸೆವಾಜ಼ ಮಹಿಮಾಕ್ಹು ಭರಲ ರ‍್ಹಯಾರೆ ಆ ನಿತಿನಿ ಸೆವಾ ಹಜು಼ನ ಕೆಕ್ಲಿಕಿ ಮಹಿಮಾಕ್ಹು ಭರಲ ರ‍್ಹೌ?

¹⁰ ಹಮ್ನಾ ಘನ್ನಿ ಮಹಿಮಾ ರ‍್ಹಯಲ ಸೆವಾ ಆಯಲಕ್ಹು ಪೈಲಾ ರ‍್ಹಯಲ ಸೆವಾನಿ ಮಹಿಮಾ ತಿನಾ ಕ್ಹಾಮಿ ಮಹಿಮಾ ನೈಸೊ ಥೈ.

¹¹ ಕ್ಹರಿಜಾ಼ವಾನಿ ಮಹಿಮಾಜ಼ ಅಕ್ಲಿ ಪ್ರಭಾವಕ್ಹು ಭರಲ ರ‍್ಹಯಾಮ ಕೆಳಾಮಾಬಿ ಹಮೆಶಾಬಿ ರ‍್ಹವಾನಿ ಮಹಿಮಾ ಹಜು಼ನ ಕೆಕ್ಲಿಕಿ ಜಾಸ್ತ ಪ್ರಭಾವಕ್ಹು ಭರಲ ರ‍್ಹೌ ನೈ?

¹² ಹಮೊನೆ ಅಕ್ಲೊ ಬರೊಕ್ಹೊ ರ‍್ಹಯಲ ಹುತಿಜ಼ ಹಮೆ ಅಕ್ಲಾ ಧೈರ್ಯಕ್ಹು ಛೆ.

¹³ ಅಪೆ ಮೊಶೆನಿಂಗತ ನತ್ತಿ. ಕುಂದಿ ಜಾ಼ವಾನಿ ಮಹಿಮಾ ಅಂತ್ಯಥಾನಾನು ಇಸ್ರಾಯೆಲನಾ ಮನಕ್ಹೊ ನೈ ದೆಕಲನಿಂಗತಮೊಶೆ ತಿನಾ ಮ್ಹೊಡಾನೆ ಘುಮುಸ ಘಾಲ್ಲಿದ್ಯೊ.

¹⁴ ತೆನೈಸೊ ತೆ ಮನಕ್ಹೊ ಗ್ಯಾನ ನೈಸೊವಾಲ ಥೈನ ತ್ಯುನೆ ಕಳೈಲಿದ್ಯಾ ನೈ. ತ್ಯುನೆ ಜುನ್ನು ವಡಂಬಡಿಕೆ ಒದತಾಮಾ ಹಜುನಬಿ ತೆಜ಼ ಘುಮುಸಮಾ ಕಳೈಲಿವಸ. ತೆ ಘುಮುಸ ಕಾಡ್ಯಾ ನೈ. ಕಾ ಕದ್ಯಾಮ ತೆ ಘುಮುಸ ಕ್ರಿಸ್ತಕ್ಹುಜ ಕಡಾವಸ.

¹⁵ ಹಜುನಬಿ ಮೊಶೆನು ಧರ್ಮಶಾಸ್ತ್ರ ಒದತಾಮಾ ತ್ಯುನಾ ಮನಸೊಬಿ ಮಂಡ ರ‍್ಹವಸ.

¹⁶ ತ್ಯುನೆ ಮನಸ ರ‍್ಹಯಲ ಪ್ರಭು ಬಗಲ ಫರ್ತಾಮಾಜ಼ ತೆ ಝಾಕಲ ಖುಲ್ಲಾ ಥಾವಸ.

¹⁷ ತೆ ರ‍್ಹಯಲ ಪ್ರಭು ಕ್ಹುದಾನಿ ಆತ್ಮಾ ವ್ಹೈ. ಕಿಜಾ಼ ಪ್ರಭುನಿ ಆತ್ಮಾ ರ‍್ಹವಸ ತ್ಯಾ ಬಿಡುಗಡೆ ರ‍್ಹವಸ.

¹⁸ ಅಪ್ನಾ ಮ್ಹೊಡಾ ಘುಮುಸಕ್ಹು ಝಕಾಯಾ ನತ್ತಿ. ಅಪ್ನಾ ಮ್ಹೊಡಾಪರ ಘುಮುಸ ನೈಸೊವಾಲಾ ಥಯಾಸ. ಪ್ರಭುನಿ ಮಹಿಮಾ ಅರಕ್ಹಾಮಾ ದಿಕ್ಹಾನಾ ಭೌಲಾನಿಂಗತ ಛೆ.ಪ್ರಭುಕ್ಹು ದಿಕ್ಹಾನಿ ಮಹಿಮಾ ಅಪೊನೆ ಘನ್ನಿ ಬದಲಾವಣೆ ಕರಿನ ತಿನಾನಿಂಗತಜ಼ ಕರಸ.ಎ ಕ್ಹಾರು ಕಾಮ ಕ್ಹುದಾನಿ ಆತ್ಮಾ ಥಯಲ ಪ್ರಭುನುಜ ವ್ಹೈ.