1 ಕೊರಿಂಥ 9 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಪೌಲಾ ಅದಿಕಾರ ನೈ ಚ಼ಲಾಯಲ

¹ ಮಿ ಆಜಾ಼ದ ಮನಕ್ಹ ನ್ಹವೈ ಸು? ಅಪೊಸ್ತಲ ನ್ಹವೈ ಸು? ಅಪ್ನಾ ಪ್ರಭು ಯೆಸುನೆ ದೆಕಲವಾಲೊ ನ್ಹವೈ ಸು? ಪ್ರಭುಮಾ ಮಿ ಸೆವಾ ಕರಲ ಫಲ ತುಮೆ ನ್ಹವೈ ಸು?

² ಬಿಜಾ಼ವೊನೆ ಮಿ ಅಪೊಸ್ತಲ ನ್ಹವೈತೊ ತುಮೊನೆ ಮಿ ಅಪೊಸ್ತಲಜ಼ ವ್ಹೈ. ಮಿ ಅಪೊಸ್ತಲ ವ್ಹೈ ಕವಾನೆ ಪ್ರಭುನೆ ಮಳಲವಾಲಾ ತುಮೆಜ಼ ಜಿವ್ತಾ ಸಾಕ್ಷಿಯೊ ವ್ಹೈ.

³ ಮನೆ ಪುಚ್ಚಾಲಾ ಮನಕ್ಹೊನೆ ಮಾರು ಜವಾಬ ಎಜ಼ ವ್ಹೈ;

⁴ ತುಮೊಕಂತು ಅನ್ನ ಪಾನಿ ಲಿವಾನೆ ಹಮೊನೆ ಹಕ್ಕ ನತ್ತಿ ಸು?

⁵ ಉಗ್ರಲ ಅಪೊಸ್ತಲೊ ಲಿಂಗತ, ಪ್ರಭುನಾ ಭಾಯೊ ಲಿಂಗತ, ಪೆತ್ರಾ ಲಿಂಗತ ಮಿಬಿ ಕ್ರಿಸ್ತಮಾ ಭೆನ ವಿಶ್ವಾಸಿ ಯಕ್ಲಿನೆ ಹಿವಾ ಕರಲಿನ ತಿನಾ ಕ್ಹಾತೆ ಜಿವ್ನಾ ಕರಾನೆ ಮನೆ ಹಕ್ಕ ನತ್ತಿ ಸು?

⁶ ಜ಼ಲಮನಾ ಹುತಿ ಬಾರನಬ ವರಿ ಮಿ ಯಕ್ಕಜ಼ ರಾಬಿನ ಜಿವ್ನಾ ಕರಾನೆ ಆಗನ್ಯಾ ದಿದ್ಯಾಸು?

⁷ ಕಯೊ ಸೈನಿಕ ಸ್ವಂತ ಖರಚ಼ ಕ್ಹು ಯುದ್ದನೆ ಹುಬ್ರಿವಸ? ಕಯಾ ಖೆತರವಾಲೊ ತಿನಾ ಸ್ವಂತ ದ್ರಾಕ್ಕಷಿನಾ ಖೆತರ ಮಾತೊ ದ್ರಾಕ್ಷಿನೊ ಫಲ ಖಾತೊ ನೈ ಸು? ಕಯೊ ಕುರಬುರ‍್ಯೊ ತೆ ರಾಕಲ ಬಕ್ರಿಯೊನು ದುದ್ದ ಪಿತೊ ನೈ ಸು?

⁸ ಎ ಕ್ಹಾಲಿ ದುನಿಯಾ ಕವಾನಿಯೊ ವಾತೊ ನ್ಹವೈ. ಧರಮಶಾಸ್ತ್ರ ಎ ತಿಳ್ಸಾವಸ.

⁹ "ಮಾತಿ ಖುಂದಾನೆ ಬೈಲನು ಮ್ಹೊಡು ಭಾಂದು ನಕೊ" ಕೈನ ಮೊಶೆನಾ ಧರ್ಮಶಾಸ್ತ್ರಮಾ ಬರ್ದಲ ಛೆ. ನ್ಹ್ಯಾ ಕ್ಹುದಾನೆ ಬೈಲ ಪರ ಚಿಂತಾ ಛೆಸು? ನತ್ತಿ.

¹⁰ ಇನೆ ಅಪ್ನಾ ಹುತಿ ಕದಲ ನ್ಹ ವ್ಹೈಸು? ತೆಜ಼ ಉದ್ದೆಶಕ್ಹು ಬರ್ದಲ ಛೆ. ಹೊ, ಬಿತ್ತಾಲೊ ವರಿ ಕಾಟಾಲೊ ಆಯಲ ಬೆಳೆಮಾ ವಾಟೊ ಲಿವಾನಾ ಉದ್ದೆಶಕ್ಹುಜ಼ ರಾಬಸ.

¹¹ ತುಮೊಮಾ ಆತ್ಮಿಕ ಬಿಯ್ಯಾ ಬಿತ್ತಲ ಹಮೆ ಪ್ರತಿಫಲಕ್ಹು ದಿನ್ನೆನಾ ಚಾ಼ಯೆ ಥಯಲ ಆಸ ಕರಾನು ಘನ್ನು ಥೈಯು ಸು?

¹² ಬಿಜಾ಼ವೊನೆ ತುಮೊ ಪರ ಹವೊ ಹಕ್ಕ ರ‍್ಹಯಾಮ ತಿನಾತಿ ಹೆಚ್ಚ ಹಕ್ಕ ಹಮೊನೆ ರ‍್ಹೌ ನೈ? ತೆನೈಸೊ ಹಮೆ ಹಕ್ಕ ಚ಼ಲಾಯಾ ನೈ. ತಿನಾ ಬದಲ, ಕ್ರಿಸ್ತ ಯೆಸುನಾ ಸುವಾರತೆನೆ ಕೈಜ಼ ಅಡ್ಡಿ ಆಯೆ ನೈಸೊ ಕ್ಹಾರುಬಿ ತಡ್ದಿಲಿದ್ಯಾ.

¹³ ದೆವಾಲಯಮಾ ರ‍್ಹವಾಲಾ ದೆವಾಲಯನಿ ಆದಾಯಕ್ಹು ಜಿವ್ನಾ ಕರಸ. ಬಲಿನಾ ಕಟ್ಟಾ ಕನ ಸೆವೆ ಕರಾಲಾ ಬಲಿ ಚ಼ಡಾಯಲಮಾನು ಪಾಲ ಲಿವಸ. ಎ ತುಮೊನೆ ಗ್ವತ್ತ ಛೆ.

¹⁴ ತಿನಾ ಲಿಂಗತ ಸುವಾರ್ತೆ ಪ್ರಚಾರ ಕರಾಲಾ ಸುವಾರ್ತೆ ಪ್ರಚಾರನಾ ಆದಾಯಕ್ಹು ಜಿವ್ನಾ ಕರು ಕೈನ ಪ್ರಭುಜ಼ ಆಗನ್ಯಾ ದಿದ್ಯೊಸ.

¹⁵ ಮಿ ತುಬಿ ಎ ಹಕ್ಕೊಮಾ ಯಕ್ಕಬಿ ಚ಼ಲಾಯೊ ನೈ. ಚ಼ಲೌ ಕವಾನಿ ಉದ್ದೆಶಕ್ಹು ಎ ಬರ್ದಾಡ್ಯೊಸ ನತ್ತಿ. ತಿನಾತಿ ಮರಾನುಜ಼ ಚೊ಼ಕು ವ್ಹೈ. ಎ ಮಾರಿ ಹೆಮ್ಮೆನೆ ಕುನ್ನಜ಼ ನೈ ಬೊಲಸಕ್ತಾ.

¹⁶ ಸುವಾರ್ತೆ ಪ್ರಚಾರ ಕರಾಡ್ಯೊಸ ಕೈನ ಕೊಚ್ಚಿ ಲಿವಾನೆ ಮನೆ ಮೌಕೊ ನತ್ತಿ. ಕಾಕದ್ಯಾಮ, ಪ್ರಚಾರ ಕರುಜ಼ ಕವಾನಾ ಕರ್ತವ್ಯ ಪರ ಮಿ ಘಟ್ಟ ಛೆ. ಪ್ರಚಾರ ನೈ ಕರ‍್ಯೊಮ ಮನೆ ಅದಿಕಾರ ರ‍್ಹವಾದೆ!

¹⁷ ಮಿ ಸ್ವಂತ ಇಷ್ಟಾಕ್ಹು ಎ ಕಾಮ ಕರ‍ಲ ರ‍್ಹವತ್ತೊ ಕರೆಟ್ಟ ಇನಾಮ ದಿದ್ಯಾ. ತೆನೈಸೊ ಎ ಕಾಮ ಮನೆ ದಿದಲ ವ್ಹೈ ತಿನಾಹುತಿ ಕರತವ್ಯಕ್ಹು ಕರಾಡ್ಯೊಸ.

¹⁸ ತಿಮ್ಮ ರ‍್ಹಯಮ ಮನೆ ಮಳಾನು ಇನಾಮ ಸುವೈ? ಸುವಾರ್ತೆ ಕತಾಮಾ ಜಿವ್ನಾ ಕರಾನೆ ಮನೆ ರ‍್ಹವಾನು ಹಕ್ಕ ಉಪಯೊಗ ಕರ‍್ಯಾವಾಚಿ ಫ್ರಿಮಾ ಕವಾನು ನಸಿಬಜ಼ ಮಾರು ಪಗಾರ ವ್ಹೈ.

¹⁹ ಮಿ ಸ್ವತಂತ್ರ ವ್ಹೈ, ಕಿನೆಜ಼ ಗುಲಾಮ ನ್ಹವ್ಹೈ. ರ‍್ಹೈತಬಿ ಥಯಲ ತೆಕ್ಲಾ ಮನಕ್ಹೊನೆ ರಕ್ಷಣೆ ಮಾರಗಮಾ ಲಾವಾನೆ ಕೈನ ಕ್ಹಾರಾವೊನೆ ಗುಲಾಮ ಥಯೊ.

²⁰ ಯಹುದಿಯೊನೆ ರಕ್ಷಣೆ ಮಾರಗಮಾ ಲಾವಾನೆ ಯಹುದಿಯೊನೆ ಯೆಹುದಿ ಥಯೊ. ಧರ್ಮಶಾಸ್ತ್ರನೆ ಚಾ಼ಲಿನ ಜಾ಼ವಾಲಾವೊನೆ ರಕ್ಷಣೆ ಮಾರಗಮಾ ಲಾವಾನೆ ಮಿ ತೆ ಧರ್ಮಶಾಸ್ತ್ರನೆ ನೈ ಚಾ಼ಲಾಲೊ ರ‍್ಹೈತುಬಿ ತ್ಯುನಾ ಹುತಿ ಚಾ಼ಲಾಲೊ ಥಯೊ.

²¹ ಧರಮಶಾಸ್ತ್ರತಾ ಭಾರಾ ರ‍್ಹಯಲವಾಲಾವೊನೆ ರಕ್ಷಣೆ ಮಾರಗಮಾ ಲಾವಾನೆ ಮಿ ಧರಮಶಾಸ್ತ್ರನಾ ಭಾರೊ ರ‍್ಹಯಲ ಲಿಂಗತ ಥಯೊ. ಯೆಸು ಕ್ರಿಸ್ತನಾ ನಿಯಮನೆ ವಿದೆಯ ಥಯಲ ಹುತಿ ಕ್ಹುದಾನಾ ನಿಯಮನೆ ಮಿ ಭಾರೊ ರ‍್ಹಯಲವಾಲೊ ನ್ಹವ್ಹೈ.

²² ಬರೊಕ್ಹಾಮಾ ಕಮ ಜೊ಼ರ ರ‍್ಹಯಲವಾಲಾವೊನೆ ರಕ್ಷಣೆ ಮಾರಗಮಾ ಲಾವಾನೆ ಮಿ ಕಮಜೊ಼ರ ಥಯೊ. ಕಿಮ್ಮ ತುಬಿ, ದಕ್ಹಾ ಜ಼ನಾವೊನೆ ತುಬಿ ಉದ್ದಾರ ಕರಾನೆ ಕ್ಹಾರಾವೊನೆ ಕ್ಹಾರುಜ಼ ಥಯೊ.

²³ ಸುವಾರ್ತೆನಾ ಸೌಭಾಗ್ಯಮಾ ಪಾಲ ಲಿವಾಲೊ ಥೌ ಕೈನ ಎ ಕ್ಹಾರುಜ಼ ಸುವಾರ್ತೆನಾ ಹುತಿಜ಼ ಕರುಸ.

²⁴ ತುಮೊನೆ ಗ್ವತ್ತ ರ‍್ಹಯಲ ಲಿಂಗತ ಮೈದಾನಮಾ ಘನ್ನಾ ಜ಼ನಾ ನ್ಹಾಟಾನಾ ಕ್ಹೆಲಮಾ ಭಾಗ ಲೆತಾ ನೈಸು? ತೆನೈಸೊ ಪಸ್ಟ ಬಹುಮಾನ ಮಳಾನು ಯಕ್ಲಾನೆಜ಼ ವ್ಹೈ. ತಿನಾಹುತಿ ಬಹುಮಾನ ಲಿವಾನೆ ತುಮೆಬಿ ನ್ಹಾಟೊ.

²⁵ ಖೆಲ ಖೆಲಾನೆ ಆಯಲವಾಲಾ ಕ್ಹಾರಾ ತ್ಯುನೊನೆ ಹತೊಟಿಮಾ ಮ್ಹೆಲ್ಲಿವಸ. ನಾಶ ಥಾವಾನಾ ಬಹುಮಾನ ಲಿವಾನಾಹುತಿ ಕೊಶಿಶ ಕರಸ. ಅಪೆ ತುಬಿ ಹಮೆಶಾನು ಬಹುಮಾನ ಲಿವಾನಾ ಹುತಿ ರಾಬಿಯೆಸ.

²⁶ ಮಿ ತುಬಿ ಗುರಿ ಗ್ವತ್ತ ನೈಸೊ ನ್ಹಾಟತೊ ನೈ, ವಾರಾನಾ ಕ್ಹಾತೆ ಗುದ್ಯಾಡಾಲಾವೊನಾ ಲಿಂಗತ ಹೊರಾಡತೊ ನೈ.

²⁷ ಬಿಜಾ಼ವೊನೆ ಬಲೈನ ಮಿಜ಼ ನಾ ಕಾಬಿಲ ಲಿಂಗತ, ಮಾರಾ ಅಂಗನೆ ರಬಾಡಿನ, ಮನೆ ಮಿಜ಼ ಹತೊಟಿಮಾ ಮ್ಹೆಲ್ಯುಸ.