1 ಕೊರಿಂಥ 7 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಹಿವಾನಾ ಹುತಿ ಬೊದನೆ

¹ ತುಮೆ ಬರ್ದಿನ ಐಕಲ ವಿಷಯನಾ ಹುತಿ ಮಿ ಕವಾನು ಸು ವ್ಹೈ ಕದ್ಯಾಮ; ಯಕ್ಕ ಮನಕ್ಹ ಬಾಕ್ಡಿನಾ ಕ್ಹಾತೆ ಲೈಂಗಿಕ ಸಂಪರ್ಕ ನೈ ಮ್ಹೆಲ್ಲಿವಾನು ಚೊ಼ಕು ವ್ಹೈ.

² ತೆನೈಸೊ ಲೈಂಗಿಕ ಪಾಪ ಘನ್ನು ಕೆಟ್ಟ ವ್ಹೈ. ತಿನಾಹುತಿ ಹರ ಯಕ್ಲಾ ದಾಣಗಾನೆ ತಿನಿ ಸ್ವಂತ ಬೈಕೊ ರ‍್ಹಯಾಮ ವರಿ ಹರಯಕ್ಕ ಬಾಕ್ಡಿನೆ ತಿನೊ ಸ್ವಂತ ಮಾಟಿ ರ‍್ಹಯಾಮ ಚೊ಼ಕು ವ್ಹೈ.

³ ಮಾಟಿ ತಿನಿ ಬೈಕೊನೆ ಮಾಟಿ ಬೈಕೊನಾ ಬಾಳ್ಯೊನೆ ಚಾ಼ಯೆ ಥಯಲ ಕ್ಹಾರುಜ಼ ದಿವಾದೆ. ವರಿ ಬೈಕೊ ಮಾಟಿನೆ ಮಾಟಿ ಬೈಕೊನಾ ಬಾಳ್ಯೊನೆ ಚಾ಼ಯೆ ಥಯಲ ಕ್ಹಾರು ಕರಾದೆ.

⁴ ಬೈಕೊನೆ ತಿನಾ ಅಂಗ ಪರ ಅದಿಕಾರ ನತ್ತಿ. ತೆನೈಸೊ ಮಾಟಿನೆ ತೆ ಅಂಗಪರ ಅದಿಕಾರ ಛೆ. ತಿನಾ ನಿಂಗತಜ ಮಾಟಿನೆ ತಿನಾ ಅಂಗ ಪರ ಅದಿಕಾರ ನತ್ತಿ. ತೆನೈಸೊ ಬೈಕೊನೆ ತೆ ಅಂಗಪರ ಅದಿಕಾರ ಛೆ.

⁵ ತಿನಾಹುತಿ ಮಾಟಿ ಬೈಕೊ ಯಕ್ಕನೆ ಯಕ್ಕ ದಾಂಪತ್ಯನಾ ಕಾಮೊ ಕರಾನೆ ಇನ್ಕಾರು ನೈ. ಧ್ಯಾನ, ಪ್ರಾಥನಾ ಕರಾಮಾ, ದಕ್ಹಿಯೆಳ ಯಕ್ಕನೆ ಯಕ್ಲಾ ದುರ ರ‍್ಹೆ ಸಕಸ, ತೆನೈಸೊ ತಿನೆ ಯಕ್ಕನೆ ಯಕ್ಕ ವಪ್ಪಗಿ ರ‍್ಹೌ. ತೆ ಥಯಲ ಪರ ಯಕ್ಕ ಥೌ. ನೈ ಥಯಾರೆ, ತುಮೊಮಾ ಹೊಂದಾಣಕಿ ನೈ ರ‍್ಹಯಲ ದೆಕಿನ ಸೈತಾನ ಶೊದನೆಮಾ ಪಾಡಸಕಸ.

⁶ ಮಿ ಕದಲ ಎ ಆಗನ್ಯಾ ನ್ಹವೈ, ಇಜಾಜ಼ತ ವ್ಹೈ.

⁷ ಕ್ಹಾರಾಬಿ ಮಿ ರ‍್ಹಯಲ ಲಿಂಗತ ರ‍್ಹೌ ಕೈನ ಮಾರು ಆಸ ವ್ಹೈ. ತೆನೈಸೊ ಕ್ಹುದಾ ಹರ ಯಕ್ಲಾನೆ ಖಾಸ ವರಾ ದಿದ್ಯೊಸ. ಯಕ್ಲಾನೆ ಯಕ್ಕ ವರಾ ರ‍್ಹಯಾಮ, ಬಿಜೆ಼ಕ್ಲಾನೆ ಬಿಜೆ಼ಕ ವರಾ ಛೆ.

⁸ ನೈ ಹಿವಾ ಥಯಲವಾಲಾವೊನೆ ವರಿ ರಾಂಡಿಯೊನೆ ಮಾರಿ ಗ್ಯಾನನಿ ವಾತ ಕೈ ವ್ಹೈ ಕದ್ಯಾಮ; ಮಿ ಯಕ್ಲೊಜ ರ‍್ಹಯಲ ನಿಂಗತ ತ್ಯುನೆ ರ‍್ಹವಾನು ತ್ಯುನೊನೆ ಚೊ಼ಕು ವ್ಹೈ.

⁹ ತ್ಯುನೊನೆ ಸಬರ ನೈ ರ‍್ಹಯುರೆ ಹಿವಾ ಕರಿಲಿವಾದೆ. ಅಂಗನಿ ಆಸನಿ ಆಗಕ್ಹು ಬಳಿನ ಮರಾತಿ ಹಿವಾ ಕರಿಲಿವಾನು ಚೊ಼ಕು ವ್ಹೈ.

¹⁰ ಹಿವಾ ಥಯಲವಾಲಾವೊನೆ ಮಾರಿ ಯಕ್ಕ ಆಗನ್ಯಾ; ಕ್ಹರಿಬಿ ತೆ ಮಾರಿ ನ್ಹವೈ, ಪ್ರಭುನಿ ಆಗನ್ಯಾ ವ್ಹೈ. ಬೈಕೊ ತಿನಾ ಮಾಟಿನೆ ಛೊಡಿಪಡು ನೈ.

¹¹ ಯಕ್ಕೆಳೆ ಛೊಡಿನ ಗೈಮ ವರಿ ಹಿವಾ ಕರಿಲಿವ ನೈ. ನೈತೊ, ತಿನಾ ಮಾಟಿನಾ ಕ್ಹಾತೆ ಯಕ್ಕ ಥಾವಾದೆ. ತಿನಾ ನಿಂಗತಜ಼ ಮಾಟಿ ತಿನಿ ಬೈಕೊನೆ ಛೊಡಿಪಡು ನೈ.

¹² ಉಗ್ರಲ ಕ್ಹಾರಾವೊನೆ ಮಿ ಕವಾನು ಸು ವ್ಹೈ ಕದ್ಯಾಮ; ಎ ಸಂಗತಿಯೊ ಕವಾಲೊ ಮಿಜ಼ ವ್ಹೈ, ಪ್ರಭು ನ್ಹವೈ; ಕ್ರಿಸ್ತಮಾ ಯಕ್ಕ ಭೈನೆ ಕ್ರಿಸ್ತವಿಶ್ವಾಸಿ ನೈ ರ‍್ಹಯಲ ಬೈಕೊ ರ‍್ಹೈಮ, ತೆ ತಿನಾ ಕ್ಹಾತೆ ಜಿವ್ನಾ ಕರಾನೆ ಒಪ್ಪಿಮ, ತೆ ಬೈಕೊನೆ ತಲಾಕ ದಿವ್ ನೈ.

¹³ ತಿನಾ ನಿಂಗತ ಯಕ್ಲಿ ಬಾಕ್ಡಿನೆ ಕ್ರಿಸ್ತಮಾ ಬರೊಕ್ಹೊ ನೈ ಮ್ಹೆಲೆಲ ಮಾಟಿ ರ‍್ಹಯಮ ತೆ ತಿನಾ ಕ್ಹಾತೆ ಬಾಳ್ಯೊ ಕರಾನೆ ಒಪ್ಪಿಲಿದ್ಯಾಮ, ತೆ ತಿನೆ ತಲಾಕ ದಿವ್ ನೈ.

¹⁴ ಕಾಕದ್ಯಾಮ ಕ್ರಿಸ್ತಮಾ ಬರೊಕ್ಹೊ ನೈ ಮ್ಹೆಲಲ ಮಾಟಿ ತಿನಾ ಬೈಕೊಕ್ಹು ಕ್ಹುದಾನಾ ಮನಕ್ಹೊಮಾ ಸಂಬಂದ ಪಡಲವಾಲೊ ಥಯೊ. ತಿನಾನಿಂಗತಜ಼ ಕ್ರಿಸ್ತಮಾ ಬರೊಕ್ಹೊ ನೈ ಮ್ಹೆಲಲ ಬೈಕೊ ತಿನಾ ಮಾಟಿಕ್ಹು ಕ್ಹುದಾನಾ ಮನಕ್ಹೊಮಾ ಸಂಬಂದ ಪಡಲವಾಲಿ ಥೈ. ತಿಮ್ಮ ನೈ ರ‍್ಹಯಾಮ ತಿನಾ ಬಚ್ಚಾ ಅಪವಿತ್ರ ಥಾತಾತಾ. ಹಮ್ನಾ ತುಬಿ ತ್ಯುನೆ ಕ್ಹುದಾನಾ ಮನಕ್ಹೊಮಾ ಮಳಲವಾಲಾ ಥಯಾಸ.

¹⁵ ಯಕ್ಕೆಳೆ, ಕ್ರಿಸ್ತ ವಿಶ್ವಾಸಿ ನೈ ರ‍್ಹಯಲ ಬೈಕೊ ರ‍್ಹವಾದೆ, ಮಾಟಿ ರ‍್ಹವಾದೆ ಜು಼ದಾ ಥೌಸ ಕದ್ಯಾಮ ತ್ಯುನೆ ಥಾವಾದೆ. ಹೆವಾ ಟೈಮಮಾ ಕ್ರಿಸ್ತಮಾ ರ‍್ಹಯಲ ಭೈ ರ‍್ಹವಾದೆ, ಭೆನ ರ‍್ಹವಾದೆ ಹಿವಾನಾ ಬಂಧನಮಾ ನತ್ತಿ. ಕಾ ಕದ್ಯಾಮ, ಕ್ಹುದಾ ತುಮೊನೆ ಶಾಂತಿ ಸಮಾಧಾನಕ್ಹು ರ‍್ಹವಾನೆ ಬಲಾಯೊಸ.

¹⁶ ತೆನೈಸೊ ಬಾಕ್ಡಿಜ಼ ಕ್ರಿಸ್ತ ವಿಶ್ವಾಸಿ ನೈ ರ‍್ಹಯಲ ತಾರಾ ಮಾಟಿನೆ ಉದ್ದಾರ ಕರುಸ ಕೈನ ಕಿಮ್ಮ ಕಶಿ? ಮಾಟಿ, ಕ್ರಿಸ್ತ ವಿಶ್ವಾಸಿ ನೈ ರ‍್ಹಯಲ ತಾರಿ ಬೈಕೊನೆ ಉದ್ದಾರ ಕರುಸ ಕೈನ ಕಿಮ್ಮ ಕಶಿ?

ಕ್ಹುದಾನಿ ಚಿತ್ತನಿಂಗತ ಜಿವ್ನಾ ಕರೊ

¹⁷ ಕ್ಹುದಾ ಬಲಾಯಲನೆ ವರಿ ಪ್ರಭು ದಿದಲ ವರದಾನೊನೆ ಸರಿಸಮಾನ ಹರ ಯಕ್ಲೊ ಜಿವ್ನಾ ಕರಾದೆ. ಕ್ಹಾರಾ ಸಭೆನೆ ಮಿ ಎಜ಼ ಕೌಸ.

¹⁸ ಸುನ್ನತಿ ಕರೈಲಿದಲವಾಲಾನೆ ಕ್ಹುದಾನೊ ಬುಲಾವೊ ಆಯಲ ರ‍್ಹಯಮ ತೆ ಸುನ್ನತಿ ಕರೈ ಲಿದಲನೆ ಚಿಂತಾ ಕರಾನಿ ಜ಼ರುರತ ನತ್ತಿ. ಸುನ್ನತಿ ನೈ ಕರೈ ಲಿದಲವಾಲಾನೆ ಕ್ಹುದಾನೊ ಬುಲಾವೊ ಆಯಲ ರ‍್ಹಯಮ ತೆ ಸುನ್ನತಿ ಕರಾವಾನಿ ಜ಼ರುರತ ನತ್ತಿ.

¹⁹ ಸುನ್ನತಿ ಕರೈ ಲಿವಾನು ವರಿ ನೈ ಕರೈ ಲಿವಾನು ಖಾಸ ನತ್ತಿ. ಕ್ಹುದಾನಾ ಆಗ್ಯ್ನಾನೆ ವಿಧೆಯ ಥೈನ ರ‍್ಹವಾನು ಖಾಸ ವ್ಹೈ.

²⁰ ಕ್ಹುದಾ ಬಲಾಯಲ ಟೈಮಮಾ ಯಕ್ಲೊ ಕಯಾ ಸ್ಥಿತಿಮಾ ವ್ಹತ್ತೊ ತೆಜ಼ ಸ್ಥಿತಿಮಾ ಅಗೊ ಬಡಾದೆ.

²¹ ಕ್ಹುದಾ ಬಲಾತಾಮಾ ತು ಗುಲಾಮ ಗಿರಿಮಾ ವ್ಹತ್ತೊ ಸು? ಚಿಂತಾ ನಕೊ ಕರು. ತೆನೈಸೊ ಆಜಾ಼ದ ಥಾವಾನೆ ಮೌಕೊ ಮಳಲ ಟೈಮಮಾ ತು ಆಜಾದ ಥಾ.

²² ಪ್ರಭು ಬಲಾಯಲವಾಲೊ ಗುಲಾಮ ರ‍್ಹಯೊ ತುಬಿ ಪ್ರಭುಮಾ ತೆ ಆಜಾ಼ದ ವ್ಹೈ. ತಿನಾಹುತಿ ಆಜಾ಼ದ ಥಯಲವಾಲಾನೆ ಕ್ರಿಸ್ತ ಯೆಸು ಬಲಾಯಲ ರ‍್ಹಯಮ ತೆ ಕ್ರಿಸ್ತ ಯೆಸುನೊ ಗುಲಾಮ ಥಾವಸ.

²³ ತುಮೊನೆ ಕಿಮ್ಮತ ದಿನ್ನ ಲಿದಲ ವ್ಹೈ. ತಿನಾಹುತಿ ಮನಕ್ಹೊನೆ ಗುಲಾಮೊ ಥಾವೊ ನಕೊ.

²⁴ ಮಯಾನಾ ಭಾಯೊ ಭೆನೊ, ಕ್ಹುದಾ ಬಲಾತಾಮಾ ಕಯಾ ಸ್ಥಿತಿಮಾ ವ್ಹತ್ತೊ ತೆಜ಼ ಸ್ಥಿತಿಮಾ ಕ್ಹುದಾನಾ ಕ್ಹಾತೆ ನವಾ ಜಿವನಮಾ ಅಗೊ ಬಡಾದೆ.

ಹಿವಾ ಕರ್ಲಿವಾನಾಹುತಿ ಪ್ರಶ್ನೆ

²⁵ ಹಿವಾ ನೈ ಕರಿಲಿದಲ ಮನಕ್ಹೊನಾ ಹುತಿ ಹಮ್ನಾ ಮಿ ಬರ್ದಾಡೊಸ. ಇನಾಹುತಿ ಪ್ರಭುಕ್ಹು ಆಯಲ ಕಯುಜ಼ ನಿಯಮ ಮಕನ ನತ್ತಿ. ಪ್ರಭುನಿ ಕೃಪಾಕ್ಹು ಬರೊಕ್ಹಾನೆ ಯೊಗ್ಯ ಥಯಲ ಮನಕ್ಹ ನಿಂಗತ ಮಾರಾ ವಿಚಾರೊ ತುಮಾರಾ ಕ್ಹಾಮೊ ಮ್ಹೆಲುಸ.

²⁶ ಆಜ಼ನಿ ಎ ಪರಿಸ್ಥಿತಿಮಾ ಯಕ್ಲೊ ತೆ ರ‍್ಹಯಲ ಸ್ಥಿತಿಮಾಜ಼ ರ‍್ಹವಾನು ಚೊ಼ಕು ವ್ಹೈ ಕೈನ ವಿಚಾರ ಕರುಸ.

²⁷ ತುನೆ ಬೈಕೊ ಛೆ ಸು? ಹಿವಾ ತೊಡಾನೆ ಕೊಶಿಶ ಕರು ನಕೊ. ತು ಹಿವಾ ನತ್ತಿ ಕರಿಲಿದ್ಯೊ ಸು? ಹಿವಾ ಕರಿಲಿವಾನೆ ಗಡಬಡ ಕರು ನಕೊ.

²⁸ ತಿಮ್ಮ ಸುತಬಿ ತು ಹಿವಾ ಕರಿಲಿದ್ಯೊಮ ತೆ ಪಾಪ ನ್ಹವೈ. ತಿನಾ ಲಿಂಗತಜ಼, ಹಿವಾ ನೈ ಕರಿಲಿದಲ ಯಕ್ಕ ಬಾಕ್ಡಿ ಹಿವಾ ಕರಿಲಿದಿಮ ತೆ ಪಾಪ ನ್ಹವೈ. ತೆನೈಸೊ ಹಿವಾ ಕರಿಲಿದಲ ವಾಲಾವೊನೆ ತ್ರಾಸೊ ಘನ್ನಾ ವ್ಹೈ. ತೆ ಕ್ಹಾರು ತುಮೊನೆ ತ್ರಾಸ ಕರು ನೈ ಕವಾನುಜ಼ ಮಾರು ಆಸ ವ್ಹೈ.

²⁹ ಮಯಾನಾ ಭಾಯೊ ಭೆನೊ, ಮಾರಿ ವಿಚಾರ ಆ ವ್ಹೈ; ಉಗ್ರಲ ಟೈಮ ದಕ್ಹೊಜ಼ ಛೆ. ತಿನಾಹುತಿ ಹಿವಾ ಕರಿಲಿದಲವಾಲಾ ಹಿವಾ ನೈ ಕರಿಲಿದಲವಾಲಾ ಲಿಂಗತ ರ‍್ಹವೊ.

³⁰ ದುಖ ರ‍್ಹಯಲವಾಲಾ ನೈ ದುಖ ರ‍್ಹಯಲವಾಲಾ ಲಿಂಗತ, ಖುಶಿಕ್ಹು ರ‍್ಹಯಲವಾಲಾ ಖುಶಿಕ್ಹು ನೈ ರ‍್ಹಯಲವಾಲಾ ಲಿಂಗತ ವರಿ ಲಿದಲವಾಲಾ ಲಿದಲ ತ್ಯುನು ನ್ಹವೈ ಕೈನ ರ‍್ಹವಾದೆ.

³¹ ದುನಿಯಾನಿ ವ್ಯವಹಾರಮಾ ರ‍್ಹವಾಲಾ ತಿಮಾಜ಼ ರ‍್ಹೌ ನೈ. ಕಾಕದ್ಯಾಮ, ದುನಿಯಾಮಾನು ಕ್ಹಾರು ಹಾಳ ಥೈನ ಜಾ಼ವಸ.

³² ತುಮೆ ಚಿಂತಾ ಬಗರ ರ‍್ಹೌ ಕೈನ ಮಾರಿ ಆಸ ವ್ಹೈ. ಹಿವಾ ನೈ ಕರಿಲಿದಲವಾಲೊ ಪ್ರಭುನಿ ಸೆವಾಮಾ ರ‍್ಹವಸ; ಪ್ರಭುನೆ ಖುಶಿ ಕರಾನೆ ಕಾಮ ಕರಸ.

³³ ಹಿವಾ ಕರಿಲಿದಲವಾಲೊ ದುನಿಯಾನಿ ವ್ಯವಹಾರಮಾ ಹೊಕ್ಯಲ ರ‍್ಹವಸ. ತೆ ತಿನಿ ಬೈಕೊನೆ ಖುಶಿ ಕರಾನೆ ಕೊಶಿಶ ಕರಸ.

³⁴ ತೆ ಮನಕ್ಹ ತಿನಿ ಬೈಕೊನೆಬಿ ವರಿ ಪ್ರಭುನೆ ಮೆಚ್ಚಿಸಾನಾ ಹುತಿ ವಿಚಾರ ಕರು ಲಾಗಸ. ಹಿವಾ ನೈ ಕರಿಲಿದಲ ಬಾಕ್ಡಿ ನೈತೊ ಛೊಕ್ರಿ ಪ್ರಭುನಿ ಸೆವಾಮಾ ಕೆಳಾಮಾಬಿ ರ‍್ಹವಸ. ಅಂಗ ಆತ್ಮಾ ಭಂಬಿ ಪ್ರಭುನೆ ಮ್ಹೆಲಸ. ತೆನೈಸೊ ಹಿವಾ ಕರಿಲಿದಲ ಬಾಕ್ಡಿ ದುನಿಯಾನಿ ವ್ಯವಹಾರಮಾ ಪಡಲ ರ‍್ಹವಸ. ತಿನಾ ಮಾಟಿನೆ ಖುಶಿ ಕರಾನೆ ಕೊಶಿಶ ಕರಸ.

³⁵ ತುಮೊನೆ ಸಹಾಯ ಥಾವಾದೆ ಕೈನ ಎ ಸಂಗತಿಯೊ ಕವಾಡೊಸ. ಮಿ ತುಮೊನೆ ಭಾಂದಾನೆ ಕೊಶಿಶ ನತ್ತಿ ಕರಾಡೊ. ತೆನೈಸೊ ತುಮೆ ಚೊ಼ಕಿ ವಾಟಮಾ ರ‍್ಹೌ ಕೈನ ಮಾರಿ ಆಸ ವ್ಹೈ. ತುಮೆ ತುಮಾರೊ ಟೈಮ ಬಿಜಾ ಕಾಮೊನೆ ದಿದ್ಯಾವಾಚಿ ತುಮೆ ಪುರಾ ಪ್ರಭುನಿ ಸೆವಾ ಕರು ಕೈನ ಮಾರಿ ಆಸ ವ್ಹೈ.

³⁶ ತಿನಿ ದಿಕ್ರಿನು ಹಿವಾನಿ ವೈಸ ಥೈನ ಜಾ಼ವಾನೆ ದಿವಾನು ಚೊ಼ಕು ನ್ಹವೈ ಕೈನ, ತಿನೆ ಹಿವಾ ಕರಾನು ಜರುರಿ ವ್ಹೈ ಕೈನ ಯಕ್ಲೊ ವಿಚಾರ ಕರ‍್ಯೊಮ, ತೆ ತಿನಿ ಇಛಾ ನಿಂಗತ ಕರಾದೆ. ತೆ ತ್ಯುನೊನೆ ಹಿವಾ ಕರಿನ ದಿವಾದೆ. ತೆ ಪಾಪ ನ್ಹವೈ.

³⁷ ತೆನೈಸೊ ತೆ ಕಿನಾಜ಼ ಜ಼ಬರದಸ್ತಿಕ್ಹು ನೈ ಐಕ್ಯೊಮ ಗಟ್ಟ ಮನಸ್ಸ ಕರಿಲಿದಲ ರ‍್ಹಯಮ, ತಿನಾ ಕ್ಹಾತೆ ನಾತ್ರು ಘಟ್ಟ ಥಯಲ ಛೊಕ್ರಿನಾ ಕ್ಹಾತೆ ಹಿವಾ ಕರಿಲಿವಾನು ನಕೊ ಕೈನ ಪೈಸ್ಲೊ ಕರಿಲಿದಲ ರ‍್ಹಯಮ ವರಿ ತಿನಾ ಖುದ್ದಕ್ಹು ಹತೊಟಿಮಾ ರ‍್ಹಯೊಮ ತೆ ತಿನಾ ನಿಂಗತಜ಼ ಕರಾದೆ. ಇಮ್ಮ, ಹಿವಾ ನೈ ಕರಿಲಿವಾನು ಚೊ಼ಕು ವ್ಹೈ.

³⁸ ಇಮ್ಮ ಘಟ್ಟ ಥಯಲ ಛೊಕ್ರಿನಾ ಕ್ಹಾತೆ ಹಿವಾ ಕರಿಲಿವಾನು ಚೊ಼ಕು ವ್ಹೈ. ಹಿವಾ ನೈ ಕರಿಲಿವಾನು ಹಜು಼ನ ಚೊ಼ಕು ವ್ಹೈ.

³⁹ ಮಾಟಿ ಜಿವ್ತೊ ರ‍್ಹಯೆ ಲಕ್ಕಾ ಬೈಕೊ ತಿನಾ ಬಂಧನಮಾ ವ್ಹೈ. ತೆ ಮರ‍್ಯೊರೆ ತೆ ಪಸಂದ ಕರಲವಾಲಾನೆ ವರಿ ಹಿವಾ ಥಾವಾನೆ ಆಜಾ಼ದ ವ್ಹೈ. ತೆನೈಸೊ ತೆ ಕ್ರೈಸ್ತವಿಶ್ವಾಸಿ ರ‍್ಹೌ.

⁴⁰ ತೆ ಹಿವಾ ಕರಿಲಿದ್ಯಾವಾಚಿ ರ‍್ಹೈರೆ ಹಜು಼ನ ಘನ್ನಿ ನಸಿಬವಾಲಿ ವ್ಹೈ. ತೆ ಮಾರು ವಿಚಾರ ವ್ಹೈ. ರ‍್ಹೈತುಬಿ ಕ್ಹುದಾನಿ ಆತ್ಮಾಕ್ಹು ಎ ಕವಾಡ್ಯೊಸ, ಕವಾನು ಮಾರೊ ಬರೊಕ್ಹೊ ವ್ಹೈ.