1 ಕೊರಿಂಥ 12 - ಕ್ಹುದಾನಿ ಕ್ಹರಿನಿ ವಾಕ್ಯಾ

¹ ಭಾಯೊ ಭೆನೊ, ಪವಿತ್ರ ಆತ್ಮಾನಾ ವರಾನಾ ಕ್ಹರಿನಾ ಹುತಿ ತುಮೆ ಚೊ಼ಕಿ ತರಾ ತಿಳ್ದಿಲಿವಾಲಾ ಥೌ.

² ತುಮೆ ಬರೊಕ್ಹಾಮಾ ನೈ ರ‍್ಹತಾಮಾ, ತುಮೊನೆ ಮನಸ್ಸೆ ಆಯಲ ತಿಮ್ಮ ಮುಕಿಯೊ ಮುರತಿಯೊ ಕನ ಗೈನ ಆತಾತಾ; ಎ ತುಮೊನೆಜ಼ ಗ್ವತ್ತ ಛೆ.

³ ಅಕ್ಲು ತುಮೊನೆ ಕರೆಟ್ಟ ಗ್ವತ್ತ ರ‍್ಹವಾದೆ; ಪವಿತ್ರ ಆತ್ಮಾನಿ ಪ್ರೆರಣೆಕ್ಹು ಬೊಲಾಲೊ ಕುನ್ನಬಿ "ಯೆಸುನೆ ದಿಕ್ಕಾರ" ಕೆ ನೈ ಸಕ್ತೊ. ತಿನಾ ಲಿಂಗತಜ಼, ಪವಿತ್ರ ಆತ್ಮಾನಿ ಪ್ರೆರಣೆ ನೈಸೊ ಕುನ್ನಬಿ"ಯೆಸುಜ಼ ಪ್ರಭು ವ್ಹೈ" ಕೈನ ವಪ್ಪಿ ನೈ ಲೆಸಕ್ತೊ.

⁴ ಆತ್ಮಿಕ ವರಾ ಬಿಜಾ಼ ಬಿಜಾ಼ ಛೆ; ತೆ ಕ್ಹಾರು ದಿವಾನು ಪವಿತ್ರ ಆತ್ಮಾ ಯಕ್ಲೊಜ಼ ವ್ಹೈ.

⁵ ಸೆವಾ ಬಿಜಾ಼ ಬಿಜಾ಼ ಛೆ; ತೆನೈಸೊ ತೆ ಸೆವಾನೆ ಯೊಗ್ಯ ಪ್ರಭು ಯಕ್ಲೊಜ಼ ವ್ಹೈ.

⁶ ಕಾಮ್ನಾ ತರಿಕಾ ಬಿಜಾ಼ ಬಿಜಾ಼ ಛೆ; ತೆ ಕ್ಹಾರು ಕ್ಹಾರಿ ತರಾಮಾ ಕರಾಲೊ ಕ್ಹುದಾ ಯಕ್ಲೊಜ಼ ವ್ಹೈ.

⁷ ಹರ ಯಕ್ಲಾಮಾ ದಿಕ್ಹಿನ ಆವಾನಾ ಪವಿತ್ರ ಆತ್ಮಾನಾ ವರಾ ಕ್ಹಾರಾ ಜ಼ನಾವೊನಾ ಚೊ಼ಕಾನಾ ಹುತಿಜ಼ ದಿದಲ ವ್ಹೈ.

⁸ ಪವಿತ್ರ ಆತ್ಮಾನಾ ಮುಲಕ ಯಕ್ಲಾನೆ ಗ್ಯಾನನಾ ವಾತೊ, ಬಿಜೆ಼ಕ್ಲಾನೆ ತಿನಾ ಮುಲಕ ಶಾಣಾನಿಯೊ ವಾತೊ ಬೊಲಾನು ಮಳಸ;

⁹ ತೆಜ಼ ಪವಿತ್ರ ಆತ್ಮಾಕ್ಹು ಯಕ್ಲಾನೆ ಘನ್ನೊ ವಿಶ್ವಾಸ ಬಿಜೆ಼ಕ್ಲಾನೆ ಅರಾಮ ಕರಾನಿ ತಾಕತ ಮಳಸ.

¹⁰ ಯಕ್ಲಾನೆ ಪವಾಡ ಕರಾನಿ ತಾಕತ, ಬಿಜೆಕ್ಲಾನೆ ಪ್ರವಾದನೆ ಕರಾನಿ ತಾಕತ, ವರಿ ಯಕ್ಲಾನೆ ಕ್ಹರಿನೆ ತಿಳ್ದಿಲಿವಾನು ಗ್ಯಾನ, ಬಿಜೆಕ್ಲಾನೆ ಬಿಜಾ಼ ಬಿಜಾ಼ ಭಾಶಾ ಬೊಲಾನಿ ತಾಕತ, ವರಿ ಯಕ್ಲಾನೆ ತೆ ಕ್ಹಾರು ತಿಳ್ದಿಲಿವಾನು ಅರು ತೆ ಪವಿತ್ರ ಆತ್ಮಾಕ್ಹು ದಿವಸ.

¹¹ ಎ ವರಾ ಕ್ಹಾರಾ ತೆ ಪವಿತ್ರ ಆತ್ಮಾ ಯಕ್ಕಜ಼ ತಿನಿ ಪಸಂದ ಲಿಂಗತ ಹರ ಯಕ್ಲಾನೆ ವಾಟಸ.

¹² ಅಂಗ ಯಕ್ಕಜ಼ ವ್ಹೈ; ಅಂಗನಾ ಭಾಗೊ ಘನ್ನಾ ವ್ಹೈ. ತೆ ಅಂಗನಾ ಭಾಗೊ ಘನ್ನಾ ರ‍್ಹಯಾತಬಿ ತೆ ಯಕ್ಕಜ಼ ಅಂಗ ವ್ಹೈ. ತಿನಾ ಲಿಂಗತಜ಼ ಕ್ರಿಸ್ತ ಯೆಸು ವ್ಹೈ.

¹³ ಯಹುದ್ಯೊ ರ‍್ಹವಾದೆ, ಗ್ರಿಕವಾಲಾ ರ‍್ಹವಾದೆ, ಗುಲಾಮೊ ರ‍್ಹವಾದೆ, ಆಜಾ಼ದ ರ‍್ಹಯಲವಾಲಾ ರ‍್ಹವಾದೆ- ಅಪೆ ಕ್ಹಾರಾ ಯಕ್ಕಜ಼ ಅಂಗ ಥೌ ಕೈನ ಯಕ್ಕಜ಼ ಆತ್ಮಾಕ್ಹು ಬಾಪ್ತಿಸ್ಮ ಹೊಂದಿಲಿದ್ಯಾಸ. ಯಕ್ಕಜ಼ ಆತ್ಮಾನೆ ಅಪೊನೆ ಕ್ಹಾರಾವೊನೆ ಪಾನ ಥೈನ ದಿದಲ ಛೆ.

¹⁴ ಪುರಾ ಅಂಗ ಯಕ್ಕಜ಼ ಅಂಗನು ಭಾಗಕ್ಹು ನ್ಹವೈ, ಘನ್ನಾ ಅಂಗನಾ ಭಾಗೊಕ್ಹು ಮಳಲ ಛೆ.

¹⁵ ಕೆಳಾಮಾ ತುಬಿ ಪಗ್ಗ"ಮಿ ಹತ್ತ ನ್ಹವೈ, ಎ ಕಾರಣಕ್ಹು ಮಿ ಅಂಗನೆ ಮಳಿನ ನತ್ತಿ" ಕೈನ ಕದಲ ರ‍್ಹಯಮ ತೆ ಅಂಗನು ಭಾಗ ಥೈನ ರ‍್ಹವಾನು ಚು಼ಕಸ ಸು?

¹⁶ ನೈತೊ ಕಾನ"ಮಿ ಡೊಳೊ ನ್ಹವೈ" ಎ ಕಾರಣಕ್ಹು ಕೈನ ಕದಲ ರ‍್ಹಯಮ ತೆ ಅಂಗನು ಭಾಗ ಥೈನ ರ‍್ಹವಾನು ಚು಼ಕಸ ಸು?

¹⁷ ಅಂಗ ಪುರಾ ಡೊಳೊ ಥಯುಮ ತೆ ಐಕಾನು ಕಿಮ್ಮ? ನೈತೊ ತೆ ಪುರಾ ಕಾನಜ಼ ಥಯುಮ, ಬಾಸ ದೆಕಾನೆ ತಾಕತ ಕಿಜಾ಼ ಛೆ?

¹⁸ ಚೊ಼ಕು ಛೆ, ಕ್ಹುದಾ ತಿನಿ ಚಿತ್ತ ಲಿಂಗತ, ಹರಯಕ್ಕ ಅಂಗನಾ ಭಾಗನೆ ಕರೆಟ್ಟ ಜೊಡಸಾಯೊಸ.

¹⁹ ತೆ ಕ್ಹಾರಾ ಯಕ್ಕಜ಼ ಅಂಗನಾ ಭಾಗ ಥಯಾಮ ತ್ಯಾ ಅಂಗ ಕಿಜಾ಼ ಛೆ?

²⁰ ಇಮ್ಮ ಅಂಗನಾ ಭಾಗೊ ಘನ್ನಾ ರ‍್ಹಯಾತಬಿ ಅಂಗ ಪುರಾ ಯಕ್ಕಜ಼ ವ್ಹೈ.

²¹ ಇಮ್ಮ ರ‍್ಹತಾಮಾ "ತಾರಿ ಜ಼ರುರತ ಮನೆ ನತ್ತಿ" ಕೈನ ಹತೆ ಡೊಳೊ ಕವಾನೆ ನೈ ಥಾತು. ತಿನಾ ಲಿಂಗತಜ಼"ತಾರಿ ಜ಼ರುರತ ಮನೆ ನತ್ತಿ" ಕೈನ ಪಗೊನೆ, ಮಾತು ಕವಾನೆ ನೈ ಥಾತು.

²² ತೆಕ್ಲುಜ಼ ನೈ, ತಾಕತ ನೈಸೊ ದಿಕ್ಹಾನಾ ಅಂಗನಾ ಭಾಗೊ ಅಪೊನೆ ಚಾ಼ಯೆಜ಼.

²³ ನ್ಹಾನಾ ವ್ಹೈ ಕೈನ ಕವೈಲಿವಾನಾ ಅಂಗನಾ ಭಾಗೊ ಘನ್ನಾ‍ ಮ್ಹೊಟಾ ಕಾಮೊ ಕರಸ. ಜಾ಼ಕಿನ ಮ್ಹೆಲಾನಾ ಅಂಗನಾ ಭಾಗೊನೆ ಮರ್ಯಾದಿ ವಚಾ಼ಡಸ.

²⁴ ಚೊ಼ಕು ಅಂಗನಾ ಭಾಗೊನೆ ರಕ್ಷಣೆನಿ ಜ಼ರುರತ ನೈ ರ‍್ಹತಿ. ಅಂಗನೆ ತಯ್ಯಾರ ಕರಲ ಕ್ಹುದಾ ಕಮಿ ರ‍್ಹಯಲ ಅಂಗನಾ ಭಾಗೊನೆ ಘನ್ನಿ ಮರ್ಯಾದಿ ದಿದ್ಯೊಸ.

²⁵ ಅಂಗಮಾ ಭೆದ-ಭಾವ ನೈಸೊ ಅಂಗನಾ ಭಾಗೊನೆ ಯಕ್ನಾ ಯಕ್ಕನೆ ಚೊ಼ಕಾನಾ ಹುತಿ ಕರ‍್ಯೊಸ.

²⁶ ಯಕ್ಕ ಅಂಗನಾ ಭಾಗನೆ ದುಕ್ಕ ಥಯುಮ, ಕ್ಹಾರಾ ಅಂಗನಾ ಭಾಗೊ ತಿನಾ ಕ್ಹಾತೆ ದುಕ್ಕ ಖಾವಸ. ಯಕ್ಕ ಅಂಗನಾ ಭಾಗನೆ ಖುಶಿ ಥಯುಮ, ಉಗ್ರಲ ಕ್ಹಾರಾ ಅಂಗನಾ ಭಾಗೊ ತಿನಾ ಕ್ಹಾತೆ ಮಳಿನ ಖುಶಿ ಕರಸ.

²⁷ ತುಮೆ ಕ್ಹಾರಾ ಕ್ರಿಸ್ತ ಯೆಸುನು ಅಂಗ ಥಯಾಸ; ಹರಯಕ್ಲೊ ಎ ಅಂಗನು ಭಾಗ ಥಯೊಸ.

²⁸ ಕ್ಹುದಾ ತುಮಾರಾ ಸಭೆಮಾ, ಪೈಲಾ ಅಪೊಸ್ತಲೊನೆ, ಬೆವಾ ಪ್ರವಾದಿಯೊನೆ, ತನ್ವಾ ಮಾಸ್ತರೊನೆ ನೆಮಿಶೊಸ. ಪಾಚಲ್ತೊ ಪವಾಡ ಕರಾಲಾವೊನೆ, ರೊಗ ಅರಾಮ ಕರಾಲಾವೊನೆ, ಉಪಕಾರ ಕರಾಲಾವೊನೆ, ಸಭೆ ಚ಼ಲೈ ಲಿನ ಜಾ಼ವಾಲಾವೊನೆ, ಘನ್ನಾ ಭಾಷಾ ಬೊಲಾಲಾವೊನೆ ನೆಮಿಶೊಸ.

²⁹ ಕ್ಹಾರಾ ಜ಼ನಾ ಅಪೊಸ್ತಲೊ ನ್ಹವೈ, ಕ್ಹಾರಾ ಜ಼ನಾ ಪ್ರವಾದಿಯೊ ನ್ಹವೈ, ಕ್ಹಾರಾ ಜ಼ನಾ ಮಾಸ್ತರೊ ನ್ಹವೈ, ಕ್ಹಾರಾ ಜ಼ನಾ ಪವಾಡ ಕರಾಲಾ ನ್ಹವೈ,

³⁰ ಕ್ಹಾರಾ ಜ಼ನಾ ರೊಗೊ ಅರಾಮ ಕರಾಲಾ ನ್ಹವೈ, ಕ್ಹಾರಾ ಜ಼ನಾ ಘನ್ನಾ ಭಾಷಾ ಬೊಲಾಲಾ ನ್ಹವೈ, ನೈತೊ ಕ್ಹಾರಾ ಜ಼ನಾ ಭಾಷಾ ತಿಳಸೈನ ದಿವಾಲಾ ನ್ಹವೈ.

³¹ ಖಾಸ ರ‍್ಹಯಲ ವರಾ ತುಮೆ ಪುರಾ ಶ್ರದ್ಧಾಕ್ಹು ಆಸ ಕರೊ. ಮಿ ತುಮೊನೆ ಹಜು಼ನ ಚೊ಼ಕಿ ರ‍್ಹಯಲ ವಾಟ ದೆಕಾಡುಸ;