1 ಕೊರಿಂಥ 10 - ಕ್ಹುದಾನಿ ಕ್ಹರಿನಿ ವಾಕ್ಯಾ

ಯೆಹುದಿಯೊಲಿಂಗತ ರ‍್ಹವೊನಕೊ

¹ ಮಯಾನಾ ಭಾಯೊ ಭೆನೊ, ಅಪ್ನಾ ಪೈಲಾನಾ ಮನಕ್ಹೊನೆ ಥಯಲ ಕ್ಹಾರು ತುಮಾರು ಧ್ಯಾನಮಾ ಲಾವಾನೆ ಕೊಶಿಶ ಕರಾಡ್ಯೊಸ. ತ್ಯುನೆ ಕ್ಹಾರಾ ಮ್ಹಾಡನಾ ಛೌಲಿಮಾ ಚಾ಼ಲ್ಯಾ. ಕ್ಹಾರಾ ಜ಼ನಾ ಸಮುಂದರನೆ ಸು ಥಯಾವಾಚಿ ದಾಟ್ಯಾ.

² ಇಮ್ಮ ತ್ಯುನೆ ಮ್ಹಾಡಮಾಬಿ ಸಮುಂದರಮಾಬಿ ಬಾಪ್ತಿಸ್ಮ ಕರೈಲಿನ ಮೊಶೆನೆ ಶಿಷ್ಯಾ ಥಯಾ.

³ ಕ್ಹಾರಾ ಜ಼ನಾ ಯಕ್ಕಜ಼ ಆತ್ಮಿಕನು ರೊಕ್ಲೊ ಖಾದ್ಯಾ;

⁴ ತ್ಯುನಾ ಕ್ಹಾತೆ ರ‍್ಹಯಲ ಆತ್ಮಿಕ ದಗ್ಡಾನು ಪಾನಿ ಪಿದ್ಯಾ. ತೆಜ಼ ದಗ್ಡೊ ಕ್ರಿಸ್ತಜ಼ ವ್ಹತ್ತೊ.

⁵ ತೆನೈಸೊ ತ್ಯುನೊಮಾ ಘನ್ನಾ ಜ಼ನಾ ಕ್ಹುದಾನೆ ಪಸಂದ ಥಯಾ ನೈ. ತಿನಾಹುತಿ ಹಾಳ ಜ಼ಗಾಮಾ ಖಲಾಸ ಕರಿನ ತ್ಯುನಾ ಅಂಗೊ ರಾನ್ಮಾ ಪಡಿ ಗಯಾತಾ.

⁶ ಎ ಘಟನೆ ಕ್ಹಾರಾ ಅಪೊನೆ ಹುಶಾರಕ್ಹು ದಿವಾನಾ ವಾತೊ ಥಯಾಸ. ತ್ಯುನಾ ಲಿಂಗತ ಅಪೆ ಕೆಟ್ಟ ರ‍್ಹಯಲ ಆಸ ಕರು ನೈ.

⁷ ತ್ಯುನೊಮಾ ದಕ್ಹಾ ಜ಼ನಾ ಮುರತಿಯೊನೆ ಪುಜಾ ಕರಾಲಾ ಥಯಲ ಲಿಂಗತ ಅಪೆ ಥೌ ನೈ. ಇವ್ನಾ ಹುತಿ ಪವಿತ್ರ ಗ್ರಂಥಮಾ ಅಮ್ಮ ಬರ್ದಲ ಛೆ"ಎ ಮನಕ್ಹೊ ಖಾವಾನೆ ಕೈನ ಪಿವಾನೆ ಕೈನ ಬೆಟ್ಯಾ ನ್ಹಾಚಾ಼ನೆ ಕೆಟ್ಟ ತರಾಕ್ಹು ಉಟ್ಯಾ"

⁸ ತ್ಯುನಾಮಾ ದಕ್ಹಾ ಜ಼ನಾ ಲೈಂಗಿಕ ಪಾಪ ಕರಲಕ್ಹು ಯಕ್ಕಜ಼ ದಿನ್ನಮಾ ಇಕ್ಹಪರ ತನ್ನ ಹಜಾ಼ರ ಮನಕ್ಹೊ ಮರ‍್ಯಾ. ಅಪೆ ಲೈಂಗಿಕ ಕಾಮೊಕ್ಹು ದುರ ರ‍್ಹೌ.

⁹ ತ್ಯುನಾ ಬಗಲನಾ ದಕ್ಹಾ ಜ಼ನಾ ಪ್ರಭುನೆ ಪರಿಕ್ಷಾ ಕರ‍್ಯಾ. ತಿನಾಹುತಿ ಕ್ಹಾಪೊಕ್ಹು ನಾಶ ಥಯಾ. ತ್ಯುನಾ ಲಿಂಗತ ಪ್ರಭುನೆ ಪರಿಕ್ಷಾ ಕರಾನು ಅಪೊನೆ ನಕೊ.

¹⁰ ವರಿ ದಕ್ಹಾ ಜ಼ನಾ ಗುಣಗುಟ್ಯಾ; ಖಲಾಸ ಕರಾನಾ ದುತಕ್ಹು ಖಲಾಸ ಥಯಾ. ತುಮೆಬಿ ತ್ಯುನಾ ಲಿಂಗತ ಗುಣಗುಟ್ಟಾಲಾ ಥಾವೊ ನಕೊ.

¹¹ ಎ ಕ್ಹಾರು ತ್ಯುನೊನೆ ಥಯಲ ಬಿಜಾ಼ವೊನೆ ಗ್ವತ್ತ ಥಾವಾನಾ ಹುತಿ ವ್ಹೈ. ಎ ಕ್ಹಾರು ಬರ್ದಿನ ಮ್ಹೆಲಲ, ದುನಿಯಾನಾ ಅಂತ್ಯನೆ ಆಯಲ ಅಪೊನೆ ಪೈಲಾಜ಼ ಹುಶಾರ ಥಾವಾನಾ ಹುತಿ ವ್ಹೈ.

¹² ತಿನಾಹುತಿ ಚೊ಼ಕಿ ತರಾ ಛೆ ಕೈನ ಕೈಲಿವಾಲಾ, ಠೊಕರ ಲಾಗಿನ ಪಡೆ ನೈಸೊ ಹುಶಾರಕ್ಹು ರ‍್ಹೆ.

¹³ ಮನಕ್ಹೊಕ್ಹು ನೈ ಜಿತ್ತಾನಾ ಶೊಧನೆ ತುಮೊನೆ ಆಯಾ ನತ್ತಿ. ಕ್ಹುದಾ ದಿದಲ ವಾತ ಚು಼ಕ್ತೊ ನೈ. ನೈ ಜಿತ್ತಾನಾ ಶೊಧನೆನೆ ತುಮೊನೆ ಕೆಳಾಮಾಜ಼ ಘಾಲ್ತೊ ನೈ. ಶೊಧನೆ ಆಯಲ ಪರ ತಿಕ್ಹು ತಡ್ದಿಲಿವಾನಿ ತಾಕತ ಚು಼ಕೈಲಿವಾನಿ ವಾಟ ತೆಜ಼ ದಿವಸ.

¹⁴ ತಿನಾಹುತಿ ಮಯಾನಾ ಭಾಯೊ ಭೆನೊ, ಮುರತಿಯೊನಿ ಆರಾಧನಾ ಕರಾನು ಛೊಡಿ ಪಡೊ.

¹⁵ ತುಮೆ ತಿಳ್ದಿಲಿದಲವಾಲಾ ವ್ಹೈ ಕೈನ ತಿಳ್ದಿನ ಎ ಕವಾಡ್ಯೊಸ. ಮಾರಾ ವಾತೊ ತುಮೆಜ಼ ಪರಿಕ್ಷಾ ಕರಿನ ದೆಕೊ.

¹⁶ ಅಪೆ ಕ್ಹುದಾನೆ ಸ್ತುತಿ ಕರಿನ ಪಿವಾನಾ ವಾಟ್ಕಾಕ್ಹು ಪಿತಾಮಾ ಕ್ರಿಸ್ತನಾ ರಗತಮಾ ವಾಟೊ ಲಿವಾಲಾ ಥಯ್ಯೆಸ. ರೊಕ್ಲೊ ತೊಡಿನ ಖಾತಾಮಾ ಕ್ರಿಸ್ತನಾ ಶರಿರಮಾ ಪಾಲ ಲಿವಾಲಾ ಥಯ್ಯೆಸ.

¹⁷ ರೊಕ್ಲೊ ಯಕ್ಕಜ಼ ವ್ಹೈ; ತಿನಾಹುತಿ ಅಪೆ ಘನ್ನಾ ಜ಼ನಾ ರ‍್ಹೈತಬಿ ಯಕ್ಕಜ಼ ಶರಿರ ಥಯ್ಯೆಸ. ಕಾಕದ್ಯಾಮ ಅಪೆ ಕ್ಹಾರಾ ತೆ ಯಕ್ಕಜ಼ ರೊಕ್ಲಾನಾ ಪಾಲ ಲಿವಾಲಾ ಥಯಾಸ.

¹⁸ ಇಸ್ರಾಯೆಲನಾ ಮನಕ್ಹೊನಿ ಪದ್ದತ ದೆಕೊ; ಬಲಿ ಥೈನ ಚ಼ಡಾಯಲ ಖಾವಾಲಾ ಬಲಿಮಾನೊ ವಾಟೊ ಲಿದಲ ರ‍್ಹವಸ.

¹⁹ ಇಮ್ಮ ಮಿ ಕತಾಮಾ ಮುರತಿಯೊನೆ ಚ಼ಡಾವಾನೆ ಕರಲ ಅನ್ನ ಖಾಸ ವ್ಹೈ ನೈತೊ ಮುರತಿಜ಼ ಖಾಸ ವ್ಹೈ ಕೈನ ಮಿ ಕವಾನು ಮತ್ಲಬ ವ್ಹೈಸು? ಕಯುಜ಼ ನ್ಹವೈ,

²⁰ ಮಿ ಕವಾನು ಸು ವ್ಹೈ ಕದ್ಯಾಮ; ಬಿಜಾ಼ ಮನಕ್ಹೊ ಬಲಿ ಭುತ್ಡಾವೊನೆ ಚ಼ಡಾವಸ ತೆನೈಸೊ ಕ್ಹುದಾನೆ ನ್ಹವೈ. ಇಮ್ಮ ತುಮೆ ಭುತ್ಡಾವೊನಾ ಕ್ಹಾತೆ ಪಾಲ ಲಿವಾನು ಮಿ ಕೆಳಾಮಾಜ಼ ಪಸಂದ ನೈ ಕರ‍್ತೊ.

²¹ ತುಮೆ ಪ್ರಭುನಾ ಪಾತ್ರೆತು ವರಿ ಭುತ್ಡಾವೊನಾ ಪಾತ್ರೆತು ಪಿವಾನೆ ಥಾತು ನೈ. ಪ್ರಭುನಾ ಪಂಕ್ಕತಿಮಾ ತಿನಾ ಲಿಂಗತ ಭುತ್ಡಾವೊನಾ ಪಂಕ್ಕತಿಮಾ ಖಾವಾನೆ ಥಾತು ನೈ.

²² ಅಪೆ ಪ್ರಭುನೆ ಕದ್ರಾವಾಡ್ಯಾಸು? ತಿನಾತಿ ಅಪೆ ತಾಕತವರ ವ್ಹೈ ಸು?

ತುಮಾರಾ ಸ್ವತಂತ್ರ ಕ್ಹುದಾನಿ ಮಹಿಮಾನಾ ಹುತಿ

²³ "ಸುಬಿ ಕರಾನೆ ಆಜಾ಼ದಿ ಛೆ" ಕೈನ ಕೆ ಸಕೆಸ ಸು. ತೆನೈಸೊ ಕ್ಹಾರು ಉಪಯೊಗ ನ್ಹವೈ. ಸುಬಿ ಕರಾನೆ ಆಜಾ಼ದಿ ಛೆ. ತೆನೈಸೊ ಕ್ಹಾರುಜ಼ ಅಭಿವೃದ್ಧಿ ಕರ‍್ತು ನೈ.

²⁴ ಹರಯಕ್ಲೊ ಕ್ಹಾಲಿ ತಿನು ಚೊ಼ಕು ಆಸ ಕರ‍್ಯಾವಾಚಿ ಬಿಜಾ಼ವೊನು ಚೊ಼ಕಾನಾ ಹುತಿ ಆಸ ಕರು.

²⁵ ಮನಸ್ಸಾಕ್ಷಿನೆ ಕೆಡ್ಸಾನಾ ಸವಾಲೊನೆ ಆವಾನೆ ದಿದ್ಯಾವಾಚಿ ಮಾಕ್ಹನಾ ಬಾಜ಼ರಮಾ ಇಕ್ಕಾನು ಕ್ಹಾರು ತುಮೆ ಲೈನ ವಿಚಾರ ಕರ‍್ಯಾ ಬಗರ ಖಾ ಸಕೊಶಿ.

²⁶ ಕಾಕದ್ಯಾಮ"ಸೃಷ್ಟಿಮಾ ರ‍್ಹವಾನು ಕ್ಹಾರು ಪ್ರಭುನುಜ಼ ವ್ಹೈ"

²⁷ ಕ್ರೈಸ್ತವಿಶ್ವಾಸಿ ನೈ ರ‍್ಹಯಲವಾಲೊ, ತುಮೊನೆ ಖಾವಾನೆ ಬಲಾಯೊಮ, ತುಮೊನೆ ಚೊ಼ಕು ಲಾಗ್ಯುರೆ ಜಾ಼ವೊ; ಮನಸ್ಸಾಕ್ಷಿನೆ ಕೆಡ್ಸಾನಾ ಸವಾಲೊನೆ ಆವಾನೆ ದಿದ್ಯಾವಾಚಿ ತೆ ಘಾಲಲ ತೆಕ್ಲು ಖಾವೊ.

²⁸ ತೆಳಾಮಾ ಕುನತಬಿ"ಎ ಮುರತಿಯೊನೆ ಬಲಿ ದಿದಲ ವ್ಹೈ" ಕೈನ ಕದ್ಯಾಮ,ತಿಮ್ಮ ಕದಲವಾಲಾನಾ ಹುತಿ ವರಿ ಮನಸ್ಸಾಕ್ಷಿನಾ ಹುತಿ ತೆ ಖಾವೊ ನಕೊ.

²⁹ ಕದ್ಯಾಮ, ತಾರಾ ಸ್ವಂತ ಮನಸ್ಸಾಕ್ಷಿನಾ ಹುತಿ ನೈ, ತುನೆ ಕದಲವಾಲಾನಾ ಮನಸ್ಸಾಕ್ಷಿನಾ ಹುತಿ ಖೌ ನಕೊ. ತುಮೊಮಾ ಯಕ್ಲೊ"ತಿನಿ ಆಜಾ಼ದಿನೆ ಬಿಜೆ಼ಕ್ಲಾನಿ ಮನಸ್ಸಾಕ್ಷಿ ಕಾ ಅಡ್ಡ ಥೌ? ಕೈನ ಪುಚ಼್ಚ ಸಕಸ.

³⁰ ವರಿ "ಮಿ ಕ್ಹುದಾನೆ ಸ್ತೊತ್ರ ಕರಲ ರ‍್ಹಯಮ ವರಿ ಸ್ತೊತ್ರ ಕರಿನ ಖಾದಲ ಅನ್ನನಾ ಹುತಿ ಮಾರಾ ಉಪ್ಪರ ದುಷಣೆ ಕಾ? ಕೈನ ಪುಚ಼್ಚ ಸಕಸ.

³¹ ತಿನೆ ಮಾರು ಜವಾಬ ಎ ವ್ಹೈ; ತುಮೆ ಖಾದ್ಯಾತಬಿ ಪಿದ್ಯಾತಬಿ ಸು ಕರಿತಬಿ ಕ್ಹುದಾನಿ ಮಹಿಮಾನಾ ಹುತಿ ಕರೊ.

³² ಯೆಹುದಿಯೊನಾ ಹುತಿ ರ‍್ಹವಾದೆ, ಗ್ರಿಕವಾಲಾವೊನೆ ರ‍್ಹವಾದೆ, ಕ್ಹುದಾನಿ ಧರಮ ಸಭೆನಾ ಹುತಿ ರ‍್ಹವಾದೆ ಕರಾಲಾ ಥಾವೊ ನಕೊ.

³³ ಮಿ ತಬಿ ಮಾರಾ ಸ್ವಂತ ಚೊ಼ಕಾನಾ ಹುತಿ ವಿಚಾರ ಕರ‍್ಯಾವಾಚಿ ಕ್ಹಾರಾ ಜ಼ನಾವೊನಾ ಉದ್ಧಾರನಾ ಹುತಿ ತ್ಯುನು ಚೊ಼ಕು ಆಸ ಕರಿನ, ಕ್ಹಾರಾವೊನೆ ಕ್ಹಾರಾಮಾ ಮೆಚ್ಚಿಸಾನೆ ಕೊಶಿಶ ಕರುಸ.