प्रकाश 3 - परमेस्वर को सच्चो वचन

सरदीस की कलीसिया के ताहीं संदेस

¹ “सरदीस नाओं की कलीसिया के दूत कै जौ लिख: जोके पास परमेस्वर की सात आत्मा और सात तारा हैं, बाके घाँईं से जौ संदेस है। मोकै मालुम है कि तुम का कर रै हौ; मैं जानथौं कि तुम मरे भै होत भै भी जिंदो होन की सोच रखथौ!

² तौ जागो, और जो तुमरे झोने हबै जो भी है बाकै पूरी तरह से मजबूत करौ। काहैकि मैं जो तोसे पाओ हौं कि जो कुछ तू जो करो है हबै ले परमेस्वर की नजर मैं सिद्ध ना भौ है।

³ तभई याद रखौ, कि तुम्हैं का सिखाओ गौ रहै और तुम का सुनें रहौ; बाको पालन करौ और अपने पापन से मन फिराबौ। और अगर तुम ना जगैगे, तौ मैं चुट्टा के तराहनी तुमरे झोने आंगो, कि मैं कोनसे समय तेरे ऊपर आए पड़ंगो।

⁴ लेकिन हुँआँ सरदीस मैं तुम मैं से कुछ लोग अपने लत्ता असुद्ध नाय करीं बल्कि करकै साफ रखी हैं। तुम मेरे संग सफेद लत्ता पहने भै चलैगे, काहैकि तुम ऐसो करन के काबिल हौ।

⁵ जो बिजय होंगे जहे तरीका से सफेद लत्ता पहनाओ जागो, और मैं बाको नाओं जिंदगी की किताब मैं से ना हटांगो। मैं अपने दऊवा और बाके स्वर्गदूतन के सामने ऐलान करंगो की बे मेरे हैं।”

⁶ “अगर तुमरे कान होमैं, बौ सुन लेबै कि पवित्र आत्मा कलीसियन से का कहथै!”

फिलदिलफिया की कलीसिया के ताहीं संदेस

⁷ “फिलदिलफिया की कलीसिया के दूत कै जौ लिख: पवित्र और सच्चाई के घाँईं से जौ संदेस है। बाके झोने बौ चाबी है जो दाऊद की है, और जब बौ फाटक खोलथै, तौ कोई बाकै बंद नाय कर सकथै, और जब बौ बंद कर देथै, तौ कोई बाकै खोल नाय सकथै।

⁸ मोए मालुम है कि तुम का करथौ; मैं जानथौं कि तुमरे भीतर थोड़ी सामर्थ्य है; तू जो मेरी सिक्छा को पालन करो है और मेरे नाओं कै मना नाय करो है। मैं तेरे सामने एक फाटक खोल दौ हौं, जोकै कोई बंद नाय कर सकथै।

⁹ बात सुनौ! जहाँ ले बौ सभाघर को सबाल है जो सैतान को है, बे झूठे जो दाबा करथैं कि बे यहूदि हैं लेकिन नाय हैं, मैं आयकै तुमरे पाओं मैं झुकांगो। बे सब जानंगे कि मैं तुम सबन से प्रेम करथौं।

¹⁰ काहैकि तू धीरज धरकै मेरी आग्या कै मानो है, मैं तोकै बौ संकट के समय से बचाए रखंगो, जो दुनिया मैं सब लोगन की परिक्छा लेन के ताहीं आनबारो है।

¹¹ मैं जल्दिये आनबारो हौं। तुमरे झोने जो कुछ भी बाकै समार कै रखैं, ताकी कोई भी तुमरे जीत के इनाम कै छीन ना पाबै।

¹² जो जय पाबै, बाकै मैं अपने परमेस्वर के मंदिर मैं एक खम्मा बनांगो; और बौ फिर कहु बाहर ना निकरैगो; और मैं अपने परमेस्वर को नाओं, और अपने परमेस्वर के नगर मतलब नये यरूसलेम को नाओं, जो मेरे परमेस्वर के पास से स्वर्ग मैं से उतरन बारो है और अपनो नया नाओं भी बामै लिखंगो।”

¹³ “अगर तुमरे कान होमैं, बौ सुन लेबै कि पवित्र आत्मा कलीसियन से का कहथै!”

लौदीकिया की कलीसिया के ताहीं संदेस

¹⁴ “लौदीकिया की कलीसिया के दूत कै जौ लिख: जो आमीन को संदेस है, जो बिस्वास के काबिल और सच्चो गभा है, जो परमेस्वर की सृस्टि को आधार है।

¹⁵ मोए मालुम है कि तुम का करे हौ; मोए मालुम है कि ना तुम ठंडे हौ और ना गरम। कास तुम ठंडे ही होते या गरमैं होते!

¹⁶ लेकिन काहैकि तू गुनगुनो है, और ना ठंडो है और न गरम, मैं तोकै अपने मोहों से उगलन बारो हौं।

¹⁷ तुम कहथौ, ‘मैं सेठ हौं; मेरे झोने बौ सब है जो मोए चाहिए।’ लेकिन तुम नाय जानथौ कि तुम कित्ते दुखी और अभागे हौ! तुम गरीब, नंगे और अंधरा हौ।

¹⁸ इसलै मैं तोकै सलाह देथौं, कि सेठ होन के ताहीं मोसे सुद्ध सोना मोल लेबौ। और खुदकै तैयार करन के ताहीं सेतो लत्ता भी मोल लेबौ ताकी अपनी सर्मनाक नंगेपन कै ढकौ। और अपनी आँखी मैं लगान के ताहीं मलहम ले ताकी तुम देखन लगौ

¹⁹ मैं जिनसे प्यार करथौं उन सबन कै झुकाथौं और सजा देथौं। इसलै गंभीरता से रहबौ, और अपने पापन से मन फिराबौ।

²⁰ सुनौ! मैं फाटक के झोने ठाड़ो भौ खटखटाथौं; अगर कोई मेरी अबाज सुनकै फाटक खोलैगो, तौ मैं बाके झोने भीतर आयकै बाके संग खानु खांगो, और बे मेरे संग खानु खांगे।

²¹ जो बिजय होंगे, मैं बाकै अपने संग अपने सिंहासन मैं बैठन को हक दुंगो, जैसो मैं बिजय भौ हौं और अब अपने दऊवा के झोने बाके सिंहासन मैं बैठो हौं।”

²² “अगर जोके कान होमैं, बौ सुन लेबै कि पवित्र आत्मा कलीसियन से का कहथै।”