मर्कूस 2 - परमेस्वर को सच्चो वचन

फालिस मारे भै बिमार आदमी कै अच्छो करनो

¹ थोड़ी दिन के बाद ईसु कफरनहूम सहर मैं आओ, और ऐसी खबर फैली की बौ अपने घर मैं है।

² फिर इत्ते जनी जुराए गै की दुआरे तक जघा नाय मिली; और बौ उनकै बचन सुनात रहै।

³ और चार जनी एक फालिस मारे भै बिमार आदमी कै उठाएकै बाके झोने लै आईं।

⁴ जब बे भीड़ की बजह से बाके झोने नाय पुग पाईं, तौ बे बौ छत, जोके तरे ईसु रहै, उत्कार दईं; और बाकी खटिया कै जोमैं फालिस को बिमार आदमी लेटो रहै, बाकै हुँए से तरे उतार दईं।

⁵ ईसु उनको ऐसो बिस्वास देखकै बौ फालिस के बिमार आदमी से कही, “ओरे लौड़ा, तेरे पाप माफ हुईगै।”

⁶ तौ जो हुँआँ पर कुछ यहूदि नियम के सिक्छक बैठे पड़े रहैं, बे अपने-अपने मन मैं सोचन लागे,

⁷ “कि जौ आदमी ऐसो कैसे कह सकथै? जौ तौ परमेस्वर की बुराई कर रहो है! परमेस्वर के अलावा और कौन पाप माफ कर सकथै?”

⁸ ईसु तुरंतै अपने मन (आत्मा) मैं जानगौ, की बे अपने-अपने मन मैं ऐसो सोच रै हैं, और बौ उनसे कही, “तुम अपने मन मैं ऐसो काहेकै सोच रहे हौ?

⁹ आसान का है? का फालिस के बिमार आदमी से ऐसो कहनो कि तेरे पाप माफ हुईगै, या फिर जौ कहनो, कि उठ अपनी खटिया उठा और नेंग?

¹⁰ पर जासे तुम जानलेबौ की इंसान के लौड़ा कै दुनिया मैं पाप माफ करन को भी अधिकार है।” बौ फालिस के बिमार आदमी से कही,

¹¹ “मैं तोसे कहथौं, उठ, अपनी खटिया उठाएकै अपने घरै चले जा।”

¹² और बौ उठो, और तुरंतै अपनी खटिया उठाएकै सबन के अग्गु से निकरकै चले गौ। ऐसो देखकै सब चौहोंक गै, और परमेस्वर की बड़ाँईं करन लागे, और कहेन लागे, “हम ऐसो होत भौ कहुए नाय देखे।”

लेवी कै बुलाओ जानो

¹³ ईसु फिर निकरकै गलील झील के टिकारे गौ, और पूरी भीड़ बाके झोने आई, और बौ उनकै उपदेस देन लगो।

¹⁴ बौ जात भौ हलफई के लौड़ा लेवी कै लगान की चौकी मैं बैठो भौ देखी, और बासे कही, “मेरे पच्छू हुई ले।” और बौ उठकै, बाके पच्छू हुई लई।

¹⁵ जब ईसु लेवी के घरै खानु खान कै बैठो, तौ निरे जनी लगान लेन बारे और पापी, ईसु और बाके चेलन के संग खानु खान कै बैठे; और बे निरे जनी रहैं, और बाके पच्छू हुई लईं रहैं।

¹⁶ फरीसिन मैं से और नियम की सिक्छा देनबारे भौत से यहूदि नियम के सिक्छक लोग जौ सब देखकै, कि बौ तौ पापी और लगान लेन बारेन संग खानु खाए रौ है, बाके चेलन से कहीं, “बौ काहे लगान लेन बारेन और पापिन के संग खानु खाथै!”

¹⁷ ईसु जौ सुनकै उनसे कही, “अच्छे भलेन कै बैध की जरूरत नाय होथै, लेकिन बिमारन कै होथै। मैं धर्मिन कै नाय, पर पापिन कै मस्कान आओ हौं।”

¹⁸ यूहन्ना बपतिस्मा देनबारे के चेला, और फरीसी बर्त रखत रहैं, तौ कुछ लोग आयकै ईसु से कहीं, “ऐसो काहे है कि यूहन्ना के चेला और फरीसिन के चेला तौ बर्त रखथैं, पर तेरे चेला तौ बर्त नाय रखथैं?”

¹⁹ ईसु उनकै जबाब दई, “एक बिहा बारे घर मैं जबले दुल्हा बरैतियन के संग रहथै, का बे बर्त रख सकथैं?” और जबले दुल्हा उनके संग है, तौले बे बर्त नाय रखथैं।

²⁰ पर बे दिन आंगे, जब दुल्हा उनसे अलग करो जागो; बौ समय बे बर्त रखंगे।

²¹ “कोरे लत्ता को थिगरा पुराने लत्ता मैं कोई नाय लगाथै; ना तौ बौ थिगरा सुकर कै बामै से पुराने लत्ता से खींच लेगो, और जो भार है बौ पहले से अगरो फट जाबैगो।

²² नई दाखरस कै पुराने मसकन मैं कोई नाय रखथै, ना तौ दाखरस मसकन कै फाड़ देगी, और दाखरस और मसका दोनों बरबाद हुई जांगे, पर नई दाखरस कै नये मसकन मैं भरो जाथै।”

ईसु साबत के दिन को प्रभु

²³ ऐसो भौ कि ईसु साबत के दिन खेत से हुईकै जात रहै, और बाके चेला नेंगतै-नेंगत बाली तोड़न लग्गै।

²⁴ तौ फरीसी ईसु से कहीं, “देख; साबत के दिन तेरे चेलन कै ऐसो करनो नियम के हिसाब से ठीक नाय है?”

²⁵ ईसु उनकै जबाब दई, “का तुम जौ कहुए ना पढ़े हौ कि जब दाऊद कै जरूरत पड़ी, और जब बौ और बाके संग के भूंके भै, तौ बौ का करी रहै?

²⁶ बौ कैसे अबियातार बड़ो पुजारी के समय, परमेस्वर के घर मैं भेंट करी भई रोटी खाईं, जो रोटी खानो नियम के हिसाब से बड़े पुजारी के अलावा कोई नाय खाए सक्त रहै, और बौ अपने संग बारेन कै दई?”

²⁷ तौ बौ उनसे कही, “साबत को दिन आदमिन के ताहीं बनाओ गौ है, जौ न कि आदमी साबत के दिन ताहीं।

²⁸ तभईये, इंसानन को लौड़ा साबत के दिन को भी मालिक है।”