प्रेरित 6 - परमेस्वर को सच्चो वचन

सात सेवक

¹ कुछ समय बाद, जैसे-जैसे सेवकाई मैं चेलन की गिनती बढ़त रहै, यूनानी भासा बोलन बारे यहूदिन के बीच और इब्रानी यहूदियन के बीच लड़ाई होन लगी। यूनानी भासा बोलन बारे यहूदि दाबा करीं, कि खान-पीन मैं उनकी बिधवन की खैर-खबर नाय लई जाए रइ है।

² तौ बे बारह चेलन के विस्वासी समूह कै एक संग बुलाई और कही, “जौ तौ अच्छो नाय है कि आपन परमेस्वर के बचन को प्रचार छोड़ खबान-पिबान की सेवा मैं रहमैं।

³ जहे बजह से भईय्यौ, आपन मैं से सात भले आदमिन कै जो पवित्र आत्मा और बुद्धि से भरे होमैं, छाँट लेबौ, कि हम उनकै जौ काम मैं लगाए देमैं।

⁴ तौ हम खुद, अपनो पूरो समय प्रार्थना और प्रचार के काम मैं देंगे।”

⁵ जौ राय पूरे समूह कै अच्छी लागी, तौ बे स्तिफनुस नाओं के एक आदमी कै जो बिस्वास और पवित्र आत्मा से भरो रहै, और फिलिप्पुस, प्रुखुरुस, नीकानोर, तीमोन, परमिनास और अन्ताकिया मैं रहेन बारे नीकुलाउस जो यहूदि धर्म मैं बदल गै रहैं, चुन लई।

⁶ समूह उन्हैं प्रेरितन के अग्गु ठड़बाईं और प्रार्थना करकै उनके ऊपर हात धरी।

⁷ और परमेस्वर को बचन फैलत गौ। और यरूसलेम मैं चेलन की गिनती बड़ा बढ़त गई, और पुजारी को एक बड़ो समाज जौ बिस्वास कै मानन बारो ही गौ।

स्तिफनुस को पकड़ो जानो

⁸ स्तिफनुस, एक आदमी जो परमेस्वर के अनुग्रह पाओ भौ रहै और सामर्थ्य से भरपूर भरो रहै, बौ लोगन के बीच बड़े-बड़े अचम्मे काम और चिन्ह दिखात रहै।

⁹ लेकिन बौ कुछ आदमिन के जरिये बिरोध करो गौ रहै जो आजाद करन बारेन के सभाघरन के सदस्य रहैं, जैसो कि जाकै कहो जाथै, जोमैं कुरेनी और सिकन्दरिया के यहूदि सामिल रहैं। बे और दूसरे आदमी किलिकिया और आसिया के देसन से स्तिफनुस के संग बहस कर लागे।

¹⁰ लेकिन आत्मा स्तिफनुस कै ऐसो ग्यान दई कि जब बौ बोलो, तौ बे बाके अग्गु टिक ना पाईं।

¹¹ तौ बे कई लोगन कै घूस दईं जो कहेन लगे, “हम जाकै मूसा और परमेस्वर के खिलाप बुरो-भलो कहत सुने हैं।”

¹² ऐसे करकै बे आदमिन कै, बड़े-बूढ़ेन और यहूदि नियम के सिक्छकन कै हलाए दईं। बे स्तिफनुस कै पकड़कै पंचायत मैं लै आए।

¹³ फिर बे कुछ आदमिन कै बाके बारे मैं झूठ गभन के ताहीं लै आए। बे कहीं, “जौ आदमी, हमेसा हमरे पवित्र मंदिर और मूसा के नियम के खिलाप बोलथै।

¹⁴ हम बासे जौ कहत सुने हैं कि जहे ईसु नासरी जौ मंदिर कै उजाड़ देगो, और बे रीतियन कै बदल देगो जोकी मूसा हमकै दई है!”

¹⁵ तौ सब आदमी जो पंचायत मैं बैठे रहैं, स्तिफनुस कै निहारकै देखीं कि बाको मोहों एक स्वर्गदूत के मोहों के हानी दिखात रहै।