प्रेरित 1 - परमेस्वर को सच्चो वचन

¹ प्रिय थियुफिलुस: मैं अपनी पहली किताब मैं बे सब चीजन के बारे मैं लिखो जो ईसु करी रहै और बौ समय से सिखाओ रहौं जब बौ अपनो काम सुरू करी रहै

² बौ दिन तक बौ स्वर्ग मैं लैजाओ गौ रहै। जासे पहले कि बौ उठाओ लौ जातो, बौ पवित्र आत्मा की सक्ति के जरिये अपने प्रेरितन के रूप मैं चुने गै लोगन कै निर्देस दई।

³ अपनी मौत के बाद चालीस दिन ले बौ भौत बार दिखाई दौ जासे साबित भौ कि बौ जिंदो है। बे बाकै देखीं, और बौ उनके संग परमेस्वर के राज्य के बारे मैं बात करी।

⁴ और जब बे सब एक संग आए, तौ बौ उनकै जौ आदेस दई: “यरूसलेम कै मत छोड़ौ, लेकिन जो उपहार के बारे मैं मैं तुम्हैं बताओ हौं, बाकै असियाबौ, बौ उपहार जोको मेरो दऊवा वादा करी रहै।

⁵ यूहन्ना पानी से बपतिस्मा लई, लेकिन कुछै दिनन मैं तुम पवित्र आत्मा के संग बपतिस्मा लेगे।”

ईसु स्वर्ग मैं लैजाओ गौ

⁶ जब प्रेरित ईसु के संग मिले, तौ बे बासे पूँछीं, “हे प्रभु, का तैं जौ समय राज्य कै बापस इस्राएल कै देगो?”

⁷ ईसु उनसे कही, “समय और मौका मेरे दऊवा के अपने अधिकार के जरिये तैं करो गौ है, और जौ जाननो तुमरे ताहीं नाय है कि बे कब होमंगे।

⁸ लेकिन जब पवित्र आत्मा तुमरे ऊपर आगो तौ तुम सामर्थ्य से भर जागे, और तुम यरूसलेम मैं, यहूदिया, सामरिया और पृथ्वी के छोर तक मेरे ताहीं गभा बनैगे।”

⁹ जौ कहेन के बाद, बाकै स्वर्ग मैं लैजाओ गौ काहैकि बे बाकै देखत रहैं, और एक बादर उनकै अपनी नजर से लुकाए दई।

¹⁰ जब बे चले गै, तहुँओं उनकी निघा आसमान मैं टिकी रइ, जब सेतो लत्ता पहने दुई आदमी अनकाचीति उनके झोने ठाड़े रहैं

¹¹ और कही, “गलील, तुम हूँना ठाड़कै आसमान के घाँईं काहे देखरै हौ? जौ ईसु, जो तुमरे झोने से स्वर्ग मैं लैजाओ गौ रहै, बहे तरीका बापस आबैगो जो तरीका से तुम बाकै स्वर्ग जात भइ देखे रहौ।”

यहूदा को वारिस

¹² तौ प्रेरित जैतून नाओं के पहाड़ से यरूसलेम के घाँईं गै, यरूसलेम सहर से लमसम आधी मील की दूरी मैं है।

¹³ बे सहर मैं आत खिना कि बौ कमरा मैं गै, जहाँ बे रुके भै रहैं: पतरस, यूहन्ना, याकूब और अन्द्रियास, फिलिप्पुस और थोमा, बरतुल्मै और मत्ती, हलफई का लौड़ा याकूब, देसभक्त सिमौन, और याकूब का लौड़ा यहूदा।

¹⁴ जे सब तमान बईंय्यरैं और ईसु की अईय्या मरियम और बाके भईय्यन के संग झुंड मैं प्रार्थना करन के ताहीं इखट्टे होबै करत रहैं।

¹⁵ कुछ दिनन के बाद पतरस सब विस्वासी भईय्यन के बीच मैं, जो एक सौ बीस आदमी के लमसम रहैं, बौ हूँना ठाड़कै कहेन लागो।

¹⁶ बौ कहीं, “मेरे भईय्यौ, पवित्र सास्त्र कै सच होनो जरूरी रहै, जोमैं पवित्र आत्मा, दाऊद के जरिये बोलत भै यहूदा के बारे मैं एक भविस्यवाँड़ी करी रहै, जो ईसु कै पकड़वान बारेन के ताहीं अगुवन रहै।

¹⁷ यहूदा हमरे झुंड को सदस्य रहै, काहैकि बाकै हमरे काम मैं सेवकाई मैं हिस्सा लेन के ताहीं चुनो गौ रहै।”

¹⁸ यहूदा कै अपने अधर्म के कामन के ताहीं जो पैसा मिलो, बासे बौ एक खेत खरीदी जितै बाकी मौत ही गई; बाको पेट फट गौ और बाकी पूरी भीतर की आँती बाहर निकर आई।

¹⁹ यरूसलेम मैं रहन बारे सबै आदमी जाके बारे मैं सुनीं, और इसलै उनकी अपनी भासा मैं बे बौ जघा कै हकलदमा कहीं, जो मतलब है “खून को खेत।”

²⁰ “जाके ताहीं भजन संहिता की किताब मैं लिखो गौ है, ‘बाको घर खाली हुई जाबै; कोई भी जामैं नाय रह सकथै।’ जहो लिखो है: ‘कोई और भी बाकी सेवा लै सकथै।’”

²¹ “इसलै जितने दिन ले प्रभु ईसु हमरे संग आत जात रहो, ठीक जौ है कि उनमैं से एक आदमी बाके जी उठन को गभा ही जाबै,

²² मतलब यूहन्ना के बपतिस्मा से लैकै बाके हमरे झोने से जी उठाए जान तक, जो लोग बराबर हमरे संग रहे।”

²³ तौ बे दुई आदमी कै ठड़बाईं: एक यूसुफ जो बरसब्बास कहो जात रहै बाको उपनाओं यूस्तुस है, और दुसरो मत्तियाह कहो जात रहै।

²⁴ फिर बे प्रार्थना करीं, “प्रभु, तैं सबन के बिचारन कै जानथै, इसलै हमकै दिखा कि इन दोनों मैं से कौनकै चुनो है

²⁵ कि बाकै जौ सेवकाई और प्रेरित को पद मिलै, जो यहूदा छोड़कै अपने जघा कै चले गौ है।”

²⁶ तौ बे दोनों आदमिन कै छाँटन के ताहीं उनके बीच भौत कुछ मुहान कि कोसिस करीं, और एक चुने भौ मत्तियाह रहै, जोकै ग्यारह प्रेरितन के झुंड मैं जोड़ो गौ रहै।