မဿဲ ရီးသားပြုစုထားသော ခရစ်တော်၏ သတင်းကောင်း 12 - ဓမ္မသစ်ကျမ်း ရခိုင်ဘာသာစကား

ဥပုသ်နိ့ အကြောင်း မိန်းမြန်းခြင်း

¹ ထိုနောက် ယေသျှုသည် ဥပုသ်နိ့တစ်နိ့၌ သီးနှံခင်းများကို ဖြတ်၍ ကြွတော်မူစဉ်၊ သူ၏တပည့်တော်တိသည် ဝမ်းဆာသောကြောင့် သီးနှံများကို စားရန် ခူးဆွတ် ကြ၏။

² ထိုအခြင်းအရာကို ဖာရိယှဲရို့သည် မြင်ကြသောအခါ သူရို့က “ကြည့်လိုက်ပါ၊ ဥပုသ်နိ့၌ ကိုယ်တော်၏တပည့်တော်တိ ဤသို့ ပြုခြင်းသည် ငါရို့၏ပညတ်တရားကို ဆန့်ကျင်နိန်ကြခြင်း ဖြစ်၏” ဟု ယေသျှုကို ပြောကြ၏။

³ ယေသျှုက “ဒါဝိဒ်သည် သူနှင့် သူ့အဖော်တိ ဝမ်းဆာလာကြသောအခါ ဇာပိုင် လုပ်ခသည်ကို သင်ရို့ တစ်ခါမျှ မဖတ်ဖူးကြလော။

⁴ သူသည် ဘုရားသခင်၏အိမ်တော်ထဲသို့ ဝင်၍ ယဇ်ပုရောဟိတ်တိသာ စားခွင့်ဟိသော ဘုရားသခင်အား ပူဇော်ထားသည့်မုန့်ကို ယူ၍ သူနှင့် သူ့လူတိသည် ပညတ်တရားကို ချိုးဖောက်လျက် စားခကြ၏။

⁵ ဤတင်မကသိမ့်၊ ဗိမာန်တော်၌ဟိသော ယဇ်ပုရောဟိတ်များသည် ဥပုသ်နိ့တိုင်းတွင် ၎င်းဥပုသ်နိ့နှင့် ပတ်သက်သောပညတ်တရားများကို ချိုးဖောက်ကြသော်လည်း သူရို့သည် အပြစ်မကျ၊ ဟု မောသျှေ၏ပညတ်ကျမ်း၌ ရီးထားသည်ကို သင်ရို့သည် မဖတ်ဖူးကတ်လား။

⁶ ငါဆိုသည်ကား၊ ဗိမာန်တော်ထက် ကြီးမြတ်သောအရာသည် ဤအရပ်၌ ဟိ၏။

⁷ ‘တိရစ္ဆာန်နှင့် ယဇ်ပူဇော်ခြင်းအကျင့်ထက် သနားကရုဏာထားခြင်းအကျင့်ကို ငါ အလိုဟိ၏’ ဟု ကျမ်းစာက ပြောထား၏။ ဤကျမ်းစာ ဆိုလိုချက်ကို သင်ရို့သည် အမှန်အကန် နားလည်ကြမည်ဆိုလျှင် အပြစ်မဟိသောသူကို အပြစ်တင်ကြလိမ့်မည်မဟုတ်ပေ။

⁸ လူသားသည် ဥပုသ်နိ့၏ အသျှင်သခင် ဖြစ်၏။”

လက်တစ်ဖက်သီနိန်သော လူတစ်ယောက်

⁹ ယေသျှုသည် ထိုနီရာမှထွက်၍ တရားဇရပ်တစ်ခုသို့ ဝင်ရောက်လေ၏၊

¹⁰ ထိုနီရာ၌ လက်တစ်ဖက်သီနိန်သော လူတစ်ယောက်ဟိ၏။ ယေသျှုကို အမှားရှာ၍ အပြစ်တင်စွပ်စွဲလိုသော လူအချို့သည်လည်း ထိုနီရာ၌ ဟိနိန်ကြ၏၊ ထို့ကြောင့် ထိုသူရို့က “ဥပုသ်နိ့မှာ အနာရောဂါပျောက်စီခြင်းသည် ငါရို့၏ ပညတ်တရားကို ဆန့်ကျင်သည်မဟုတ်ပါလား” ဟု မိန်းကြ၏။

¹¹ ယေသျှုက “အကယ်၍ သင်ရို့ထဲက တစ်ယောက်ယောက်မှာ သိုးတစ်ကောင်ဟိ၏၊ ထိုသိုးသည် ဥပုသ်နိ့၌ တွင်းနက်ကြီးတစ်ခုထဲသို့ ကျနိန်လျှင် သင်ရို့သည် ထိုသိုးကို တွင်းထဲက ဆယ်တင်ကြမည်လော၊ မဆယ်တင်ဘဲ နီကြမည်လော။

¹² လူတစ်ယောက်သည် သိုးတစ်ကောင်ထက် သာ၍ တန်ဖိုးကြီး၏၊ သို့ဖြစ်၍ ဥပုသ်နိ့၌ တစ်စုံတစ်ယောက်ကို ကူညီခြင်းငှာ ငါရို့၏ပညတ်တရားက ငါရို့ကို ခွင့်ပြုထား၏” ဟု မိန့်တော်မူ၏။

¹³ ထို့နောက် ယေသျှုက လက်တစ်ဖက်သီနိန်သောသူအား “သင်၏လက်ကို ဆန့်လိုက်” ဟု မိန့်တော်မူသည့်အတိုင်း၊ ထိုသူသည် လက်ကို ဆန့်လိုက်လျှင် ထိုလက်သည် အခြားလက်တစ်ဖက်ကဲ့သို့ အကောင်းပကတိ ဖြစ်လားလေ၏။

¹⁴ ထိုအခါ ဖာရိယှဲရို့သည် တရားဇရပ်မှ ထွက်လား ကြပြီးလျှင် ယေသျှုကို သတ်ရန် ကြံစည်ကြလေ၏။

ဘုရားသခင်ရွီးကောက်တော်မူသော အခိုင်းအစီ

¹⁵ ယေသျှုသည် သူ့အား လျှို့ဝှက်ကြံစည် နိန်ကြသည့်အကြောင်းကို ကြားသောခါ၊ ထိုအရပ်မှ ကြွတော်မူ၏။ လူအုပ်ကြီးကလည်း ကိုယ်တော်နောက်သို့ လိုက်လာကြ၏။ ကိုယ်တော်သည် မကျန်းမာသူအားလုံးကို ကျန်းမာစီတော်မူပြီးလျှင်၊

¹⁶ သူ၏အကြောင်းကို တခြားလူတိအား မပြောကြရန် မိန့်မှာတော်မူ၏။

¹⁷ ဤသို့ ပြုတော်မူခြင်းမှာ ပရောဖက် ဟေသျှာယအားဖြင့် ပြောထားခသည့်ကျမ်းစကားတိ မှန်လာခြင်း ဖြစ်၏။ ကျမ်းစာလာသည်ကား၊

¹⁸ “ဤသူကား ငါ ရွီးချယ်ထားသော ငါ၏ကျွန် ဖြစ်၏။ ဤသူသည် ငါ့ကို ရွှင်လန်းစီ၍ ငါချစ်ရသောသူ ဖြစ်၏။ ငါ၏ဝိညာဉ်ကို သူ၌ တည်စီမည်။ သူသည် လူအမျိုးမျိုးတိအား ငါ၏တရားစီရင်ခြင်းအကြောင်းကို ဟောပြောလိမ့်မည်။

¹⁹ သူသည် အော်ဟစ်ခြင်း၊ ငြင်းခုံခြင်းကို မပြုသည်ဖြစ်၍ သူ၏အသံကို လမ်းများ၌ မည်သူမျှ မကြားစီရ။

²⁰ ကောက်နိန်သော ကျူပင်ချေတစ်ပင်ကို မချိုး၊ မီးတောက်ငယ်တစ်ခုကို မမှုတ်သတ်၊ တရားမျှတမှုကို အောင်မြင်သည့်တိုင်အောင် မဆုတ်မနစ်ဆက်လက် ဆောင်ရွက်လိမ့်မည်ဖြစ်၍

²¹ လူမျိုးအားလုံးက သူ့ကို မျှော်လင့်နိန်ကတ်လိမ့်မည်” ဟူ၍ ဖြစ်သတည်း။

ယေသျှုနှင့် ဗေလဇေဗုလ

²² ထို့နောက် လူအချို့သည် နတ်ဆိုးဝင်ပူးသောကြောင့် မျက်စိကန်း၍ စကားအ နိန်သော သူတစ်ယောက်ကို ယေသျှုပါးသို့ ယူလာကြ၏။ ယေသျှုသည် ထိုသူအား ကျန်းမာစီတော်မူသဖြင့် ထိုသူသည် မျက်စိမြင်၍ စကားပြောနိုင်လေ၏။

²³ ယေသျှုပြုတော်မူသောအမှုကို လူအပေါင်းရို့သည် အံ့သြကြလေ၏။ “ဤသူသည် ဒါဝိဒ်၏သား ဖြစ်သလော” ဟူ၍ သူရို့က မိန်းမြန်းကြ၏။

²⁴ ဤအကြောင်းကို ဖာရိယှဲတိကြားသောခါ၊ “သူသည် နတ်ဆိုးတိကို မောင်းထုတ်နိုင် သည်မှာ နတ်ဆိုးခေါင်းဆောင် ဗေလဇေဗုလက တန်ခိုးပီးထားသောကြောင့်ဖြစ်၏” ဟု ပြန်ပြောကြ၏။

²⁵ ယေသျှုသည် ထိုသူရို့၏စိတ်ကို သိသောကြောင့် “တိုင်းနိုင်ငံတစ်ခု၌ အုပ်စုကွဲပြီး အချင်းချင်း တိုက်ခိုက်နိန်ကြလျှင် ထိုနိုင်ငံသည် မရပ်တည်နိုင်။ မိသားစုတစ်စု၊ မြို့ရွာတစ်ခုသည်လည်း အချင်းချင်း ကွဲပြားနိန်ကြလျှင် ထိုမိသားစု၊ ထိုမြို့ရွာတိသည်လည်း မရပ်တည်နိုင်။

²⁶ စာတန်က စာတန်ကို မောင်းထုတ်နိန်လျှင် သူသည် မိမိကိုယ်တိုင် ကွဲပြားအောင်လုပ်နိန်ခြင်းဖြစ်၏။ ထိုသို့ ဆိုသော် သူ၏နိုင်ငံသည် ဇာပိုင် ရပ်တည်နိုင်မည်နည်း။

²⁷ ငါသည် ဗေလဇေဗုလ၏တန်ခိုးကို အမှီပြု၍ နတ်ဆိုးတိကို မောင်းထုတ်နိန်သည်ဟု သင်ရို့က ဆိုလျှင် သင်ရို့၏တပည့်တိသည် ဇာသူ့တန်ခိုးဖြင့် နတ်ဆိုးတိကို မောင်းထုတ်နိန်ကတ်စွာလဲ။ သင်ရို့တပည့်တိက သင်ရို့၏အမှားကို သက်သီပြနိန်ကြ၏။

²⁸ ငါသည် ဗေလဇေဗုလနတ်ဆိုး၏တန်န်ခိုးနှင့် လုပ်နိန်သည်မဟုတ်၊ ဘုရားသခင်ဝိညာဉ်တော်တန်ခိုးဖြင့် နတ်ဆိုးတိကို နှင်ထုတ်နိန်ခြင်းဖြစ်၏။ သို့ဖြစ်၍ ဘုရားသခင်နိုင်ငံတော်သည် သင်ရို့ပါးသို့ ရောက်နိန်ယာ။

²⁹ “ခွန်အားကြီးသော လူတစ်ယောက်၏ အိမ်သို့ ဝင်၍ ထိုသူ၏ပစ္စည်းများကို လုယူမည်ဆိုလျှင် ထိုသူကို ဦးစွာ ချိုင်ထားပြီးမှ သူ၏အိမ်၌ ဟိသောပစ္စည်းများကို ရယူနိုင်လိမ့်မည်။

³⁰ “ငါ့ဖက်၌ မဟိသောသူသည် ငါ့ကို ဆန့်ကျင်ဘက် ပြုနိန်သောသူ ဖြစ်၏။ ငါနှင့်အတူ တစ်စုတည်း မဟိသောသူသည် ပြန့်ကြဲနိန်သောသူ ဖြစ်၏။

³¹ သို့ဖြစ်၍ ငါဆိုသည်ကား လူတိသည် နှုတ်ဖြင့် ပြစ်မှားမိသော အပြစ်နှင့် အပြစ်အမျိုးမျိုးမှ ခွင့်ရွှတ်ခြင်းရနိုင်ကြ၏၊ သို့ရာတွင် သန့်ယှင်းသောဝိညာဉ်တော်ကို နှုတ်ဖြင့် ပြစ်မှားမိသောသူသည် အပြစ်မှ ခွင့်ရွှတ်ခြင်း မရနိုင်။

³² ဇာသူမဆို လူသားကို ဆန့်ကျင်ပြောဆိုမိသောသူသည် အပြစ်မှ ခွင့်ရွှတ်ခြင်း ရနိုင်၏။ သို့ရာတွင် သန့်ယှင်းသောဝိညာဉ်တော်ကို နှုတ်ဖြင့် ပြစ်မှားသောသူတိုင်းသည် ယခုဘဝ၊ နောင်ဘဝ အပြစ်မှ ခွင့်ရွှတ်ခြင်း မရနိုင်။

အပင်နှင့် အသီး

³³ “အပင်ကောင်းလျှင် ထိုအပင်၏အသီးသည် ကောင်းလိမ့်မည်၊ အပင်မကောင်လျှင် ထိုအပင်၏အသီးသည် ကောင်းလိမ့်မည်မဟုတ်။ အသီးအားဖြင့် အပင်၏သဘောကို သိရ၏။

³⁴ မြွီဆိုးအမျိုးရို့၊ သင်ရို့ကဲ့သို့ လူဆိုးလူယုတ်တိ၏နှုတ်ထဲက ကောင်းသောစကားတိ ဇာပိုင် ထွက်လာနိုင်ဖို့လဲ။ စိတ်နှလုံးထဲ၌ ပြည့်လျှံလာသောကြောင့် နှုတ်မှ ထွက်လာခြင်းဖြစ်၏။

³⁵ ကောင်းသောသူသည် ကောင်းသောဘဏ္ဍာတိုက်ထဲက ကောင်းသောအရာတိကိုသာ ထုတ်ဖော်တတ်၏၊ မကောင်းသောသူသည် မကောင်းသောဘဏ္ဍာတိုက်ထဲက မကောင်းသောအရာတိကိုသာ ထုတ်ဖော်တတ်၏။

³⁶ “သို့ရာတွင် သင်ရို့ကို ငါဆိုသည်ကား တရားစီရင်သည့်နိ့ရက်၌ လူတိုင်းသည် မိမိပြောသမျှသော အကျိုးမဟိသည့်စကားအတွက် ပီးဆပ်ကြရလိမ့်မည်။

³⁷ အကြောင်းမူကား သင်ရို့၏စကားအားဖြင့် သင်ရို့သည် အပြစ်လွတ်ကြလိမ့်မည်၊ ပြီးနောက် သင်ရို့၏စကားဖြင့် သင်ရို့သည် ပြစ်ဒဏ်စီရင်ခြင်းကို ခံကြရလိမ့်မည်။”

နိမိတ်လက္ခဏာကို တောင်းခံကြခြင်း

³⁸ ထို့နောက် ကျမ်းတတ်ဆရာတချို့နှင့် ဖာရိယှဲတချို့က “ဆရာ၊ အကျွန်ရို့သည် ကိုယ်တော်ပြသော နိမိတ်လက္ခဏာတစ်ခုကို မြင်ချင်ပါ၏” ဟု ကိုယ်တော်အား တောင်းလျှောက်ကြ၏။

³⁹ ယေသျှုက “ဆိုးယုတ်ပြီး ဘုရားတရားမဲ့နိန်ကြသော ဤခေတ်လူရို့၊ သင်ရို့သည် ငါ့အား နိမိတ်လက္ခဏာကို တောင်းဆိုနိန်ကတ်တေလား။ မဖြစ်နိုင်။ သင်ရို့ကို ပြမည့်နိမိတ်လက္ခဏာမှာ ပရောဖက်ယောန၏ နိမိတ်လက္ခဏာမျှသာ ဖြစ်၏။

⁴⁰ ယောနသည် ငါးကြီးဝမ်းခေါင်းထဲ၌ သုံးရက်နှင့် သုံးည ကြာနိန်ခသည့်နည်းတူ လူသားသည် မြီကြီးထဲမှာ သုံးရက်နှင့် သုံးည နီရလိမ့်မည်။

⁴¹ တရားစီရင်သည့်နိ့ရက်၌ နိနေဝေမြို့သူမြို့သားတိသည် သင်ရို့တစ်ဘက်မှာရပ်လျက် သင်ရို့ကို အပြစ်တင်ကဲ့ရဲ့ကြလိမ့်မည်။ အကြောင်းမူကား သူရို့သည် ယောန ဟောသောတရားကို ကြားသောအခါ အပြစ်မှ နောင်တရကြသောကြောင့်ဖြစ်၏။ ငါအမှန်ဆိုသည်ကား၊ ယောန ထက် ကြီးမြတ်သောသူသည် ဤအရပ်၌ ဟိ၏။

⁴² တရားစီရင်သည့်နိ့ရက်၌ တောင်ပြည်ကို အုပ်စိုးရသည့်မိဖုရားသည် သင်ရို့တစ်ဖက်၌ ရပ်၍ သင်ရို့ကို ပြစ်တင်ကဲ့ရဲ့လိမ့်မည်။ အကြောင်းမူကား ထိုမိဖုရားကြီးသည် သျှောလမုန်မင်းကြီး၏ ပညာတရားကို နာယူလို၍ ခရီးအဝီးကြီးက လာရောက်လေ့ဟိ၏။ ငါအမှန်ဆိုသည်ကား၊ သျှောလမုန်ထက် ကြီးမြတ်သောသူသည် ဤအရပ်၌ ဟိ၏။

ဝိညာဉ်ဆိုး ပြန်လာခြင်း

⁴³ “ဝိညာဉ်ဆိုးတစ်ကောင်သည် လူတစ်ယောက်ထဲက ထွက်လာသောအခါ အလွန်ခြောက်သွိ့သော အရပ်ဒေသတစ်ခုလုံးကို လှည့်လည်လျက် နားခိုမည့်နီရာတစ်ခုကို လိုက်ရှာ၏။ တစ်နီရာ မတွိ့လျှင်

⁴⁴ ‘ငါ ထွက်လာသည့် အိမ်သို့ ပြန်လားရဖို့’ ဟု သူ့ကိုသူ ပြောလျက်၊ ထိုအိမ်သို့ ပြန်လာ၍ ထိုအိမ်၌ နီထိုင်သူ တစ်ယောက်လည်း မဟိဘဲ၊ သန့်ရှင်း သပ်ယပ်လျက်ဟိသည်ကို တွိ့ရ၏၊

⁴⁵ ထိုအခါ ဝိညာဉ်ဆိုးသည် ထွက်လားပြီးနောက် မိမိထက်ဆိုးသော တခြား ဝိညာဉ်ဆိုး ခုနစ်ကောင်ကို ခေါ်၍ ထိုအိမ်သို့ ပြန်လာကာ ဝင်ရောက်နီထိုင်လေ၏။ ထိုအခါ ထိုသူ၏ နောက်မှဖြစ်လာသောအခြေအနေသည် ရှိ့ကဖြစ်ခသည့်အခြေအနေထက် သာ၍ ဆိုးလေ၏။ ဤခေတ်ကာလ၏ ဆိုးသောသူတိသည်လည်း ဤသို့ ဖြစ်လာကြလိမ့်မည်” ဟု မိန့်တော်မူ၏။

ယေသျှု၏အမိနှင့် ညီအစ်ကိုများ

⁴⁶ ယေသျှုသည် ပရိသတ်တိနှင့် စကားပြောနိန်သောအခါ သူ့အမိနှင့် သူ၏ညီအစ်ကိုတိ ရောက်လာကြ၏။ သူရို့သည် သူနှင့် စကားပြောချင်၍ အပြင်က ရပ်စောင့်နိန်ကြ၏။

⁴⁷ ပရိသတ်ထဲမှ တစ်ယောက်က “ကြည့်လိုက်ပါ၊ ကိုယ်တော်၏အမိနှင့် ညီအစ်ကိုရို့သည် ကိုယ်တော်နှင့် စကားပြောချင်၍ အပြင်မှာ ရပ်စောင့်နိန်ကြ၏” ဟု ပြော၏။

⁴⁸ ယေသျှုက “ငါ့အမိသည် ဇာသူနည်း၊ ငါ့ညီအစ်ကိုတိကား ဇာသူရို့ဖြစ်သနည်း” ဟူ၍ မိန်း၏။

⁴⁹ ထို့နောက် ကိုယ်တော်က သူ၏တပည့်တော်တိကို လက်ညှိုးထိုးပြပြီးလျှင် “ကြည့်ကတ်ပါ၊ ဤနီရာ၌ ဟိသောသူတိသည် ငါ့အမိနှင့် ငါ့ညီအစ်ကိုတိ ဖြစ်ကြ၏။

⁵⁰ ကောင်းကင်ဘုံသျှင် ငါ့အဖ၏ အလိုတော်ကို လုပ်ဆောင်သောသူသည် ငါ့အမိ၊ ငါ့ညီအစ်ကိုနှင့် ငါ့ညီမဖြစ်ကြ၏” ဟု မိန့်တော်မူ၏။