Mateo 1 - WURUBURƐ NOMBIA KPAAKPAA NƆƆKEBAKESEE WƆLE

Yesu duuluŋ man balaŋ

¹ Gyoo Defidi na Aberaham be naanabii Yesu Kristo duuluŋ man balaŋ yaa.

² Aberaham lolana Asiki te Asiki mɔ lola Gyekɔpo te Gyekɔpo mɔ lola Gyuda na ɔ naabia.

³ Gyuda lolana Peresi na Sera baŋ be naa yɛna Tama nɛ, te Peresi mɔ lola Heserɔn, te Heserɔn mɔ lola Ram.

⁴ Ram lolana Aminadabo te Aminadabo mɔ lola Nasɔn te Nasɔn mɔ lola Salimɔn.

⁵ Salimɔn na ɔ wɛɛle Rahabo lolana Boase te Boase na ɔ wɛɛle Ruute mɔ lolana Obedi te Obedi mɔ lolana Gyese.

⁶ Gyese mɔ lolana gyoo Defidi te gyoo Defidi mɔ lolana Solomɔn. Solomɔn ɔ naa yɛna Yuria lialo ŋon gyoo Defidi ba mo yala nɛ.

⁷ Solomɔn mɔ lolana Rehoboam te Rehoboam mɔ lolana Abigya te Abigya mɔ lolana Asa.

⁸ Asa lolana Gyehosafate te Gyehosafate mɔ lolana Gyehoram te Gyehoram mɔ lolana Yusia.

⁹ Yusia lolana Gyotam te Gyotam mɔ lolana Ahase te Ahase mɔ lolana Hesekia.

¹⁰ Hesekia lolana Manase te Manase mɔ lola Amɔn te Amɔn mɔ lola Gyosia.

¹¹ Gyosia lolana Gyekonia na ɔ naabia debaŋ keŋ bɔɔ kyaŋ Iseraetena yoo man mo gyu Babilɔn tɛɛle man nɛ.

¹² Ba ke kyaŋ Iseraetena gyu Babilɔn tɛɛle man wɔle nɛ te Gyekonia lola Selateli te Selateli mɔ lola Serubabeli.

¹³ Serubabeli lolana Abiudi te Abiudi mɔ lola Eliakim te Eliakim mɔ lola Asɔ.

¹⁴ Asɔ lolana Sadoki te Sadoki mɔ lola Akim te Akim mɔ lola Eliudi.

¹⁵ Eliudi mɔ lolana Eliasa te Eliasa mɔ lola Matan te Matan mɔ lola Gyekɔpo.

¹⁶ Gyekɔpo mɔ lolana Gyosɛfo. Te Gyosɛfo yala Mɛɛre ŋon ɔ ba lola Yesu ŋon bɛɛ baake e nyi Kristo nɛ. Ŋon yɛna nyeelɛɛre ŋon Wurubuarɛ be yako see nyi waa kɔŋ nɛ.

¹⁷ Mena dɔɔ lee Aberaham dɔɔ kelii gyoo Defidi dɔɔ yɛɛ kalola kegyakaare kufu anaara. Te lee gyoo Defidi dɔɔ kelii debaŋ keŋ bɔɔ kyaŋ Iseraetena gyu Babilɔn nɛ yɛɛ kalola kegyakaare kufu anaara. Te lee debaŋ keŋ bɔɔ kyaa Babilɔn kelii debaŋ keŋ bɔɔ lola Kristo mɔ nɛ yɛɛ kalola kegyakaare kufu anaara.

Yesu Kristo kalola wose man nombia

¹⁸ Yesu Kristo kalola wose man nombia yaa. Gyosɛfo na Yesu ɔ naa Mɛɛre yakowɔ see nyi baa yala dɔŋa. Mɔna Gyosɛfo ta kpeo ta e ya, te Wurubuarɛ feliŋ yela Mɛɛre kyaŋa fulu.

¹⁹ Na Gyosɛfo yɛɛ walaŋ ŋon ɔ gbɛɛneŋ tenɛɛ Wurubuarɛ siaman, te ɔ bɛɛ gyae nyi waa do Mɛɛre desɛŋ balaŋ man dɔɔ ya nɛ, ɔ yɛɛ wa agyueŋ nyi waa yo bɛɛ e keŋ ŋolo na ŋolo ba gyem ya.

²⁰ Debaŋ keŋ Gyosɛfo na mo mena agyueŋ kei nɛ, te de Gbeŋgyoo Wurubuarɛ kpilale ŋolo kaa lese ɔ wose wola e dosɛɛ man, te ɔ yako e nyiaa, “Defidi ɔ naanabii Gyosɛfo, na yee Mɛɛre ke yala ya. Nawolo nyi Wurubuarɛ feliŋ yele la te ɔ kyaŋa fulu kei.

²¹ Waa lola bu baale na n ka do e yele nyi Yesu. Nawolo nyi ŋon ne gyae la waa lese ɔ balaŋ lee be nombiakumɛɛ man.”

²² Kɛŋa pou kɔŋawɔ mena, na kpene keŋ de Gbeŋgyoo Wurubuarɛ be tɛɛ ɔ dekpeŋkpeŋgyɔɔre Yesaya dɔɔ yako see nɛ ke kɔŋ mena ampaŋ. Nombia ŋenaŋ yɛna nyiaa,

²³ “Alebu ŋon ɔ te doo ta na baale see ya nɛ waa kyaŋ fulu na waa lola bu baale na baa baake e nyi Imanuɛle.” Keŋ nawolo nyi “Wurubuarɛ kyaa de man.”

²⁴ Mena dɔɔ Gyosɛfo kefoŋ nɛ, ɔ moo Mɛɛre yala ŋgba mena keŋ de Gbeŋgyoo Wurubuarɛ kpilale ŋon be yako e nɛ.

²⁵ Mɔna ŋon na Mɛɛre te doo ŋgba alo na baale nɛ ya kaboena ɔ lola bu baale. Te Gyosɛfo doo e yele nyi Yesu.