လုကာ 19 - Northern Rakhine1 ယေပြီးကေ ကိုယ်တော်ယေရှုက ဂျေရိခေါမြို့ကို ဖြတ်လို့ ကြွတော်မူလီရေ။ 2 ယင်းမြို့မာ ဇက္ခဲနာမယ်ဟိရေ လူတစ်ယောက် ဟိလီရေ။ သူက အခွန်ကောက်ဂေါင်းဆောင်တစ်ယောက် ဖြစ်ပြီးကေ ကောင်းကောင်းချမ်းသာရေ သူဌီးတစ်ယောက် ဖြစ်လီရေ။ 3 သူက ကိုယ်တော်ယေရှု ဇာသူဆိုစွာကို တွိ့မြင်ရဖို့ ကြိုးစားကေလည်း သူက အရပ်တိုလို့ လူထုပရိတ်သတ်ကို ကျော်လို့ မမြင်ရဘဲ ဖြစ်နီပါရေ။ 4 ယေတွက်နန့် သူက လူထုပရိတ်သတ် ရှိ့က ကြိုတင်လို့ အယင်ဗြီးလားပနာ ကိုယ်တော်ကို တွိ့မြင်ရဖို့ သဖန်းပင်အထက်ကို တက်နီလီရေ။ ဇာတွက်နန့်ဆိုကေ ကိုယ်တော်က ယင်းလမ်းမှ လားဖို့အတွက်နန့် ဖြစ်တေ။ 5 ကိုယ်တော်က ယင်းနီရာကို ရောက်ရေခါ မော်ကြည့်ဗျာလ် “ဇက္ခဲ၊ အယင်ဆင်းလာလတ်။ ဒေနိန့် သင့်အိမ်မာ ငါတည်းဖို့” လို့ မိန့်တော်မူရေ။ 6 ယေတွက်နန့် ဇက္ခဲကလည်း အပင်ထက်က အယင်ဆင်းလာပနာ ကိုယ်တော့်ကို ဝမ်းပန်းတသာ ကြိုဆိုလီရေ။ 7 ယင်းချင့်တိကို မြင်ရေလူတိက “ကိုယ်တော်က အပြစ်ဒုစရိုက်သမားအိမ်ကို တည်းဖို့လားခဗျာလ်” လို့ သရော်တော်တော်နန့် အပြစ်တင်ကတ်လီရေ။ 8 ယေကေလည်း ဇက္ခဲက ရပ်ပြီးကေ အသျှင်ကို “အသျှင်၊ နားထောင်ပါ။ ကျွန်တော်ပိုင်ရေ ပစ္စည်းဥစ္စာထက်ဝက်ကို မဟိဆင်းရဲသားတိကို ခွဲလို့ ဝီပီးပါဖို့။ လူတိဘားက မတရားကောက်ထားရေ အခွန်ဒင်္ဂါးတိကို လေးဆပိုလို့ ပြန်ပီးလိုက်ပါဖို့” လို့ လျှောက်တင်လီရေ။ 9 ကိုယ်တော်က ဇက္ခဲကို “သင်က အာဗြဟံ၏မျိုးဆက်ဖြစ်တေ အတွက်နန့် ဂနိန့်ကပင်စလို့ သင်နန့် သင့်မိသားစုအားလုံးကို ဘုရားသျှင် ကယ်တင်လိုက်ဗျာလ်။ 10 လူ့သားတော်ကလည်း ပျောက်နီရေလူတိကို ရှာပြီးကေ ကယ်တင်ဖို့ ကြွလာစွာ ဖြစ်တေ” လို့ မိန့်တော်မူပါရေ။ အငှါးသား ဆယ်ယောက် 11 လူထုပရိတ်သတ်ရို့က ကိုယ်တော်ဟောပြောစွာတိကို နာယူနီစိုင် ကိုယ်တော်က သူရို့ကို ပုံဥပမာတစ်ခုနန့် ဆက်ပြီးကေ မိန့်ဆိုပါရေ။ ဇာတွက်နန့်ဆိုကေ ကိုယ်တော်က ဂျေရုဆလင်မြို့အနားသျှေကို ရောက်လာဗျာလ်ဖြစ်လို့ သူရို့က ဘုရားသျှင်၏သာသနာတော် ချက်ချင်း ပေါ်လာဖို့ဗျာလ်လို့ ထင်နီရေအတွက်နန့် ဖြစ်ပါရေ။ 12 ကိုယ်တော်က “ရာထူးကြီးသူတစ်ယောက်က သူ့ပြည်မာ ဘုရင်အရစ်အရာ တင်မြှောက်စွာကို ခံယူဖို့ ဘုရင်ကြီးဟိရေ ရပ်ဝီးတိုင်းပြည်ကို လားပြီးကေ အုပ်ချုပ်ဖို့အတွက် ပြန်လာပါရေ။ 13 ယေကေလည်း မလားခင်မာ သူက ကျွန်ဆယ်ယောက်ကို ခေါ်လိုက်ပြီးကေ တစ်ယောက်ကို ဒင်္ဂါးတစ်မိနာ့စီပီးပနာc ‘ငါ ပြန်လာရေအချိန်ထိ ဒေဒင်္ဂါးနန့် စီးပွားရေးလုပ်ထားကတ်’ လို့ မိန့်မှာခလီရေ။ 14 ယေကေလည်း သူ့ပြည်မာဟိရေ လူတစ်ချို့က သူကို မုန်းရေအတွက်နန့် ဘုရင်ကြီးဘားကို သူ့ထက် အယင် သံတမန်တိကို စီလွှတ်ပြီးကေ ‘ဒေသူ့ကို ကျွန်တော်ရို့၏ဘုရင်အဖြစ် အလိုမဟိပါ’ လို့ သတော်ဦး တင်စီပါရေ။ 15 ယေကေလည်း သူက ဘုရင်အဖြစ် တင်မြှောက်စွာကို ခံယူဗျာလ် ပြန်လာပါရေ။ ယေပြီးကေ သူ ဒင်္ဂါးတိ ပီးထားခရေကျွန်တိ စီးပွားရေးလုပ်လို့ အစီးအပွား ဇာလောက် ရနီဗျာလ်ဆိုစွာကို သိချင်ရေအတွက်နန့် သူရို့ကို ခေါ်လီရေ။ 16 ယေခါ ပထမကျွန်က သူဘားကို လာဗျာလ် ‘အသျှင်မင်းကြီး ပီးခရေ ဒင်္ဂါးတစ်မိနာ့ကို ကျွန်တော်မျိုး ဆယ်ဆလောက်ပွားလာအောင် လုပ်ထားပါရေ’ လို့ သတော်ဦး တင်လီရေ။ 17 ဘုရင်ကလည်း ယင်းကျွန်ကို ‘ကောင်းလီစွ။ သင်က ကောင်းရေကျွန် ဖြစ်တေ။ သင်က ကိစ္စအငယ်သျှေမာတောင် ငါ့အပေါ်မာ သစ္စာဟိရေအတွက် သင် မြို့ဆယ်မြို့ကို အုပ်ချုပ်စီ’ လို့ မိန့်လီရေ။ 18 ယေပြီးကေ ဒုတိယကျွန်ကလည်း သူဘားကို လာဗျာလ် ‘အသျှင်မင်းကြီး ပီးခရေ ဒင်္ဂါးတစ်မိနာ့ကို ငါးဆလောက် ပွားအောင် လုပ်ထားပါရေ’ လို့ သတော်ဦး တင်လီရေ။ 19 ဘုရင်ကလည်း ‘သင်က မြို့ငါးမြို့ကို အုပ်ချုပ်စီ’ လို့ မိန့်လီရေ။ 20 ယေတွက်နန့် အရာကျွန်တစ်ယောက်က လာပနာ ‘အသျှင်မင်းကြီး ပီးခရေ ဒင်္ဂါးတစ်မိနာ့က ဒေမာပါ။ ကျွန်တော်မျိုး လက်ကိုင်ပဝါနန့် ထုတ်လို့ လလုံခခြုံ သိမ်းထားပါရေ။ 21 အသျှင်မင်းကြီးက စည်းကမ်းတိကျသူ ဖြစ်တေအတွက် ကျွန်တော်မျိုးကြောက်လို့ ဒေပိုင် လုပ်ထားရစွာဖြစ်ပါရေ။ အသျှင်မင်းကြီးက ကိုယ်မပိုင်ရေအရာကို တစ်ခြားသူတိဘားက သိမ်းယူပနာ ကိုယ်မစိုက်ထားရေ သီးနှံတိကိုလည်း ရိတ်သိမ်းတတ်တေ’ လို့ သတော်ဦး တင်လီရေ။ 22 ယေခါ ဘုရင်က ‘နာခံမှုမဟိရေကျွန်၊ သင် ပြောရေစကားအတိုင်း ငါ သင့်ကို အပြစ် စီရင်မေ။ ငါက ကိုယ်မပိုင်ရေအရာကို တစ်ခြားသူတိဘားက သိမ်းယူဗျာလ် ကိုယ်မစိုက်ထားရေ သီးနှံတိကို ရိတ်သိမ်းတတ်တေ စည်းကမ်းတိကျသူ ဆိုစွာကို သင် သိရေ။ 23 ယင်းပိုင်ဆိုကေ ငါ ပီးရေဒင်္ဂါးကို ဇာအတွက်နန့် ဒင်္ဂါးအတိုးနန့်ချီးသူဘားမာ မအပ်ထားစွာလဲ။ အပ်ထားကေ ငါ ပြန်လာရေအခါ အတိုးရဖို့မဟုတ်လား’ လို့ မိန့်လီရေ။ 24 ယေပြီးကေ ဘုရင်က ယင်းနီရာမာ ရပ်နီသူတိကို ‘သူ့ဘားက ဒင်္ဂါးတစ်မီနာ့ကို ယူလို့ ဆယ်မိနာ့ဟိသူကို ပီးလိုက်ကတ်’ လို့ အမိန့် ပီးလိုက်လီရေ။ 25 သူရို့က ‘အသျှင်မင်းကြီး၊ သူ့ဘားမာ ဒင်္ဂါးဆယ်မိနာ့ ဟိပြီးပါဗျာလ်’ လို့ ပြန်လို့ သတော်ဦး တင်လီရေ။ 26 ဘုရင်က ‘သင်ရို့ကို ငါ ပြောမေ။ တစ်ခုခုဟိသူက ပိုလို့ပီးစွာကို ခံရဖို့ဖြစ်ပြီးကေ တစ်ခုလေ့မဟိသူက သူ့မာဟိရေ အနည်းသျှေကိုတောင် သူဘားက ယူလားစွာ ခံရလိမ့်မေ။ 27 ယေကေလည်း ငါ ဘုရင်အဖြစ် အုပ်ချုပ်စွာကို အလိုမဟိရေရန်သူတိကို ခေါ်လာဗျာလ် သူရို့ကို ငါ့ ရှိ့မာ ကွပ်မျက်လိုက်ကတ်’ လို့ ဆိုလိုက်တေ” လို့ ဆိုဗျာလ် မိန့်တော်မူလီရေ။ 28 ကိုယ်တော်က ယင်းပိုင် ဟောပြောလို့ ပြီးရေအခါ တပည့်တော်တိရှိ့မှ ဂျေရုဆလင်မြို့ကို ဆက်လို့ ကြွတော်မူပါရေ။ 29 သံလွင်တောင်လို့ခေါ်ရေ တောင်ကုန်းအနားမာဟိရေ ဗက်ဖာဂေရွာနန့် ဗေသနိရွာအနားကို ရောက်ရေအခါ တပည့်တော်နှစ်ယောက်ကို ကြိုတင်လို့ စီလွှတ်ဖို့အတွက် ခေါ်လိုက်ပြီးကေ 30 ကိုယ်တော်က “ရှိ့ကရွာကို လားကတ်။ ရွာထဲကို ဝင်စွာနန့် တစ်ယောက်လည်း မစီးဖူးသိရေ မြည်းသျှေတစ်ကောင် ချိုင်ထားစွာကို မြင်ရလိမ့်မေ။ ယင်းမြည်းကို ကြိုးဖြီပနာ ငါ့ဘားကို ခေါ်လာကတ်ပါ။ 31 တစ်ယောက်ယောက်က ‘သင်ရို့ ဇာတွက်နန့် မြည်းသျှေကို ကြိုးဖြီကတ်စွာလဲ’ လို့ မိန်းကေ ‘အသျှင်က အလိုဟိလို့ပါ’ ပြောလိုက်ကတ်” လို့ မိန့်တော်မူပါရေ။ 32 ယေတွက်နန့် ယင်းတပည့်နှစ်ယောက်ကလည်း ရွာထဲကို ရောက်လာရေအခါ ကိုယ်တော် မိန့်ကြားလိုက်ရေအတိုင်း မြည်းသျှေကို တွိ့ရလီရေ။ 33 သူရို့က မြည်းကိုကြိုးဖြီနီစိုင် မြည်းပိုင်သျှင်ရို့က “သင်ရို့ ဇာအတွက်နန့် မြည်းသျှေကို ကြိုးဖြီကတ်စွာလဲ” လို့ မိန်းရေခါ 34 သူရို့ကလည်း “အသျှင်က အလိုဟိလို့ပါ” လို့ ဖြေလိုက်ပါရေ။ 35 ယေပြီးကေ သူရို့က မြည်းသျှေကို ကိုယ်တော်ဘားကို ယူလာကတ်ပြီးကေ နောက်ကုန်းထက်မာ အဝတ်တိခင်းလိုက်ဗျာလ် ကိုယ်တော့်ကို မြည်းထက်မာထိုင်ဖို့ တင်ပီးကတ်လီရေ။ 36 ကိုယ်တော်က ယင်းမြည်းသျှေကို စီးပနာ လားရေလမ်းမာ လူထုပရိတ်သတ်အများကြီးက ကိုယ်တော့်ရှိ့မာ သူရို့၏ကိုယ်ရုံတိကို ခင်းထားပီးကတ်ပါရေ။ 37 ကိုယ်တော်က သံလွင်တောင်အဆင်းလမ်းကို ရောက်ရေခါ တပည့်တော်အများကြီးက သူရို့ မြင်တွိ့ခရရေ ကိုယ်တော်ယေရှု လုပ်ဆောင်ခရေ အံ့ဩစရာအားလုံးအတွက် ဝမ်းပန်းတသာနန့် ဘုရားသျှင်ကို အသံအကျယ်ကြီးနန့် ချီးမွမ်းပူးဇော်ကတ်လီရေ။ 38 သူရို့က “အသျှင်၏နာမတော်နန့် ကြွလာရေသျှင်ဘုရင်က မင်္ဂလာဟိပါရေ။ ရွှီမြို့တော်မာ အီးချမ်းမှုဟိဗျာလ် ဘုရားသျှင်၏ဘုန်းတန်ခိုးတော် ထွန်းတောက်ပါစီ” လို့ အော်ကတ်လီရေ။ 39 ယေခါ လူအကျိုင်လိုက်ထဲမှ ဖာရိရှဲတစ်ချို့က ကိုယ်တော်ကို “ဆရာ၊ ဆရာ၏တပည့်တိ တန့်လားအောင် အမိန့်ပီးလိုက်ပါ” လို့ လျှောက်ထားလီရေ။ 40 ယေခါ ကိုယ်တော်ကလည်း “သင်ရို့ကို ငါ ပြောမေ။ ဒေလူတိကို မအော်ဖို့ ပြောလိုက်ကေ ကျောက်ခဲတိက ထဗျာလ် အော်ကတ်လိမ့်မေ” လို့ မိန့်တော်မူလီရေ။ 41 ယေပြီးကေ ကိုယ်တော်က ဂျေရုဆလင်မြို့အနားကို ရောက်လာလို့ မြို့ကို မြင်ရေအခါ မျက်ရည်ကျတော်မူပါရေ။ 42 ကိုယ်တော်က “ဂျေရုဆလင်မြို့သူ မြို့သားရို့ ဒေနိန့် သင်ရို့ဘားကို ဇာအရာက အီးချမ်းမှု ယူဆောင်လာစွာကို သိကေ ကောင်းမေ။ ယေကေလည်း သင်ရို့ ယင်းအရာကို သိနိုင်ဖို့ မဟုတ်ပါ။ 43 ဇာတွက်နန့်ဆိုကေ သင်ရို့ရန်သူတိက သင်ရို့၏ပတ်ပတ်လည်မာ တံတိုင်းတိ တည်ဆောက်ဗျာလ် သင့်ရို့ကို အဖက်ဖက်က ဝိုင်ထားပနာ တိုက်ဖို့အချိန် ရောက်လာလိမ့်မေ။ 44 သူရို့က သင်ရို့၏မြို့နန့် သင်ရို့၏လူအားလုံးကို ဖျက်ဆီးပစ်ကတ်လိမ့်မေဖြစ်ပနာ ယင်းနီရာမာ ကျောက်တုံးတစ်တုံးထက် အရာကျောက်တုံးတစ်တုံးတင်ဗျာလ် ကျန်ခလိမ့်မေ မဟုတ်။ ဇာတွက်နန့်ဆိုကေ ဘုရားသျှင်က သင်ရို့ကို ကယ်တင်ဖို့ ကြွလာရေအချိန်ကို မသိရေအတွက်နန့် ဖြစ်တေ” လို့ မိန့်တော်မူလီရေ။ 45 ယေပြီးကေ ကိုယ်တော်က ဗိမာန်တော်ထဲကို ဝင်လားရေအခါမာ ဗိမာန်တော်ခြံထဲမာ ဈီးရောင်းနီကတ်တေ ဈီးသည်တိကို နှင်ထုတ်ဗျာလ် 46 “ဘုရားသျှင်က ကျမ်းစာထဲမာ ‘ငါ၏ဗိမာန်တော်က လူတိ ဘုရားဝတ်ပြုဆုတောင်းရေနီရာ ဖြစ်လိမ့်မေ’ လို့ ရီးထားကေလည်း အဂု သင်ရို့က ဗိမာန်တော်ကို သူခိုးဒါးမရတိ ပုန်းနီရေနီရာဖြစ်အောင် လုပ်နီကတ်တေ” လို့ မိန့်တော်မူရေ။ 47 ယေပြီးကေ ကိုယ်တော်က ဗိမာန်တော်မာ နိန့်စိုင် နိန့်စိုင် ဟောပြောသွန်သင်လို့ နီပါရေ။ ဂျူးပုရောဟိတ်အကြီးအကဲတိ၊ ကျမ်းတတ်ဆရာတိနန့် ဂျူးလူမျိုးဂေါင်းဆောင်တိက ကိုယ်တော့်ကို သတ်ဖို့ ကြိုးစားကတ်လီရေ။ 48 ယေကေလည်း လူထုပရိတ်သတ်အများရို့က ကိုယ်တော်ဟောပြောသွန်သင်စွာတိကို အာရုံစိုက်လို့ နားထောင်နီကတ်တေအတွက်နန့် သူရို့က ကိုယ်တော့်ကို သတ်ဖို့ နည်းလမ်းကို ကြံစိုင်လို့ မရနိုင် ဖြစ်နီပါရေ။ |
This translation of the Northern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.