လုကာ 1 - Northern Rakhine1 လေးစားရပါသော သော်ဖိလု၊ လူအများရို့က ကျွန်တော်ရို့ကြားထဲမာ ဘုရားသျှင်ပြုလုပ်ခရေ အံ့ဩဖို့ကောင်းရေ အမှုကိစ္စတိကို ရီးသားခပါရေ။ 2 ယင်းသူရို့က ယင်းအဖြစ်ပျက်တိကို အစဦးဆုံးကပင် မျက်မြင်ကိုယ်တွိ့ မြင်ခသူတိ ပြောပြခရေအတိုင်း ရီးသားခစွာဖြစ်ပါရေ။ ယင်းမျက်မြင်ကိုယ်တွိ့ မြင်သူတိက ယင်းဖြစ်ပျက်ခစွာတိကို ကျွန်တော်ရို့ဘားကို ပြန်လို့ ပြောပြရေ နှုတ်ကပါတ်တော်၏အစီခံတိ ဖြစ်ပါရေ။ 3 ယေတွက်နန့် ကျွန်တော်ကလည်း ဖြစ်ပျက်ခစွာအကြောင်းတိအားလုံးကို အရေးတစိုက် စူးစမ်းလေ့လာပနာ သင့်ဘားကို အစီလိုက်သင့်ရီးရကေ ကောင်းဖို့လို့ ကျွန်တော် ထင်ရေ။ 4 ယေမှရာ သင်ရို့ သင်ယူခရရေ အကြောင်းအရာတိ အမှန်ဆိုစွာကို သင် သိဖို့ဖြစ်တေ။ 5 ယုဒပြည်မာ ဟေရုဒ်မင်းကြီး အုပ်ချုပ်ရေအချိန် ဇာခရိနာမယ်ဟိရေ ဂျူးပုရောဟိတ် တစ်ယောက်ဟိလီရေ။ သူက အဘိယ လို့ခေါ်ရေ ပုရောဟိတ်အဖွဲ့ဝင်တစ်ယောက် ဖြစ်လီရေ။ သူ၏မယား ဧလိရှဗက်ကလည်း အာရုန်လို့ခေါ်ရေ ပုရောဟိတ်မျိုးရို့မှ ဆင်းသက်လာသူ ဖြစ်ပါရေ။ 6 ဇာခရိနန့် ဧလိရှဗက်ရို့က ဘုရားသျှင်၏ပညတ်တော်တိကို အမှားအယွင်းမဟိ လိုက်နာခရေအတွက်နန့် ဘုရားသျှင်၏ရှိ့မာ ဖြောင့်မတ်သူတိ ဖြစ်ကတ်ပါရေ။ 7 ယေကေလည်း ဧလိရှဗက်နန့် ဇာခရိမာ သားသမီးမရပါ။ ဇာတွက်နန့်ဆိုကေ ဧလိရှဗက်က မြုံနီဗျာလ် သူရို့လင်မယား နှစ်ယောက်စလုံးမာလည်း ကောင်းကောင်းအသက်ကြီးနီရေ အတွက်နန့် ဖြစ်ပါရေ။ 8 တနိန့်မာ ဇာခရိ၏အဖွဲ့က ဗိမာန်တော်eမာ ဘုရားသျှင်၏ရှိ့မာ သူ၏ပုရောဟိတ်တာဝန်ကို ဆောင်ရွက်နီစိုင် 9 ဘုရားသျှင် ဗိမာန်တော်ထဲကို လားဗျာလ် ပုရောဟိတ်တိ၏ဓလိထုံးစံအတိုင်း အမွှီးနံ့သာတိကို မီးစွဲဗျာလ် ပူဇော်ဖို့ မဲနှိုက်လို့ရွီးရေခါ ဇာခရိ အရွီးခံရပါရေ။ 10 ယေတွက်နန့် ဇာခရိက အမွှီးနံ့သာတိကို မီးစွဲလို့ ပူဇော်နီရေအချိန်မာ လူအများကြီးစွာ အပြင်မာ ဆုတောင်းလို့ နီကတ်လီရေ။ 11 ယင်းအချိန်မာ ဘုရားသျှင် စီလွှတ်လိုက်တေ သမ္မာဒေဝါနတ်fက ဇာခရိအမွှီးနံ့သာတိ မီးစွဲပနာ ပူဇော်ရေ ပလ္လင်၏ညာဖက်မာ ရပ်လို့ ဇာခရိကို ကိုယ်ထင်ပြလီရေ။ 12 ဇာခရိ သမ္မာဒေဝါနတ်ကို မြင်ရေခါ ကောင်းကောင်းကြောက်လန့်ဗျာလ် တုန်နီလီရေ။ 13 ယေကေလည်း သမ္မာဒေဝါနတ်က ဇာခရိကို “မကြောက်ကေ့ ဇာခရိ။ ဇာတွက်နန့်ဆိုကေ သင် ဆုတောင်းစွာအသံကို ဘုရားသျှင် သိတော်မူရေ။ သင်၏မယား ဧလိရှဗက်က သင့်အတွက် သားယောက်ကျားသျှေ တစ်ယောက်ကို မွီးပီးလိမ့်မေ။ သင်က သူ့ကို ယောဟန်လို့ နာမယ်ပီးရမေ။ 14 အသျှေ မွီးရေအချိန်မာ သင်ရို့က ကောင်းကောင်းကြီး ဝမ်းသာရရေပိုင် အရာလူတိလည်း ကောင်းကောင်းကြီး ဝမ်းသာကတ်လိမ့်မေ။ 15 ဇာတွက်နန့်ဆိုကေ သူက ဘုရားသျှင်၏ရှိ့မာ မြင့်မြတ်သူဖြစ်လိမ့်မေ။ သူက အချဉ်ဖောက်ထားရေ စပျစ်ဝိုင်နန့် အရက်သီစာတိကို တစ်ခါလေ့ သောက်လိမ့်မေ မဟုတ်။ အမိဝမ်းထဲမာ ဟိနီစိုင်ကပင် ဉာဏ်အလင်းတော်က သူနန့် တတူဟိနီလိမ့်မေ။ 16 သူက အစ္စရေးလူမျိုးအများကြီးကို နောင်တသံဝေဂရစီပြီးကေ သူရို့၏အသျှင်ဖြစ်တေ ဘုရားသျှင်ဘက်ကို ပြန်လှည့်စီလိမ့်မေ။ 17 သူက ပရောဖက်h ဧလိယပိုင် တန်ခိုးနန့် အခွင့်အာဏာဟိပြီးကေ အသျှင်i၏ရှိ့ဗြီး ဖြစ်လိမ့်မေ။ သူက မိဖတိနန့် သားသမီးတိ၏စိတ်နှလုံးကို အသင့်အတင့်ဖြစ်စီပနာ လန့်ဆန်လုပ်နီသူတိကိုလည်း ဖြောင့်မတ်မှန်ကန်သူတိ၏အသိတရားမျိုးရအောင် သင်ပီးလိမ့်မေ။ ယင်းတွက်နန့် လူတိက အသျှင်ပြန်လို့ ကြွလာရေအချိန်မာ အလိုက်သင့် ဖြစ်နီကတ်လိမ့်မေ” လို့ ပြောလီရေ။ 18 ယေတွက်နန့် ဇာခရိကလည်း သမ္မာဒေဝါနတ်ကို “ယင်းပိုင် ဖြစ်လာဖို့ဆိုစွာကို ကျွန်တော်မျိုး ဇာပိုင် သိနိုင်ပါဖို့လဲ။ ဇာတွက်နန့်ဆိုကေ ကျွန်တော်နန့် ကျွန်တော်၏မယား နှစ်ယောက်စလုံးက ကောင်းကောင်းအိုနီပါဗျာလ်” လို့ ပြန်လို့ ပြောလိုက်ပါရေ။ 19 ယေခါ သမ္မာဒေဝါနတ်ကလည်း ဇာခရိကို “ငါက ဘုရားသျှင်၏ရှိ့မာ ခစားရရေ ဂါဗြေလ ဖြစ်တေ။ ဒေပိုင်ဝမ်းသာဖို့ကောင်းရေ မင်္ဂလာသတင်းကောင်းကို သင့်ကို ပြောပြဖို့အတွက် ဘုရားသျှင်က ငါ့ကို စီလွှတ်လိုက်စွာ ဖြစ်တေ။ 20 ယေပြီးကေ ငါ့စကားကို သင် မယုံကြည်ရေအတွက်နန့် ယင်းအဖြစ်ပျက်တိ မဖြစ်လာခင်အချိန်ထိ သင် စကားမပြောနိုင်ဘဲနန့် ဘဘောဖြစ်နီလိမ့်မေ ဇာတွက်နန့်ဆိုကေ အချိန်ကျကေ ငါ့စကားတိက အမှန်ပင် ဖြစ်လာလိမ့်မေ” လို့ ပြောလီရေ။ 21 ယင်းပိုင် ဇာခရိနန့် သမ္မာဒေဝါနတ်ရို့က ဗိမာန်တော်အထဲမာ စကားပြောနီစိုင် အပြင်ဖက်မာဟိရေ လူထုပရိတ်သတ်တိက ဇာခရိကို စောင့်လို့ ဟိနီကတ်လီရေ။ သူရို့က ဗိမာန်တော်အထဲမာ ဇာခရိ ဇာအတွက်နန့် အချိန်အကြာကြီး ဟိနီစွာကို အံ့ဩနီကတ်လီရေ။ 22 ဇာခရိ အပြင်ကို ပြန်ထွက်လာရေအချိန်မာ လူတိကို စကားမပြောနိုင်ပါဗျာလ်။ သူက ဘဘောဖြစ်လားလို့ လက်ဟန်ခြီဟန်နန့်ရာ ပြနီရေအတွက်နန့် လူတိက သူ ဗိမာန်တော်ထဲမာ တစ်ခုခုကို မြင်ခရလီဖို့လို့ နားလည်လားကတ်လီရေ။ 23 ယေပြီးကေ ဇာခရိက ဗိမာန်တော်မာ သူဆောင်ရွက်ရဖို့ ပရောဖက်တိ၏အမှုကိစ္စတိကို လုပ်လို့ပြီးရေခါ သူ့အိမ်ကို ပြန်လားလီရေ။ 24 အချိန်သင့်ရုံလောက်ကြာရေခါ ဇာခရိ၏မယား ဧလိရှဗက်မာ ကိုယ်ဝန်ဟိလာပနာ သူမက ငါးလလောက် ကြာရေအချိန်ထိ လူတိကြားထဲကို မလားဘဲနီလီရေ။ 25 ဧလိရှဗက်က “ဘုရားသျှင်ရေ ငါ့ကို သနားကြင်နာရေအတွက်နန့် ကိုယ်ဝန်ရစီခဗျာလ်။ သူက ငါ့ကို လူအများကြီး ကဲ့ရဲ့ အထင်သီးစွာတိက ငါ့ကို လွတ်လားစီဗျာလ်” လို့ ပြောလီရေ။ 26 ဧလိရှဗက်၏ကိုယ်ဝန် ခြောက်လလောက် ဟိရေအချိန်မာ ဘုရားသျှင်က သမ္မာဒေဝါနတ် ဂါဗြေလကို ဂါလိလဲပြည်ဟိ နာဇရက်မြို့ကို စီလွှတ်လိုက်ပါရေ။ 27 သူက မာရိလို့ခေါ်ရေ အပျိုမတစ်ယောက်ဘားကို လားဗျာလ် သတင်း ပီးစီခပါရေ။ မာရိက ဘုရင်ဒါဝိဒ်၏မျိုးရို့ကနီ ဆင်းသက်လာရေယောသပ်နန့် စိစပ်ထားသူဖြစ်ပါရေ။ 28 သမ္မာဒေဝါနတ်က မာရိကို နှုတ်ဆက်ပနာ “ဘုရားသျှင်က သူ၏ကြီးမားရေမေတ္တာကို ပြသခပြီးကေ ဘုရားသျှင်က သင်နန့်အတူ ဟိနီရေ” လို့ ပြောကြားလီရေ။ 29 ယေတွက်နန့် မာရိက ယင်းစကားကို ကြားရေခါ ကောင်းကောင်းစိတ်ယှုပ်လားပြီးကေ သမ္မာဒေဝါနတ်၏စကားတိရေ ဇာကို ပြောချင်စွာလဲလို့ ဆိုပနာ စဉ်းစားနီလီရေ။ 30 ယေပြီးကေ သမ္မာဒေဝါနတ်က သူမကို “မကြောက်ပါကေ့၊ မာရိ။ ဘုရားသျှင်က သင့်ကို မျက်နှာပီးတော်မူရေ။ 31 သင်က ကိုယ်ဝန်ရဗျာလ် သားတော်တစ်ပါးကို မွီးရလိမ့်မေ။ သူ့နာမယ်ကို ယေရှုလို့ ခေါ်ရမေ။ 32 သူက မြင့်မြတ်သူတစ်ယောက် ဖြစ်လာဗျာလ် အမြင့်မြတ်ဆုံးဘုရားသျှင်၏သားတော်လို့ ခေါ်ကတ်စွာကို ခံရလိမ့်မေ။ ဘုရားသျှင်က သူ့ကို သူ၏ဖိုးဖီးဖြစ်တေ ဘုရင်ဒါဝိဒ်ပိုင် သူ့လူမျိုးတိကို အုပ်စိုးနိုင်ဖို့အခွင့်အာဏာကို ပီးအပ်ပါလိမ့်မေ။ 33 သူက ယာကုပ်၏မျိုးနွယ်ဖြစ်တေ အစ္စရေးလူမျိုးတိကို ဘုရင်အဖြစ် ထာဝရအုပ်ချုပ်ဗျာလ် သူ၏နန်းဆက်က တစ်ခါလေ့ သုန်လားလိမ့်မေ မဟုတ်” လို့ ပြောလီရေ။ 34 ယေခါ မာရိက သမ္မာဒေဝါနတ်ကို “အကျွန်ရေ အပျိုမတစ်ယောက် ဖြစ်တေအတွက်နန့် ဒေချင့်တိရေ ဇာပိုင် ဖြစ်နိုင်ပါဖို့လဲ” လို့ သမ္မာဒေဝါနတ်ကို ပြောလီရေ။ 35 သမ္မာဒေဝါနတ်ကလည်း “ဉာဏ်အလင်းတော်က သင့်ဘားကို ဆင်းသက်ပနာ အမြင့်မြတ်ဆုံးဘုရားသျှင်၏တန်ခိုးတော်က သင့်ဘားမာ ဟိနီလိမ့်မေ။ ယေတွက်နန့် သင် မွီးလာဖို့သားကလည်း ဘုရားသျှင်၏သားတော်လို့ ခေါ်စွာကို ခံရလိမ့်မေ။ 36 သင်၏အမျိုးဖြစ်တေ ဧလိရှဗက်က အိုနီဗျာလ်ဖြစ်လို့ လူအများရို့က အသျှေမရနိုင်ဗျာလ်လို့ ထင်နီကတ်ကေလည်း အဂု ကိုယ်ဝန် ခြောက်လဟိနီဗျာလ် ဖြစ်တေ။ 37 ဇာတွက်နန့်ဆိုကေ ဘုရားသျှင် မလုပ်နိုင်ရေအရာဆိုစွာ တစ်ခုလေ့ မဟိ” လို့ ပြောလီရေ။ 38 ယေခါ မာရိက “အကျွန်စွာ ဘုရားသျှင်၏ကျွန်တစ်ယောက် ဖြစ်ပါရေ။ သင် ပြောရေစကားအတိုင်း အကျွန့်ဘားမာ ဘုရားသျှင်ဆန္ဒအတိုင်း ဖြစ်ပါစီ” လို့ ပြောလီရေ။ ယေပြီးကေ သမ္မာဒေဝါနတ်ကလည်း မာရိဘားက ထွက်လို့ လားခလီရေ။ 39 ကောင်းမကြာခင်မာ မာရိက အလိုက်သင့်ပြင်ဆင်ဗျာလ် ဇာခရိနီထိုင်ရေ ယုဒပြည်ဟိ တောင်ပေါ်မြို့ တစ်မြို့ကို အယင်လားလီရေ။ 40 ယင်းနီရာကို ရောက်ရေအခါ သူမက ဇာခရိ၏အိမ်ထဲကိုဝင်ဗျာလ် ဇာခရိ၏မယား ဧလိရှဗက်ကို နှုတ်ဆက်လီရေ။ 41 မာရိနှုတ်ဆက်စွာကို ဧလိရှဗက် ကြားစွာနန့်တဆက်တည်း သူမ၏ဝမ်းထဲကအသျှေ လှုပ်လားလီရေ။ ယေပြီးကေ ဉာဏ်အလင်းတော်က ဧလိရှဗက်ဘားကို သက်ရောက်ပနာ 42 သူမက အသံအကျယ်ကြီးနန့် မာရိကို “ဘုရားသျှင်က အရာမမာ့တိထက် သင့်ကို ပိုလို့ မင်္ဂလာဟိစီပြီးကေ သင်မွီးလာဖို့ အသျှေကလည်း မင်္ဂလာဟိပါလိမ့်မေ။ 43 ယေကေလည်း အကျွန့်အသျှင်၏မယ်တော်က အကျွန့်ဘားကို လာရရေ အထူး အခွင့်ကို ဇာတွက်နန့် ခံစားရစွာလဲ။ 44 သင်နှုတ်ဆက်ရေ အသံကို ကြားကြားချင်းမာပင် ငါ့ဝမ်းထဲက အသျှေစွာ ကောင်းကောင်းပျော်ပနာ လှုပ်နီပါရေ။ 45 ဘုရားသျှင်၏စကားက အမှန်ဖြစ်လာဖို့လို့ သင်ယုံကြည်ရေအတွက်နန့် သင်ကလည်း မင်္ဂလာဟိပါရေ” လို့ အသံကျယ်ကျယ်နန့် ပြောလီရေ။ 46 ယေပြီးကေ မာရိက “အကျွန် ဘုရားသျှင်ကို ချီးမွမ်းပူဇော်ပါရေ။ 47 အကျွန်၏စိတ်နှလုံးကလည်း အကျွန်၏ကယ်တင်သျှင်ဘုရားဘားမာ ဝမ်းသာပျော်ရွှင်ပါရေ။ 48 ဇာတွက်နန့်ဆိုကေ အကျွန်က ဘုရားသျှင်၏နိမ့်ကျရေ ကျွန်ဖြစ်ကေလည်း ဘုရားသျှင်က အကျွန့်ကို စောင့်ရှောက်တော်မူပါရေ။ အဂုအချိန်ကစလို့ မျိုးဆက်တိုင်းက အကျွန့်ကို မင်္ဂလာဟိရေမမာ့လို့ ခေါ်ကတ်လိမ့်မေ။ 49 ဇာတွက်နန့်ဆိုကေ တန်ခိုးကြီးတော်မူရေဘုရားသျှင်က အကျွန့်ဘားကို ကောင်းမြတ်တေအရာတိကို ဆောင်ရွက်ပီးခလီရေ။ သူ၏နာမတော်ကလည်း မြင့်မြတ်တော်မူပါရေ။ 50 ဘုရားသျှင်က ခေတ်အဆက်ဆက် သူ့ကို ကြောက်ဗျာလ် ရိုသီကိုင်းသျှိုင်းရေ လူတိကို သူ၏မဟာကရုဏာမေတ္တာတော်ကို အစဉ်မပြတ် ပြသတော်မူပါရေ။ 51 ဘုရားသျှင်က မာန်မာနကြီးသူအများရို့ကို သူ၏တန်ခိုးတော်နန့် နှိမ့်ချစီတော်မူပါရေ။ 52 ဘုရားသျှင်က အုပ်ချုပ်သူ ဘုရင်တိ၏အခွင့်အာဏာတိကို ယူလားပြီးကေ နှိမ့်ချသူတိကို ချီးမြှောက်တော်မူပါရေ။ 53 ဘုရားသျှင်က ငတ်မွတ်နီသူများကို ကောင်းရေအရာတိနန့်ပြည့်ဝစီဖို့ဖြစ်ကေလည်း သူဌီးသူကြွီတိကို လက်ခစည်းနန့် စီလွှတ်တော်မူပါရေ။ 54 ဘုရားသျှင်က သူ၏မဟာကရုဏာမေတ္တာတော်ကို သတိရရေအတွက်နန့် သူ၏ကျွန်တိဖြစ်တေ အစ္စရေးလူမျိုးတိကို ကူညီပီးခပါဗျာလ်။ 55 ဘုရားသျှင်က ကျွန်တော်ရို့၏ဖိုးဖီးဖြစ်တေ အာဗြဟံjနန့် သူ၏မျိုးနွယ်တိကို ပီးခရေ ကတိတော်ကြောင်းဖြစ်တေ” လို့ ချီးမွမ်းပူဇော်လီရေ။ 56 ယေပြီးကေ မာရိက ဧလိရှဗက်နန့်တတူ သုံးလလောက် နီထိုင်ခပြီးကေ သူမ၏အိမ်ကို ပြန်လားခလီရေ။ 57 ယေပြီးကေ ဧလိရှဗက်ကလည်း အသျှေမွီးဖို့ လစိနိန့်စိကျလာရေအခါ သားတစ်ယောက်ကို မွီးလီရေ။ 58 ဧလိရှဗက်၏အိမ်နားပါးချင်းတိနန့် အမျိုးတိက ဘုရားသျှင်က သူမဘားမာ ဘုရားသျှင်၏ကြီးမားရေမေတ္တာကရုဏာ ပြသစွာကို ကြားသိရရေအတွက်နန့် သူမနန့်တတူ ဝမ်းသာကတ်လီရေ။ 59 အသျှေမွီးပြီးကေ သျှစ်ရက်မြောက်တေ နိန့်မာ လူတိက အရီဖျားလှီးမင်္ဂလာkလုပ်ဖို့ ရောက်လာရေခါ သူရို့က အသျှေနာမယ်ကို အဖဘားက ဇာခရိဆိုရေနာမယ်အတိုင်း ဇာခရိလို့ နာမယ်ပီးချင်ကတ်ပါရေ။ 60 ယေနန့် အသျှေအမိဧလိရှဗက်က “မဟုတ်ပါ။ သူ့ကို ယောဟန်လို့ ခေါ်ရမေ” လို့ ပြောလီရေ။ 61 ယေခါ လူအများရို့က ဧလိရှဗက်ကို “သင့်မျိုးရိုးတိထဲမာ ဒေပိုင်နာမယ်မျိုး မဟိ” လို့ ပြောကတ်လီရေ။ 62 ယေကေလေ့ သူရို့က အသျှေအဖ ဇာခရိကို လက်ဟန် ခြီဟန်နန့် ဇာပိုင်နာမယ် ပီးချင်လဲလို့ မိန်းကတ်လီရေ။ 63 ဇာခရိက ကျောက်သင်ပုန်းတစ်ချပ်ကို တောင်းယူလိုက်ပြီးကေ သူ့သားနာမယ်က ယောဟန်ဖြစ်တေလို့ ချရီးလိုက်စွာကို မြင်ရသူအများရို့ကလည်း အံ့ဩလားကတ်လီရေ။ 64 ယင်းချိန်အတွင်းမာ ဇာခရိက ပြန်လို့ စကားပြောနိုင်လာပြီးကေ ဘုရားသျှင်ကို စလို့ချီးမွမ်းပူဇော်လီရေ။ 65 အိမ်နားပါးချင်းတိနန့် အမျိုးတိက ကြောက်ဗျာလ် တုန်လှုပ်လားကတ်လီရေ။ ယေနန့် ယုဒပြည်တောင်ပေါ် ဒေသတစ်လျှောက်ဟိ လူတိုင်းကလည်း ဖြစ်ပျက်ခရေအကြောင်းတိ အားလုံးကို ပြောနီကတ်လီရေ။ 66 ယင်းသတင်းကို ကြားသိရရေလူအများရို့က ယင်းအကြောင်းကိုတွေးပြီးကေ “ဒေအသျှေ ကြီးလာရေအခါ ဇာပိုင်လူဖြစ်ဖို့လဲ” လို့ ပြောနီကတ်လီရေ။ ဇာတွက်နန့်ဆိုကေ ဘုရားသျှင်၏တန်ခိုးတော်ကလည်း အသျှေနန့်တတူ ဟိနီခလီရေ။ 67 ယေပြီးကေ ဉာဏ်အလင်းတော်က ယောဟန်၏အဖဇာခရိဘားမာ သက်ရောက်ပနာ ဘုရားသျှင်ဘားကနီ သူအားပြောစီချင်ရေစကားကို ပြောစွာ ဖြစ်တေ။ သူက 68 “အစ္စရေးလူမျိုးရို့၏ဘုရားသျှင်ဖြစ်တေ အသျှင်ကို ကျွန်တော် ချီးမွမ်းပူဇော်ပါရေ။ ဇာတွက်နန့်ဆိုကေ ဘုရားသျှင်က သူ၏လူမျိုးတိကို လွှတ်မြောက်စီဖို့ ကြွရောက်လာဗျာလ်။ 69 ဘုရားသျှင်က သူ၏ကျွန်ဘုရင်ဒါဝိဒ်မှ ဆင်းသက်လာရေ တန်ခိုးအာဏာကြီးမားရေ ကယ်တင်သျှင်ကို ကျွန်တော်ရို့အားလုံးအတွက် ပီးသနားတော်မူပါဗျာလ်။ 70 ရှိ့အယင်ကပင် ဘုရားသျှင်က သူ၏မြင့်မြတ်တေ ပရောဖက်ရို့ကို မိန့်ကြားခရေအတိုင်း 71 ဒေတန်ခိုးကြီးရေ ကယ်တင်သျှင်က ကျွန်တော်ရို့ကို ရန်သူတိဘားက ကယ်တင်ဖို့အပြင် ကျွန်တော်ရို့ကို မုန်းနီသူတိဘားကလည်း ကတင်ပါလိမ့်မေ။ 72 ဘုရားသျှင် ယင်းပိုင်ပြုလုပ်ရစွာက ကျွန်တော်ရို့၏ဖိုးဖီးတိကို သူ၏မဟာကရုဏာမေတ္တာတော်ကို ပြသဖို့နန့် သူ၏မြင့်မြတ်တေ သဘောတူညီမှုကို သတိရစီဖို့ဖြစ်တေ။ 73 ဘုရားသျှင်က ကျွန်တော်ရို့၏ဖိုးဖီးဖြစ်တေ အာဗြဟံကို ကတိပီးထားခရေအတိုင်း 74 ကျွန်တော်ရို့ကို ကျွန်တော်ရို့၏ရန်သူတိလက်က ကယ်တင်ဖို့ဖြစ်ပြီးကေ ကျွန်တော်ရို့ကလည်း ကျွန်တော်ရို့ အသက်ရင်နီသမျှ ကာလပတ်လုံး အကြောက်တရားကကင်းနန့် ဘုရားသျှင်၏အမှုကိစ္စတိကို ဆောင်ရွက်နိုင်ကတ်ပါလိမ့်မေလို့ ပြောလီရေ။ 75 ယေနန့် ကျွန်တော်ရို့က ကျွန်တော်ရို့၏ဘဝတစ်လျှောက်လုံး ဘုရားသျှင်ရှိ့မာ ဖြောင့်မတ်မှန်ကန်ပနာ မြင့်မြတ်စွာအသက်ရင် နီထိုင်ကတ်လိမ့်မေ” လို့ ဘုရားသျှင်ကို ချီးမွမ်းပူဇော်လီရေ။ 76 ယေပြီးကေ ဇာခရိက သူ့သားကို “ငါ့သားသျှေ၊ သင့်ကို အမြင့်မြတ်ဆုံးဘုရားသျှင်၏ပရောဖက်လို့ ခေါ်ကတ်ဖို့ဖြစ်ပြီးကေ သင်က အသျှင်၏ရှိ့က အယင်လားပနာ အသျှင်၏လမ်းကို ပြင်ဆင်ပီးရလိမ့်မေ။ 77 ဘုရားသျှင်က လူတိ၏အပြစ်ဒုစရိုက်တိကို ခွင့်ရွှတ်ပြီးကေ သူရို့ကို ကယ်တင်လိမ့်မေလို့ သင်က လူတိကို ပြောရလိမ့်မေ။ 78 ဘုရားသျှင်က မဟာမေတ္တာကရုဏာကြီးရေအတွက်နန့် ကျွန်တော်ရို့ကို ခွင့်ရွှတ်စွာဖြစ်တေ။ ယေတွက်နန့် ဘုရားသျှင်က ကျွန်တော်ရို့ကို ကယ်တင်ဖို့ မေရှိယကို ရွှီမြို့တော်က စီလွှတ်လိုက်စွာ ဖြစ်တေ။ 79 သူက ဘုရားသျှင်ကို မသိဘဲနီရေလူတိနန် သီရဖို့စွာကြောက်နီရေလူတိကို ကူညီပီးပါလိမ့်မေ။ သူ၏လမ်းပြမှုကြောင့် ကျွန်တော်ရို့က အီးအီးချမ်းချမ်းနီထိုင်ရပါလိမ့်မေ” လို့ ပြောလီရေ။ 80 အဂုခါမာ ယောဟန်က အရွယ်ရောက်လာပြီးကေ အသိဉာဏ်ပညာနန့်ပြည့်စုံသူ ဖြစ်လာပါရေ။ သူက အစ္စရေးလူမျိုးတိရှိ့မာ အမှုကိစ္စကို စလို့ မဆောင်ရွက်ခင်ထိ တောကန္တာရထဲမာ နီခလီရေ။ |
This translation of the Northern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.