रोमियो 2 - सत मारग पर चलन वारो किताब

परमेस्वर को न्याय

¹ अगो मोरो संगीहुन! तुमी जोन गोस्टी मा दुसरो ला फैसला मा खोटो ठैयरावा सो, वोच काम तुमी करासेव, तुमी कोनी भी सेव तुमरो बहाना को कारन तुमिला कोनी सूट नाहती।

² अमीला मालूम सेत का, परमेस्वर सही से। अना एनो गोस्टी को बिरोध मा फैसला देवासेत।

³ तरी तुमी वोना काम करतत जोन को बारेमा तुमी दुसरो को फैसला करतत। का तुमिला असो लगा सेत का परमेस्वर को फैसला तुमी ला बचा देहेत?

⁴ मंग तू वोको मोठो दया अना धिरज लक सहन करनो ला हीन मानतत। अना तु यो गोस्टी को कन धियान नही देवा सेत। का वोको दया तोला पाप सोड़न को लाय मौका देवा सेत।

⁵ तरी तुम्ही जिद्दी सेव, अना तुम्हरो गोटा को दिल से। कारन तुम्ही आपरो सजा ला अखिन बढावा देवा सेव। एक दिवस परमेस्वर को कोप अना सही फैसला तुम्हरो पुढा आहेत।

⁶ काहेका नियाव को दिवस मा अमिना जोन काम करयो सेत वोको अनुसार अमिला ईनाम भटेत। मजे “जसो करनी तसोच भरनी”

⁷ काही लोकहुन साजरा करतत, अना मान गौरव, अना अमर जिंदगी चाव्हा सेत। परमेस्वर उनला अमर जिंदगी देहेत।

⁸ काही लोकहुन सुवारथी सेत, अना गलत काम करा सेत, सही काम करन लाय, वोको हुकूम ला नही माना सेत। उनको मा परमेस्वर को गुस्सा दिसायेत।

⁹ हरेक मानूस, जोन बूरो करासे, वोका पर दुख अना सकंट आहेत, पयले यहूदी पर, मंग गैरयहूदी पर।

¹⁰ हरेक मानूस जोन साजरो काम करासे, वोला महिमा मान, अना सान्ती मिल्हेत, पहले यहूदी मंग गैरयहूदी गीनला।

¹¹ परमेस्वर कोनी को तरफदारी नही करा से।

¹² जोन मोसे को नियम को जाने बगेर पाप करा से, वोला बिना मोसे को नियम को दन्ड भेटेत। अना जोन को कना मोसे को नियम से, अना पाप करीसेस, वोको नियाव मोसे को नियम, को लक होहेत।

¹³ काहेका परमेस्वर को कठा मोसे को नियम को आयकन वाला नही, पर वोको लक चलन वारा नेक ठहरायो जावासेत।

¹⁴ मंग जो गैरयहुदी सेत अना उनको कठा मोसे को नियम नाहती, वय आपरो सुभाव लक, मोसे को नियम को बात ला मानसे। ता वय मोसे को नियम नही होवन को मंघा, भी आपरो हिरदय मा मोसे को नियम ठेवा सेत।

¹⁵ असो वय मोसे को नियम ला आपरो हिरदय मा लिख्यो दिसासेत, अना उनको अक्कल भी यो गोस्टी को गवाही देवा से। अना उनको आपस को विचार उनला, कभी दोसी अना कभी निरदोस ठैयरावा सेत।

¹⁶ यो वोना दिवस होहेत, जोन दिवस साजरो बारता को लक यीसु मसीह को लक मोसे, परमेस्वर मानूस गीन को लुकी बात को, न्याय करके दन्ड देहेत।

यहुदीगिन अना मोसे भविस्यवक्ता को नियम

¹⁷ अना तुम जोन यहूदी कहलावा सो। अना तुम मोसे को नियम मा भरोसा राखासो, अना परमेस्वर मा घमन्ड राखासो।

¹⁸ अना परमेस्वर को काजक मरजि सेत? तुमला मालूम सेत। अना मोसे को नियम को सिक्सा पायके, तुमिला खरो अना खोटोमा परख सेत।

¹⁹ अना तु आपरो आप मा भरोसा राखासे, का मी अन्धरा गिन ला रास्ता चोवान वारा, अना इन्धार मा पडयो मानूस गीन को, उजाड़ सेऊ।

²⁰ अना मुरख ला सिकावन वारा, अना लेकरागिन ला सिक्सा देवन वारा सेउ। अना गियान अना खराई को नमूना सेऊ, मोला यो सबा मोसे को नियम लक भेटयो से।

²¹ पर तु मुनादी करा सेत, का चोरी नोको करो। अना तू खुदच चोरी करा सेत। पर तुमी स्वता ला सिक्सा नही देवा सो, पर दुसरो ला सिक्सा देवसो। तुमरो तो दियो खाल्या इंधार सेत।

²² तुम कव्हसो छिनाला नोको करो, अना का खुदच करासो। तुमी मुरत लक घिरना करासो, अना मंदिर ला लुटा सो।

²³ तुम मोसे को नियम मा घंमड करा सो, तरी मोसे को नियम को हुकूम ला तोड़ा सो, अना परमेस्वर ला बेइज्‍जत करा सेव।

²⁴ काहेका जसो मोसे को नियम मा लिखीसे, गैरयहुदी मा परमेस्वर को नाव को बदी होवासे। कारन तुमरो यो काम।

²⁵ यदि तुमी मोसे को कानून को पालन करा सेत। ता किमती सेत तुमरो खतना! पर तुमी मोसे को कानून ला तोड़ा सेव। ता खतना लका तुमरो काजक फायदा?

²⁶ यदि गैरयहुदी को खतना नहीं होवासे, अना मोसे को हुकूम माना सेत। ता खतना को कोनी जरुरत नाहोती।

²⁷ जोन बिना खतना को, मोसे को नियम को पूरो हुकूम ला माना सेत, उ तुमरो न्याय करयेत। काहेका जोन हुकूम मोसे को नियम मा लिख्यो सेत, वोला तुमी यहुदी होवन को बाउजूद भी तोड़ासो।

²⁸ यो सब को बाद, जोन एक असली यहूदी से, सहीमा खतना करायो सेत। यो उ मानूस नाहाय जोन बहारी तौरमा यहूदी सेत। वोको लाय खतना देह को सपायी सेत।

²⁹ तरी असली यहूदी वा मानूस सेत। जोनको दिल को खतना सेत। अना यो परमेस्वर को आतमा को काम सेत, कोनी लिख्यो कानून को नाहोती। असो मानूस को परमेस्वर बड़ाई करा सेत कोनी मानूस नही।