रोमियो 13 - सत मारग पर चलन वारो किताब

तुमरो राज को अधिकारी गिनको अधिन रव्हनो

¹ सबअ राज को अधिकारी गिनको पालन करनो पाहिजे। काहेका कोनी भी अधिकार परमेस्वर को हुकूम को बिना मौजुद नाहती। अना मौजुद अधिकारी गिन परमेस्वर लक राख्यो गयो सेत।

² जोन मौजूद अधिकारी गिनको बिरोध करा सेत वा परमेस्वर को हुकूम को बिरोध करा सेत, अना जोन कोनी असो करा सेत उ आपरो पर नियाव आना सेत।

³ राजा अना सासकगिन उन लोक हुनला नही डरावा सेत, जोन साजरा काम करा सेत, पर वय वोला च डरावा सेत, जोन बुराई करा सेत। अदी तुमी सासन लक नही डरनो चाव्हा सेव, तो भलो काम करो, तुमरो बड़ाई होहेत।

⁴ काहेका वय परमेस्वर को सेवक सेत। जोन तुम्हारो भलो को लाय काम कर रहयो सेत। परा अगर तुम्ही बुराई करतत ता उन लक डरो, काहेका दंड देवन को ताकत उनला भेटयो सेत। अना बुराई करन वालों ला सजा देवा सेत।

⁵ यो कारन लक तुमला अधिकारी गिनको पालन करनो पाहिजे। ना च परमेस्वर की सजा को कारन, बल्कि डिमाक लक भी।

⁶ यो च कारन सेत, का तुम्ही जमा पटावा सेव। काहेका हरेक अधिकारी परमेस्वर को काम करा सेत। अना आपरो करतब ला पूरो करा सेत।

⁷ एकोलाय हरेक को हक देव, जोनला जमा पटानो से, उनको जमा पटाओ, जोको लक डरानो जरुरी से, वोको लक डराव, जोनको आदर करनो से, वोको आदर करो।

सब हुकूम को सार एक दुसरो लक पिरेम

⁸ आपसी मा पिरेम ला छोड़ अना काही बात को करजा नोको चाहो। काहेका जोन दुसरो लक माया राखासे उ नियम धरम ला पूरो कर सेस।

⁹ यो का छिनालापन नोको करो, कोनिला जान लक नोको मारो, चोरी नोको करो, लोभ नोको करो, इनला छोड़ अना कोनी हुकूम सेस तो यो सब बातको निचोड़ यो हुकूम मा सेत। का आपरो सेजारी लक आपरो समान माया राख।

¹⁰ माया आपरो सेजारी को काही बुराई नही करा से, एकोलाय माया राखनो नियम ला पूरो करनो से।

¹¹ बेरा ला चिन्हके असोच करो, एकोलाय का अबा तुमारो लाय जप लक जगन को बेरा आय गयो सेत। काहेका जोन बेरा अमीना भरोसा राख्यो होतो, वोना बेरा को बिचार लक सूटकारा कठा होति।

¹² अबा रात बित गयी सेत, दिवस हिटनवारा सेस एकोलाय आमी इन्धार को काम ला छोड़-छोड़के उजाड को हतियार घालो।

¹³ आमी दिवस को लक खरो चाल-चलबिन। आमी रगिलोपन नसा पानी गन्दोकाम, अना छिनालापन जलन अना देह को वासना झगड़ा-रगडा लक दुहुर रव्हबिन।

¹⁴ तुमी पिरभू यीसु मसीह ला घालो अना देह को इक्सा पूरो करन को कोसिस नोको करो।