परकासित वाक्य 20 - सत मारग पर चलन वारो किताब

हजार बरस को राज

¹ एको मंघा मिना एक सरग को दूत ला सरग लक खाल्या उतरतो चोवयो। ओको हात मा नरक को कुन्जी अना एक भारी साकल होती।

² सरगदूत ना ओना पंखा वालो जुनो सरप ला जोन सैतान भी कहलावा सेत, एक हजार बरस को लाई बाँध दियो।

³ तबा सरगदूत ना ओला नरक मा फेक देईस। अना ओला बंद करके ओको मा सील लगाय देईस। का उ हजार बरस पूरो होवन तकन कैद रहेत। अबा उ कोनी भी देस ला अखिन जादा नोको भरमा पायेत। यो सब होवन को मंघा यो जरूरी होतो की ओला जरा सो बेरा को लाई छुट दियो जाहे।

⁴ मगं मि ना सिघासन चोवयो। ओनो पर वय लोक बसी होतीन। जिनला नियाव करन को हक दियो होतो। तबा मिना उन आतमा गीन ला चोवयो, जिनको डोस्का यीसु मसीह को गवाही को कारन अना परमेस्वर को गोस्टी को आयकावन लक काप दियो गयो होतीन। उनना ओना जनावर मजे ओको मुरत को पूजा नही करयो होतीन। जिनको कपार मा अना हात पर ओको सील नही लगाईन होतिन। वय जित्तो होय गईन, अना उनना हजार बरस तकन मसीह को सँग राज करीन।

⁵ योच से पयलो जी उचलनो-बाकी मरयो हुयो तबा तकन जित्तो नही होयो। जबा तकन हजार बरस पूरो नही होय गयीन।

⁶ पवीतर अना धन्य सेति वय, जिनला यो पयलो जी उचलनो मा सामिल करयो गयो से। दुसरी मिरतु को उन पर कोनी हक नाहती। तर वय परमेस्वर अना मसीह को याजक होयेती। अना हजार बरस तकन उनको सँग राज करयेत।

सैतान ला नास करनो

⁷ मंग हजार बरस को बेरा पूरो होवनो मा सैतान ला सोड़ दियो जाहे।

⁸ अना उ पुरो धरती मा फैलो हरेक देसला छलन को लाय हीट जाहेत, अना वा गोग अना मागोग ला छलेत। उ उनला लड़ाई को लाय जमा करयेत। वय समुन्दर को रेता को बराबर होतिन।

⁹ सैतान को सेना सबा धरती मा फैल जाहेत। अना वय संतगिन को डेरा अना चहेतो नगरला घेर लेहेत। तर स्तो गरता लक बरसेत अना सबको नास कर देहेत।

¹⁰ तबा सैतान ला, जेना उनको सँग छल करी होतीन, स्तो अना गन्धक को झील मा फेक दियो जाहेत, जहान ओना जनावर अना खोटो भविस्यवक्ता ला फेक गयो से। वहान उनला सदा को लाई तड़पत रहेत।

मोठो पाँढरो सिघासन अना आखरी नियाव

¹¹ तबा मिना पांढरो रंग को एक महिमा भरयो सिघासन अना ओको मा बसन वालो ला चोवयो, जिनको हाजरी लक धरती अना बादल पराय गयो, अना मंग कबच नही चोवयो।

¹² मंग मिना सबच मरयो हुयो लहान अना मोठयो ला सिघासन को समोर चोवयो। तबा किताब खोलियो गयो, अना एक अखीन न्याय को किताब खोलयो गयो।

¹³ समुंदर ना आपरो मा समाये हुयो मरयो लोकगीन ला पुढ़ा कियो। हर कोनी को न्याय ओको काम को अनुसार करयो गयो।

¹⁴ मिरतु अना नरक को स्तो को झील मा उनला फेक दियो गयो। योच से दुसरो मिरतु-स्तो को झील।

¹⁵ ओला जोको नाव जीवन को किताब मा नही पायो गयो से, स्तो को झील मा फैक दियो गयो।