परकासित वाक्य 12 - सत मारग पर चलन वारो किताब

बायका अना पंख वालो साँप

¹ तबा सरग मा एक अदभुत निसान चोवयो, एक बायको सूरज जेनको कपरा होती। अना चन्दा जेनको पाय को खाल्या होती। अना जेनको डोस्की मा बारा तारा को एक मुकुट होतो।

² पोट लक होती, अना वोको जचकी को दरद सुरू भयी अना कलपन लगी।

³ ओनो बेरा सरग मा एक अखीन निसान दिसय। लाल रँग को एक मोठयो पंखा वालो सरप जेनको सात डोस्की अना दहा सींग होतीन। हरेक डोस्की मा एक-एक राज मुकुट होतो।

⁴ ओना बादल को एक तिहाई तारागीन ला आपरी पुँछ लक समेट के धरती पर फेंक देईस। अना उ पंखा वालो सरप, वा बायको को समोर जोन लेकरा जलम देवन वाली होती, वोको उभो होय गयो। का लेकरा को जलम लेवन को संग वोला लील लेय।

⁵ ओनो बायको ना एक टूरा ला जनम देईस, जेनको सबच देस गीन पर लोहा को छड़ी लक राज करनो पक्को होतो। ऐना लेकरा ला तुरन्त च परमेस्वर को राजगद्दी को जवर पहुचाय दियो गयो होतो।

⁶ लेकिन उ बायको जंगल को कना पराय गयी, जहान परमेस्वर कन लक ओको लाय एक जघा तैय्यार कियो गयो होतो। की वहान बारा सम्बर साठ दिवस तकन ओकी निगरानी लक पालो पोसो जाहे।

⁷ तबा सरग मा दूबारा लड़ाई सुरू होय गयो। सरगदूत मीकाईल अना ओको दूत ला उ पंखा वालो सरप लक लड़नो पड़यो

⁸ पर वय सरप अना वोको संगी सरगूत गिनलक हार गयिन। अना सरग लक हेड़ दियो गयीन।

⁹ तबा ओनो पंखा वालो सरप ला-ओना जुनो सरप ला, जोन सैतान कहलावासे अना जोन जगत को सबच रव्हनवारा गीन ला भरमाव से। वोला वोको संगी गिगन को संग धरती पर फेंक दियो गयो।

¹⁰ तबा मोला सरग मा एक ऊचो आवाज यो मुनादी करतो हुयो आयकयो दियो; “अब मुकती, ताकत, आमरो परमेस्वर को राज, अना मसीह को राज करन बेरा आय गयो से।” आमरो भाऊगीन पर जोन परमेस्वर को समोर हरामेसा दोस लगावत होतो। वोला हेड़ दियो गयो से।

¹¹ उनना मेढ़ा को रकत, अना आपरो गवाही को कारन लक ओला हराय देईन। “आखरी साँस तकन उनना आपरो जीवन को माया नही करीन।”

¹² एकोलाय सप्पा सरग अना ओको रव्हन वारा, खुस होयेत! हाय से तुमी पर धरती अना समुंदर! काहेकि सैतान तुमी तकन पहुँच गयो। उ लगत गुस्सा मा भर गयो से, काहेकि ओला मालूम से का ओको बेरा लगत ही कम से।

¹³ जबा पंखा वालो सरप ला यो मालुम हुयो। का ओला धरती पर फेंक दियो गयो से। ता उ ओनो बायको ला, जेने ओनो टूरा ला जनम देइसेस, परेसान करन लगयो।

¹⁴ तबा ओनो बायको ला एक मोठयो गरूड़ को दुय पंख दियो गयी। की वा उड़के ओनो सरप लक दुहूर जंगल मा आपरो रव्हन की जघा मा चली जाय। जहान वोला साडे तीन साल रव्हनो सेत। काहे का वहानवोको जेवन रव्हन को बेवस्था कियो गयोहोतो।

¹⁵ मंग सरप ना ओनो बायको को मंघा, आपरो टोंड लक नदी को जसो पानी ला बोहाईस। का ओला पानी को पूरा मा बोहाय ले जाय।

¹⁶ पर धरती ना बायको को मदद करीस। अना सरप को टोंड लक हिटयो नदी को सप्पा पानी ला सोक लेयीस।

¹⁷ अना पंखा वालो सरप बायको पर हिजड़ गयो। अना ओकी बचयो औलाद जोन परमेस्वर को हुकूम ला मानसेत। अना यीसु को गवाही पर पक्को सेत। उन लक लड़ाई करन ला हिट गयो।

¹⁸ अखीन उ समुंदर को रेत पर जायके उभो होय गयो।