परकासित वाक्य 11 - सत मारग पर चलन वारो किताब

दूई गवाह

¹ मंग मोला नापन को लाय एक छड़ी दियो गयो। अना मोला कव्हयो गयो। “उभो होय अना परमेस्वर को मंदिर अना वेदी ला नाप, अना जोन लोकहुन मंदिर को भीतर अराधना करा सेत, उनको गिनती कर।

² परअ मंदिर को बाहेर आँगन ला रव्हन देव, वोला नोको नाप काहेका यो गैरयहुदी लोकगीन ला दियो गयो सेत। वय बयचाड़िस महिना तकन पवीतर येरुसलेम नगर ला अपरो पाय लक रवदेत।

³ मि आपरो दुय गवाह गीन ला जेनको कपरा बोरा को से, बारा सम्बर साठ दिवस तकन भविस्यवानी कराहिन।”

⁴ यो गवाह जैतून को दुय झाड़ अना दुयी दयोदानी सेत। जोन धरती को पिरभू को पुढ़ा उभा सेति।

⁵ अदी कोनी उनको हानी करनो चाव्हसे। ता उनको टोंड लक स्तो हिटा सेत जोन उनको बैरी गीनला नास कर देहेत। उनला असो मरनो होहेत।

⁶ वय बादल ला बाँधन को ताकत राखत होतीन। जोन लक वय भविस्यवानी कर रव्हयो सेत। तबा तकन कोनी बरसात नही होहेत। उनको झरना को पानी पर हक होतो। जोनलक वय पानी ला रकत मा बदल सकत होतिन। अना उनला धरती मा जबा-जबा चाहेत, तबा-तबा हर परकार को मरही धाड़न को अधिकार सेत।

⁷ उनको गवही देवन को मघा, वा पसु महा गरत लक बाहेर हिटेत अना उनपर धावा करहेत। अना पसु उनला हराके मार डाखेत।

⁸ उनको मुरदा वोना महा नगर को चौकमा रखो रहेत। वो नगर को संकेतिक नाव सदोम या मिसर सेत। जहान उनको पिरभू ला कूरूस मा चघायो होतिन।

⁹ साडे तीन दिवस तकन सबरी कुल अना भासा अना देस-देस को लोकगीन उनको लास ला चोहेत। अना कबर मा राखन को हुकूम नही रव्हेत।

¹⁰ अना सब धरती को लोकगिन यो गोस्टी लक खुसी मनाहेत। अना एक दुसरो ला भेट देहेत। काहेका यो दुयी भविस्यवक्ता गीनना धरती को रव्हनवारा गिनला लगत दुख दियो होतिन।

¹¹ पर साढ़े तीन दिवस मघा परमेस्वर को कनलक वय जित्तो भयी गयीन। अना आपरो पाय मा उभो भयी गयीन। जोनना उनना चोवीन लगत डराय गयो होतिन।

¹² मंग वय दुयी भगतगिन लाय जोरलक बादल लक आवाज आयो। “यहान वरता आव।” तो वय बादलको वरता चले गयीन। उनला वरता जावत उनको बैरी चोवीन।

¹³ उतरो च बेरा मोठयो भुयीडोल आयो, अना नगर को दसवा हिस्सा पड़ गयो। अना 7,000 लोकगीन मर गयीन। अना जोन लोक बचयो होतिन वय डराय गयीन। अना सरग को परमेस्वर को महीमा करन लगीन।

¹⁴ असो परकार लक अबा दूसरो आफद बीत गयो। पर सुसियार तिसरो आफत लवकर आवन वालो सेत।

सातवी आवाज

¹⁵ “सातवो सरगदूत ना जबा आपरो तुर्रा फूँकीस तो बादल मा लगत आवाज होवन लगयो।” वय कव्हत होतिन, “अबा जगत को राज आमरो पिरभू को सेत। अना वोको मसिहा को। अबा वा साजरो सासन लक हरामेसा राज करहेत।”

¹⁶ तब वय चौबीस बुजरूक गीन ना, जोन आपरो-आपरो कुरसी मा बसयो होतीन। परमेस्वर को पुढ़ा तोन्ड को बल पड़के नमस्कार करत यो कव्हत धन्यवाद करीन।

¹⁷ “सब लक ताकत वर परमेस्वर, जोन अबा से, अना जोन होतो।” अना हरामेसा रहेत, काहेका तू ना आपरो बल लक यो राज को सरुवात करयो सेत। अना येको अधिकारी सेत।

¹⁸ गैर यहुदीगीन हिजड़ गयो सेत। पर उन पर तोरो पर कोप भड़क गयो। अब बेरा आय गयो से, की मरयो हुयो को न्याय कियो जाहे। अना तोरो दास गीन भविस्यवक्ता गीन, पवीतर लोकगीन अना उन लहान मोठयो जोन तोरो नाव को भेव मानत होतिन, उनको बदला लियो जाये। अना भूई ला बिगाड़न वालो ला मिटायो जाय।

¹⁹ तब परमेस्वर को मंदिर जोन सरग मा से, उघाड़ दियो गयो। अना ओनो मंदिर मा उनको करार को संदूक दिसयो। ओना बेरा बिजली कौन्धी, गड़गड़ाहट अना बादल को गरजन हुयो। एक डरावनो भुईडोल आयो, अना मोठो-मोठो ओला पड़िन।