परकासित वाक्य 1 - सत मारग पर चलन वारो किताब1 यो यीसु मसीह को अदभुत सन्देसा सेत। जेनला परमेस्वर को कन लक एकोलाय दियो होतो। का जोन गोस्टी लवकर पुरो होवन वालो सेत। उनला आपरो दास गिनला दरसायो जाय। आपरो सरगदूत धाड़के यीसु ना आपरो दास योहन इसारा मा साँगीसेस। 2 योहन ना जोन काही चोवयो होतो, वोको बारेमा सांगिस वा खरो सेत। जोनला यीसु मसीह ना सांगयो होतो। यो वा खबर से, जोन परमेस्वर कन लक सेत। 3 धन्य सेत वय जोन यो परमेस्वर को यो खबर ला आयक सेत, अना यो मा लिखयो गोस्टी ला माना सेत। काहेका मुसिबत को बेरा जवर सेत। सात कलीसिया को नमस्कार 4 योहन को कन लक एसिया प्रान्त को सात कलीसिया गिनको नाव, वोना परमेस्वर को कन लक, जो अबा से, अना हरामेसा होतो अना जोन आवनवाला सेत। अना उन सात आत्मा गिनको कन लक जोन वोको सिघासन को समोर सेत। 5 अना यीसु मसीह कन लक जो भरोसा लायक गवाह, मरयो हुयो मा लक जी उचलनो मा पयलो, अना सारो जगत को राजा गीन को मुखिया से। तुमला किरपा अना सान्ती मिलत रव्हे। उ आमरो लक माया राखासेत, अखिन आपरो रकत लक अमिला पाप लक छुड़ायो से। 6 वोना अमीला एक राज अना अपरो परमेस्वर दआजी को सेवामा याजक होवन लाय रचयो। ओको गौरव अना ताकत जुगजुग तकन बनयो रह। आमेन 7 चोवो, बदली को संग मसीह आवा से। हरेक डोरा वोला चोवयेत। उनमा वय भी सेत जोनना वोला छेदयो होतिन। दुनिया मा सबा लोकहुन वोको कारन रड़ेत। असोच होवनो पाहिजे। आमीन! 8 परमेस्वर जो सब लक ताकत वर से, यो कव्हसे, “कवन से? कवन होतो? अना कवन आवन वालो से? मी च पयलो अना आखीर सेऊ।” योहन ला मसीह को चोवनो 9 मी योहन, तुम्हारो भाऊ सेऊ, अना यीसु को चेला को रूप मा, मी उन लोक गिनको लाय धीरज लक धीरज राखअ सेऊ, जोन उनको राज को बारेमा सेत। मोला पतमोस टापु मा डाख दियो गयो। काहेका मीना परमेस्वर को बचन अना यीसु कन लक सांगयो गयो सच्चाई को मुनादी कियो होतो। 10 यहोवा को दिवस मा आतमा ना मोला आपरो बसमा कर लियो। तबा मीना जोरलक आवाज आयकुआय। जोन तुर्रा जसो लग रह्यो होतो। मोरो मघा बोलत होतो। 11 की जो काही तु देखीसेस ओला किताब मा लिख अना सात कलीसिया गीन को नाव धाड़ मजे इफिसुस, स्मुरना, पिरगमुन, थुआतीरा, सरदीस फिलोदिपिया अना लौदीकिया ला धाड़ देव। 12 यो चोवन लाय मि मुरक गयो, का कवन मोरो लक गोस्टी करा से? अना मी ना सात सोन्नो को दियोदानी चोवयो। 13 अना उन टवरी गीन को बीच मानूस को टूरा जसो एक मानूस जो पाय हिन तकन लम्बो कुरता घाल्यो अना छाती पर एक सुनहरो पट्टा बांधयो हुयो होतो। 14 ओको डोस्की अना ओको चुन्दी ऊन जसो पाँढरो अना बरफ को जसो जगाजग पाँढरो होतो। अना ओको डोरा स्तो को स्तो को जसो होतीन। 15 ओको पाय असो चमकिलो पीतल को जसो होतीन जो भट्टी मा तपयो के चमकायो गयो होयहेत। ओको आवाज पानी को आवाज जसी होती। 16 उ जेवनो हात को सात तारागीन ला धरयो हुयो होतो। ओको टोंड लक ताकत वालो तेज जसी तलवार हिटत होती। ओको टोंड को सोभा दुफार को सुरज को जसो चमक रहयो होतो। 17 जबा मिना ओला दिसयो ता मरो हुयो जसो ओको पाय मा गिर पड़यो, वोना मोरो पर आपरो उजो हात राख के सागयो नको भेव खाय मी पयलो अना अखट्ट जिवित सेव। 18 मि मर गयो होतो अता मि सदा लक जित्तो सेव। मिरतु अना नरक को कुन्जी मोरो जवर से। 19 एको लाई जो गोस्टी तु ना देखीसेस, जो गोस्टी होय रही सेत, उनला लिख लेव जोस। 20 वोय सात तारा गीन को भेद जो तुना मोरो जेवनो हात मा देखीसेस अना सात सोनो को टवरी को भेद यो आय; सात तारागीन, सात कलीसियागीन को दूत सेत, अना वय सात दियो सात कलीसिया गीन सेत। |
The New Testament in Powari Language © The Word for the World International and Powari Madhya Pradesh, 2023.