फिलिप्पियो 3 - सत मारग पर चलन वारो किताबखरो धारमिकता 1 एकोलाई अगा भाऊ मोला तुमला यो घड़ी-घड़ी लिखनो मा, काही दुख नही होवा का पिरभु मा खुसी रव्हो। काहेकि ऐमा तुमरो रक्सा होवासे। 2 कुतरा गीन, बुरो करनवारा गीन अना खोटो खतना लक सजग रव्हो। 3 खरो खतना वारा ता आमिच सेजन जोन परमेस्वर को आतमा मा भगती करसेजन, मसीह यीसु पर घमन्ड करसेजन अना तन पर भरोसा नही राखासेजन। 4 मि ता तन पर भरोसा राख सकत होतो। अदि कोनी को तन पर भरोसा राखन को बिचार से ता मोला ओकोलक कही लगत होय सकासे। 5 आठवो दिवस मोरो खतना भयो। इसरायल जाति को बिन्यामीन गोत को सेऊ। इबरानी हुन को इबरानी, नियम को कानुन पालनो को नजर लक फरिसी सेऊ। 6 कट्टरता को बारेमा मि कलीसिया को खूब सतावन वालो अना मोसे को नियम को धरमिपन को कन लक खरो अना निरदोस होतो। 7 पर जोन गोस्टी मोरो फायदा को होती उनला च मिना मसीह को काजी हानि समझ लेईसेउ। 8 एकोलक बड़के मि आपरो पिरभु यीसु मसीह को गियान को मोठो महिमा को काजी सबच गोस्टी ला बेकार समझासेउ। जोको काजी मिना सब चीजगीन को हानि उचली सेऊ। 9 मि ओनो धरमिपन लक मसीह मा पायो जाऊ जो मोसे को नियम लक नही पैदा होवासे पर मसीह पर बिस्वास करन लक मिलासे, मजे ओनो धारमिकता लक जो केवल भरोसा को साठी परमेस्वर लक मिलासे। 10 का मि ओको मिरतु को समानता ला पाय सकुह, जोकोलक ओको अना ओको जित्तो उचलन को ताकत ला अना ओको संगा दुखहुन मा संग होवन को भेद ला जान लेहुँ। 11 का मि भी मरयो हुयो को मंग लक जित्तो होवन ला पाय सकु। मसीहगीन लाई निसाना 12 यो नही की मोला मिल गयो से या पक्को होय गयो सेऊ पर मकसद ला पुरो करन लाई पुढा बड़त जावासेऊ जोन को लाई मसीह यीसु ना मोला धरयो होतो। 13 अगा भाऊगीन, मोरो सोच असो नहोय की मि पाय लेईसेउ पर यो एक काम करासेऊ की जो गोस्टी मंघा रव्ह गयीसेत, उनला भुलके पुढा को गोस्टी को कना बड़तो हुयो 14 निसाना कना धाव रहीसेऊ का उ ईनाम पाहुँ जोको लाई परमेस्वर ना मोला मसीह यीसु मा वरता हाकलीसेस। 15 एकोलाई आमी मा लक जेतरो पक्को सेत योच बिचार राखेत, अना कोनी गोस्टी मा तुमरो अलग-अलग बिचार सेत ता परमेस्वर वोला भी तुम पर आन दिसाय देहे। 16 जेना नाप तक आमी पहुच गयी सेजन ओनाच लक आचरन करबिन। 17 भाऊगीन तुमी सब मिलके मोरो जसो चाल चलो। अना उनला धियान लक दिसो, जोन ऐना रिती लक चलसेत। जेनको नमुना तुमी आमी मा दिससो। 18 काहेका मि तुम लक कई लोक खोटो चालचलन राखसेत। पुढा कई गन कव्ह चुकी सेऊ अना अबा भी रोय-रोय के कव्हसू की असा लगत सेत, जोन आपरो चाल चलन अना सुभाव लक मसीह को कूरूस को दुस्मन सेत। 19 उनको खातमा नास से, उनको पोट देवता से, वय आपरो बेसरमी को गोस्टी ला महिमा करासेत अना संसारिक चीजगीन पर मन लगाय रव्हसेती। 20 पर आमरो रव्हन साठी जघा सरग मा से, जहान लक आमी सुटकारा करनवालो पिरभु यीसु मसीह को आवन को रस्ता बड़ी बेसबरी लक कर रहया सेजन। 21 उ आपरी ताकत को असर लक जेनको लक उ सबच चीजगीन ला आपरो बस मा कर सकासे, आमरो दुखी तन सुखी तन को रूप बदल के, आपरो महिमा वालो तन जसो बनाय देहे। |
The New Testament in Powari Language © The Word for the World International and Powari Madhya Pradesh, 2023.