फिलिप्पियो 2 - सत मारग पर चलन वारो किताबमसीह की रहम अना मोठो दिल 1 ऐना तरीका लक अदी मसीह मा काही सान्ती, अना माया लक हिम्मत, अना आतमा को संगती अना काही करूना अना दया से, 2 ता मोरो यो खुसी पूरी करो का एकच मन रव्हो, अना एकच माया, एकच चित, एकच मनसा एकच बिचार राखो। 3 बिरोध अना बनावटी बड़ाई को लाई काही नोको करो, पर दीनता लक एक दुजो ला साजरो समझो। 4 हर एक आपरो हित को नही, पर दुजो को हित को भी चिन्ता करेत। 5 जसो मसीह यीसु को बिचार, सुभाव होतो वसोच तुमरो भी सुभाव होय। 6 जेना परमेस्वर को खुदच रूप मा होयके भी, परमेस्वर को बरोबर होवन को आपरो बस मा राखन को चीज नही समझीस। 7 पर आपरो खुदच ला काही नही असो कर देईस, अना दास को खुदच रूप धारन कर लेईस, अखीन गरीब मानूस को, जसो बन गयो। 8 अखीन मानूस को रूप मा आयके आपरो आप ला खुदच दिनहिन कर लेईस, अना यहान तकन हुकूम मानन वालो रहयो की मिरतु हव, कूरूस को मिरतु ला सह लेईस। 9 एने काजी परमेस्वर ना ओला लगत मोठो कर देईस, अना ओला उ नाव दे दियो जोन सबच नावगीन मा वरता से। 10 काहेका जोन सरग मा अना धरती मा अना पाताल मा से, वय सबच यीसु को नाव, पर टोंगरा टेकेत। 11 अना परमेस्वर बाबूजी को बड़ाई को साठी हरेक जुबान कबुल करेहेत का, यीसु मसीह च पिरभु से। संसार मा उजाडो जसो चमको 12 एकोलाई अगा मोरो चहेतो, जेना तरीका लक तुमी हमेसा लक हुकूम मानतो आयासेव, वसोच अबा भी नही केवल मोरो संग रव्हत हुयो पर खास रुप लक अबा मोरो दुहूर रव्हन पर भी भेव लक अना कापत हुयो आपरो-आपरो मुकती को काम पूरो करत जावो; 13 काहेकि परमेस्वर च से जोन ना आपरी साजरो मरजी को लाई तुमरो मन मा मरजी अना काम, दुही गोस्टी को करन को असर डाकीसेस। 14 सबच काम बगर कोसे अना बगर बिवाद को करने। 15 मजे तुमी निरदोस नेक अना सीधो होयके टेड़ो अना जिद्दी लोकगीन को बीच परमेस्वर को बेकसूर औलाद बनया रव्हो, जिनको बीच मा तुमी जिंदगी को बचन लियो हुयो संसार मा जलतो दियो को जसो दिससो। 16 की मसीह को दिवस मोला घमन्ड करन को काजी होय की न मोरो दौड़ अना मोरो मेहनत करनो बेकार भयो। 17 अदी मोला तुमरो भरोसा रुपी बलिदान अना सेवा को संगा आपरो खून भी बोहानो पड़ेह, मंग भी मि खुस सेऊ अना तुमी सब को संगा खुसी मनावसेऊ। 18 वसोच तुमी भी खुसी मनावो अना मोरो संगा खुस रव्हो। तीमुथियुस अना इपफ्रुदीतुस 19 मोला पिरभु यीसु मा आस से की मि तीमुथियुस ला तुमरो जवर तुरुतच धाड़ुह, जोकोलक तुमरो दसा आयक के मोला सान्ती मिलेह। 20 काहेकि अता मोरो जवर कोनी असो नाहती जो सुध्द मन लक तुमरी चिन्ता करहे। 21 काहेकि सबच आपरी सुवारत को खोज मा रव्हसेत, नाच यीसु मसीह की। 22 पर ओला ता तुमीना ता परखया सेव, अना जानच लेईसेव, की जसो टूरा बाबूजी को संगा करासे, वसोच ओना साजरो बारता को फैलावन मा मोरो संगा सेवा करीसेस। 23 एकोलाई मोला आस से का जसोच मोला जान पड़हेत का मोरी का दसा होहे, तसोच मि ओला तुरंत च धाड़ देहुँ। 24 अना मोला पिरभु मा भरोसा से की मि खुदच जल्दीच आहू। 25 पर मिना इपफ्रुदीतुस ला जोन मोरो भाऊ अना संगकरमी अना संग को पेरीत अना तुमरो दूत अना कामवारी गोस्टी मा मोरी दास से, तुमरो जवर धाड़नो जरुरी समझियो। 26 काहेकि ओको मन लगत तुमी सबच मा लगयो होतो, यो काजी उ बैचेन रव्हत होतो, काहेकि तुमी ना ओकी बीमारी को हाल आयकिया होतो। 27 बाकई मा उ बीमार ता होय गयो होतो यहान तक का मरन पर होतो, पर परमेस्वर न ओको पर दया करीसेस, अना नाच केवल ओको पर, मोरो पर भी की मोला सोक पर सोक नही होहे। 28 एकोलाई मिना ओला धाड़न को अखीन भी कोसिस करियो की तुमी ओला मंग भेटके खुसी भयी जावो। अना मोरो भी सोक घट जाहे। 29 एकोलाई तुमी पिरभु मा ओला लगत खुसी को संग भेंट करने अना असोहुन को मान करने। 30 काहेकि उ मसीह को काम को लाई आपरो परान पर मुसीबत उचलके मिरतु को जवर आय गयो होतो मन्जे जोन घटी तुमरो कन लक मोरी सेवा मा हुयी ओला पूरो करो। |
The New Testament in Powari Language © The Word for the World International and Powari Madhya Pradesh, 2023.