मत्ती 27 - सत मारग पर चलन वारो किताब

पीलातुस को पुढा यीसु

¹ जबा दिवस हिटयो, तबा सब मुखिया याजक, अना सियानो गीन, आपसी मा विचार करीन, का यीसु मार डाख्यो जाय।

² उनना यीसु ला बाँधीन, अना वोला पिलातुस राजा ला सोप देईन।

युदूस की आत्महत्या

³ जबा, यीसु को धरानवारा, यूदस ना चोवयो, का वोला दन्ड मिल्यो से। तब उ, गजब पस्तायो, अना उ खुरो को तीस सिक्का, वापिस आनिस।

⁴ मीना निरदोस मानूस को खून को सौदा, अना पाप करीसेव। तबा मुखिया यजक गिन सांगीन, हमला एको लक, काजक कामसे? तूच जान।

⁵ एको पर यूदूस ना, खूरो को सिक्का ला, मंदिर मा फैक दियो, अना वहान लक चलयो गयो, अना जायके फाँसी मा झूल गयो।

⁶ मुखिया याजक गीन खुरो को सिक्का, ला सकल लेइन। अना कव्हन लगीन, मोसे को नियम लक यो सिक्का ला खजाना मा राखनो, पाप से। काहेका यो तो खून को किमत से।

⁷ यो काजी आपसी मा, विचार करन को बादमा, उनना परदेसी गीन ला दफनान काजी, उन सिक्का लक, कुम्भार को जमीन खरीद लेइन।

⁸ योच कारन लक, आज तकन, उ जमीन खून को जमीन कहलावसे।

⁹ तबा काजक भविस्यवक्ता यीरमीयाह को लिख्यो, पूरो होवासे, उनना खुरो को तीस सिक्का लियो, ओतरो रकम लक इसरायल को लोकहुन ना, बेकिमती मानूस लाय राखी सेस।

¹⁰ अना उनना यो सिक्का कुम्भार को जमीन लाय, दे दियो से जसो पिरभु ना, मोला हुकूम देइसेस।

राजपाल पीलातुस को यीसु ला सवाल पुसनो

¹¹ अबा यीसु राजपाल को पूढ़ा उभो होत्यो। राजपाल ना वोला पुसयो, का तू यहूदिगीन को राजा आस? यीसु ना जवाब दियो, तु खुदच कव्हसेस।

¹² मुखिया याजक, अना सियानोगीन, वोको पर लान-छान लगावत होतिन। पर यीसु ना कोनी जवाब नही दियो।

¹³ एको पर पिलातुस ना यीसु ला कव्हयो, “का तू नही आयकासेत? का यो तोरो विरोध मा कितरो गवाही देवासे।”

¹⁴ मंग भी यीसु ना काही सबद नही सांगयो। एको पर राजपाल ला, गजब ताजुब भयो।

मिरतु की सजा देवनो

¹⁵ हरेक फसह सन-तीहार को बेरा मा राज पाल, लोकहीन को मनको अनुसार, एक कैदी ला छोड़त होतो।

¹⁶ वोच बेरा यीसु को संग बरब्बा नाव को एक मानूस, जेल मा होतो।

¹⁷ पिलातुस राजा ना लोकइन ला साग्यो। “तुमी काजक चव्हासो? मी तुमरो लाय कोनी ला छोडू? बरब्बा ला का यीसु ला? जो मसीह कहलावसे।”

¹⁸ उ जानत होत्यो का, यीसु ला जलन, लक धरायो गयो से।

¹⁹ जबा राजपाल पिलातूस न्याय आसन मा बसो होतो। ता वोकी बायको ना वोको जवर खबर धाड़ी होती, “वोना सीधो-नेक मानूस को संग काही नोको करजोस, मी ना वोको बारेमा एक सपना चोवीसेऊ जोनलक अज मी दिवस भर बेचैन होती।”

²⁰ पर मुखिया याजक अना बुजुरुग यहूदी नेतागिन ना भीड़ ला बहेका लेइन, का वय पिलातुस लक बरब्बा ला सोड़न अना यीसु ला मरवान की माँग करेत।

²¹ जवाब मा राजपाल ना अखीन पुछयो, “तुम्ही काजक चव्हासो? दोंनो मा कोनी ला छोडनो से?” उनना जवाब दियो, “बरब्बा ला!”

²² एको पर पिलातुस न उन लक कव्हयो, “मी यीसु जोन मसीह कहलावा से वोको का करु?” सबना जवाब देइन, “एला कूरूस मा चघा देव।”

²³ पिलातुस ना कहीस “काहे ओना काजक, बुरो करीसेस?” पर वय अखीन चिल्लावसेत अना कव्हसेत, “ओला कूरूस मा चघा ओ।”

²⁴ जब पिलातुस ना चोवयो, का यीसु ला बचावन को लाय कोनी, चांस नाहती। तबा उ उदास भई गयो, अना वोना पानी बुलवायके, ना हात धोवके सांगीस, “मी यो मानूस को खून को, दोसी नही सेव, तुमच जानो।”

²⁵ तबा सप्पा भीड़ ना जवाब देइन, “एको खून को बदला, आमी अना, हमरो सन्तान ला मिले।”

²⁶ तब पिलातुस न उनको लाय, बरब्बा ला छोड़ देइस। अना यीसु ला कोडा लगवाइस, अना कूरूस मा चघान, काजी सिपाई गीन को हातमा सोप देइस।

सिपाही कन लक यीसु को बेईज्जती

²⁷ एको मंघा राजपाल को सिपाही गीन, यीसु ला राजभवन को भीतर ले गइन। अना उनना यीसु को कठा सिपाही गीन, ला जमा कर लेइन।

²⁸ उनना यीसु को कपरा उतार के, वोला, लाल चोगा पहनाइन।

²⁹ अना झाड़ी को काँटा को मुकुट गुथ के वोको, डोस्की मा राखीन। अना वोको, उज्जो हात मा एक घागरा काड़ी धरा देइन। तबा वोको पुढा टोगंरा टेकके, असो मजाक करन लगीन। यहूदिगीन को राजा ला नमस्कार!

³⁰ उनना वोको पर थुकिन, अना घागरा काड़ी लक वोको डोस्की मा मारिन।

³¹ असो मजाक करन को मंघा यीसु को, चोगा ला उतार लेइन, अना वोको कपरा पहना देइन। एको मंघा वय यीसु ला कूरूस मा चघा वन काजी ले गइन।

यीसु ला सुली मा चघावनो

³² नगर लक हिटतो बेरा मा, सैनीक गीन, एक कुरेन देस को रव्हनवारा, सिमोन नामको मानूस ला धरीन। अना वोला यीसु को कूरूस उचलन लाई कहीन।

³³ वय गुलगुता मजे कवटी नाव को, जघा मा पहूचीन।

³⁴ वहान लोकगीन पीत मिलयो अंगूर को रस, यीसु ला पीवन लाय देइन, यीसु वोला चख्यो, पर नही पीवयो।

³⁵ सीपाई गिनना, यीसु ला कूरूस मा चघा देइन। अना वोको कपरा ला आपसी मा बाट लेइन।

³⁶ एको मंघा वय वहान बसके पहेरा देवन लगीन।

³⁷ यीसु को डोस्की को वरता मा दोस पतर लटका देइन। वोमा लिख्यो होता, यहूदिगीन को राजा यीसु से।

³⁸ यीसु को संग, उनना दोन डाकुगीन ला, कूरूस मा चघा देइन। एक ला उज्जोकन, अना एक ला डायोकन।

³⁹ उता लक आवन-जावन वारा लोकगीन, यीसु को निन्दा बदी करत अना डोस्का हिलात।

⁴⁰ यो कव्हत होतीन, यो मंदिर ला गीरावन वारा, अना तीन दिवस मा, मंग बनान वालो, यदि तु परमेस्वर को टूरा आस, तो आपरो आप ला बचा। अना, कूरूस लक खाल्या आव।

⁴¹ असोच मोसे को नियम को गुरू सयानो अना मुखिया याजकगीन, भी कव्हत-कव्हत मजाक करत होतीन।

⁴² “यो ना दूसरो ला बचाई सेस, पर आपरो आप ला नही बचा य सकसे, यो तो इसरायल जात को राजा से, अबा यो कूरूस लक खाल्या उतरे ता, हमी एको पर बिस्वास कर बीन।

⁴³ यो परमेस्वर पर बिस्वास राखासेत। यदि सचमा परमेस्वर एको लक खुस सेत तो अबा एको बचाव कर लेहत। काहेका यो ना साग्यो होतो, का मी परमेस्वर को टूरा सेव।”

⁴⁴ डाकुगीन यीसु को संग, सूली पर चघीन होतीन, वय भी असोच खरो-खोटो सांगन लगीन।

यीसु को जान हिटनो

⁴⁵ दूफार 12 बजे लक 3 बजे को बेरा लक, सारो देस मा इन्धार छायो, रहयो।

⁴⁶ अना तीन बजे, यीसु ना जोर लक कव्हयो, “एली-एली लेमा सबकतानी,” जोन ओ मोरो परमेस्वर! ओ मोरो परमेस्वर! तूना, मोला काहे छोड़ देइसेस।

⁴⁷ यो आयक के जवर उभो लोकगीन, बोलन लगीन, यो भविस्यवक्ता एलिय्याह ला हाकल से।

⁴⁸ उन मा लक एक धावके ना, स्पंज आन लेइस अना वोला अंगूर रस सिरका, मा डुबाय के, घागरा काड़ी मा लगाके यीसु ला, पीवन दियो।

⁴⁹ पर बाकी बचयो लोकगीन ना सांगिन, चोवो एलिय्याह वोला बचा वन काजी आवासे, का नही।

⁵⁰ तबा यीसु ना मंग ऊचो आवाज मा हाकलके, आपरो जान छोड़ दियो।

⁵¹ वोच बेरा मंदिर को पड़दा वरता लक, खाल्या तकन फट गयो, अना दोन टुकड़ा भई गई। जमीन हिलन लगी, भुईडोल भई अना, चट्टान फट गइन।

⁵² मरघट्टी उघड़ गयो, अना गजबसो पवीतर सन्त महातमा, देह समेत दुबारा जित्तो भई गईन।

⁵³ अना वय यीसु को जित्तो, होवन को मंघा मरघट्टी लक हिट के, अना पवीतर नगर मा जायके, लगत लोक ला चोवन लगीन।

⁵⁴ सेना को मुखिया, अना पहरादार, सैनीक गीन भुईडोल अना, यो सब गोस्टी चोयके गजब डराय गइन। अना बोलन लगीन, खरो खर पक्को मा यीसु च परमेस्वर को टूरा आय।

⁵⁵ वहान गजब सी आई-माई गीन दुहूर लक चोवत होतीन। वय यीसु को सेवा करन वालो, गलील छेतर लक उनको संग-संग आई होतिन।

⁵⁶ उनमा मरियम मगदलनी, याकूब अना यीसु को माय अना जबदी को टूरा गीन को माय होती।

यीसु ला गड़ायो जानो

⁵⁷ सन्जा होवन को मंघा, अरिमितिया नगर को, एक धनी महाजन आयो। वोको नाव युसुफ होतो, उ खुद यीसु को चेला बन गयो, होतो।

⁵⁸ वोना पिलातुस राजपाल को कठा जायेके, यीसु को लास मागीस, अना पिलातूस ना हुकूम करीस, का देह वोला सौप दियो जाय।

⁵⁹ युसुफ देह धरकेना, वोला सुध्द मलमल को कफन मा लपेट के।

⁶⁰ नवो मरघट्टी मा ठेव दियो जोनला, वोना आपरो लाय चट्टान मा, खुदवायो होत्यो। उ मरघट्टी को, धसन को जघा मा एक मोठो गोटा लुढकाके चले गयो।

⁶¹ मरियम मगदलनी दूसरी मरियम कबर को पुढा बसी होतिन।

कबर पर पहिरा देवनो

⁶² दुसरो दिवस मजे सूकिरवार को, मंघा पवीतर दिवस मा मुखिया पुजारी मोठयो पुरोहित अना, फरिसी गुरु गीन एक संग, पिलातुस को घरमा गइन।

⁶³ अना बोलिन की अमीला हेत से पिरभु, क उ धोकाबाज न आपरो, जिंदगी मा असो सांग्यो होतो, का मी तीन दिवस मघा जित्तो भई जाहू।

⁶⁴ कहि असो न होहे का चेला उचलके, ले जाये अना जनता लक सांगन लगेत, का यीसु जित्तो भई गईसे, यो मंघा को धोका लक जादा खोटो होहेत, यो काजी तीन दिवस लक कबर को, सुरक्सा को इन्तेजाम कियो जाय।

⁶⁵ पिलातुस ना कव्हयो “तुमरो कठा पहरेदार से” जाओ! अना जसो साजरो लगसे, वसोच तुमी करो।

⁶⁶ वय चले गइन, अना उनना कबर को, दरवाजा मा राख्यो गोटा मा मूहर लगा देइन।