मत्ती 22 - सत मारग पर चलन वारो किताब

बिहाव जेवन को उदाहरन

¹ यीसु मंग एना उदाहरन लक लोकहुन ला कव्हन लग्यो।

² सरग को राज असो से जसो, एक मोठो मानूस मजे राजा ना अपरो टूरा को बिहा करीसेस।

³ वोना अपरा दास ला धाडिस का निवता दियो गयो, लोकगीन ला बिहा को जेवन मा आवन लाय कव्ह, पर वय आवनो नही चाहिन।

⁴ मंग वोना अखिन दास गीनला असो, सांग के धाडिस का निवता दियो गयो, लोकगीन ला कव्हने, “का छपन्न भोग अना पलियो हुया जनावर भी तैय्यार से। आव अना बिहा को जेवन करो।”

⁵ पर वय जेवन मा नही आइन पर कोनी अपरो, खेत चली गयो अना कोनी अपरो, काम-धाम मा चली गयो।

⁶ काही लोकगीन न दास गीनला मारिन, अना बेज्जती करीन।

⁷ तबा राजा ला गुस्सा आयो अना अपरी सेना धाड़के, उनला नास करीस, अना धड़काय डाकिस।

⁸ तबा वोना अपरो दास ला कहीस, बिहा को जेवन ता तैय्यार से पर निवता दियो गयो, लोक काबील नही होतीन।

⁹ एकोलाय चौवक पर जावो अना जेतरा लोक, तुमला मिलहेत सबला बिहा को जेवन, मा बुलायके आनने।

¹⁰ अखीन उन दास गीन न रास्ता मा जायके, का बुरा का साजरो भला जेतरा मिरिन सबला जोड़ीन, अना बिहा वालो घर पाहुना लक, गसा-गस भर गयो।

¹¹ जबा राजा पाहुना गिनला चोवके भीतर आयो, ता वोना वहान एक मानूस ला चोयो, का जेना बिहा का कपरा नही पेहनो होतो।

¹² वोना पुसीस का अगा संगी तुना बिहा, को कपरा कायलाय नही डाकिसेस? उ उगा-मुगा भय गयो।

¹³ तबा राजा न दास गीनला कहीस, ऐका हात-पाय बांधके इंधारो मा डाक देव, वहान रोवनो अना दात पिसनो होहेत।

¹⁴ काहेकी हाकलो गयो लगत सेत पर निवड़ो हुयो जरासो सेत।

कैसर राजा ला जमा पटावनो

¹⁵ तबा फरिसी न जायके आपस मा विचारन लगीन का वोला कसो रिती लक फसावबिन।

¹⁶ अखीन उनना अपरो चेला गीन ला हेरोदियोगीन को संग वोको जवर असो कव्हन लाई धाडिस हे गुरू हमी जानासेजन का तु खरो सेस, अना परमेस्वर को रस्ता खराई लक सिकावा सेस, अना कोनी की चिंता नही करासेस, काहेकि तु मानूस को टोन्ड चोयके गोस्टी नही करसेस।

¹⁷ एकोलाय हमला सांग तु का सोचसेस? मोसे को नियम लक केसर राजा ला जमा पटावनो साजरो से का नही?

¹⁸ यीसु न उनको मनकि कपट जानके कहीस, हे कपटी मोला कायला परखा सेव?

¹⁹ रोमन देस को राजा ला जमा पटावन वालो सिक्का ला मोला दिसाव तबा वय वोको जवर एक खुरो को सिक्का आनीन।

²⁰ वोना उन लक पुसीस यो नाव अना छाप कोन को से?

²¹ उनना वोला कहिन केसर को तबा उन लक कहीस जोन केसर, को से वोला केसर ला अना जोन परमेस्वर को से वोला परमेस्वर ला देव।

²² असो आयक के उन न अचंभा करीन अना वोला सोड़के चली गईन।

मरया हुवो लक जिवनो अना बिहाव

²³ वोना दिवस सदुकी गुरुजी कव्हत होतीन का मरया हुया का जित्तो होवनो नहात, यीसु को जवर आइन अना ओला पुसिन,

²⁴ हे गुरू, मोसे गुरुजी ना कव्हयो होतिस, का अदी कोनी मानूस बंझला मर जाहेत, ता ओको भाऊ ओकी बायको लक बिहा करके, ना आपरो भाऊ को नाव लक लेकरा पैदा कर सकासे।

²⁵ अब आमरो यहान सात भाऊ होतिन, पयलो बिहा करीस अना मर गईस अना सन्तान नही होवन को काजी आपरी बायको ला आपरो भाउ लाई सोड़ गयो।

²⁶ असो तरीका लक दुजो अना तीसरो ना भी करीस अना सात गीन तकन असोच भई।

²⁷ सबच को संग वा बायको भी मर गई।

²⁸ अता जित्तो होवनो पर वा सात गीन मा लक कोन की बायको होहे? काहे की वा सबच की बायको भई गई होती।

²⁹ यीसु ना सांगिस, “तुमी पवितर गीरंथ अना परमेस्वर की ताकत ला नही जानासो एकोलाय भुल मा पड़ीसेव।

³⁰ काहे की मरयो हुयो मा लक जित्तो होवनो पर वय न ता बिहा करयेत अना न ता बिहा मा दियो जाहेत, पर सरग मा सरगदूत जसो रहेत।

³¹ पर मरयो हुया लक जित्तो होवनो, को बारे का तुमी ना यो नही बाचिसेव जोन परमेस्वर ना तुमला कहिसेस,

³² मि अबराहम, इसहाक अना याकूब को परमेस्वर सेव। उ मरयो हुया को नही पर जित्तो को परमेस्वर से।”

³³ भीड़ ना यो आयकिन ता ओको सिक्सा लक चकित भईन।

सब लक मोठी हुकूम

³⁴ जबा फरिसी गुरू ना आयकिन का यीसु ना सदुकि गीन ला उगा-मुगा कर देईसेस, ता वय एकजुट भई गइन।

³⁵ उनमा लक एक मोसे को नियम को गुरु गिनना ओला परखन लाई ओला सवाल पुसिन,

³⁶ हे गुरू सांग की पवीतर गिरंथ मा सब लक मोठी हुकूम कोनतो से?

³⁷ ओना सांगिस, तुमी आपरो पिरभु परमेस्वर लक आपरो सप्पा मन अना आपरो सप्पा आतमा अना आपरी सप्पा बुध्दि को संग माया राखजोस।

³⁸ सब लक मोठी हुकूम ता याच से।

³⁹ अना वोको जसी या दुसरी भी से की तुमी आपरो सेजारी लक आपरो जसो माया राखने।

⁴⁰ या दुही हुकूम सेत जोन सप्पा पवीतर गिरंथ अना मोसे को नियम अखीन सफा भविस्यवक्ता गीन को मूल सेत।

मसीहा को बारेमा सवाल

⁴¹ जबा फरिसी गुरू जमा गईन, ता यीसु ना उनलक पुसिस,

⁴² मसीह को बारे मा तुमी का जानासेव? उ कोन को टूरा आय? उनना कहिन का दाऊद को।

⁴³ ओना उन लक पुसिस ता दाऊद परमेस्वर को आतमा मा होयके ओला पिरभु काई लाई कव्हासे?

⁴⁴ पिरभु ना मोरो पिरभु लक कहीस, मोरो उज्जो कन बस जबा तकन की मि तोरो, बैरी गीन ला तोरो पाय को खाल्या नही कर देहुँ।

⁴⁵ भलो जबा दाऊद ओला पिरभु कव्हासे ता उ ओको टूरा कसो होहेत?

⁴⁶ एको लाई जवाब मा कोनी भी एक बात नही कहे सकीन। ओनो दिवस लक कोनी ला मंग ओको लक काही पुसन की हिम्मत नही भई।