लूका 8 - सत मारग पर चलन वारो किताब

यीसु की चेलीगिन

¹ योको मंघा उ नगर-नगर अना गाँव-गाँव परमेस्वर को राज को साजरो बारता साँगत होतो।

² अना बारा चेला भी वोका संग होत्यो, अना गजब आई-माई गीन, जोन भुत-पलित लक, अखीन बिमारी लक, साजरी भयी होतिन। अना उनको नाव यो सेत। मरियम मगदलीनी जेनको मा सात भूत होतिन।

³ अना राजा हेरोदेस को खजांची खोजा की बायको, अना योअन्ना अना सुसन्ना अना लगत आई-माई गीन होतिन, अना यो आपरो धन-माया लक, पिरभू को सेवा करत होतिन।

बीज बोवन वालो को उदाहरन

⁴ जबा, मोठि भीड़ ओको कठा एकठ्ठो भईन, अना नगर-नगर को लोक हुन जमा होवन लगीन, तबा वोना उदाहरन लक सांगिस।

⁵ एक बीज-बोवनवालो, बीज-बोवन हिटयो। बोनी करत बेरा, काही बीज रास्ता को कठा पड़यो। अना उनला बादल को पक्सी न आयके खाय लियो।

⁶ अना काही बीज चट्टान पर पड़यो अना उगयो, अखीन माटी न मिलन लक सूक गयो।

⁷ काही बीज कांटा को झाड़ को बिच मा पड़यो अना झाड़ झकड़ संग-संग बढके ना ओला दबाय देईस।

⁸ अना काही बीज साजरो जघा मा पड़यो अना उगके सौ गुना फर लायो। यो कहके ओना उचो आवाज लक कहीस, सबा ध्यान धरके आयको।

उदाहरन को काय मतलब से?

⁹ वोको चेला गीन पुसन लगीन, यो उदाहरन को काजक मतलब से? तबा वोना सांगिस,

¹⁰ “तुम ला परमेस्वर को राज को, छुपयो गोस्टी को समझाय दियो गयो से। पर परायो ला, उदाहरन लक आयकवायो जासे। एकोलाय का वय चोवकेना बिना चोवो जसो भयी जाय, अखीन आयकनो पर भी नही समजेत।”

बीज बोवन वालो उदाहरन को मतलब

¹¹ उदाहरन को मतलब असो से, बीज तो परमेस्वर को गोस्टी से।

¹² “रास्ता को किनार का बीज वय सेती। जोना आयकीस, तबा बालजबूल उनको मन लक, गोस्टी उचल ले जासे। कही असो नाहती की भरोसा राखेत, अना साजरो बिस्वास लक सूटकारा मिल जाये।

¹³ चट्टान मा पड़ियो बीज वय सेत, जोन परमेस्वर को गोस्टी ला खुसी-खुसी लक आयकासेव सेत, अना मानन लगासे। पर उथलो भरोसा राखासे, काहेका उनमा जड़ नही रव्हासे, अखीन परिक्सा को बेरा मा सब भरोसा खतम होय जासे।

¹⁴ जोन बीज कांटा को झाड़ पर पड़ासे, उ वय लोग सेत, जोन परमेस्वर को गोस्टी ला, आयकन पर, पयले धन-माया की चिंता, रोज को जिंदगी को सुक, लोभ-माया को कारन, उन मा फर नही लगासे।

¹⁵ साजरी जघा पर पड़ियो हुयो बीज, वय लोक होत्यो, जोन गोस्टी ला आयक केना, वोना बिचारीस, अखीन साजरो मन लक, अपनावसेत, अना धिरज लक फर आनासे।”

फूला पर दियो

¹⁶ दियो पेटावनो को मंघा, बरतन लक नही ढाकासे, अखीन ना खाट को खाल्या ठेवासे। मंघ फूल मा राखसेत, का भीतर अवन वालो ला, उजाड़ो दिसेत।

¹⁷ काही, लुको नहात, जोन उघाड़ो ना जाहेत, अखीन उ सबला दिसेत, अखीन काही लुकयो नहात, जोन सबला ना दिसेत।

¹⁸ “एको लाय होसियार रव्हो, का तुमी काजक आयकसेव? काहेका जेनको जवर सेत, वोला अखीन दियो जाहेत। अखीन जेनको जवर नहात, पर जोन सेत, उ सप्पा ले लियो जाहेत, जोनला वो आपरो समजासे।”

यीसु की माय अखीन भाऊ

¹⁹ वोको भाऊ, अखीन माय, वोको जवर आइन। पर भिड को कारन लक, यीसु लक, नही मिल सकिन।

²⁰ कोनी ना सांगिस का, “तोरो माय अखीन भाऊ, बाहेर उभो सेत, वय भेंट करन आइसेस।”

²¹ वोना फट ने जवाब देईस, मोरी माय अखीन भाऊ वोच से, जोन परमेस्वर को गोस्टी आयका सेत, अखीन मानासेत।

यीसु आँधड़ गरड़ ला सान्त करासे

²² अना एक दिवस यीसु, अखीन वोको चेला, डोंगा पर चढिन। वोना अपरो चेला लक कहीस, “आव हमी झिल को वोना गन जाबिन।” अना वोना नाव ला खोल देईन।

²³ जबा नाव चलन लगी, तो यीसु झोप गयो, तबा झिल मा आँधड़ चली, अना डोंगा पानी मा, बुड़न लगयो। अना वय संकट मा पड़ गेईन।

²⁴ तबा उनना, जवर आयके वोला जगाईन, अना कव्हयो, मालीक-मालीक हमी नास भई जाबिन, तबा वोना, आँधड़ अखीन पानी ला डटकार के हुकूम देइस, अखीन आँधड़ थम गयो, अना उनको मन मा, सुकुन आयो।

²⁵ तबा वोना उनला कहीस, “कसो, तुमरो भरोसा कहांन से?” अना वय डराय गयो होतीन, अना चकित होय के कव्हन लगीन “उ कोन आय जोकी हुकूम पानी अना आँधड़ भी मान सेती।”

भूत झोमयो मानूस ला साजरो करनो

²⁶ अना वय गिरोसेनियो नाव को देस मा पहुचीन। जोन ओनागन गलील परदेस को पुढा मा से।

²⁷ जबा व डोंगा लक खालया मा उतरियो, तो उ नगर मा एक मानूस होतो। जेनको मा भूत-पलित धसी होतीन। उ बिना कपरा को रव्हत होतो, न तो घर मा रव्हत होतो, उ मरघट्टी को जघा मा रहोत होत्यो।

²⁸ व यीसु ला चोवयो, तो चिलवन लग्यो, अना ओको पुढा मा, पड़यो, अना उच्चो आवाज लक कव्हन लग्यो। “ओ मोठो, परमेस्वर को टूरा यीसु! मोला तोरो लक का काम से? तोरो लक बिनती करासू, मोला दुख नोको दे।”

²⁹ काहेका उ भूत-पलित ला हिटन को हुकूम देवत होतो। व ओला घड़ी-घड़ी झूमत होतो अना ओला साँकल अना बेड़ी मा बांधत होतिन, पर उ बंधन ला पटा-पट तोड़ देत होतो। अना जंगल मा भागतो फिरतो रहोत होतो।

³⁰ यीसु न ओको लक पुसीस की, तोरो काजक नाव से। वोना सांगिस, मोरो नाव सार संगाड़ से, काहेका वोको भितर मा, लगत सारी बुरो आतमा होती।

³¹ वोना बिनती करीस हमला नरक मा जावन को हुकूम नोको देव।

³² वहान, पहाड मा खालमानी को एक मोठो करप चर रहयो होतो। एको लाय उनना, ओको लक बिनती करीन, हमला उनमा धसन देव। यीसु ना कहीस जाय!

³³ तबा भूत-पलित ओनो मानूस लक हिटके, खालमानी मा धस गईन। अना हेड जोर लक झपटयो, अना झिल मा जायके बुड़ गयीन, अना मर गयीन।

³⁴ तबा चरानवारा गीन, असो कान्ड चोय के पारय गेईन। अना नगर मा जाय के सबला सांगिन।

³⁵ लोग यो चोवन, लाई यीसु को कठा आइन, अखीन उ भुत वालो मानूस ला चोवके ना भेव मा पड़ गईन। काहेका उ मानूस कपरा घाल केना सान्त यीसु को कठा बस्यो होतो।

³⁶ अना चोवनवारा गीनना उनला सांगीन का भुत लक झोमयो हुयो मानूस कसो रिति लक साजरो भयी से।

³⁷ तबा गिरोसेनियो छेतर को आखा-पाखा को लोकगीन, बिनती करन लगीन, तुम्ही यहान लक चली जाव, काहे का लोग गजब भेव मा पड गई होतीन। यीसु नाव मा चघ के ना लवट गयो।

³⁸ जोन मानूस लक बुरो आतमा हिटी होती। उ यीसु लक बिनती करके कव्हन लग्यो, मोला आपरो सँगा रव्हन दे। तबा

³⁹ यीसु ना कव्हयो, “का तु घर जाय, अखीन लोकगीन ला सांगजो, का परमेस्वर ना तोरो लाय, काजक-काजक काम करीसेस।” उ चले गयो अखीन सबा, नगर-नगर मा, यो गोस्टी ला परचार करन लग्यो। का यीसु ना मोरो लाय कसो मोठो काम करयो से।

याईर की मरी टूरी अना धोवा को रोगी बायका

⁴⁰ जबा यीसु लवट गयो, तबा लोग गीन वोको मान करीन, काहे का सबा वोको बाट जोहत होतीन।

⁴¹ वोना बेरा सभाघर मा, याईर नाव को एक मुखिया आयो। अखीन यीसु को पाव पड़के, ना बिनती करन लग्यो, का मोरो घर चल,

⁴² काहेका वोकी एकच टूरी होती। वोको, उमर 12 साल होति, व आखीर सांस लेवत होति। यीसु वोको संग जावन लग्यो। रस्ता मा भीड़, यीसु ला, दबान लगीन।

⁴³ एक बायको बारा बरस लक लाल धोवा को बीमारी लक, परेसान होती, वा साजरो होवन को लायक भी नहोती। वा आपरो सबा धन, बैद को जवर, इलाज मा लगा देयि होती, पर उ साजरो नही भई।

⁴⁴ वा आयके ना, कपरा को छोर ला, छिव लेयी, अखीन वोको रकत बहनो, बंद भई गई।

⁴⁵ तबा यीसु ना कव्हयो, “मोला कोन छिवी से?” सबको मना करन को मघा, पतरस ना कव्हयो, “गुरूजी, तुम्ही भीड़ लक घिरोसव, अखीन भीड़ तोरो पर पड़ासे।”

⁴⁶ यीसु ना कव्हयो, “कोनी ना जरुर मोला छिवी सेस, काहे का मी ना समज गई सेव, का मोरो लक, साजरो होवन वालो ताकत हिटी से।”

⁴⁷ तबा वा बायको ना चोयी, का मी लुक नही सकसू, तबा थरथारान लगी, यीसु को पाय पड़के ना, सब लोकगीन को पूढा सांगन लगी, का काहे छिवीसेव, अखीन उ कसो साजरो भई गई।

⁴⁸ यीसु ना वोला कव्हयो “बेटी, तोरो भरोसा ना तोला साजरो करीसेस। तू सान्ती लक घर जाय।”

⁴⁹ यीसु साँगत होत्यो, तबच उ सभाघर को मुखिया लक एक मानूस आयो। अखीन कव्हयो, “तोरी टूरी मर गई, तु गुरूजी ला सांग दे।”

⁵⁰ यो आयक के, यीसु न कव्हयो, “भेव नोको खाय, भरोसा राख, उ साजरो भई जाहेती।”

⁵¹ जब यीसु याईर को घर मा, पहुचयो। तो वोना पतरस योहन अना याकूब, अखीन टूरी को माय-बाबूजी को सीवा कोनी ला भीतर नही, आवन दियो।

⁵² सब रड़त होतीन, यीसु ना कहेयो “नोको रडो, यो मरी नहाति, पर जप मा से।”

⁵³ लोकगीन यीसु को मजाक उडावन लगीन, काहेका, सब जानत होतीन। का वा मर गईसे।

⁵⁴ यीसु ना टूरी को हाथ धरके ना कव्हयो, टूरी उठ ओ।

⁵⁵ तबा टूरी को जीव लवट के आई गई, अखीन उ जाग के ना बस गई। यीसु न कव्हयो, एला काही जेवन देव।

⁵⁶ वाको माय-बाबूजी चकीत भई गईन। पर यीसु न कव्हयो, यो चरचा कोनीला नोको सागजोस।