लूका 7 - सत मारग पर चलन वारो किताब

सुबेदार को भरोसा

¹ जबा उ लोग गीन ला, गजब सी गोस्टी सांग चुकयो तबा कफरनहुम नगर मा आयो।

² वहान एक सूबेदार को, एक नौकर बिमारी लक, मरन वालो होतो। सुबेदार वोला गजब चाव्हत होत्यो।

³ यीसु की गोस्टी ला आयक के, सुबेदार यहूदिगीन आपरा सयानो गीनला, अना कई नावी मानूस, ला यीसु को जवर, बिनती करन धाड़िन, का जायके वोको नौकर ला बचाय लेय।

⁴ गुरू गीन यीसु को कठा आइन, अखीन बिनती करके कव्हन लगीन। उ सूबेदार यो काबील सेत, का वोको नौकर ला, तू साजरो कर दे।

⁵ काहे का, यो सभाघर ला वोच ना बनवाइसेस। अना उ आमरो लोक गीन लक माया राखासे।

⁶ यीसु उनको, संग-संग गयो, वय वोको, घर को, कठा पहुचयो होतिन, सुबेदार ना आपरो संगी गीनको जवर, यीसु को लाय यो खबर धाडीस। पिरभू दुख नोको उठावस, काहेकी, मी यो काबिल नही सेव, का तुमी मोरो छत मा आव।

⁷ एको काजी मी तोरो कठा नही आईसेव, पर तू वहाँच लक हुकूम दे, अना मोरो दास साजरो भय जाहेत।

⁸ मी खुदच सरकारी अधिकारी सेव। अना सिपाई मोरो हात को खाल्या सेत, अना जबा मी, एक ला कव्हसू, तु जाय, तो उ जासे अना दूसरो ला कव्हासू तू आव तो उ आवासे। अखीन अपरो दास ला कव्हासू का तु यो कर त उ करासे।

⁹ यो आयक के यीसु ला अचंभा भयो, वोना आपरो मंघा आवन वालो ला कव्हयो, असो भरोसा ठेवन वालो मी, इसरायल लोक मा नही चोवीसेव।

¹⁰ अना खबरिया, जबा घर मा आइन, तबा उ दास सजरो भय गयो होतो।

बेवा बायको को टूरा ला जित्तो करनो

¹¹ काही दिवस को मंघा, यीसु नाईन नाव को नगर मा गयो। गजब जनता, अखीन चेला गीन वोको संगमा होतिन।

¹² जब वय नगर मा भीतर धसन को जघा मा गयीन, तब लोक साकोली मा एक लास बाहेर ले जावत होतीन। उ आपरो माय को एकच टूरा होतो, अना वोकी माय बेवा होती, नगर को लगत जनता वोको संग होतीन।

¹³ वोला चोवके यीसु पिरभू दया लक भर गयो, अखीन वोको लक काहीस, रड़स नोको

¹⁴ तबा वोना जवर आयके सकोली ला छिइस अखीन उचलन वारा उभो भईन। तबा वोना कव्हासे ओ जुवान तोला कव्हसू का उठ जाय,

¹⁵ तबा मुरदा जाग के ना बस गयो, अखीन वोना वोकी माय ला सोप देइस।

¹⁶ यो चोवके सबा डराय गईन, अउर वय, परमेस्वर को बड़ाई करके कव्हन लगीन, का हमारो बिच मा एक मोठयो भविस्यवक्ता आईसे, अखीन परमेस्वर आपरो लोक-बाग गीन पर किरपा करीसेस।

¹⁷ अना ओको बारे मा यो गोस्टी सप्पा यहुदिया अना अगल-बगल को सब देस मा फैल गयो।

योहन बप्तिस्मा देवनवारा को सवाल

¹⁸ योहन को चेला गीन, यो गोस्टी वोला सांगिन।

¹⁹ तबा योहन आपरो चेला मा लक दोन ला, यीसु पिरभू को कठा, यो पूसन ला धाड़िस, का आवनवालो तू च आस? का दुसरो सेत, हमि वोको बाट चोयबीन।

²⁰ तबा वय लोक ओको जवर आवा सेत ता उनना कहिन योहन बप्तिस्मा देन वालो यो कव्हके पूसन ला धाड़िसेस। “का आवनवालो तू च आस, का अखीन कोनी सेत?”

²¹ ओना बेरा, ओना गजब बिमार ला दया लक साजरो करीस, अँधरा गीनको डोरा उघाड़ो, अना भूत-पलीत ला भगायो।

²² वोना उनलक कहीस, जोन काही तुम्ही ना चोवीसेव, अखीन आइकू सेव, जायके योहन लक साँगने का, अँधरा चोवा से, लंगडा हिडंसे, कोढी साजरो होवासे, बहेरा आयकासेत, मरयो हुयो जित्तो होवासे, अखीन गरिब गोर गीनला, परमेस्वर को साजरो बारता सांगासेत।

²³ अना धन्य “किस्मत वारा से” उ जोन मोरो बारे मा ठोकर ना खाय।,

²⁴ जबा योहन को चेला चले गइन, त यीसु योहन को बारे मा लोग गीन ला संगिस, “तुमी जंगल मा का चोवन गयो होतो? का हवा लक हिलतो, झाड़-झड़ुला ला।

²⁵ तुमी का चोवन गयो होतो? का नरम कपरा पहरो हुवो मानूस ला, जोन सजरा कपरा पहिरिसेस, अना सुख लक रव्हसे? उ महीमा लक राज दरबार मा रव्हसे।

²⁶ तबा तुमी का चोवन ला गयो होतो, का कोनी भविस्यवक्ता ला? मि तुमरो लक कव्हसु, उ भविस्यवक्ता लक मोठो सेत।

²⁷ यो वोच से जेनको बारे मा लिखिसे, चोव मी, आपरो दूत ला, तोरो पूढ़ा-पूढ़ा धाड़सु, जो तोरो पूढ़ा लक रस्ता सीधो करयेत।

²⁸ मि तुमी ला कव्हसू, जोन बायको लक जलमो से, उनमा कोनी योहन लक मोठो नहात। पर जोन परमेस्वर को राज मा, सबा लक नाहनो सेत, उ योहन लक मोठो सेत।”

²⁹ सबा जनता अखीन जमा लेवन वारा अधिकारी गीन, जबा यो आयकिन तो, उनना योहन को बप्तिस्मा लेवन को कारन, परमेस्वर को न्यायीपन ला खरो मान लेईन।

³⁰ अखीन धरमगुरू अना मोसे को नियम को गुरू ना, वोको बप्तिस्मा नही लेइन, अखीन परमेस्वर ना उनको लाय, जोन तरकिब हेड़ो होतो, वोला नापास कर देईन।

³¹ यीसु ना कव्हयो, अता मी, यो जुग को लोकगीन ला, कोनी को जसो समझू, यो कोनी को समान सेत?

³² वय वोना टूरागिन को जसो से, जो हाट मा बस्यो एक दुसरो लक हाकलके कव्हासे, अमीना तुमरो लाय बंसरी बजाया, अखीन तुमी नही नाचिसेउ, हमी दुखी भयी सेजन, अखीन तुमी नही रड़ीसेव।

³³ योहन बप्तिस्मा देवन वालो कभी जेवन नही जेवो, न कभी दारू पिविस, मंग तुमीना कव्हयो, एको मा बालजबुल से।

³⁴ मानूस को टूरा जेवन करतो अना पिवतो आयो सेत अना तुम्ही कव्हसो चोवो, यो मानूस कसो अघोरी सेत? यो तो, बरगन लेवन वारा पापी गिनको संगी सेत।

³⁵ पर परमेस्वर की अक्कल अपरो सबा परजा को लक खरो दिसाईसेस।

फरीसी को घरमा पापनी बायको ला छिमा करनो

³⁶ कोनी मोसे को नियम को गुरू न बिनती करीस, की मोरो संग जेवन कर, तबा धरमगुरू को संग, ठाव मा बस्यो।

³⁷ नगर मा एक पापी बायको होति। वोला पता चलयो, का यीसु मोसे को नियम को गुरू को घर मा जेवन ला बसीसे, वहान वोना एक सीसी मा इतर आनिस।

³⁸ अखीन रड़त-रड़त यीसु को पाय को जवर उभी भई, अना अपरो आसूँ लक, ओको पाय ला धोवन लगी, अखीन अपरो चुन्दी लक पाय ला पोछन लगी। अना पाय को चुम्मा लेवन लगी, अना इतर ला मलन लगी।

³⁹ जोन मोसे को नियम को गुरू यीसु ला निवता देई होतिस, असो चोवके! मन च मा कव्हन लग्यो “यदि यो मानूस भविस्यवक्ता होतो तो जान लेतो का यो बायको कसी से अना काजक करासे? काहे की वातो पापी होती।”

⁴⁰ वोको मन को बिचार जान के यीसु वोला कव्हयो ओ सिमोन! मि तोला काही कव्हनो चाव्हसू। वोना जवाब देइस गुरूजि सांगो।

⁴¹ तबा यीसु न कहीस, कोनी साउकार का दुई करजदार होतिन, एक पाँच सौ दीनार, अना दुजो पचास दीनार लेई होतिस।

⁴² उनको जवर काही पटावन ला नही होतो। तो उ साउकार ना उनको करजा छिमा कर देईस। वोना दुई मा कोनी साउकार लक लगत माया करयेत।

⁴³ सिमोन ना उत्तर दियो, मोरो समज मा मी तय करासू वोच से, जोनला लगत दे दियो गयो से। वोना वोको लक कहीस, की तु साजरो कव्हासेस।

⁴⁴ अना वोनो बायको कन मुरकके, सिमोन ला सांगिस, का तु या बायको ला चोयोसेस, मि तोरो घर मा आयो, पर तु मोरो पाय धोवन लाई पानी नही देईस। पर या बायको, मोरो पाय ला आसूँ लक भिगोय के, अपरो चुन्दी लक पोछिसेस।

⁴⁵ तुना मोला चूमा नही देईस, पर जबा लक मि आईसेऊ, या मोरो पाय ला चुमनो नही छोड़िस।

⁴⁶ तुना डोस्का पर जैतून तेल लगावन नही देईस, पर येना मोरो पाय मा इतर मलन लगी।

⁴⁷ येको लाय मि तोला सांगसु, या बायको को लगत पाप, छिमा भई सेति। काहेका यो मोरो लक, लगत माया करासे। पर जेनको जरासो छिमा भयोसे, वा जरासो माया करासे।

⁴⁸ तबा यीसु वोना बायको ला कहीस, आव बाया जाय तोरो पाप छिमा भय गई सेति।

⁴⁹ तबा जोन, यीसु को संग जेवन लाय बसाया होतीन। वय बिचारन लगीन यो कोन से? जो पाप ला छिमा करासे।

⁵⁰ तबा यीसु न वा बायको लक कहीस, तोला तोरो बिस्वास साजरो मोक्स देइसेस, तु सान्ती लक घर जाय।