लूका 6 - सत मारग पर चलन वारो किताब

बिसराम दिवस को सवाल

¹ तबा यीसु अखीन वोको चेला गीन, पवीतर दिवस मा, एक खेत मा लक जावत होतो। आखिन वोको चेला गीन, सेंग तोडके, अना हात लक मल के, जेवत-जेवत जावत होतीन।

² तबा मोसे को नियम को गुरू मा, काही कव्हन लगीन, मोसे को नियम लक जोन काम पवीतर दिवस मा, करनो मनाहिसेत, तुमी वोच काम कायलाय करोसो।

³ मंग यीसु न उनला जवाब देइस, का तुमीना यो नही बाचिसेव? दाऊद राजा अखीन वोको संगी गीनला, जबा भूख लग्यो होतो। तबा वय का करीन?

⁴ वय परमेस्वर को घर मा गईन, अना भेंट की भाखर ला आन के, अपरो संगीगिन सगं जेविन, जोनला मोसे को नियम लक याजक ला सोड़के, कोनी ला जेवन करनो खरो नहात।

⁵ अखीन वोना उनला सांग्यो, मानूस को टूरा पवीतर दिवस को भी पिरभू सेत।

सुकयो हात वालो ला साजरो करनो

⁶ एक बेरा यीसु, पवीतर दिवस सभाघर मा जायके, सिक्सा देवन लगयो। अना वहान एक मानूस होतो, जेनको उज्जो हात सूकयो होतो।

⁷ मोसे को नियम को गुरू आना धरमगुरू, एना गोस्टी को तक्का मा होतीन, की अदी यीसु पवीतर दिवस मा साजरो करासे, ता वय ओको पर दोस लगाय सकसेत।

⁸ यीसु उनको मन को विचार जानत होतो, येको लाय वोना सुक्को हातवालो मानूस ला कहीस, बीच मा उभो होय जाय! तब उ उठ के उभो भय गयो।

⁹ यीसु ना उनला कव्हयो, मि तुमी लक पुससू मोसे को नियम लक पवीतर दिवस मा भलो करनो साजरो से का खोटो से? जान बचानो या जान ला लेवनो?

¹⁰ तबा वोना इता-उता सबला चोवीस, अना मानूस लक कहीस, अपरो हात बढ़ाव, वोना वसोच करीस अखीन वोको हात जसो को तसोच साजरो भई गयो।

¹¹ वय लोग गीन गजब गुस्सा भय गईन, अना आपसी मा बिचार करन लगीन, का हमी यीसु को संग मा का करबीन?

बारा चेला गीन ला निवाड़नो

¹² यीसु वोना दिवस मा पहाड़ी मा पिराथना करन गयो, अना परमेस्वर लक पिराथना करनो मा पूरी रात बिताइस।

¹³ जबा दिवस भयो तो वोना अपरो, चेला गीनला हाकल के ओमा लक बारा चेला गीनला निवाड़ो, अखीन उनला पेरीत कहीस।

¹⁴ अना वय यो सेत, समोन जेनको नाव, वोना पतरस राखीस। अखीन वोको भाऊ अन्दिरयास, अना याकूब, अना योहन, अना फिलिप्पुस, आना बरतुल्मै।

¹⁵ अना मत्ती, अना थोमा, आना हलफई को टूरा याकूब अना सिमोन ला जोन धरमोत्साही कहलावासेत,

¹⁶ याकूब को टूरा यहूदा अना युदस इस्करियोति ला जोन बिन भरोसावालो होतो, जेना यीसु ला धरवायो भी होतियो।

सिक्सा देनो अना साजरो करनो

¹⁷ तबा यीसु उनको संगा मा, खाल्या आयके, बर्रा मा उभो भयो। अना वोको चेलागीन, अना जनता को गरदि, सप्पा यहुदिया छेतर, येरुसलेम नगर, आना सूर अना सैदा, सागर को जवर लक लगत सा लोक,

¹⁸ जसो की वोको आयकन वारा, आपरी बीमारी लक, साजरो होवन लाय, वोको कठा आइन। वय भुत-पलित लक भुकतन वारा, लोकगीन ला साजरो करत होतो।

¹⁹ सबा लोकगीन यीसुला छिवन को कोसीस करत होतिन, काहेका वोको लक ताकत हिटके ना, सबला साजरो करत होतो।

आसीरवाद अना सोक गोस्टी

²⁰ यीसु ना आपरो चेला गीन, को कना चोवयो, अना यो कहीस, “धन्य सेव तुमी जो गरिब सेव काहेका, परमेस्वर को राज तुमरोच सेत।”

²¹ धन्य सेव तुम्ही जोन भुखो सेव, काहेका तुमी अघाय जाहो। धन्य सेव तुमी, अबा रोवसो काहेका तुमला हसनो पड़हेत।

²² धन्य सेव तुमी जबा मानूस को टूरा को कारन लक लोक तुमरो लक बुराई करे, अना तुम ला हेड देहेत, आना तुमरो निंदा करते, अखीन तुमरो नाव ला बुरो जानके काप देहेत।

²³ वोच दिवस खुसी होवने, अखीन खुसहाली मनाने काहेका, सरग मा मोठो फर सेत, उनको आजा पुरखा भविस्यवक्ता गीनको संग, असोच करयो सेत।

²⁴ अखीन हाय तुमरो पर जोकी धनवान सेव, येको लाय तुमी आपरो सान्ती पाय गयो सेव।

²⁵ धिक्कार सेत “तुमरो पर, अता अघाय सेव, काहेका तुम, ला भुखो रव्हनो पडे़त।” धिक्कार सेत तुमला, जोन अबा हासोसेव काहेका, तुमला रोवनो अखीन दुख मनानो पड़हेत।

²⁶ धिक्कार से जबा मानूस तुमला भला कहेत, काहेकि उनको बाप-आजा ना, भी खोटो भविस्यवक्ता गीनको सँगा असोच बरताव करयो होतीन।

बयरी लक माया

²⁷ पर मि तुमी आयकन वारा गिनला कहुँसू आपरो बैरी गीन लक माया राखो, जोन तुमरो लक बैर राखासे, उनको भलाई करो।

²⁸ तुम ला जोन सराप देवासे उनला आसीस देव। जो तुमरो बेईज्जति करासे, उनको लाय पिराथना करो।

²⁹ अना तोरो एक गाल मा झापड़ मारासे तबा दुसरो गाल ला भि देदे। जोन तोरी पचिया ला हिसकवासे वोला झंगा भी देदे।

³⁰ जोन कोनी तोरो लक मांगासे, वोला देवने, अखीन जो चिज ला हिसकासे वोको लक नोको मागंने।

³¹ जसो तुमी चाव्हासेव का लोग गीन तुमरो संग करेत, तुमी भि उनको संग मा वसोच करो।

³² अखीन तुमी आपरो चाव्हन वालो को संग मा माया राखासेव, ओमा का बड़ाई से? काहे की पापी गीन भी आपरो चाव्हन वालो को संग मा असोच करासे।

³³ अखीन तुमी आपरो भलो करन वालो संग मा, भलो करासो, असो मा तुमरो का बड़ाई से? काहे की पापी भी असोच करासे।

³⁴ जोन लक मिलन को भरोसा ठेवा सो उनला उधार देवासो, तो तुमरो काजक बड़ाई से? काहेकी पापी भी सबला, उधारी देव से। क मंग वोतरोच पाय सके।

³⁵ पर मिले न नोको मिले, पर माँगन वालो ला उधारी देव, यो तुमरो लाय मोठो फर होयेत। अना तुम्ही परमेस्वर को, टूरा-टूरी कहलाने, काहे की जोन परमेस्वर ला नही मानासे, अखीन बुरो भी सेत, ओको पर भी, परमेस्वर भलो सेत। अना आपरो सतरु लक, माया करो।

³⁶ जसो परमेस्वर दयालू से, वसोच तुमी दयालु बनो।

दोस नोको लगाव

³⁷ तुम्हि न्याय नोको करो अना “नोको बोट उठाव, नही तो तुमरो पर भी उठायो जाहेत।” छिमा देदो, तो तुमला भी छिमा कर दियो जाहेत।

³⁸ देवो तो तुमला भी दियो जाहेत, लोकगीन ठुस-ठुस के गजब, तुमरो आचर मा डाखेत। काहेकि जोन नाप लक तुम नापिसेव, वोच लक तुमरो लाय नापयो जाहेत।

³⁹ मंग वोना उनला यो हाना डाखिस, “का अँधरा-अँधरा ला रस्ता चोवाय सकासे? दुई खोदरा मा पड़ जाहेत।”

⁴⁰ का चेला आपरो गुरूले मोठो होयेत, नही, आपरो गुरू को जसो भई जाहेत योच लगत से।

⁴¹ तु आपरो भाऊ को डोरा मा तिनका, काय लइ चोवासेस, पयले आपरो डोरा मा को लठ्ठा नही चोवसे।

⁴² जबा तोला आपरो डोरा को, लठ्ठा नही चोवासे, तबा आपरो भाऊ ला कसो कह सकसे? अगा भाउ, रव्हजोस, तोरो डोराको तिनका हेड़देसू। अगा कपटी पयले, आपरो डोरा लक लट्टा हेड, तबा, आपरो भाऊ को डोरा मा लक, तिनका हेड़न काजी, साजरो लक चोवजोस।

जसो झाड़ वसोच फर

⁴³ असो साजरो झाड़ नोहोय जेव निकम्मो फर आनेत, अखीन असो नोहोय का निकम्मा झाड़ सजरो फर आनेत।

⁴⁴ अना सप्पा झाड़ अपरो फर लक चिन्हो जासेत काहेका लोग गीन झाड़ी मा लक अँजीर नही तोड़त अखीन कांटा को झाड़ लक अंगूर नही तोड़ासेत।

⁴⁵ साजरो मानूस अपरो मन को साजरा पेटखोली लक सजरो गोस्टी हेड़ासे अना बुरो मानूस अपरो आतमा को पेटखोली लक बुरी- बुरी गोस्टी हेड़ासेस काय की जेनो आतमा मा ठुसीसे वाच वोको टोंड पर अवासे।

घर बनावनवारा दुई मानूस

⁴⁶ जबा तुमी मोरो कव्हनो नही मानो ता कायलाय मोला हे पिरभू, हे पिरभू! कव्हसो

⁴⁷ जोन मोरो जवर आवासे अखीन मोरी गोस्टी आयकासे वोला मी ओरखूसु अना मी तुमला सांगसू का उ कोन को जसो से।

⁴⁸ उ वोनो मानूस को जसो से जोन घर बनावतो बेरा मा धरती ला खोदकर गहेरी करके ना वोना चट्टान मा पाया डाकीस अखीन जबा पूरा को धार वोना घर मा लगी अना वोनो घर ला नही हलाय सकीस काहेकी उ घर पक्को बनयो होतो।

⁴⁹ पर जोन आयक के नही मानसे उ मानूस वोको जसो से जोन चट्टान मा पाया खोदन को जघा जमीन मा बिना पाया को घर बनावासे अना जबा पूर आवासे, त वोको घर नास भय जासे।