लूका 11 - सत मारग पर चलन वारो किताब

यीसु चेलागिन ला पिराथना सिकानो

¹ यीसु कोनी जघा मा, पिराथना करत होतो। जबा पिराथना पूरो भयो, तो वोको चेला गीन मा, एक ना कव्हयो, पिरभू योहन गुरूजि ना, आपरो चेला गिनला, जसो पिराथना सिकाइसेस, वसोच अमीला पिराथना करनो सिकाव।

² वोना कव्हयो जबा तु पिराथना करने, तो असो कव्हने, हे, आमरो बाबूजी तोरो नाव पवीतर मानो जाहेत, तोरो राज आहेत।

³ अमरो दिवस भर को जेवन, अमीला देव।

⁴ हमिना जसो हरेक बुराई करनवालो ला, छिमा करीसेजन वसोच, आमरो बुराई ला छिमा कर, अखीन हमीला परिक्सा मा नोको डाख।

पिराथना को बारेमा यीसु को सिक्सा

⁵ तबा यीसु ना, उन लक कव्हयो, तुम्ही मा लक कोन सेत। वोको एक संगी अरधो रात मा, जायके वोला कहे, मोला तीन भाकर देव,

⁶ मोरो घर मा संगी आइसे। वोला जेवन परसन लाय, काही नाहत।

⁷ उ भीतर लक कव्हन लग्यो, मोला दुख नोको देव, किवाड़ बंद से, अखीन लेकरा-बारा झोपीसेस। यो काजी बिछोना लक जाग के ना, काही नही दे सकसू।

⁸ मी तुम्हिला सागंसू, का उ टोन्ड फोड के मांगीसेस, यो काजी जेतरो जरुरत से, वोको संगी वोला जरुर देहेत।

⁹ अखीन मी सांगसू, क मांगजोस तबा दियो जाहेत, ढुढने, पावने, किवाड़ खटखटाने, तो उघाडो, जाहेत।

¹⁰ काहेका जो कोनी मांगा से, वोला भेटासे। अखीन जो ढुढासे, उ पावासे, अखीन जोन खटखटासे वोको काजी किवाड़ उघाड़ासे।

¹¹ तुम्ही मा कोनतो आसो बाबूजी से, जबा टूरा भाकर मांगहे, त वोला गोटा दे देहे, मसरी मांगहे, त सरप दे देहेत।

¹² ना डिम, मांगेत तो मेहदल देहेत।

¹³ अता जबा तुम्ही बुरो होयके, आपरो लेकरा बारो-ला, साजरो चीज देवनो जानासो, तो सरग को बाबूजी, परमेस्वर आपरो मांगन वालो ला, पवीतर आतमा काहे नही देहेत।

यीसु अना सैतान को बालजबुल

¹⁴ मंग वोना, एक गुंगो बुरो आतमा ला कहाड़िस। जबा उ बुरो आतमा हिट गयो तो, गुंगो हाका देवन लगयो, अखीन लोकगीन चकित भई गईन।

¹⁵ पर काही लोग गीन कव्हन लगीन, का, यो बुरो आतमा को मुखिया, बालजबुल को सहायता लक बुरो आतमा ला हेड़ासे।

¹⁶ काही लोग गीन वोको परिक्सा लेवन काजी, बादल लक निसान मांगन लगीन।

¹⁷ उनको मन को बात जानके ना, यीसु कव्हन लगयो, जोन राज मा फुट पड़ जासे, उ सत्यानास हो जासे, अना जोन घरमा फुट पड़ जासे उ नास होवजासे।

¹⁸ अदी बालजबुल आपरो विरोध करयेत, तो वोको राज कसो बनो रहेत? काहेका, तुम्ही कव्हसो का, मि सैतान को सहयाता लक बुरो आतमा हेड़ासु।

¹⁹ अदी मि बालजबुल की सहायता लक बुरो आतमा ला हेड़ासेत तबा तूमी तय करो, तुमरो औलाद कोनी को साहयता लक हेड़ासेत? एकोलाय वोच तुमरो न्याय करयेत।

²⁰ पर अदी मि परमेस्वर को ताकत लक बुरो आतमा हेडासु, तो परमेस्वर को राज तुम्हारो कठा आईसेस।

²¹ जबा कोनी ताकतवर मानूस, हतियार बान्ध लेवासे अना आपरो घर को चौकीदारी आँगन मा कर रहयो से, तो धन को सुरक्सा को चिन्ता नही रव्हासे।

²² पर कोनी मोठयो पहलवान चढ़ाई करके, वोको हतियार जोनमा वोला भरोसा होतो वोला हिसकसे, अखीन वोको सम्पती लुटा से, अखीन बाट देवासे।

²³ जोन मोरो संग नहात, उ मोरो बिरोध मा सेत, अखीन जो मोरो संग नही सेत, उ बटोरनो सोड़ केना, छितरावा सेत।

अधूरो चँगाई लक मुसीबत

²⁴ जबा भूत पलीत, मानूस लक हीट जावासे, अखीन सूखो जमीन मा, चैन नही मिलासे। तो, उ जहान लक हिटयो से, वहान लक जावासे।

²⁵ अखीन आके आपरो घरला, झाड़ो बोहरो, सजो पावासे।

²⁶ ता उ जायकेना, अपरो लक सात बुरो आतमा ला, आपरो सगं ले आवासे, अखीन वय वो मा समाके बास करासेत। अखीन उ मानूस को हाल, मंघा पूढा लक बूरो भई जासे।

साजरो कोन से?

²⁷ जबा उ यो गोस्टी सांग रहयो होतो, तबा भीड़ मा लक, एक बाई ना जोर लक हाकलीस। धन्य से उ पोट, जेनको लक तू जनम लेइसेस। अखीन जोन माय को दूध पीवी सेस।

²⁸ यीसु ना कव्हयो, हाँ पर धन्य सेत उ, जोन परमेस्वर को गोस्टी आयक के, वोला मानसे।

भविस्यवक्ता योना को निसान

²⁹ जब गजब भीड़ हो लोक होत्यो तो, उ कव्हन लग्यो, यो जूग को लोक गीन खोटो सेत, उ हिदान ढुन्ड़ासे, पर योना भविस्यवक्ता को हिदान ला सोड़, अखीन कोनी हिदान, उनला नही दियो जाहेत।

³⁰ जसो योना भविस्यवक्ता, निनवे माहानगर को लोग गिनको लाय, एक हिदान बन गयो होतो। वसोच मानूस को टूरा, यो पीढ़ी काजी हिदान सेव।

³¹ न्याय को दिवस, दक्सिन देस को महारानी, यो पीढ़ी को लोग गीन संग मा, उभी होयती, अखीन इनला खोटो ठहराय देहेत। काहेका, उ राजा सुलेमान को अक्ल को, गोस्टी आयकन काजी, धरती को छोर लक आई होति। अखीन चोवो मि वोको लक महान सेव,

³² न्याय को दिवस, निनवे नगर को लोकगीन, यो पीढ़ी को लोकगीन संग उभो होहेत, अना इनला दोसी मानेत, काहेका उनना, योना भविस्यवक्ता को संदेसा आयकके ना पस्तावा करयो होतो, अखीन चोयो सेस, क मी योना लक भी मोठो सेव।

आँग को दियो

³³ दियो पेटाके कोनी वोला तहखाना मा, मंग डलीया उबड़ा के नही ठेवासे, पर फूल मा ठेवासे, जोन लक भीतर आन जान वालो ला उजारो चोहे।

³⁴ तुमरो, तन को, दियो तुमरो डोरा सेत, अदी तुमरो डोरा साजरो से, तर तुमरो सारो आँग मा उजाड़ो से, पर उ खराब भयि जाहेत, तर आँग भी इन्धार भई जाहेत।

³⁵ एको लाय दोन गोस्टी ध्यान राखन को से, जोन यो उजाड़ो तुमरो मा से उ कहिं, इन्धार न होयेत जायेत।

³⁶ अदी तुम्हारो सारो तन मा उजाड़ो सेत, अखीन वोको कोनी भी हिस्सा, इन्धारो मा नाहत, तो उ वसोच हमेसा लक चमकत रव्हासे जसो दियो आपरो उजाड़ो लक सबा ला चकाचक कर देसे।

सास्तरी अना फरीसी पर हाय!

³⁷ यीसु सागंत होतो, तबच एक मोसे को नियम को गुरू ना कव्हयो, गुरूजी हमरो संग जेवन कर, यीसु भीतर जायके न, जेवन करन बस गयो।

³⁸ मोसे को नियम को गुरू यो चोवके, चकीत भय गयो, का यीसु बिना हात पाय धोवके, जेवन बस गयो।

³⁹ पिरभू ना कव्हयो, हे मोसे को नियम को गुरू, तुम्ही विधि-विधान लक हात-पाय धोवके ना, गडू-गिलास भानी ला बहार लक माजा सो, पर तुम्हारो भीतर मा ला लक बुराई भरोसे।

⁴⁰ अरे मुरख, जो बाहेर को हिस्सा बनइसेस, वोच भीतर भी बनाइसेस।

⁴¹ जोन भीतर सेत, वोला तुम्ही दान करदेव, अखीन चोवो सबच सुध्द भय जाहेत।

⁴² हे मोसे को नियम को गुरू, तुम लक धिक्कार से, काहेका पोदीना, सोप, अखीन हरेक हिवरो साग को, दसवा पराय लेवासो, पर परमेस्वर को, माया अखीन न्याय को लक, तुम्ही लापरवाही करा सेव। तुम्हारो लायक यो साजरो होवतो, का तुम्ही वोला भी मानासेव, अखीन येला भी।

⁴³ मोसे को नियम को गुरू तुम्हारो पर धिक्कार सेत, तुम्ही सभाघर मा, हरेक समाजीक काम मा, ऊचो आसन चाव्हासो, अखीन बजार मा सबा परनाम करहेती, तुम्ही यो सबा माया राखासेव।

⁴⁴ धिक्कार से तुम पर, काहेका, तुम्ही चुना पुतो सफा मरघट्टी सेव, जोन नही दिससे का, भितर मा का सेत, लोग तुमीला साजरो समज के, लोग तुमरो कव्हनो मा चलासे।

⁴⁵ एक मोसे को नियम को गुरू कव्हसे, हे गुरूजी, तुम्ही असो कव्हसो, आखिन आमरो बेइज्जती करासो।

⁴⁶ यीसु ना कव्हयो, हे मोसे को नियम को गुरू गीन तुमला धिक्कार सेत, तुम्ही मोठो-मोठो नियम को बोझा जनता पर लाद देसो, जो उ नही उचल सक से। अखीन वो भारी बोझा ला तुम्ही बोट भी नही, लगा सकासो।

⁴⁷ तुम पर धिक्कर सेत, जुनो जमाना मा, मोठो-मोठो भविस्यवक्ता गीनला, तुमारो बाप-दादा गीन मार डाखिन अखीन तुम्ही उनको मठ बनासेव

⁴⁸ असोमा तुम्ही गवाही सेव का तुम्हरो बाप दाद ना खोटो काम करी सेस मारके उनको मठ बनाइसेस

⁴⁹ यो कारन परमेस्वर कव्हासे, मि उनको जवर चेलागीन ला धाड़ासू उन मा लक काही ला सताहेत अखीन काही भविस्यवक्ता ला मार डाखेत

⁵⁰ जोन लक दुनिया बनान को बेरा ले अब तकन जितरो भविस्यवक्ता गीनको खून बोहाय गयो सेत वोको हिसाब योच पीढ़ी को लोकईन लक लियो जाहेत।

⁵¹ मि कव्हसू भविस्यवक्ता हाबिल पासुन जकरयाह वरीच जोनला भविस्यवानी को घर अना वेदी को भितर म खून कर दियेत।

⁵² मोसे को नियम को गुरू तुम पर धिक्कार सेत, तुम्ही ना गियान को कुन्जी हिसकसेव, अना तुम्ही खुदच नही धसेव अखीन कोनी ला भी नही धसन देसो।

⁵³ यीसु वहान लक जावन लग्यो, त मोसे को नियम को गुरू गीन वोला फसावन काजी, सवाल-जवाब करन लगीन।

⁵⁴ अखीन वोको विरोध मा वोला मार डाखन लाय डाव ढुढन लगीन।