लूका 1 - सत मारग पर चलन वारो किताब

परिचय थियुफिलुस को समरथन

¹ ओ पियारो थियुफिलुस, जोन गोस्टी हमरो संग मा बितो से। मि ना उनला लिखन को मन बनाइ सेव हमरो लक

² पयले यीसु को उन गोस्टी ला चोवन अखीन आयकन वालो दास होतिन। उनना सबच गोस्टी ला हमि तकन धाडिसेस।

³ एकोलाई अगो थियुफिलुस अबा मोला यो साजरो लगि से, का उनच, गोस्टी ला खरो-खरो जाँचकेना, एक को मघा एक, ठिख-ठाख मालुम करके लिखु।

⁴ जेनको लक तू जानले, का वा गोस्टी, अना जोन को गियान तुना पाईसेस। कसो अटल से?

योहन बप्तिस्मा देवन वालो को जनम को बारे सांगनो

⁵ यहुदिया को राजा हेरोदेस को बेरा मा, अबिय्याह को दल मा, जकरयाह नाव को एक याजक होत्यो। अखीन वोको बायको हारून को खानदान की होति। अखीन वोको नाव एलीसीबा होती।

⁶ वय दुई परमेस्वर को नजर मा नेक होतीन। वय पिरभु को सबच, हुकूम ला मानत होतीन।

⁷ उन को कोनी लेकरा बारा नही होतिन। काहेका एलीसीबा वाखड होती, अखीन उ बुड़गा भई गई होतो।

⁸ जब जकरयाह आपरो दल को सगंमा परमेस्वर को पुजा-पाट करत होतिन।

⁹ तबा धुप-जलावन काजी, जकरयाह याजक को नाव लक चिठ्ठी हिट्यो। का उ मंदिर मा पिरभु को पूढा धुप जलाये।

¹⁰ तबा धूप जालावन को बेरा मा, सबच बिनती करत होतिन।

¹¹ ओच बेरा मा पिरभु को सरगदूत ओला धुप वेदी को उज्जो कन चोवयो।

¹² जकरयाह डराय गयो, अखीन ओको “घिघगि बंध गयो।”

¹³ पर सरगदूत न ओला सांगिस, ओ जकरयाह, भेव नोको खावजोस, काहेका तोरो पिराथना परमेस्वर ना आयक, लेइस। अखीन तोरि बायको एलीसीबा लक, तोरो लाय एक टूरा होहेत, अखीन तु वोको नाव योहन राखजोस।

¹⁴ तोला खुसी होहे। अखीन गजब लोकगीन, वोको जनम को कारन, खुसी मनाहेत।

¹⁵ काहे का उ पिरभु को पुढ़ा, मा महान होयेत। अखीन अंगूर को रस, अर दारु, कभी नही पिहेत। अखीन उ आपरो माय को पोट लक, पवीतर आतमा लक भरो होयेत।

¹⁶ अखीन भटको हुओ, इसरायल को गजब लोकगीन ला, उनको परमेस्वर को रास्ता मा आनेत।

¹⁷ उ एलिय्याह को आतमा अखीन ताकत मा, पुढा-पुढा चलेत, क आजा पुरखागीन को मन ला, लेकरा-बारा मा लगा देहेत। अखीन हुकूम नही मानन वालो ला, नेक बना देहेत। अखीन पिरभु को लाई, साजरो लोकगीन ला, तैय्यार करयेत।

¹⁸ जकरयाह ना सरगदूत सांग्यो, यो कसो होयेत? काहेकी मी, अखीन मोरो बायको, दूई को बुडगापन से।

¹⁹ तब सरगदूत ना वोला जवाब दियो, मी जिबराइल सरगदूत सेव। जोन परमेस्वर को पुढा उभो रहुसु, अखीन तोरो लक बात करन, अखीन यो खबर आयकावन काजी इता आईसेव।

²⁰ जोन दिवस तकन यो गोस्टी पूरो होहेत, ओना दिवस तकन तू गुंगो रव्हजो। काहेका तू मोरी गोस्टी पर भरोसा नही मानीसेस।

²¹ लोग गीन जकरयाह को “बाट जोहत होतिन” अखीन चकित भईन। काहे का मंदिर मा, वोला उसीर भई गई होती।

²² जब उ बाहेर हिटयो, तो उ बोल ना सकयो, तब लोकगीन जान गईन, का मंदिर पर कोनी दरस-परस भयो से। अखीन उ ईसारा करत होतो, अखीन गुगों भय गयो होतो।

²³ जब वोको सेवा को दिवस पूरो भयो, तो उ आपरो घर चलो गयो।

²⁴ काही बेरा को बादमा वोको बायको एलीसीबा पेट लक भई। वो 5 मास तकन आपरो ला छुपाय राखयो।

²⁵ अखीन कव्हन लगयो, मोरो कलंक दुर करन काजी, पिरभु न किरपा करीसेस।

यीसु को जनम को पूढा सांगनो

²⁶ छँटवो महीना मा, परमेस्वर कन लक, एक कुँवारी को कन जिबराइल सरगदूत नाव को, सरग दूत ला धाडिस। वा टूरी गलील छेतर को, नासरत नगर मा, रव्हन वालो होती।

²⁷ जोकि पक्की राजा दाऊद को खानदान मा, यूसुफ नामको टूरा संग भई होती। ओ कुँवारी टूरी को नाव मरियम होती।

²⁸ सरग दूत ना, ओको कठा जायके सांगिस, नमस्कार मरियम, पिरभु को किरपा तोरो पर भईसे।

²⁹ अखीन, यो बात ला आयक के, वा टूरी घबराय गई, अखी मनमा सोचन लगी, यो कसी गोस्टिसे?

³⁰ तबा सरगदूत ना कहीस, मरियम तु भेव नोको कर, परमेस्वर को किरपा तोरो पर भईसे।

³¹ चोव! तु पोट लक होवजोस, अखीन तोरो लक एक टूरा जनम लेहे, तु ओको नाव यीसु राखजो।

³² उ महान होहे अखीन पिरभु को टूरा कहलाहे। परमेस्वर वोको आजा-पुरखा, दाऊद को सिघासन वोला देहे।

³³ अना उ तोरो पुरखा, याकूब को घराना मा, जुग-जुग लक राज करहे, अखीन वोको राज अमर रहेत।

³⁴ मरियम ना सरगदूत ला कहीस, यो कसो होहे, मी तो, कोनी मरद को संग नही सोयी सेऊ।

³⁵ सरगदूत ना वोला साँगिस, पवीतर आतमा को ताकत तोरो पर आहेत, अखीन मोठो परमेस्वर तोरी, रक्सा करहे। एको लाई उ पवीतर, जो जनम लेवन-वालो से, परमेस्वर को टूरा कहलाहे।

³⁶ अखीन देख, तोरो कुटुम्ब मा एलीसीबा लक वोला बुड़गीपन मा टूरा होवन वालो से। अब वोको छँटवो महीना से।

³⁷ काहे की परमेस्वर की गोस्टी खरी ठयरासे। कभी खोटो नही होवासे।

³⁸ मरियम ना सांगिस, चोव, मी, पिरभु की सेविका सेउ। मोला तु जसो सांगासे, वसोच गोस्टी भई जाहे। तब सरगदूत ओको कठा लक चलो गयो।

³⁹ वो ना बेरा मा, मरियम लवकर तैय्यार भई अखीन आपरो कुटुम्बी एलीसीबा को यहूदा देस को पहाड़ी गांव मा गई।

⁴⁰ वो जकरयाह को घर मा गई। अखीन एलीसीबा ला नमस्कार करीस।

⁴¹ जेंधावर एलीसीबा ना, मरियम को नमस्कार आयकिस, तसोच, वोको लेकरा पोट मा उचलो, अना उ पवीतर आतमा लक भर गई।

⁴² अना वा चिल्ला के कहीस, तु सबच आई-माई गीनमा धन्य से। अना धन्य से तोरो पोट को फर।

⁴³ मोरो ऊँचो किस्मत से का, मोरो पर दया कसो भई? पिरभू को माय मोरो घरमा आई सेस।

⁴⁴ काहेका, जसो तोरो नमस्कार मीना आयकीसेव, लेकरा मोरो पोट मा, खुसी लक उछल पडयो।

⁴⁵ तू धन्य सेस, जोन ना बिस्वास लक असो करीसेस, का पिरभू ना जोन गोस्टी साँगीसेस, वो पूरी भई जाहेत।

मरियम को गाना

⁴⁶ एको पर मरियम असो गावन लगी, “मोरी जीव (मन) पिरभु को गुन-गान करासे।”

⁴⁷ मोरो जीव, आपरो मुक्ती देवन वालो, परमेस्वर को खुसी मनावसे।

⁴⁸ काहे का वोना आपरो सेविका को गरीबी पर, किरपा करीसेस। अब लक सब पीड़ी, मोला धन्य कहेति।

⁴⁹ काहे का, गजब सक्तिसाली परमेस्वर ना, मोरो लाय मोठयो काम करीसेस, पवीतर से वोको नाव।

⁵⁰ वोको तरस वोको भविस्यवक्ता गीन पर, पीढ़ी-पीढ़ी लक बनो रव्हसे।

⁵¹ परमेस्वर ना अपरो ताकत दिखाईसेस, वोना घमन्डी गीन ला, छितराय देईसे।

⁵² वोना मोठो अधिकारी गिनला, उनको सिघासन लक उतार दियो से। अखीन, गरिब ला, महान बनायो से।

⁵³ वोना भुखो-लाघो गिनला, साजरो-साजरो जेवन देइसेस। अखीन धनी गिनला, रिकामो हात लौटा दियो से।

⁵⁴ वोना अपरो दया, ला ध्यान देके ना, आपरो दास इसरायल ला संभालयो से।

⁵⁵ जसो कसम, हमरो बाप-दादा लक खायो होतो। का अबराहम अखीन ओको सन्तान पर, परमेस्वर को करुना सदा बनो रहेत।

⁵⁶ तीन महीना मरियम एलीसीबा को घर रहकेना, अपरो घर आय गई।

योहन बप्तिस्मा देवन वालो को जलम

⁵⁷ एलीसीबा को जचकी को बेरा पूरो भयी। अखीन वोना एक टूरा ला जलम दियो।

⁵⁸ जब वोको पड़ोसी, अखीन रिस्तेदार ना यो बात आयकिन, का पिरभु को किरपा से। तब सब वोको संग खुसी मा सामील भईन।

⁵⁹ आठवा दिवस टूरा को खतना को बेरा आयो। तब लोकगीन वोको नाव वोको बाबूजी जकरयाह को नाव पर, राखन चाव्हत होतीन।

⁶⁰ पर वोको माय ना सांगीस, नही, एको नाव योहन राखबिन।

⁶¹ तब वोना लोकगीन कव्हन लगीन, तुम्हारो कुटुम्ब मा, कोनी को असो नाव नहात।

⁶² तब लोकगीन ईसारा करके वोको बाबूजी लक पुसन लगीन, उ का नाव राखन चाव्हसेस।

⁶³ वोना पाटी मागंके ओमा योहन नाव लिख्यो।

⁶⁴ वोच बेरा मा, जकरयाह को जुबान खुल गयो, अखीन उ परमेस्वर को धन्यवाद करन लगयो।

⁶⁵ तब सब सेजारीगीन मा भेव छाय गयो। अखीन उनको गांव को आखा-पाखा मा अना यहुदिया देस मा यो गोस्टी को चरचा फैल गयो।

⁶⁶ सब आयकन वारा मन मा विचार के, ना कव्हन लगीन, का यो लेकरा का बनहेत? काहे का सचमूच मा पिरभु को “वोको पर हात होतो।”

जकरयाह को भजन

⁶⁷ योहन को दादजी जकरयाह, पवीतर आतमा लक भर गयो। अखीन असो कव्हत, आवन वारो गोस्टी साँगन लग्यो।

⁶⁸ धन्य से इसरायल को परमेस्वर, वोना आपरो लोकगीन को सूधी लेवासे, अखीन उनको मोक्स करोसे।

⁶⁹ अखीन आपरो दास दाऊद को घराना, लक एक सूटकारा देवन वालो सींग हिटिसे।

⁷⁰ उ आपरो पवीतर भविस्यवक्ता को टोन्ड ले, पूरानो जमाना लक, यो कव्हतो आयो सेस।

⁷¹ क उ बैरी अखीन सब बैरी हुन को हात लक, हमीला सूटकारा करीसेस।

⁷² का आमरो बाबूजी दादजी पर दया करके आपरी पवीतर वायदा ला हेत करयेत।

⁷³ वोना किरया खायके ना, हमारो पुरखा अबराहम लक, असो सांग्यो होतो।

⁷⁴ क उ हमारो दुस्मन को हाथ लक, हमीला छुड़ाय लेहेत।

⁷⁵ जोन को लक हमी बेधड़क, पवीतर, अखीन न्यायी पन लक वोको सेवा करयेत।

⁷⁶ उ टूरा सब लक मोठो परमेस्वर को भविस्यवक्ता कहलाव जोस, तू पिरभू को पूढ़ा चलन वालो दूत बनजो! तू वोको मारग तैय्यार करजो।

⁷⁷ अखीन वोको लोकगीन ला, उनको पाप छिमा को कन लक, मुकती को गियान देवजोस।

⁷⁸ हमारो परमेस्वर को यो माया, अखीन दया लक, हमी ला सरग लक, उजाड़ो मिलहेत।

⁷⁹ जेनको लाय उ इन्धीयारो अखीन, मरन को सावली मा, जो लोग बस्यो से, वोला उजाडो देवजो! अखीन हामरो पाय ला सान्ती को रास्ता मा ले जाहेत।

⁸⁰ लेकरा योहन मोठो होवन लग्यो, अखीन वोको आतमा बल बढन लगयो! उ इसरायल को सामने चोवनो को पूढ़ा सुनसान जघा मा रव्हन लग्यो।