योहन 19 - सत मारग पर चलन वारो किताब

¹ येको पर पीलातुस ना यीसु ला कोड़ा लगवाइस।

² सिपाई ना कांटा झाड़ को मुकुट गुथके ओको डोस्का मा राखिन अना ओला बेजनी कपरा पहनाय देईन।

³ अना ओको जवर आयके कव्हन लगीन, हे यहूदी को राजा नमस्कार अना ओला झापड़ भी मारिन।

⁴ तबा पीलातुस ना मंग बाहेर हिटके लोक गीनला कहीस, चोवो मि ओला तुमरो जवर मँग बाहेर आनासू, जोनलक तुम्हि जानो का उ निरदोस से। ओमा काही भी दोस नहात।

⁵ तबा यीसु कांटा को मुकुट अना बैजनी कपरा डाकयो हुयो बाहेर हिटयो। अना पीलातुस ना उनलक कहीस, “चोवो यो मानूस ला।”

⁶ तबा मुखिया याजक अना सिपाही ना ओला चोवीन। तो चिल्लाके कहिन, का ओला कूरूस मा चघाव! पीलातुस ना ओला कहीस, तुम्हिच ओला आन के कूरूस पर चघाओ! काहेकि ओमा काही दोस नही पायो सेऊ।

⁷ यहूदी गीनना ओला जवाब देइन, “हमारो भी मोसे को नियम को लक, उ जरुर मार डाकन को काबील से, काहेकी ओना आपरो आपच परमेस्वर को टूरा बनाईसेस।”

⁸ जबा पीलातुस ना यो गोस्टी आयकीस तो अखीन भेव समाय गयो अना यीसु लक कहिस, “तु किता को सेस?” पर यीसु ना ओला काही भी जवाब नही देइस।

⁹ अना मंग किला को भीतर गयो अना यीसु लक कहिस, तु किता को सेस? पर यीसु ना ओला काही भी जवाब नही देइस।

¹⁰ एतरो पर पीलातुस ना ओला कहीस, मोरो लक काहे नही कव्हासे? का तु नही जानस की तोला छोड़ देवन को हक मोला से, अना तोला कूरूस मा चघा वन को हक मोला से।

¹¹ यीसु ना जवाब देइस, “अदी तोला वरता लक नही दियो जाहे तो तोरो मोरो पर काही भी हक नही से। एकोलाय जोन मोला तोरो हात धरायो से ओको पाप लगत से।”

¹² एतरो पर पीलातुस ना ओला सोड़ देनो चाहयो, पर यहूदी गीनना चिल्लाके कहीन, अदी तु एला सोड़ देजोस तो तोरी भक्ति कैसर को संगी नही से। जोन कोनी आपरो आप ला राजा बनावासे। उ कैसर को सामना करासे।

¹³ यो गोस्टी आयक के पीलातुस यीसु ला बाहेर लायो, अना उ जघा एक चबुतरा होती जो इबरानी मा गब्बता कहलासे अना उता न्याय आसन पर बसयो

¹⁴ यो फसह को तिहार की तैय्यारी को दिवस होतो, अना यो बेरा छटवो तास को लगभग की होती। तबा ओना यहूदिगीन लक कहीस, “चोवो तुमरो राजा!”

¹⁵ पर वय चिल्लाइन, ले जाव, ले जाव! अना ओला कूरूस मा चघाव, पीलातुस ना उन लक कहीस, का मि तुमरो राजा ला कूरूस पर चघाऊ! मुखिया पुजारी ना जवाब देइस, कैसर ला छोड़ हमरो कोनी राजा नहाय!

¹⁶ तबा उनना यीसु ला उनको हात सौप देइस, ताकि उ कूरूस मा चघाव जाहे।

यीसु ला कूरूस मा चघावनो

¹⁷ तबा वय यीसु ला ले गईन, अना उ आपरो कूरूस उठायके उ जघा तकन बाहेर गयो, जो कवटी को जघा कहलावासे अना इबरानी मा गुलगुता।

¹⁸ उता उनना ओला अना ओको सँगा अखीन दोन मानूस ला कूरूस पर चघाईन, एक को इता अना एक ला उता, अना बीच मा यीसु ला।

¹⁹ पीलातुस ना एक दोसपतर लिखवाके‍ कूरूस पर लगा देइस, अना ओमा यो लिखयो होतो, यीसु नासरी, यहूदिगीन को राजा।

²⁰ यो दोसपतर लगत सा यहूदिगीन ना वाचिन काहेकि उ जघा जिता यीसु कूरूस मा चघाव गयो होतो। नगरको जवर होतो, अना पतर इबरानी मा अना लतीनी अना यूनानी मा लिखयो होतो।

²¹ तबा यहूदिगीन को मुखिया याजक ना पीलातुस लक कहीस, “यहुदि गिनको को राजा” मत लिखने पर यो की “ओने कहीस मि यहुदी को राजा सेउ।”

²² पीलातुस ना जवाब देइस, मि ना जो लिख दियो उ लिख दियो।

²³ जबा सैनिक यीसु ला कूरूस मा चघा देईन तो ओको कपरा आन के चार करीन, हर सिपाही को लाई एक पराय अना कुरता भी लेईन, पर कुरता बिन सिवन को वरता लक खाल्या तकन बुनयो हुवो होतो।

²⁴ एकोलाय उनना आपसी मा कहिन, हमि एला नही फाड़बोन पर एको पर चिठ्ठी डाकबिन की यो कोन की होहे। यो एकोलाय की पवितर गिरंथ मा जोन कव्हयो गयो उ पूरो भये। उनना मोरो कपरा आपस मा बाँट लेइन अना मोरो पल्लु पर चिठ्ठी डाकिन।

²⁵ अता सिपाही ना असो ही करीन यीसु को कूरूस जवर ओकी माय, अना ओकी माया की बहिन, कलोपास की बायको मरियम, अना मरियम मगदलीनी उभी होती।

²⁶ जबा यीसु ना आपरी माय अना ओनो चेला ला जेनला उ माया राखत होतो। जवर उभो देखिस ता आपरी माय लक कहीस हे बाया देख यो तोरो टूरा से।

²⁷ तबा ओना चेला लक कहीस, यो तोरो माय से। अना वोच बेरा लक उ चेला ओला आपरो घर ले गईन।

यीसु को मिरतु

²⁸ एको मँघा यीसु ना यो जानके की अता सब काही पूरो भयो, पवितर गिरंथ मा जोन कहो गयो उ पूरो भयो, तब कह्यो “मि तहान सेउ।”

²⁹ उता अंगूर रस भरो हुयो एक बरतन राखियो होतो, अता उनना अंगूर को रस माफिलायो हुयो स्पंज ला जुफा मा राखके ओको तोन्ड लक लगाइन।

³⁰ यीसु ना उ पित मिलयो अंगूर को रस टोंड मा लेइस अना कहीस “पूरो भयो।” अना डोस्का डाखके परान छोड़ देइस।

भाला लक यीसु ला छेदनो

³¹ यो बिसराम-दिवस लक पहेले तैय्यारी को दिवस होतो। यहूदी गीनना पीलातुस लक बिनती करीन का उनको टगंड़ी तोड़ दियो जाय अना उनको देह उतारो जाय, जोनलक पवीतर दिवस मा वय कूरूस पर नोको रहेत। काहेकि उ सब्त का मोठो दिवस होतो।

³² एकोलाय सैनिक ना आयके कूरूस मा टगयो, पहेलो अना दूसरो, मानूस को टेगड़ी टोड़िन, जोन यीसु को संग कूरूस मा चघायो गयो होतीन।

³³ पर जबा यीसु को जवर आयके चोविन की उ मर चुकयो तो ओकी टाँग नही तोड़ीन।

³⁴ पर सिपाही मा लक एक ना बरछी लक ओको पसरी मा मारयो, अना ओमा लक तुरंत रकत अना पानी हिटियो।

³⁵ जेना यो देखीस ओने गवाही देइस, अना ओकी गवाही देईसेस अना ओको गवाही खरो से उ खूदच जानासे का खरो कव्हसे जेनको लक तुमी भी भरोसा राखो।

³⁶ यो गोस्टी एको लाई भई का पवितर गिरंथ मा कव्हयो गयो होतो, उ पुरो भयो। “ओकी एक भी हाड़ नही तोड पाहे।”

³⁷ मँग एक जघा पवितर गिरंथ पर यो लिखो से “जोनना वोला छेदयो, वाच वोको कन चोवयो।”

यीसु को गाड़ो जानो

³⁸ यो गोस्टि को बाद अरिमितिया को यूसुफ ना जोन यीसु को चेला होतो, पर यहूदी गीनको भेव लक यो गोस्टी ला लुकाय राखत होतो। युसुफ ना पीलातुस ला साँगीस, का “तु यीसु को लास ला मोला देव।” तबा पीलातुस ना कव्हयो का ले जाय।

³⁹ नीकुदेमुस जोन पुढा रात ला यीसु को कठा गयो होतो, वोच पचास सेर लुभान अना गवारपाठा ले गयो।

⁴⁰ तबा उन्ना यीसु को लास ले गईन, अना यहूदिगीन को गाड़ो जानो को रिवाज लक ओला सुगंधित सामान को सँगा कपरा मा लपटिन।

⁴¹ ओनो जघामा जिता यीसु कूरूस मा चघाव गयो होतो, एक बारी होती अना उ बारी मा एक नवतो मरघट्टी होती जेमा कोनी ना राखियो गयो होतो।

⁴² एकोलाय यहूदिगीन की तैय्यारी को दिवस सूकीरवार को कारन उनना यीसु ला वोचमा राख्यो, काहेकि वा मरघट्टी जवर होती।