याकूब 2 - सत मारग पर चलन वारो किताब

¹ अगो मोरो चहेतो भाऊहुन, आमरो महिमा वारो पिरभु मसीह यीसु मा जोन तुमरो भरोसा सेत; उ बिन पक्सपात को होय।

² तुमरी सभाघर मा अदी कोनी मानूस सोनो को छल्ला अना उचो किसम को कपरा घालयो हुयो आवासे अखीन वहान एक गरीब मानूस भी मैलो कपरा मा आवासे।

³ अदि तुमी साजरो कपरा वारो को संगा मान ईज्जत करोसेव। अना ओको लक कव्हसेव, आव यहान साजरो आसन मा बस। पर गरीब मानूस ला कसो, वहान लक उभो होय मनजे कुरसी लक अना मोरो पाय को खाल्या को जघा मा बस।

⁴ असो करत हुयो का तुमीना आपरो बीच कोनी भेदभाव नही करियो अना बुरो बिचार को संगा न्याय करता नही बन गयेत?

⁵ ओ मोरो चहेतो भाऊगीन, आयको। का परमेस्वर न संसार को नजर मा ओना गरीबहून ला भरौसा मा धनी अना ओना राज को वारसाना को रूप मा नही निवड़ीसेस, जेनला परमेस्वर ना, जोन ओला माया करासेत, देवनो को बचन देयीसेस।

⁶ पर तुमना ता ओना गरीब मानूस को पुढ़ा मनमुटाव करिया सेव। अना का असो अमीर मानूस वयच नोहोति, जोन तुमरो पर अतियाचार करासेत अना तुमीला अदालत तकन घस-टतसेत?

⁷ का वय याच नोहोति का जोन मसीह को नाव की निन्दा करासेत, जोन का तुमी कहलावासे।

⁸ तबा भी अदी तुमी पवितर गिरंथ को मोसे को नियम को पालन करासेव, जसो का तु अपरो सैजार लक अपरो जसो माया राखबिन तुमी सही मा वोनो करार ला पूरी करासेव त साजरो करासेव।

⁹ पर अदी तुमी पक्सपात करासेव त पाप करासेव अना करार तुमला अपराधी ठहरावासे।

¹⁰ काहेकी कोनी भी अदि सप्पा मोसे को नियम ला पालन करासे अना एक गोस्टी मा चूक जावासे ता उ सप्पा मोसे को नियम को तोड़न को दोसी भय जासे।

¹¹ एकोलाय का जोन न यो कहयो होतो, “छिनालापन नोको करबिन” वोना यो भी कहयो होतो, “रकत नोको करबिन।” एकोलाय अदी तुमी छिनालापन त नही करोसो पर खून करोसो ता तुमी मोसे को नियम ला नही माननवारा ठहरासो।

¹² तुमरो गोस्टी अना तुमरो सुभाव उन लोकहुन को जसो होय, जिनको न्याय छुड़ोती देनवारो मोसे को नियम को जसो कियो जाहे।

¹³ जेना दया नही चोवायीसेस, ओको न्याय दया को संगा नही कियो जाहे; पर दया न्याय पर जीत पाय लेहे।

भरोसा अना भलो काम

¹⁴ अगा मोरो भाऊगीन, अदि कोनी मानूस कव्हसे का उ बिस्वासी से ता एको का नफा? जबा तकन का ओको काम बिस्वास को जसो नहोत। असो बिस्वास का ओको सूटकारा कर सकासे?

¹⁵ अदी भाऊहुन या बहिनीहुन ला कपरा को पायजे, उनको जवर खान तकन को नहोत।

¹⁶ ता तुमरो ओन्हीसीन कव्हनो यो बेस से, का परमेस्वर तुमला आसीरवाद देहे सांती लक रव्हो! गरम-गरम कपरा घालयो अना भरपेट खावहो। लेकिन तुमी उनला जरुरत को चीजहुन ला नही देसो ता का नफा

¹⁷ ऐना पिरकार लक अदि बिस्वास, काम को संगा नाहती ता उ आपरो आपच मा मरयो हुयो से।

¹⁸ अता कोनी मानूस कवह सकेत, “तोला बिस्वास से, अना मि काम करासेऊ।” तु आपला बिस्वास मोला बगेर काम को दिसाव; अना मि आपरो बिस्वास आपला काम लक तोला दिसाहुँ।

¹⁹ का तोला बिस्वास से का परमेस्वर एकच से? तू साजरो करासेस! बुरो आतमा भी बिस्वास धरासेत का परमेस्वर से अना वय कपकपात रव्हसेत।

²⁰ पर ओ मुरख मानूस का तू यो भी नही जानस, का करम को बगेर बिस्वास फालतू सेत?

²¹ का आमरो पुरखा अबराहम ना जबा आपरो टूरा इसहाक ला वेदी मा चघाय दियो होता? तो का उ वोनो बेरा आपरो करम लक धरमी नही ठहरायो गयो होतो?

²² पर अबा तूना चोवलियो का बिस्वास ना वोको करम को संग मिलके परभाव डाखी सेत। अना करम लक बिस्वास पूरो होवासेत।

²³ अखीन पवितर गीरंथ को यो बचन पूरो होवासेत; “अबराहम ना परमेस्वर मा बिस्वास करीस, अना यो वोको लाय नेकी गीनो गयो अना वा परमेस्वर को संगी गिनो गयो।”

²⁴ एना परकार तुमी ना चोवलियो, का मानूस सिरप बिस्वास लक नही पर करम लक भी धरमी ठैयरासेत।

²⁵ वसोच राहब बेसिया भी, जबा वोना दूतगिन ला आपरो घरमा राखीस, अना दुसरो रस्तालक बिदा करीस, ता कर लक वा धरमी नही भई?

²⁶ एकोलाय जसो देह आतमा को बिन मरिया हुया सेत, वसोच बिस्वास भी करम को बिन मरया हुया सेत।