इब्रानियो 9 - सत मारग पर चलन वारो किताब

संसारीक अना सरगीय अराधना

¹ अबा आयको, पयलो करार मा भी सेवा को बारेमा हुकूम होतो, अखिन एक मानूस को हात को बनयो, आपरो अराधना को पवीतर जघा होतो।

² एक तम्बु उभो कर दियो गयो। वोको पुड़ा खोली मा टवरी राखन को चीज टेबिल मा होतो। अना चढावा को भाकर होति, वा पवीतर जघा कहलात होतो।

³ तम्बु मा दुसरो पड़दा को मघा को खोली, परम पवीतर जघा कहलात होतो।

⁴ उता धुपदान को सोनो को वेदी, अना करार को सोनो मढो मन्जुसा होति। अना मन्जुसा मा सोना को कटोरा मा मन्ना होती। हारून को छड़ी जोन मा फर लग गयो होती, उ भी वोच जघा मा होती। अना कानून को गोटा को पटिया होति।

⁵ अना मन्नजुसा को वरता दया को आसन ला ढाकन वारा महिमा मय करुब होतिन। ऐना सबको बारे मा लम्बो चौड़ो लिखन को कोनी जरुरत नाहती।

⁶ परमेस्वर ना असो च तम्बु मा अराधना को जघा बनान ला कव्हयो होतो। सेवा को बिधी बिधान करन काजी याजक हरेक बेरा पुड़ा को खोली मा जात होतो।

⁷ पर महायाजक साल मा एकच बार दुसरो खोली मा, रकत लेके जावत होतो। जोनला वो आपरो पाप अना जनता को पाप छिमा काजी चघावत होतो।

⁸ एकोलक पवीतर आतमा, तम्बु मा यो दिसानो चाव्हसेत, का जबा तकन वोको पुड़ा पवीतर जघा उभो सेत। तब तकन दुसरो खोली को रस्ता बंद सेत।

⁹ उ तम्बू आज को बेरा मा एक उदाहरन सेत। जोन मा असो चघावा अना बली चघायो जावासेत। जोन लक अराधना करनवालो को मन सिध्द नही होवा सेत।

¹⁰ काहेका वय बस जेवन-वेवन को चीज अना रकम-रकम को आँग धोवनो सेत। जोन हुकूम वोना बेरा मा देह को सुधार को लाय ठहरायो गयो होतो।

¹¹ पर जबा मसिहा आवनवारा साजरो-साजरो चीज को महायाजक बनके आयो। अखीन मोठो अना सिध्द तम्बु लक होयके आयो। जोन हात को बनयो यो दुनिया को नाहती।

¹² अना बोकरा अना नाटा को रकत लक नही, पर आपरो च रकत लेके, एक च बार, पवीतर जघा मा धस गयो। अना अमरता को सूटकारा मिल गयो से।

¹³ काहेकि जबा बकरा गीन अना बैइल बछेरु को रकत, अना कलोर को राख, असुध्द लोकगीन पर छिड़को जानो, उनको देह ला, सुधद करन को लाई उनला पवीतर करासे।

¹⁴ मग मसीह को रकत, जोन ना अपरो आप ला अमर आतमा लक, बेकसूर बली को रुप मा परमेस्वर ला दे दियो। आमरो मन ला मरो हुवो काम लक, काहे पवीतर नही करयेत। अना अमला जित्तो परमेस्वर को काबिल काहे नही बनाहेत।

¹⁵ मसीह पयलो करार को भितर, कियो गयो गुनाह, को छिमा को लाय मर गयो सेत। अना अबा उ एक नवा करार को बिचवई से। परमेस्वर जोन ला हाकल सेत, उनला अबा वोको करार लक अमर काल तकन सूटकारा को हक मिलासेत।

¹⁶ करार को बारे मा करार करनवारा को मिरतू को परमान पतर देवनो पड़सेत।

¹⁷ काहेकि असो करार मरनोच पर पक्को होवासेत। अना जबा तकन करार बाँधनवालो जित्तो रव्हसे, तबा तकन इकरार नामा कोनी काम को नाहती।

¹⁸ एकोलाय रकत को बिना पयलो करार को सुरुवात नही भयो होतो।

¹⁹ काहेका जब मोसे ना सारो जनता को पुड़ा करार को किताब को सबा हुकूम ला पढ़के आयकाईस। तो वोना पानी, लाल चोगा, अना जूफा को संग बछिया अना बोकरा को रकत लियो। अना वोला पवीतर गिरथ अना सप्पा जनता पर छिड़क हुया,

²⁰ उ ना हुकूम दियो होतो। यो वोना करार को रकत सेत। जोनला परमेस्वर ना तुमरो लाय ठेविसेस।

²¹ मोसे ना तम्बु अना सेवा मा लगनवारा सबा बरतन पर भी, रकत छिड़क दियो होतो।

²² करार को लक हमेसा, सबा काही खून को बव्हनो लक पवीतर कियो जावत होतो। अना रकत को बिना छिमा नही मिलासेत।

पाप को लाय यीसु को बली

²³ जोन सरग को चीज गीन को बस सावली होती। अदी उनको सुध्द होवन काजी असो नेम जरुरी होतो। तो खुद सरग को चीजगिन ला सूद्द करन काजी, एक साजरा लक साजरा बली तो जरुरी च सेत।

²⁴ मसीह हात को बनयो हुया वोना पवीतर जघा मा नही धसयो। जोन सही को पवीतर जघा को सावली सेत। वोना सिद्दो सरग मा च धसयो। जोन लक मसीह अबा आमरो कन लक सरग मा परमेस्वर को कठा हाजिर हो सके।

²⁵ यहान को तम्बू को महायाजक कोनी दुसरो को रकत आन के हर साल पवीतर जघा मा धसत होतो। पर मसीह ला बार-बार आपरो आप ला चघान को जरुरत नहती।

²⁶ अदी असो होतो, तो दुनिया को सुरुवात लक वोला बार-बार दुख उठानो पड़तो। पर अबा जुग को आखीर मा एक च बार परगट भयो। जोको लक खुद को बली देके पाप ला मिटा देवे।

²⁷ जसो मानूस को लाय एक बार मरनो, अना एको मघा उनको नियाव होवनो लेखा सेत।

²⁸ वसोच मसीह, लगत लोकगीन को पाप लक मुकती काजी, एकच बार आपरो आप ला चघा दियो। मसीह अबा दूसरो बार परगट होयेत। पाप को कारन नही, पर जोन लोक वोको रस्ता चोवासेत। उनला मुक्ती दिलावन आहेत।