इब्रानियो 2 - सत मारग पर चलन वारो किताब

मोठो सूटकारा

¹ एकोलाय अमिला जोन खबर भेटयो सेत। वोको कन आपरो बारीकी लक धियान देवनो पाहिजे। वा गमावू नका अना मारग भटक जाबिन।

² कारन देवदूत जोन सबद बोलयो वा पक्को रव्हयो अना हरेक झन ला सजा अना हुकूम तोड़न को नेमको बदला भेटयो,

³ “इतरो मोठ्या तारन लक अमी धियान नही दियो सेत ता अमी कसौ सूट जाबोन?” जबकि स्वता पिरभु ना पयले सूटकारा को मुनादी करयो होतो। अना जोन लोकगीन ना वोकी आयेकले, उनना यो सही सेत असो सिध्ध करयो।

⁴ वोच बेरा परमेस्वर ना सप्पा परकार को चिमत्कार अना अद्भुत गोस्टी करयो, अना पवितर आतमा भेटी वोको इक्सा अनुसार बाटयो। उ ना वोकी गवाही ला बड़ायो।

मसिहा सूटकारा देवनवारा सेत

⁵ जोन आवनवालो नवीन दुनिया सेत। वोको बारे मा परमेस्वर ना देवदूतगिन ला नियुक्त नाही करयो।

⁶ धरम गिरथ मा एक जघा असो चेताय गयो सेत “ओ परमेस्वर, मानूस का सेत का तू वोको देख रेख करतोस? मजे मानूस को टूरा को तु चिन्ता करजोस

⁷ तू जरासो बेरा साठी वोला देवदूत लक लहान कियो सेत। अना ओला गौरव अखिन सन्मान को मुकुट दियो से, अना वोला तैय्यारी मा आपरो हात को काम पर हक्क देइसेस।

⁸ अना वोना उनला सप्पा गोस्टी मा राज दियोसेत।” असो कहयो सेत का परमेस्वर ना “सप्पा गोस्टी” मा नियुक्त कियो। एको साप मतलब सेत, सप्पा काही समायो सेत।

⁹ परंतु, मानूस अबा सप्पा गोस्टी मा राज करतो दिसत नाही। पर आपरो यीसुला चोवो, जोनला काही बेरा साठी देवदूत को मुकाबला मा नीचो कियो। या साठी की, परमेस्वर को किरपा लाय वा सर्वांसाठी मरयो। अता आपरो मरनो को दुख को कारन वोला गौरव व सन्मान को मुगुट पहनायो गयो।

¹⁰ फक्त इतरोच खरो च सेत, का जोनना सप्पा गोस्टी बनायो। अना वा सर्वां को रक्सन करयो, या साठी का वोना लगत सो टूरा-टूरी ला वोको गौरव वाटन साठी मसीह ला दुख देके पुरो करयो। अबा यीसु उनको सूटकारा ठैयरो अता कोन सेत?

¹¹ परमेस्वर ना उनला पाप पासुन सुद्ध करासे। अना जोन सुद्ध सेत, उ सबको एकच अजी सेत। एकोलाय यीसु ला उनला कुटुंब माननो मा कोनी लाज नही लगासेत।

¹² अना उ परमेस्वर ला कव्हसेत “तू जोन करयो सेत, उ मी मोरो लोकगीन ला सांगिन, मी उनको सभा मा तोरो स्तुती करीन।”

¹³ उ अखिन कव्हसेत “मी मोरो विस्वास वोको मा ठेविन।” अना उ मंग कव्हसेत “इतानी मी सेऊ” मजे मोरो बरोबर परमेस्वर ना जोन सन्तान देइसेस, अमी समेर सेत।

¹⁴ उ लेकरागिन ला सांगतो, “यो लोकगिन मोरो स्वता को देह अना रक्त सेत, एकोलाय यीसु स्वता उनको सारखा भयो अखिन वोको स्वभाव मानूस सारखा भय गयो, यासाठी की वोना आपरो मरनो लक सैतान को नास करे।” जोन को मरनो मा हक सेत।

¹⁵ अना जोन लोक ला सप्पा जीवन मा मरनो को भेव सेत। अना वय मरन को दास सारखे जगत मा होतीन, उनला त मुक्त करावे।

¹⁶ यो कारन उ देवदूतगिन को नही तर अबराहम को खानदान को लोक गिन ला सभांला सेत।

¹⁷ यो कारन खुद सप्पा गोस्टी को बिच मा उ उनको भाऊ सरिसो होवनो पाहिजे। एको लाय का लोकगिन को पाप को लाय को बदला मा बली देवन साठी परमेस्वर को संबंधित असो गोस्टी तो दयालू अना बिस्वासी असो परमुख याजक सेत।

¹⁸ कारन जबा उना परिक्सा को बेरा दुख सहयो सेत। एकोलाय उ परिक्सा मा पड़यो मानूस गिन को मदत करू सकासेत।