इब्रानियो 11 - सत मारग पर चलन वारो किताब

भरोसा

¹ बिस्वास मन्जे जोन आस अमी करे सेजन, वोको लाय पक्को होवनो। अना अमी जोन गोस्टी ला नही चोवासेजन। पर वोको खातिर निस्चित होवनो ला बिस्वास कव्हसेत।

² एकोलाय जूनो जमाना मा लोकगिन परमेस्वर को मान भेटयो।

³ बिस्वास को कारन अमिला समजमा आवासेत, का यो जगत ला, परमेस्वर ना सबद लक बनायो सेत। यासाठी जोन-जोन दिसासेत, वा जेन दिसत नाही, वोको पासुन बनायो गयो सेत।

⁴ हाबिल को बिस्वास को कारन काईन को लक साजरा बलिदान परमेस्वर ला देइसेस। वोको छय को कारन वोको देवन को परसंसा भयी उ नेक मानुसमा आदरनीय होता। अना बिस्वास को कारन उ अजून च मरन को तरी च बोलासेत।

⁵ हनोक ला मरनार नाही यो गोस्टी मा बिस्वास होता। वोना ऐवज मा वोला परमेस्वर आपरो संग लेगयो। परंतु कोनीच वोला सापड़ा नहि सक्यो, यो कारन लक वोला लेजात होतिन। पवितर गींरथ सांग सेत का हनोक ला लेजावन को पयले वोना परमेस्वर ला खुस करयो।

⁶ अना बिस्वास को सिवाय कोनी गोस्टी लक परमेस्वर ला खुस नही कर सकत। कारन हरेक झन जोन वोको जवर आवासे, वोला असा बिस्वास होवनो जरूरी सेत। का परमेस्वर सेत, अना जोन वोला सच्चो लक तपासन वालो ला वोको जवाब देवासेत।

⁷ बिस्वास को च कारन लक नूह ला भबिस्य मा घटनवालो घटना को बारे मा परमेस्वर को इसारा ला समजयो, अना जोन ला तो चोव सकत नहोती। वा परमेस्वर को हुकूम ला मानयो अना एक जहाज नाव बनायो, ज्यामध्ये उ अना वोको कुटुंब वाचले। एको परिनाम असा भयो की, जघा को निंदा भयो। अना बिस्वास लक नूह ला परमेस्वर जवर ला नेक मानूस ठैरायो गयो।

⁸ बिस्वास को कारन को कारन अबराहम ला असो सांगयो का वोला जोन जघा मा जावन साठी परात जानको होतयो, पर उ कितानी जात होता उनला मालूम नही होता। तरी उना हुकूम मानयो अना गयो।

⁹ बिस्वास को कारन जोन धरती को वायदा कियो गयो होतो। उ धरती मा वय इसहाक अना याकूब तकन परदेसी जसो तम्बू मा रव्हन लगयो। अना वारसाना हक्क नही तजयो।

¹⁰ अबराहम ना असो करयो, काहेका उ वोना पक्को पाया वालो नगर को बाट चोवत होतिन। जेनको बनान वारा परमेस्वर सेत।

¹¹ बिस्वास को कारन च, अबराहम बूड़गा भयी गयो होतो। अना सारा वाखड़ होती। जोनना बचन दियो होतो। वोको पर बिस्वास करके पोट लक भयी अना अबराहम बाप बना दियो।

¹² अखिन असो परकार यो एका मानूस पासुन जोन मरियल सारखा होता। बादल को तारागिन अना सागर कगर को रेत जसो बेगिनत अवलाद भयी।

¹³ बिस्वास ला आपरो मनमा ठेयके लोकगिन मरन पाय लियो। पर बचन दियो चीज भेटयो नाही। उनना दूहुर च लक वोको स्वागत करीन। अना वय ओरख ला का अमी तो यो धरती मा परदेसी अना अनजान सेत।

¹⁴ वय लोक जोन असो गोस्टी करासेत, वय असो दीसात होतिन जसो एक असो देस को खोज मा होतिन जोन उनको आपरो सेत।

¹⁵ अदी वय वोना देस को बारेमा सोचयो होतो जोनला सोड़ दियो होतिन। तो उनको दुबारा लवटन को मौका होतो।

¹⁶ परंतु उनला सरग को एक उत्‍तम राज इक्सा सेत। एकोलाय परमेस्वर उनको परमेस्वर कहलानो मा अजिबात संकोच नाही करासेत। कारन वोना उनको साठी एक नगर तइयार कियो सेत।

¹⁷ बिस्वास को कारन च अबराहम ना, जब परमेस्वर वोला परखत होतो। इसहाक को बलि चघायो। वोच जोन लक करार कियो होतो। अपरो एकठिया टूरा को जबा बलि देवन वालो होतो।

¹⁸ तरी च परमेस्वर वोला कहयो, “इसहाक लक तोरो खानदान वाढेल।”

¹⁹ परंतु अबराहम ला लगयो का, परमेस्वर ना मरयो हुयो ला भी जित्तो कर सकासेत। अना उपमा दियो जाय ता वोना इसहाक ला मरन को मंघा उलट पाय लियो।

²⁰ बिस्वास को कारन च इसहाक ना याकूब अना एसाव ला उनको भबिस्य को बारेमा आसिरवाद दियो।

²¹ बिस्वास को कारन च याकूब ना ने, जब उ मर रहयो होतो। यूसुफ को हरेक टूराहुन ला आसीरवाद दियो अना अपरो लठीको को सहारा वोवन के परमेस्वर को पिराथना करयो।

²² बिस्वास को कारन च जबा युसुफ को मरन को बेरा आयो, तबा वोना मिसर देस लक हिटन काजी इसरायल लोकहुन ला सांगयो अना वोको हाड़ को बारेमा हुकूम दियो।

²³ बिस्वास को आधार मा च मोसे को माय-बाप ना वोला तीन महिना लुकाउन कारन पयलेच उनला मालूम होतो का यो कौनी साधारन लेकरा नाहती। अना वय राजा को हुकूम लक भेव नही खायो।

²⁴ बिस्वास को कारन च मोसे जब मोठो भयो, तबा उना फिरौन को नाती कहलावन लक नकार दियो।

²⁵ वोना पाप को छिनभर को सूक को ऐवज मा परमेस्वर को संतगिन को गैरव मा पर सहन करन्या साठी निवड़ले।

²⁶ मिसर देस को खजाना को अपेक्सा मसीह साठी बेइज्जत होवनो वोला जादा किमती लगयो। कारन वोको नजर आवन वालो बेरा मा भेटनवालो बक्सीस मा होतो।

²⁷ बिस्वास को कारन च उनना मिसर देस ला राजा को भेव को परवा कियो बगेर सोड दियो। काहेका उ नही दिसनवालो परमेस्वर ला चोवत होतिन।

²⁸ बिस्वास को कारन ओरान्डा को तिहार मा मोसे ना नेम को पालन करयो अना रकत छिड़काव करयो। या साठी का सिग को टूरागिन को नास करनवारा दूत इसरायिल को सिग को टूरा गिनला नोको छिये।

²⁹ बिस्वास च को कारन लोक वारले धरती सारखे लाल सागर पार कर लियो। परंतु जबा मिसरी लोकगीन यो करत होतिन तो बुडले।

³⁰ बिस्वास को कारन, लोक सात दिवस भोवती फिरले मघा यरीहो को सहर को बाजू को मोठो दिवाल पड गयो।

³¹ बिस्वास को कारन राहाब नावकी बेसिया हुकूम नही माननवालो को संग नास नही भयी काहेकी वा ने भेदिया गिनला सान्ती लक लूका के राखयो होतो।

³² अता मी अखिन काय सांगू? गिदोन, बारक, सीमसोन, इफ्ताह, राजा दाऊद, समूएल अना भविस्यवक्ता गिनको बारे मा का सांगू?

³³ उनना आपरो बिस्वास लक राजगिनला आपरो अधिन कर लियो, नियाव को पालन करयो, वादा को फर पायो। अना बाघ को तोंड बंद कर दियो।

³⁴ स्तो को धगाड़ी ला सान्त करीन, तरवार को धार लक बच गइन, कमजोरी ला ताकत बनाइन, लडाई मा बीर बनिन, अना परदेसी सेना ला मारके भगाइन।

³⁵ आई-माई गिनना दुबारा जित्तो होवन को कारन लक, आपरो मरोयो हुया ला दुबारा पाइन। काही लोकगीन ला मोठयो दुख दियो गयो पर उनना सूटकारा नही चाहयो, जेनको लक की वय एक साजरा मग जित्तो होवनो ला पाय सकेत।

³⁶ काहींना बेड्या ठोकली अना काहींना चाबूक मारयो मजाक उड़ानो सांकल बेड़ी अना जेल लक काही लोकगीन को परिक्सा लियो गयो सेत।

³⁷ काहींना गोटा फेकयो, अना आरीमा फाड डाखिन, अना काहिला तलवारमा मारयो। वय गरीब होतिन, छल अना वाईट अतियाचार को सिकार बन गईन। वय मेंढा को अना सेरी को चमड़ा पघंर के इतानी-उतानी फिरले।

³⁸ योदुनिया उनको काबील नही होतो, वय रेतिला ज़मीन पहाड कन्दरा अना धरती को खोह मा लुकत हिडीन।

³⁹ उनको बिस्वास को कारन यो सर्वां को कौतुक भयो। परंतु जोनना परमेस्वर ला दियो मोठा करार को फर नही भेटयो। सब को साजरो गवाही दियो गयो।

⁴⁰ काहेका परमेस्वर ना आमरो पर नजर राखके एक योजना बनायो होतो। उ चाव्हत होतो का आमरो संग सिध्ध बन जाबिन।