गलातियो 5 - सत मारग पर चलन वारो किताबमसीह कन लक दियो गयी छुट 1 मसीह ना छुट्टो रव्हन लाई हमरो सूटकारा करीसेस, एकोसाठी तुमी लोक पक्का रव्हो। अना मंग गुलामी को जुआड़ी मा नोको फंदहो। 2 मि पौलुस, तुमी लोकगीन लक यो कव्हसु अदी तुमी सुद होवन को नियम करावासो, तो तुमी लोकगीन ला मसीह लक कोनी फायदा नही होहे। 3 मंग मि हर एक खतना करानवालो ला पूरो जोर लक कव्हसू की ओला सप्पा मोसे को नियम को पालन करनो से। 4 अदी तुमी आपरी धरमी पन को साठी मोसे को नियम पर आसरा रखनो चाव्हसो, तो तुमी ना मसीह लक आपरो नाता तोड़ लेईसेव अना परमेस्वर की दया ला खोय देइसेव। 5 काहेका आतमा लक आमी भरोसा लक आस कियो हुया, धरमिपन को रस्ता चोविसेजन। 6 अदी आमी यीसु मसीह लक जुड़या सेजन, तो खतना कोनी काम को नाहती। पर भरोसा से, जोन माया कन लक असर डाकासे। 7 तुमी लोक साजरो उन्नती कर रहया होतत। तुमी लोकगीन ला कोन ना पुढ़ा बढ़नो लक रोकिस की तुमी खरो गोस्टी ला नोको मानो? 8 असो सीक तुमरो हाकलन वालो को कन लक नही। 9 जरा सो खमीर पूरो गुथो हुयो कनीक ला खमीर बनाय देसे। 10 मोला पिरभु मा तुमी पर सत से की तुमी कोनी अखीन बिचार धारा ला नही अपनाहो। पर तुमला घबरावनवालो चाहे उ कोनी काहे न होहे, सजा पाहे। 11 पर ओ भाऊ अदी मि अबा तकन खतना को परचार करतो आईसेव तो काहे सतावो जावुसु? मंग तो कूरूस को रास्ता पर जोन ठोकर होती, उ खतम भय गई। 12 भलो होतो की जोन तुमला भटकाय देवासे, वय खुदच आपरो आँग काप डाकतीन। पवीतर आतमा को जीवन 13 ओ भाऊ गीन तुमी सूटकारा पावन को लाई हाकलो गयो सेव, यो सूटकारा आँग की मनसा पूरी करन लाई नही होइसे, पर माया लक एक दुजो की सेवा करो। 14 काहेकि सप्पा मोसे को नियम यो कव्हयो लक एकच सबद लक पूरो भय जावसे। तु आपरो पड़ोसी लक आपरो जसो माया राख। 15 पर अदी तुमी एक दुसरो ला दात लक काटो सो अना फाड़ खावोसो, तो सतरक रव्हने की कही एक दुसरो ला सत्यानास नोको कर देहो। 16 पर मि कव्हसू की पवीतर आतमा को जसो चलोह तो तुमी आँग की मनसा ला कोनी रिती लक पूरी नही करहो। 17 काहे की आँग तो पवीतर आतमा को विरोध मा अना पवीतर आतमा आँग को विरोध मा लालसा करासे, यो तो एक दुसरो को विरोधी सेत, जोन तुमी करनो चाव्हसो ओला नही कर सकोह। 18 पर अदी तुमी पवीतर आतमा को चलाय चला सो तो मोसे को नियम को बस मा नही रहयो। 19 अबा आँग को काम खुलोसेत, मजे छिंडरापन, खोटो करम कामुकता, 20 मुरत पुजा, जादु टोना, गुटबन्दी, बैर, झगड़ा, ईरसा, गुस्सा, बिरोध, फुट, अधरम 21 छल, नसा, रँगरेली, अना ऐना तरह का काम सेत, जिनको बिसय मा मि तुमला चितासु जसो पयले चितोनी देय चुकयो, की असो-असो कामवारा तो परमेस्वर को राज का हकदार नही होव्हेत। 22 पर पवीतर आतमा को फर माया, उत्साह, सान्ती, धीरज, दयालुपन, भलाई अना भरोसा सेत। 23 नरमदिली अना संयम सेत। असो-असो मोसे को नियम को विरोध मा कोनी कानुन नही से। 24 जोन मसीह यीसु को सेत, उनना आपरो आँग ला बुरो मनसा अना लालसा गीन सकट कूरूस मा चघायो देईसेत। 25 अदी आमी पवीतर आतमा की सलाह को लक जिंदगी बिताबिन तो हमला पवीतर आतमा कन लक जिंदगी मिल गई से। मानूस जोन बोवासे वाच कापासे 26 आमी झुठो घमन्ड नोको करबिन एक दुजो लक ला नही भडकाबिन अना एक दुजो लक जरन नही करबिन। |
The New Testament in Powari Language © The Word for the World International and Powari Madhya Pradesh, 2023.