इफिसियो 5 - सत मारग पर चलन वारो किताब

¹ तुमी लोकगीन परमेस्वर को चहेतो सन्तान सेव एकोलाय साजरो लेकरा को जसो परमेस्वर लक जित्तो रव्हने

² अना माया मा चलोह जसो मसीह ना भी आमी लक माया करीस अना आपरो खुदच ला परमेस्वर को कठा सुख देवनवारी खुसबुदार चढ़ावा बनके आमरो लाई परमेस्वर ला चढ़ाय देईसेस

³ तुमरो बीच छीनाला अना हर कोनी तरीका को असुध्दता अना लोभ को चरचा तक नही होवनो चाहिसे, जसो का संत लोकगीन को लाई बेस से,

⁴ तुमी मा ना त घिनोनी भासा ला काम मा नही आननो चाहसे, ना मुरखताको गोस्टी या भद्दा हसी अना ठठ्ठा। यो तुमरो जसो नही से। लेकिन तुमरो बीच धनवाद च दियो जाहे।

⁵ कायसेकि तुमी पिक्को लक जानसेव का असो कोनी भी मानूस जोन दुराचारी सेत, अपवितर अना लोभी सेत, जो एक मुरतिपूजक होवन जसो से। मसीह को अना परमेस्वर को राज को वारसाना नही पाय सका।

⁶ तुमला कोनी कोरी गोस्टी लक नोको ठगेह, कायसेकि एनेच गोस्टी को कारन लक हुकूम ला नही मानन वालो पर परमेस्वर को गुस्सा कोप भई जासे।

⁷ एकोलाय तुमी असो लोकगीन को सँगी नोको बनने।

⁸ यो मि एकोलाई कव्ह रही सेउ का एक बेरा होतो जबा तुमी अँधार लक भरयो होतो पर अबा तुमी पिरभु को मंगा चलन वारा को रुप मा उजाड़ो लक भरपुरो होय। एकोलाई उजाड़ो को टूरा को जसो सुभाव करने।

⁹ काहेकि उजियाड़ो को फर सब परकार को भलो काम अना धरमिपन अना सत्य से।

¹⁰ हरेक बेरा यो परखन को जतन करो का परमेस्वर ला कोनतो गोस्टी खुस करासे।

¹¹ असो काम जोन अंधार लक भरयो सेत, उन बेकार को काम मा हिस्सा नोको बाटने पर उनको भाडा फोड़ करने।

¹² काहेकि जोन काम छुपयो मा उनको कन लक कियो जासे। उनको गोस्टी ला करनो भी सरम करनो जसो से।

¹³ पर जोन काम ला परगट कियो जासे। वय सबच उजियाड़ो लक परगट होसेत, काहेकि जोन सबच काही ला परगट करासे, उ उजियाड़ो से।

¹⁴ येनेच कारन लक यीसु कवत होतो की अगो झोपन वालो, जपलक उठना, अना मरयो हुयो लक जित्तो होय, तो मसीह की उजियाड़ो तोरो पर चमकेह।

¹⁵ एकोलाय सतरक रवह, की तुमी कसी चाल चला सो। बेअकल को जसो नही बल्कि अकलवर को जसो चलोह।

¹⁶ बेरा ला पूरो-पूरो साजरो करम करन लाई बोवजने, कायसेकि दिवस बुरा सेति।

¹⁷ ऐना कारन बेअकल नोको बनो, पर यो जान लेव की पिरभु की मनसा काजक से।

¹⁸ दारू ला पीवके बोलनवारा ना होवने, काहेकि एको लक लुच्चाई होवासे, पर एको उलट आतमा लक भरजाव।

¹⁹ आपसी मा भजन पिराथना गान अना आतमिक गीत गावने अना आपरो-आपरो मन मा पिरभु लाई गावत अना किरतन करत रव्हने।

²⁰ सबच कोनी गोस्टी को लाई आमरो पिरभु यीसु मसीह को नाव पर हमरो मोठो बाबूजी परमेस्वर को हरदम धनवाद करने।

बायको अना मरदमाना

²¹ अना मसीह को डर लक एक दुसरो को आसरीत रव्हने।

²² ओ बायकोहुन आपरो-आपरो घरवालो को आसरीत रव्होने, जसो की तुमी पिरभु को आसरीत सेव।

²³ कायसेकि नौरा ता बायको को डोस्का से, जोन परकार लक मसीह भी कलीसिया को डोस्का से। अना खुदच बदन को पाप हरन वालो पाप मोचक से।

²⁴ पर जसो कलीसिया मसीह को वस मा सेत, वसोच बायकोगीन भी हरेक गोस्टी मा आपरो-आपरो घरवालो को वस मा रव्हनो जरुरि सेत।

²⁵ ओय घरवालो आपरी बायको लक माया करने। वसोच का जसो मसीह ना भी कलीसिया लक माया राखिसेस, अना आपरो खदच ला ओन्हीसीन लाई चघाय देइसेस।

²⁶ जेकोलक का उ ओला पिरभु को सेवा मा पानी को नहावनो लक पवीतर करके हमरो आवाज पुकारन लक परमेस्वर ला चघायके पवीतर बनाय।

²⁷ एने रीती उ कलीसिया ला एक असी नवती नौरी को उपमा मा खुदच को लाई पेस कर सकासे जोन बेडाग होय, बेझुर्रि होय असी अखिन कोनी कमी नही होय। बल्कि उ पवितर रव्हे अना हरदम बेकसूर होय।

²⁸ ऐना तरीका लक जरुरी से की नौरा भी आपरो बायको लक आपरो बदन को जसो माया करेत, जोन आपरो बायको लक माया करासे। उ खुदच आपरो आप लक माया राखासे।

²⁹ कोनी आपरो बदन लक ता कबच गुस्सा नही राखा पर उ ओला पाला पोससे, अना ओको धियान राखासे वसोच जसो मसीह आपरी कलीसिया को

³⁰ काहेकि आमी ओको बदन को हिस्सा सेजन।

³¹ एकोलाई गिरंथ कव्हसे: “मानूस आपरो माय-बाबूजी ला छोड़के आपरी बायको लक मिलयो रहयो। अना वय दुही एक बदन होयेती।”

³² यो छुपयो गोस्टी लगत काम की से, पर मि यो गोस्टी मसीह अना कलीसिया को बारे मा कव्ह रही सेव।

³³ एकोलाई काही भी होय, तुममा ला हरेक ला आपरी बायको लक वसोच माया करनो चाहिसे जसो तुमी खुदच अपरो आपला करोसो। अना एक बायको ला भी आपरो मरद को डर मानत हुयो ओको मान करनो चाहिसे।