कुलुस्सियो 3 - सत मारग पर चलन वारो किताब

¹ एको लाई जबा तुमी मसीह को सँगा जिलाया गईसेव ता सरग को चीज ला ढुंढन मा रव्हो, जहान मसीह पायो जावसे। अना परमेस्वर को उजो कना जित्तो उचलीस सेस।

² धरती को नही पर सरग को चीज गीन की बिचार मा रव्हो

³ काहेकि तुमी ता मर गयासेव अना तुमरो जिंदगी मसीह को सँगा परमेस्वर मा छुपयो से।

⁴ जबा मसीह जोन आमरो जिंदगी से उ जबा दिसे तबा तुमी भी ओको महिमा सँगा दिसाय जाहो।

⁵ एको लाई आपरो उन आँग ला मार डाको जोन धरती मा रव्हसेत मजे छिनालापन असुध्दता, नीच काम बुरो कामना अना लोभ ला जोन मुरत पुजा को बरोबर से।

⁶ एनच कारन परमेस्वर को गुस्सा हुकूम नही मानन वालो पर पड़से

⁷ अना जबा तुमी ऐना बुराईगीन मा जिंदगी मा काटत होता इनको जसो चाल चलत होता।

⁸ पर तुमी भी ऐना सब ला मजे गुस्सा, ताव, बैरभाव, निन्दा अना टोंड लक बक-बक बँद कर देव

⁹ अना एक दुजो लक झुठो नोको बोलने काहेकि तुमी ना जुनो मानुसरुप ला ओको कामगीन सकट उतार डाकईसो।

¹⁰ अना नयो मानूस रुप ला डाक लेईसेव, जोन आपरो बनावन वालो को जसो गियान मिलन को लाई नयो बनतो जावसे

¹¹ ओमा ना ता परजात न काही यहूदी से न खतना ना काही खतनावालो, न जंगली, न कारो पानी मा रव्हनवारा न दास अना न छुट्टो: केवल मसीह सब कुछ अना सब मा से।

¹² एको लाई परमेस्वर को बेचयो जसो जोन पवीतर अना पिरेम को से। मोठी दया ना भलाई अना दीनता अना दयालू पन अना सहनसिलता धारन कर लेव

¹³ अना अदी कोनी ला कोनी पर दोस देवन को कोनी कारन से ता एक दुजो ला सह लेव अना एक दुसरे को दोस छिमा करोह, जसो पिरभु ना तुमरो दोस छिमा करीसे वसोच तुमी करो।

¹⁴ ऐन सब सुभाव मा माया जुड़से जोन सबला एक संगा बाँध लेव।

¹⁵ मसीह को सान्ती जोको लाई तुमी एक देह होयके बुलाय भी गया सेव। तुमरो मन मा राज करेत, अना तुमी धन्यवाद देवनो नोको छोड़नो।

¹⁶ मसीह को गोस्टी ला आपरो हिरदय मा लगत बसन देव अना सिध्द गियान सहित एक दुजो ला सिकाहो अना चिताहो अना आपरो मन मा दया को सँगा परमेस्वर को लाई धनबाद भजन अना स्तुति गान अना आतमिक गीत गावनो से

¹⁷ गोस्टी मा या काम मा जोन काही भी करोह सब यीसु पिरभु को नाव लक करोह, अना ओको नाव लक परमेस्वर बाबूजी को धन्यवाद करने।

नयो जिंदगी को समाजिक करतब

¹⁸ हे बायकागीन जसो पिरभु मा साजरो से; वसोच आपरो घरवालो को बसमा रव्हने।

¹⁹ हे नौरागीन आपरी-आपरी बायको लक माया राखो, अना उन लक कठोर नोको होवने।

²⁰ हे टुरागीन सब गोस्टी मा आपरो माय दादजी को हुकूम पालन करोह। काहेकि पिरभु ला खुसी होवासे।

²¹ हे टुरावालो आपरो टुरागीन ला सतावहो नोको। कही असी न होहे का उनको हिम्मत कम होय जाये।

²² हे दास गीन जोन आँग को जसो तुमरो मालिक से सब गोस्टी मा उनको हुकूम को भगती करोह, मानूस ला खुस करनवालो वालो जसो दिसावन को लाई नही पर मन को सीधाई अना परमेस्वर को भेव लक।

²³ जो काही तुमी करोसो, तन मन लक करोह, यो समझके की मानूस लाई नही पर पिरभु लाई करोसो;

²⁴ काहेकि तुमी जानासो की तुमला बदला मा पिरभु लक सान्ती मिलहेत; तुमी पिरभु मसीह को सेवा करोसो;

²⁵ काहेकि जोन बुरो करासे उ आपरी हानी को फर पाहे, वहान कोनी को पक्स नही करा