कुलुस्सियो 2 - सत मारग पर चलन वारो किताब

¹ मी चाव्हसू का तुम्ही ला मालुम पड जाय का तुम्हारो अना उनको लाय जोन लौदीकिया मा सेत, अना उन सबको लाय जोन मोरो टोन्ड ला नही चोविसेत, वय नही जानत का मी कसो काम करासू।

² जोन लक उनको मन मा सान्ती होवे अना आपस मा एक दुसरो लक पिरेम मा बंधके बढ़ते जाय। अना वय समझ के पूरो पक्को रुप लक वो पूरो धन ला पा जाय जोन को फर परमेस्वर को भेद मजे मसीह ला चिन्हनो सेत।

³ जिनमा बुध्दि अना गियान को सप्पा धन छुपयो रव्हसेति।

⁴ यो मि एकोलाय कव्हसू की कोनी मानूस तुमला ललचानवारी गोस्टी लक धोखा नोको देहे।

⁵ अखीन मि देह को मनसा लक तुमी लक दुहूर सेव, ता भी आतमिक मनसा लक तुमरो लक कगर सेव अना तुमरो साजरो जिंदगी ला अना तुमरो भरोसा ला जोन मसीह मा से मजबुती चोवके ना खुस सेव।

⁶ एकोलाय तुमीना मसीह यीसु ला पिरभु करके अपनायो लेईसेव वसोच ओमा चाल चलत जावने।

⁷ ओमाच जड़ धरता अना बढ़ता जावने अना जसो तुमी सिकाया गया वसोच मा भरोसा मा पक्को होवतो जावने, अना लगत धनवाद करत रव्हने।

⁸ सतरक रव्होने की कोनी तुमला ओना संसार को गियान अना बेकार छल लक आपरो सँगा नोको कर लेहे, जोन मानूस को उसुल गीन अना संसार की जुनो सिक्सा को जसो से। पर मसीह को जसो नही।

⁹ काहेकि ओमा परमेस्वर की सप्पाच सिध्दता सप्पा देह लक रव्हसे।

¹⁰ अना तुमी ओमाच पूरो होय गया सेव जोन सप्पा सरकार अना अधिकार को वरता से।

¹¹ ओमा तुमरो असो खतना हुयो से जोन हात लक नही हुयो मजे मसीह को खतना जोको लक सारिरीक देह उतार देई जावसे।

¹² अना ओकोच संगा बपतिस्मा मा गाड़यो गया अना ओमाच मोठो परमेस्वर को ताकत पर भरोसा करके, जेने ओला मरयो हुया मा लक जित्तो उचलीस ओको संगा जित्तो उचलेह।

¹³ ओना तुमला, जोन आपरो दोस अना आँग को खतना बिना दसा मा मुरदा होतीन, ओको संगा जिलाइस अना आमरो सब दोस ला छिमा करहे।

¹⁴ अना नेम को उ लिखयो पन्ना जोन आपरो नाव पर अना आमरो विरोध मा होतो मिटाय डाकीस, अना ओला कूरूस पर खिल्ला लक ठोकवाय करके पुढ़ा लक हटाय देईस।

¹⁵ अना ओना सब परधानता अना अधिकार ला वरता लक उतारके उनको खुल्लम खुल्ला तमासा बनाईस अना कूरूस को कन लक ओको पर जय को संगा ललकारीस।

¹⁶ यो काजी जेवन पिवनो अना तिहार पावन अना नयो चंदा अना पवीतर दिवस को बारे मा तुमरो कोनी न्याय नोको करेत।

¹⁷ काहेकि यो सब आवनवालो गोस्टी को सावली से; पर मुल देह गोस्टी मसीह को आय।

¹⁸ कोनी मानूस आत्म हीनता अना सरगदूत गीन की पूजा पाठ करायके तुमला साजरी दौड़ को ईनाम लक छुछो नोको करेत। असो मानूस चोवयो हुयो गोस्टी मा लगयो रव्हसे अना आपरी आँग को अक्ल पर बेकार मा फुलसे,

¹⁹ अना ओना सब लक वरता परमेस्वर ला नही आपनावा से जेनको लक सप्पा देह जोड़गीन अना पाठ को कनलक पालयो पोसयो पायके अना एक संगा मिलके मोठो परमेस्वर को कना बड़त जासे।

मसीह को संगा मरनो अना जित्तो होवनो

²⁰ जबकि तुमी मसीह को सँगा संसार को जूनो सिक्सा लक मर गया सेव, ता मंग कायलाई उनका जसो जोन संसार का सेत जिंदगी बितावासो? तुमी असी उसुल गीन को वस मा काहे रव्हसो।

²¹ की एला नोको छुवने, ओला नोको चाखने, अना ओला हात नोको लगावने?

²² या सब चीजगीन काम मा आनत-आनत नास होय जाहेति। काहेकि या सबचीज मानूसगिन को हुकूम अना सिक्सागीन को जसो से।

²³ ऐना बिधि बिधान मा आपरी मनसा को कनलक बनायी गयी भक्ति को रिती, अना आतमा हीनता अना देह को योगाभ्यास को मरजी लक गियान को नाव ता से, पर सारिरीक लालसागीन ला रोकनो मा एना लक कोनी फायदा नही होवासे।