पेरीत 26 - सत मारग पर चलन वारो किताब

अग्रिप्पा को पुढ़ा पौलुस को बचाव बिनती

¹ तबा अग्रिप्पा न पौलुस लक कहीस, “तोला खुदच अपरो पक्स मा बोलन की हुकूम से।” अना पौलुस अपरो बचाव मा सांगन लगयो।

² “हे राजा अग्रिप्पा, मी आपरो आपला तकदीर वालो समझासु का, यहूदी गीन न जोन मोरो पर लान-छान लगायो से। वोना सब गोस्टी को बचाव मा मी तोरो पुड़ा अपरो बचाव साग रही सेऊ।”

³ खास एकोलाय का ये सब यहूदी ला मालुम सेत, का मी बचपन मा कसो जिंदगी बिताइसेव।

⁴ वय जानसेत मी मोरो देसमा अना येरुसलेम मा कसो जियो सेऊ।

⁵ वय मोला लगत बेरा लक जानासेत, अना वय अदी चाव्हासेत ता यो बात को गवाहि, देव सक सेत। का मी ना कसो, आमरो धारमिक रित मा एक कट्टर समहु को अनुसार एक फरीसी को जसो जिंदगी बिताइसेऊ।

⁶ अना अबा उ करार, जोन परमेस्वर ना आमरो आजा पुरखा लक कियो होतो। वोच भरोसा मा, मी यहान यो मुकदमा साठी उभो सेउ।

⁷ यो वोच करार सेत, जेनको आस मा, हमी बारा कुर रात-दिवस परमेस्वर को भगती करत आयो सेत। अना हे राजा एना च आस को बारे मा, मोरो पर यहुदी गिन लान-छान लगावसे।

⁸ तुमी लोकगीन ला यो गोस्टी, बिस्वास को लायक काहे नही लगसेत। का परमेस्वर मरयो हुया ला जित्तो कर सेत?

⁹ मी खुद सोचत होतो, नासरी यीसु को बिरुद करनलाय जोन काही होय सकत उ सब करीन।

¹⁰ ता मीना येरुसलेम नगर मा असोच करीसेव। अना मुख याजक लक हक पायके, लगत सो परमेस्वर को भगतगिन ला जेल मा डाख दियो। अना जबा वय मारो जात होतीन। ता मी उनको बिरोध मा अपरी मत देवत होतो।

¹¹ अना मी हरेक यहुदी सभाघर मा जायके। उनको यो बिस्वास को मारग लक हटान काजी दबाव डाकन को कोसीस करत होतो। उनको लाय गुस्सा इतरो होतो का उनला सतावन लाय मी परदेस को सहेर मा गयो।

पौलुस आपरो दिल को बदलन को बारे मा सगसेत

¹² असोच एक मकसद को संग मी मुख याजक लक हुकूम पाय के दमिस्क नगर जा रहयो होतो।

¹³ तबच हे राजा दुफार जबा मी अना सब मोरो संगी रस्ता मा होतिन, तबच मी ना बादल लक एक उजाड़ उतरता चोवयो। वोको तेज दिवस को सुरज लक भी जादा लगत होतो। अना मोरो अना मोरो संगी गिन को आखा-पाखा चमको।

¹⁴ जबा हमी सब जमीन पर लुड़क गयो। तबच मोला इबरानी बोली मा असी आवाज आयकू आई। साऊल-साऊल, तु मोला कायलाई सतावसेस? तरवार को धार मा लात नोको मार, यो तोरो बसको नाहती।

¹⁵ मग मीना कव्हयो पिरभू तु कोन आस, “पिरभू न कहीस, मी यीसु सेव, जेनला तु दुख दे रहीसेस।”

¹⁶ परन्तु तु उभो होय, अना अपरो पाय पर उभो होय, मी तोरो पूड़ा एकोलाय परगट भयी सेऊ, का तोला मी एक दास को रूपमा ठैयराउ। अना जोन काही मोरो बारेमा तूना चोविसेस। अना जोन काही तोला चोवाहिन, वोको गवाही रहेत।

¹⁷ अना मी तोला जोन यहुदी अना गैर यहुदी लोकगिन को जवर धाड़ासू।

¹⁸ उनको डोरा उघाड़न, उनला इंधारो लक उजाड़ कन आनन लाय, अना सैतान को अधिकार लक परमेस्वर को कन मुरकान लाय, तोला धाड़ासेऊ। उनलक तोला बचावत रहिन। एकोलक वय उनला पाप की छिमा भेटेत। अखीन उन लोखगिन को बीचमा जघा पाहेती। “जोन मोरो मा बिस्वास को कारन पवितर भयो सेत।”

पौलुस को काम

¹⁹ “हे राजा अग्रिप्पा तबा च लक वोना दरसन की हुकूम ला कभीच मना नही करिसेऊ।”

²⁰ बल्की एको उलट मी पयले उनला, दमिस्क मा, मंग येरुसलेम नगर मा, अना यहुदिया छेतर मा अना गैर यहुदी गीन ला सांगत रहयो। का मन मुरकाव, अना परमेस्वर कन मुरको अना साजरा काम करो।

²¹ एनाच कारन जबा मी मंदिर मा होतो। यहूदी गीन न मोला धरलेइन। अना मोरो मार डाकन को जतन करयो।

²² पर आज तकन मोला परमेस्वर को मदद भेटत रव्हयो, जोनलक मी आज तकन जित्तो रहयो। अना एकोलाइ मी नहान मोठो सबच को पुड़ा गवाही देवन लाई उभो सेऊ। मी बस एना गोस्टी ला छोड़के अखिन काही नहि कव्हसेऊ। जोन भविस्यवक्ता गीन अना मोसे को अनुसार पुरो होवन की होती।

²³ जसो की मसीह ला दुख उठावनो पडहेत। अना ओच मारयो हुया मा लक पयले जित्तो होहेत, अना उ यहूदी अना गैर यहूदी गीन ला उजाड़ को खबर देहेत।

आयकन वालो की हव भाव

²⁴ जबा पौलुस अपरो बचाव मा एना पिरकार कहे रहयो होतो। त फेस्तुस न जोरलक कहीस “पौलुस तोरो डिमाक खराब भय गईसे।” तोरी लगत पढ़ाई लक तु बैयताड़ भय गयोसेस।

²⁵ पौलुस न कहीस हे “महामहिम् फेस्तुस! मी बैताड़ नही सेउ, पर खराई अना मुद्‍दा की गोस्टी ला सांगासू।”

²⁶ राजा भी जेनको पुड़ा मी बेधड़क होयके सांग रहयो सेऊ। उ एना गोस्टी ला जानासे। अना मी बेखटका कव्हसू, मोला बिस्वास, का इन गोस्टी मा लक काही भी नही लुको नाहती, काहेका उ घटना कोनी कोनटा मा नही भईसे।

²⁷ “हे राजा अग्रिप्पा, का तु भविस्यवक्ता गीन जोन गोस्टी कहिसेत वोना गोस्टी मा बिस्वास करासे? हव मी जानासेव का तु बिस्वास करासे।”

²⁸ एको पर राजा न पौलुस न कहेयो “तु काजक सोचासेस का इतरो सरल रित लक मोला मसीह बनानो चाव्हसेस।”

²⁹ पौलुस न कहीस “जरासो मा का लगत बेरामा, परमेस्वर लक मोरो पिराथना से का, ना तु च बल्कि वय सबच भी बिना सजा को आ जाय। जोन आज मोला आयक सेत।”

³⁰ तबा राजा उभो भयो अना वोको संगच राजपाल, बिरनीके अखीन बसया हुया लोक भी उभा भईन।

³¹ अखीन ऐक कन जायके एक दुसरो लक गोस्टी करके असो कव्हन लगीन। यो मानूस त असो काही भी नही कर रहीसेत। जोन ला मिरतु को दंड मिलहे।

³² अग्रिप्पा न फेस्तुस लक कहीस “अदी एना मानूस न कैसर लक अपील न करी होतीस त एला मानूस ला छोड़ दियो गयो होतो।”