पेरीत 24 - सत मारग पर चलन वारो किताब

रोमन राजपाल फेलिक्स को पुढ़ा हाजिर

¹ पाँच दिवस को मघा मुखिया याजक हनन्याह काही बुजरुक नेता अना तिरतुल्लुस नाव को वकिल को संग कैसरिया पहुचयो। उनना राज पाल को पुड़ा पौलुस को बिरोध बिनती को चिठ्ठी लिखीन।

² तबा पौलुस ला बुलायो गयो। अना तिरतुल्लुस न असो कव्हतो हुयो वोको पर दोस लगाईस “महामहिम फेलिक्स महासय! हमी तोरो कारन लक लगत सान्ती मा जिंदगी बितावसेजन। अखीन तोरो साजरो काम लक अमरो लोकगिन को लगत बुराई मा सुधार भय गयो सेत।”

³ एकोलाय आमी हरेक जघा मा अना हरेक परकार लक तोरो धनवाद मानासेजन।

⁴ मी तुमरो लगत बेरा नही लेवनो चाहवसू। मोरी बिनती से का तुमी हमरा दूई सबद आयकनो की किरपा करो।

⁵ काहेकी हमी न एना मानूस ला उपदरी अना जगत को सप्पा यहूदी गीन मा बलवा करन वालो अना नासरी गीन को नेता सेत।

⁶ वोना मंदिर ला अपवितर करन को कोसीस करयो सेत। अना हमिना वोला धरिसेस।

⁷ पर सेना को मुखिया लुसियास न वोला जबरन हमरो हात लक हिसक लेईस।

⁸ अना एको पर लगयो अरोप खुदच एकोलक पुसतास करके जान सकासेव।

⁹ एना आरोप मा यहूदी गीन भी समील भय गईन। वय ताकत लक कव्हन लगीन, का या गोस्टी सच्चीसे।

फेलिक्स को पूड़ा पौलुस को बचाव

¹⁰ जबा राजपाल न पौलुस ला बोलन को ईसारा करीस। त वोना जवाब देतो हुयो कहीस, तु लगत साल लक यो लोक गिनको न्याय करनवालो सेस। यो जानतो हुयो मी खुसी लक, अपरो बचाव कर रहयो सेऊ।

¹¹ तु आपच जान सेस का अबा येरुसलेम नगर गयो। मोला बारा दिवस भईन।

¹² वहान मंदिर मा मोला नही त, कोनी संग बहेस करता देखिन, अना नहि सभाघर गीनमा न नगर मा कोनी लक झगड़ा करता हुयो।

¹³ अना अबा तोरो पूड़ा जोन अरोप ला मोरो उपर लगाय रहिसेत। वोको पुरुप नही देय सकत।

¹⁴ पर मी तोरो पुड़ा यो मान लेसू का मी अपरो बुजरुक गीन को परमेस्वर की आराधना अपरो मारग को जसो करासेऊ। जोनला एक मारग कव्हसेत। मी हरेक गोस्टी मा भरोसा करासेऊ जोन नियम अना भविस्यवक्ता गीनको किताब मा लिखीसे।

¹⁵ अना मि परमेस्वर मा वसोच भरोसा राखासु, जसो खुदच यो लोक राखसेत। का साजरा अना बुरो दुई कोच मर जानो को बाद जित्तो होवनो होहेत।

¹⁶ एकोलाय मि भी परमेस्वर अना मानूस गीन को पूड़ा आपरी आतमा ला सुध्द बनावन को लाई जतन करतो रव्हासेऊ।

¹⁷ लगत बरस दुर रव्हन को मघा मि येरुसलेम मा आपरो गरीब लोक गीन को लाय दान लेके भेंट चघावन आयो होतो।

¹⁸ अना जबा मी पवितर बिधी कर रहयो होतो। तो ना मंदिर मा कोनी भीड़ होतो, ना कोनी असान्ति होतो।

¹⁹ पर आसिया को काही यहुदीगिन को मनमा मोरो विरोध मा काही से, त वय तोरो पुड़ा यहान होवनो चाहिये होतो।

²⁰ यो जोन लोकगीन उभा सेत। वय खुदच ही सांगेत, का मोरो मा कोनतो खोट सेत?

²¹ केवल एनाच गोस्टी ला छोडके जेनला मीना वोको बीच मा उभो होयकर जोर लक कहियो होतो “मारया हुया को जित्तो उठनो को बिसय मा तुमरो पुड़ा मोरो मुकदमा होय रहिसे।”

कैसरिया मा पौलुस ला जेल मा डाकनो

²² पर फेलिक्स न जोन एना मारग की साजरी-साजरी खबर राखत होतो। आयक के रोकतो हुयो कहीस “जबा सेना को मुखिया लुसियास आहेत। तबा मी तुमरो मुकद्दमा ला जाच देहू।”

²³ तबा वोना सेना को मुखिया ला हुकूम देइस। का पौलुस ला काही छुट देकन जेल मा राखयो जाय। अना वोका संगी मा लक कोनी ला भी वोकी सेवा करन लक न रोखयो जाहे।

²⁴ काही दिवस गीन को मंघा फेलिक्स अपरी बायको दरसिल्ला ला जोन यहूदी होती। संग आनके अखीन पौलुस ला बुलाय के वोला भरोसा को बिसय मा जोन मसीह यीसु मा से आयकाव।

²⁵ पर जबा पौलुस उ आवन वालो न्याय की गोस्टी कर रहयो होतो त फेलिक्स न कहीस “एना बेरा त तु जाय। बेरा मिलनो पर मी तोला मंग बुलाऊ।”

²⁶ वोना बेरा यो आस भी होती का पौलुस वोला काही रुपया देहे। एकोलाई उ पौलुस ला बार-बार बुलायके वोको लक गोस्टी करत होतो।

²⁷ जबा दुई बरस बीत गईन त फेलिक्स को जघा मा पुरखियुस फेस्तुस आयो। तबा फेलिक्स यहूदी गीन को खुस करन की आस लक पौलुस ला जेल मा च छोडके गईस।